Winston, tel wi bowt yu saach fi Gaad.

Ai mi groa op pahn wahn faam da Queensland, Australia. Mi famili neva bilangz tu eni rilijan. Bikaaz wi mi liv soh faar, wi bayli yoostu si enibadi els ada dan famili. Fahn wen Ah mi bowt 12 yaaz oal, Ah mi staat saach fi Gaad. Ah mi pray tu ahn an Ah mi aks ahn fi help mi noa di chroot bowt hihn. Ah mi en op di lef di faam ahn Ah mi geh wahn jab da di siti a Adelaide, da South Australia. Wen Ah mi 21, Ah mi meet Pam wen Ah mi deh pahn vakayshan da Sydney. Shee mi taak tu mi bowt di British-Izrel rilijan weh klaym seh dat di British peepl kohn fahn di soa-kaal ten chraib a Izrel. Da rilijan seh dat dehndeh chraib da di ten chraib a di naadan kingdom weh dehn mi tek az priznaz bowt 700 yaaz bifoa Jeezas mi kohn pahn ert. Soh wen Ah mi gaahn bak da Adelaide, Ah mi bring op di tapik wid wahn werkmayt weh mi-di staat tu stodi di Baibl wid Jehoava Witnisiz. Ah mi taak tu hihn fi jos wahn fyoo owaz. Wi mi taak bowt weh di Witnisiz bileev eena. Afta wi kanvasayshan, Ah mi riyalaiz dat Ah mi-di geh wahn ansa tu weh Ah mi pray fa yaaz agoa. Ah mi-di laan di chroot bowt mi Kriyayta an ih Kingdom! Ah mi fain di “[perl] weh wot lata lata moni.”—Mach. 13:45, 46.

Pam, yoo mi staat saach fi da perl da wahn erli ayj. How yu mi en op di fain it?

Ai mi groa op da wahn tong naym Coffs Harbour, da New South Wales. Mai famili mi fala di teechinz a di British-Izrel rilijan. Mee, mi yonga breda, mi oalda sista, ahn lata mi kozn dehn, mi groa op di bileev dat Gaad  prifaa British peepl. Dat neva kanvins mi, soh Ah stil mi feel laik sohnting misn. Wen Ah mi 14 yaaz oal, Ah mi vizit sevral cherch fahn rong di ayrya, inkloodin di Anglikan, Baptis, ahn di Adventis cherch dehn. Bot nat wan a dehn vizit mi help mi fi noa Gaad.

Laytaraan, mi famili mi moov da Sydney, wehpaat Ah mi meet Winston joorin ih vakayshan. Laik weh hihn mi menshan erliya, wi kanvasayshan dehn bowt rilijan mi mek hihn staat tu stodi wid di Witnisiz. Afta dat, wen hihn wuda sen mi letaz, dehn wuda bee ful op wid skripchaz! Ah wahn tel yu di aanis chroot, Ah hafu seh dat mi wori mi, Ah mi eevn feel beks. Bot lee bit bai lee bit Ah mi riyalaiz dat dis da di chroot.

Eena 1962, Ah mi gaahn liv da Adelaide fi bee kloasa tu Winston. Hihn mi mek araynjments soh Ah kuda mi stay wid wahn kopl weh da-mi Jehoava Witnisiz—Thomas ahn Janice Sloman. Dehn mi serv az mishineriz da Papua New Guinea. Bai den, Ai mi jos 18 yaaz oal, ahn dehn mi veri kain wid mi; dehn mi help mi wahn lat fi laan moa bowt Jehoava. Soh Ah mi staat stodi di Baibl, an Ah mi kanvins dat dis da reeli di chroot. Rait afta dat wi mi geh marid, mee ahn Winston mi staat aaf wi servis tu Jehoava tugeda. Dis da di bes laif eva. Eevn doa wi ga chraiyalz, Jehoava help wi fi valyu dis perl moa ahn moa.

Winston, tel wi bowt yu erli yaaz eena yu servis tu Jehoava.

Wel, noh lang afta wi mi geh marid, Jehoava mi staat tu gi wi sohn speshal asainment. (1 Kor. 16:9) Di fos apachooniti weh wi mi ga fi du moa fi Jehoava da-mi fi regyula painyaa. Brada Jack Porter an ih waif, Roslyn, mi inkorij wi fi du dat wen dehn mi vizit wi smaal kangrigayshan az serkit oavaseeya. (Hihn di serv wid mi az wahn memba a di Branch Komiti da Australia now.) Mee ahn Pam mi reeli injai di painyaa fi dehn faiv yaaz. Wen Ah mi 29 yaaz oal, dehn mi aks mee ahn mi waif fi serv eena di serkit werk da di South Pacific Islands, weh mi deh anda di Fiji branch. Di ailan dehn da-mi American Samoa, Samoa, Kiribati, Nauru, Niue, Tokelau, Tonga, Tuvalu, ahn Vanuatu.

Eena dehn dayz, peepl fahn dehn ailan neva reeli chros di Witnisiz. Soh wi mi haftu bee veri kyaaful ahn noh jraa tu moch atenshan tu wiself. (Mach. 10:16) Di kangrigayshan dehn mi smaal bak den, soh som a dehn kudn provaid wi wid wahn plays fi stay. Soh wi doz aks di peepl dehn fahn di difrent vilij dehn fi stay wid dehn, ahn dehn mi aalwayz wilin.

Winston, yoo reeli inchrestid eena di chranslayshan werk. Weh mek yu feel da way?

Wen wi mi staat tu serv da di ailan a Tonga, di bradaz onli mi ga wahn fyoo chraks ahn buklet eena di Tongan langwij—wahn Polineezhan langwij. Eena di minischri, di bradaz doz yooz di Inglish kapi a di buk The Truth That Leads to Eternal Life. Soh joorin wahn foa-week eldaz skool, chree eldaz mi disaid fi chranslayt di buk The Truth That Leads to Eternal Life eena Tongan, eevn doa dehn neva noa Inglish gud. Pam mi taip weh dehn mi chranslayt ahn wi mi sen it tu di United States branch fi print. Di hoal proajek mi tek bowt ayt weeks. Eevn doa di kwaliti a di chranslayshan neva aal dat gud, dis poblikayshan mi help lata peepl weh mi taak di Tongan langwij fi laan di chroot. Mee ahn Pam da noh chranslaytaz, bot dis ekspeeryens mek wi reeli inchrestid eena di chranslayshan werk.

Pam, how laif pahn dehn ailan mi difrent fahn laif da Australia?

Ih mi veri difrent! Bot ih mi aal dipen pahn wehpaat wi mi deh. Kaaz da sohn plays ih mi hat bad ahn dehn mi ga wahn lata maskito ahn rat. Da ada plays, sertn siknis wuda di goh rong ahn sohntaim  wi neva ga nof food. Bot afta eech day, ih mi rilaksin fi luk owt ahn admaiya di see fahn wi lee fale, (dis da di Samoawn naym fi wahn kaman Polineezhan hows wid tach roof ahn no waal.) Sohntaim, di moon wuda soh brait dat wi kuda si di shado a di paam chree dehn ahn di moon lait wuda shain brait pahn di see. Dehnya preshos taimz mi help wi fi meditayt ahn pray ahn tink bowt pazitiv tingz insteda negitiv tingz.

Wi mi lov di chiljren, dehn da-mi lata fon. Ih mi luk laik dehn mi neva si wait peepl bifoa eena dehn laif. Wan taim, wen wi mi-di vizit di ailan a Niue, wahn lee lee bwai mi rob wan a Winston hayri han ahn seh: “Mista, Ah laik feel yu fedaz.” Ih luk laik da lee bwai mi neva eva si wahn hayri han laik dat bifoa, kaa ih neva eevn noa how fi kaal it!

Ih mi hert wi fi si how poa di peepl dehn mi poa ahn di terabl kandishan dehn mi-di liv eena. Evriting rong dehn mi soh byootiful, bot dehn mi ga bad helt-kyaa ahn lee bit a waata fi jrink. Bot stil, dat neva wori wi dyaa bradaz. Dat mi naamal fi dehn. Wans dehn mi ga dehn famili rong dehn, ahn ga wahn plays ahn di privilij fi wership Jehoava, dehn mi hapi wid dat. Fi dehn egzampl help wi fi foakos pahn di moa impoatant tingz ahn liv wahn simpl laif.

Pam, sohntaim yu mi haftu geh yu oan waata ahn pripyaa yu oan food. How yu mi aybl fi manij?

Ah tank mi pa dat ih mi gi mi gud chraynin. Hihn mi teech mi wahn lat, laik how fi staat wahn faiya ahn kuk pan it, ahn how fi servaiv wid lee bit. Wan taim, wen wi mi vizit Kiribati, wi mi stay da wahn smaal lee hows weh mi ga tach roof, di floa mi mek owta koaral, ahn di waal dehn mi mek owta bambu. Fi kuk, Ah mi dig wahn hoal ahn staat wahn faiya wid kuknat hoks. Dis da-mi mai verzhan a wahn faiya haat. Ahn fi geh waata, Ah yoostu kech lain da di wel wehpaat aal di laydi dehn wuda goh fi get waata. Fi dip op waata fahn di wel, wi mi yooz sohnting weh mi luk laik wahn fishin rad bot insteda di huk pahn di en, ih mi ga wahn bokit. Wi wuda tek tern an eech wan a wi wuda geh wi chaans fi chroa een wi bokit. Bot ih tek skilz fi haal op waata fahn di wel. Di bokit wuda jrap eena di wel, den yu moov yu han soh di bokit wuda flip oava, den ih geh ful op; tu mee, ih mi eezi. Ah neva noa how haad ih mi haad til da-mi mai tern. Wen Ah mi chroa een di bokit, ih wuda onli float tap a di waata! Di laydi dehn wuda laaf aata mi, bot afta dat wan a dehn mi help mi. Di peepl dehn mi aalwayz kain ahn helpful.

Di too a unu mi lov unu asainment da di ailan dehn. Unu wuda waahn shayr sohn memriz weh unu cherish?

Winston: Ih mi tek wi wahn wail fi laan som a dehn kostom. Fi egzampl, wen di bradaz wuda aafa wahn meel, dehn wuda yoozhwali gi wi aal di food dehn mi gat. Da di biginin, wi neva noa dat wi mi sopoas tu lef som fi dehn. Soh wi mi nyam evri singl ting weh dehn mi put front a wi! Afta wahn wail, wi mi riyalaiz weh mi-di hapm, soh wi mi staat tu lef food fi dehn. Eevn doa wi mi mes op eena di biginin, di bradaz mi andastan. Evri siks monts wen wi wuda vizit di kangrigayshan az serkit oavaseeya, dehn mi veri hapi fi si wi. Ada dan di loakal bradaz, wee da-mi di onli ada Witnisiz dehn mi noa.

Wi vizit dehn mi gi wahn witnis tu di kamyooniti tu, kaaz lata di peepl da di vilij mi tink dat di bradaz mi jos mek op wahn rilijan fi dehnself. Soh wen dehn mi si mee ahn Pam vizit di bradaz, di vilijaz riyalaiz dat dis da wahn werlwaid aaganaizayshan weh kay bowt eech ada. Dis mi impres di peepl.

Pam: Wan a di memri dehn weh Ah cherish di moas da wen wi mi deh da Kiribati, wehpaat dehn mi ga wahn smaal kangrigayshan ahn jos wahn fyoo bradaz ahn sistaz. Di onli elda, Itinikai Matera, mi du ih bes fi tek kyaa a wi. Wan day, hihn mi shoa  op wid wahn baaskit weh mi ga wan singl eg. Ih mi seh: “Dis da fi unu.” Bak den, wahn eg da-mi sohnting veri speshal. Dis brada kain ahn jenaros atichood mi toch wi haat.

Pam, sohn yaaz layta, yu mi pregnant ahn looz yu baybi. Weh mi help yu fi koap wid da chraiyal?

Ai mi geh pregnant eena 1973 wen wi mi deh da di South Pacific. Wi mi disaid fi goh bak da Australia, bot foa monts layta, wi mi looz wi baybi. Dat mi reeli brok Winston haat kaaz da-mi fi hihn baybi tu. Di payn eena mi haat mi staat tu fayd weh wid taim, bot ih neva did gaahn kompleetli til wi mi geh di Aypril 15, 2009, ishu a The Watchtower. Di “Questions From Readers” mi aks if wahn baybi weh ded eena ih mami beli wahn geh rezorek. Di aatikl mi seh dat da Jehoava hoo wahn disaid weh fi du, ahn hihn aalwayz du di karek ting. Hihn wahn tek weh aala di payn weh wi goh chroo bikaaz a dis wikid werl weh wi liv eena. Hihn di gaid ih Son fi ‘dischrai aal weh di Devl du.ʼ (1 Jan 3:8) Da aatikl mi aalso help wi fi valyu di preshos “perl” weh wi ga az Jehoava peepl! Kaaz wi noa di chroot bowt di fyoocha, wi geh komfert noh mata weh kaina prablemz wi goh chroo.

Afta wi mi looz wi baybi, wi mi get bak eena ful-taim servis agen. Wi mi serv fi sohn monts da di Australia Betel, ahn den, wi mi get bak intu di serkit werk. Eena 1981, afta wi mi serv fi foa yaaz da New South Wales ahn Sydney, wi mi geh asain fi serv da di branch da Australia. Sins den wi di serv dehsoh.

Winston, how di ekspeeryens yu mi geh fahn di South Pacific Islands help yu eena yu werk az wahn memba a di Branch Komiti da Australia?

Fos, Australia mi in chaaj a luk afta American Samoa ahn Samoa. Den, di New Zealand branch mi jain op wid di branch da Australia. Now, di branch da Australia inklood Australia, American Samoa ahn Samoa, di Cook Islands, New Zealand, Niue, Timor-Leste, Tokelau, ahn Tonga. Ah mi geh di privilij fi vizit wahn lata dehnya konchri az wahn brada hoo reprizent di branch. Di ekspeeryens Ah geh di werk lang wid dehn faytful bradaz ahn sistaz da di ailan dehn help mi wahn lat, espeshali now dat Ah di serv dehn fahn di branch aafis.

Chroo aala di yaaz, mee ahn Pam mi laan dat noh onli adolts saach fi Gaad, yong peepl saach fi ahn tu. Dehn waahn da “[perl] weh wot lata lata moni”, eevn if ada famili membaz noh shoa eni kaina inchres, laik eena fi wee kays. (2 Ki. 5:2, 3; 2 Chron. 34:1-3) Jehoava waahn evribadi fi liv fareva, noh kay if wi yong er oal!

Wen mee ahn Pam mi staat saach fi di chroot nayli 50 yaaz agoa, wi neva mi eevn noa wehpaat wi mi wahn en op. Kingdom chroot da wahn perl weh ga hai valyu! Wi mek op wi main fi hoal aan tu dis perl wid aala wi schrent ahn mait!