1-2. (a) Eena weh way Saytan chrik peepl? (b) Weh wi wahn kansida eena dis aatikl?

FAHN way bak eena di taim a Adam ahn Eev, Saytan, “di pa a aala di lai dehn,” di chrik peepl. (Jan 8:44) Som a dehnya lai da di faals teechin dehn bowt det ahn weh hapm tu wi afta wi ded. Wahn lata di tingz weh peepl praktis tudeh bays pahn dehnya faals teechin. Ahn bikaaz a dis, wahn lata wi bradaz ahn sistaz haftu “fait haad” fi weh dehn bileev eena, espeshali wen sombadi eena dehn famili er kamyooniti ded.—Jood 3.

² If yoo di fays dehnya tes, weh ku help yu fi kip yu fayt eena weh di Baibl teech? (Ifee. 6:11) If wan a yu bradaz er sistaz deh anda presha fi tek paat eena dehnya praktis weh Gaad noh laik, how yoo ku gi dehn schrent ahn komfert? Eena dis aatikl wi wahn diskos how Jehoava help wi. Fos, mek wi kansida weh di Baibl seh bowt det.

3. Weh hapm bikaaz a di fos lai?

³ Gaad neva mek wi fi ded. Bot, Adam ahn Eev neva lisn tu weh Jehoava mi tel dehn. Hihn mi tel dehn: “Az tu di chree a di nalij a gud ahn bad, yu noh fi eet di froot, bikaaz di day yu eet it yu wahn ded fi shoar.” (Gen. 2:16, 17) Saytan kaaz wahn lata prablem wen hihn priten laik da di snayk mi-di taak, an ih tel Eev: “Ah di tel yu, yu noh wahn ded.” Wel, shee mi bileev ahn, soh ih eet di froot ahn den ih gi sohn tu Adam ahn hihn eet tu. (Gen. 3:4, 6) Bikaaz a dat, wi sin ahn ded.—Roam. 5:12.

4-5. How Saytan stil di kantinyu fi chrik hyoomanz?

⁴ Adam ahn Eev mi ded jos laik how Jehoava mi seh. Bot  laytaraan, Saytan stil kantinyu fi tel lai bowt det. Wan a dehn lai da di teechin dat sohn paat a wi servaiv afta wi ded, weda dehn kaal it wi spirit, wi soal er sohnting els. Ahn dis taip a lai chrik wahn lata peepl rait dong tu tudeh.—1 Tim. 4:1.

⁵ Wai wahn lata peepl bileev eena Saytan lai dehn? Saytan tek advantij a how peepl feel bowt det ahn chrik dehn. Bikaaz Jehoava kriyayt wi fi liv fareva, wi noh waahn ded. (Eccl. 3:11) Soh dat eksplayn wai wi si det az wi enimi.—1 Kor. 15:26.

6-7. (a) Wai Saytan kyaahn haid di chroot bowt det? Pleez eksplayn yu ansa. (b) How di chroot fahn di Baibl help wi fi noh frayd fi di ded?

⁶ Eevn doa Saytan chrai haad fi haid di chroot bowt det, ih kyaahn du it. Tudeh, moa ahn moa peepl di laan di chroot fahn di Baibl bowt di kandishan ahn di hoap fi di ded, ahn dehn shayr it wid adaz. (Eccl. 9:5, 10; Aks 24:15) Di Baibl gi wi komfert ahn help wi fi noh fyaa er dowt weh wahn hapm tu wi afta wi ded. Az servants a Jehoava, wee noh frayd fi di ded ner wi noh tink dat sohnting bad wahn hapm tu fi wee frenz er famili weh don ded. Wee noa dat dehn noh alaiv ner dehn kyaahn hert nobadi. Da jos laik if dehn deh eena wahn deep deep sleep. (Jan 11:11-14) Sins di ded noh noa notn, dehn kyaahn tel humoch taim don paas. Soh eena di rezorekshan, eevn dehn wan weh ded fi honjridz a yaaz wahn feel laik dehn jos mi gaahn sleep, laik notn neva hapm.

⁷ Wi ku aal agree dat di chroot bowt di ded mek sens, ih klyaa, an ih eezi fi andastan. Dis da wahn big difrens fahn di lai dehn weh Saytan spred. Faals teechin kanfyooz peepl. Dehn lai noh onli fool op peepl bot dehn aalso slanda wi Kriyayta. Soh fi mek wi reeli andastan di damij weh Saytan kaaz, wi wahn diskos dehnya chree kweschan: How Saytan slanda Jehoava wid di lai dehn weh ih spred? How dehnya lai mek peepl bileev dat wi noh need di ransom sakrifais? Ahn how dehnya lai ad moa berdn tu peepl payn ahn sofarin?

8. Akaadn tu Jeremiah 19:5, how Saytan slanda Jehoava wid di lai dehn weh ih spred?

⁸ Saytan slanda Jehoava wid di lai dehn weh ih spred. Wan a dehn lai da di faals  teechin dat di ded wahn bon op eena hel. How dehn kaina faals teechin slanda Gaad? Da bikaaz dehnya kaina teechin mek peepl bileev dat Jehoava, di Gaad a lov, kruwil jos laik di Devl. (1 Jan 4:8) Dat terabl noh chroo? Soh, jos imajin how dat mek Jehoava feel. Aftaraal, hihn hayt enibadi weh kruwil.—Reed Jeremiah 19:5. *

9. Akaadn tu Jan 3:16 ahn Jan 15:13, how Saytan lai dehn mek peepl bileev dat dehn noh need di ransom sakrifais?

⁹ Saytan lai dehn bowt det mek peepl bileev dat dehn noh need di ransom. (Mach. 20:28) Wahn nada lai weh Saytan tel da dat hyoomanz ga wahn soal weh kantinyu fi liv afta det. If dat da chroo, den evribadi mi wahn liv fareva. Ahn den Krais neva mi wahn haftu giv ih laif az wahn ransom fi wee. Memba dat di ransom sakrifais weh Jeezas mek da di moas lovin ting enibadi eva du fi wi. (Reed Jan 3:16; 15:13.) Jos tink how Jehoava ahn Jeezas feel bowt dehn faals teechin weh mek di wandaful gif a di ransom luk yoosles!

10. How Saytan lai dehn bowt det ad tu peepl payn ahn sofarin?

¹⁰ Saytan lai dehn bowt det ad moa berdn tu peepl payn ahn sofarin. Moas a di taim wen wahn payrent looz wahn pikni eena det, peepl seh dat Gaad tek di pikni kaaz ih mi need wahn nada aynjel da hevn. Bot how yoo tink dis mek dehn feel, beta er wers? Som peepl yooz di faals teechin dat Gaad bon op peepl da hel az wahn ekskyoos fi taacha er ponish adaz. Dis inklood di fak dat rilijos leedaz yoostu tai peepl tu wahn stayk ahn bon dehn op jos bikaaz dehn neva agree wid di teechinz a di cherch. Akaadn tu wahn buk bowt di Spanish Inkwizishan, som a di prees weh mi bon peepl pahn di stayk mi bileev dat dehn onli mi-di gi peepl weh neva bileev eena dehnya teechinz “wahn tays a weh helfaiya wahn bee laik” soh dat dehn ku ripent ahn geh sayv fahn helfaiya bifoa dehn ded. Eena wahn lata konchri, peepl feel laik dehn hafu wership er aana dehn ded relitiv. Adaz feel laik dehn haftu satisfai dehn ded relitiv soh dat dehn noh ponish dehn. Bot insteda peepl geh komfert fahn dehnya lai, ih onli mek dehn frayd fi di ded ahn wori moa.

11. How wi frenz ahn relitiv mait chrai fi kanvins wi fi goh gens weh di Baibl seh?

¹¹ Weh ku schrentn wi fi obay Jehoava if wi frenz ahn relitiv chrai fi kanvins wi fi goh gens weh di Baibl seh bowt di ded? Lov fi Jehoava ahn di Baibl. Bikaaz wi noh tek paat eena fi dehn chradishan, dehn mait chrai mek wi luk shaym er seh wi neva lov er rispek di ded persn. Dehn mait eevn seh dat if wi noh tek paat wi wahn kaaz di ded fi haam di livin. How wee ku stan op fi Baibl chroot? Mek wi luk pahn how wi ku yooz dehnya neks Baibl prinsipl.

12. Wat da sohn kostom bowt di ded weh di Baibl noh gree wid?

¹² Mek op yu main fi “noh ga notn fi du wid dehn” bileef ahn kostom weh di Baibl noh gree wid. (2 Kor. 6:17) Da wahn konchri eena di Caribbean, wahn lata peepl bileev dat wen wahn persn ded, ih “goas” mait heng rong fi sohn dayz ahn haant dehn wan weh neva nais tu ahn. Wan refrens seh dat di “goas” mait eevn  “kaaz chrobl eena di kamyooniti.” Eena Africa, wahn kostom da fi kova di miro dehn eena di persn hows weh ded ahn ton di picha dehn fi fays di waal kaaz dehn bileev dat wahn ded persn noh sopoas tu si ihself. Az servants a Jehoava, wee noh bileev eena eni soopastishan er tek paat eena eni praktis weh promoat Saytan lai dehn!—1 Kor. 10:21, 22.

13. Akaadn tu Jaymz 1:5, weh yu fi du if yu noh ga aala di faks bowt wahn sertn kostom?

¹³ If yu noh ga aala di faks bowt wahn sertn kostom, pray tu Jehoava ahn aks ahn fi wizdom. (Reed Jaymz 1:5.) Den du sohn risaach eena wi poblikayshanz. If nesiseri, taak tu di eldaz eena di kangrigayshan. Dehn noh wahn tel yu weh fi du, bot dehn ku help yu fain Baibl prinsiplz weh ku reeli help. An az yu du dis, yu wahn di chrayn yuself fi noa “weh da di difrens bitween gud ahn eevl.”—Heeb. 5:14.

14. Weh wee ku du soh dat wi noh mek peepl stombl?

¹⁴ “Du evriting soh dat Gaad geh di gloari far it. Wi noh waahn gi nobadi reezn fi stombl.” (1 Kor. 10:31, 32, NW) Bifoa wi tek paat eena wahn kostom er chradishan, wi shuda tink fos bowt how ih wuda afek ada peepl kanshans, espeshali wi bradaz ahn sistaz. Wi wuda neva waahn bee di reezn wai sombadi stombl! (Maak 9:42) Aalso, wi noh waahn ofen nobadi eevn if dehn da noh Witnisiz. Wen wi shoa lov bai di way wi taak tu peepl wid rispek ahn noh hert dehn feelinz, wi di bring gloari tu Gaad. Wi noh wahn kwaaril wid peepl ahn bring dehn dong bikaaz a weh dehn bileev. Memba, lov powaful! Soh wen wi shoa lov, wi ku eevn mek di haat a dehn wan weh deh gens wi geh saaf.

15-16. (a) Wai da wahn waiz ting fi mek adaz noa weh yu bileev eena? Koment pahn di egzampl eena di paragraaf. (b) How Paal werdz da Roamanz 1:16 aplai tu wee?

¹⁵ Mek evribadi eena yu kamyooniti noa dat yoo da wan a Jehoava Witnisiz. (Isa. 43:10) If yu frenz ahn relitiv dehn noa dat yu da wahn servant a Jehoava, ih wahn mek it eeziya wen sertn sichuwayshan kom op. Francisco, hoo liv da Mozambique, rait: “Wen mee ahn mi waif, Carolina, laan di chroot, wi mi tel wi famili dat wi mi kyaahn kantinyu wership di ded. Wen Carolina sista mi ded, dat mi tes  di schrent a wi disizhan. Eena Mozambique, di kostom da fi bayd di ded joorin wahn rilijos richwal. Den di kloasis famili memba haftu sleep fi chree dayz da di spat wehpaat dehn mi chroa di waata weh dehn mi yooz fi bayd di ded persn. Akaadn tu dehnya bileef, di spirit a di ded persn sopoas tu bee pleez wid dehnya chradishan. Ahn Carolina famili mi ekspek shee fi du dat.”

¹⁶ Weh Francisco an ih waif mi du? Francisco seh: “Bikaaz wee lov Jehoava ahn wi waahn pleez ahn, wi mi rifyooz fi tek paat eena di richwal. Dis mi mek Carolina famili beks no miks. Dehn mi seh dat wee noh rispek di ded ahn dat dehn noh wahn vizit wi er help wi nohmoh. Sins wi mi don eksplayn tu dehn weh wi bileev eena, wi neva diskos notn bowt it wen dehn mi beks. Som a wi relitiv dehn mi eevn difen wi ahn seh dat wi mi don tel dehn lang taim weh wi bileev wen ih kohn tu dehnya richwal. Afta sohn taim, Carolina relitiv dehn kaam dong, ahn dehn mi staat tu taak tu wi agen. Som a dehn eevn kohn da wi hows an aks fi poblikayshanz.” Wi ku laan fahn dis ekspeeryens fi neva feel shaym fi stan op ahn difen di chroot bowt di ded.—Reed Roamanz 1:16.

17. How wee ku bee wahn chroo fren tu wi bradaz ahn sistaz wen dehn looz sombadi eena det?

¹⁷ Wen wi bradaz er sistaz looz wahn fren er relitiv eena det, wi fi chrai haad fi bee “wahn chroo chroo fren . . . , wahn brada weh baan fi wen taimz haad.” (Prov. 17:17) How wee ku bee “wahn chroo chroo fren,” wen wi bradaz er sistaz weh looz wahn fren er relitiv eena det di geh presha fi goh gens weh dehn bileev eena? Mek wi luk pahn too Baibl prinsipl weh ku help wi fi komfert sombadi weh di goh chroo dis terabl sichuwayshan.

18. Wai Jeezas mi krai, ahn weh wi ku laan fahn fi hihn egzampl?

¹⁸ “Ahn wen peepl feel sad, unu mos feel sad lang wid dehn tu.” (Roam. 12:15) Sohntaim wi noh noa weh fi seh wen sombadi di moarn bikaaz dehn looz wahn fren  er relitiv eena det. Bot wen wi krai lang wid dehn, ih ku bee moch moa komfertin dan eniting wi mait seh. Mayri, Marta, an adaz mi krai wen Lazaros mi ded. Ahn foa dayz layta wen Jeezas mi reech, eevn doa hihn mi noa ih mi wahn rezorek Lazaros, hihn “staat tu krai” tu. (Jan 11:17, 33-35) Wen Jeezas mi krai ih shoa wi how Jehoava mi feel bowt di det a Lazaros. An ih mi reeli komfert Mayri ahn Marta fi si dat Jeezas reeli lov dehn. Sayhn way soh, wi bradaz ahn sistaz noa dat wi da dehn chroo chroo fren wen dehn si dat wi lov ahn kay bowt dehn.

19. Wen wi di komfert wi bradaz ahn sistaz weh looz wahn fren er relitiv eena det, how wi ku put intu praktis Ecclesiastes 3:7?

¹⁹ “Wahn taim deh fi kip kwaiyet ahn wahn taim deh fi taak.” (Eccl. 3:7) Wahn nada way fi komfert sombadi weh looz wahn fren er relitiv eena det da fi bee wilin fi lisn gud tu dehn. Noh kech feelinz bikaaz a dehn “krayzi taak.” Lef dehn mek dehn poar owt dehn feelinz. (Job 6:2, 3) Dehn mait deh anda wahn lata presha fahn famili membaz weh noh di serv Jehoava. Soh pray wid dehn, ahn bayg “di Wan weh hyaa wi pryaaz” fi gi dehn di schrent weh dehn need soh dehn ku tink klyaa. (Ps. 65:2) If yu kud, reed di Baibl er wahn laif stoari wid dehn fahn wan a wi poblikayshanz weh wahn inkorij dehn.

20. Weh wi wahn diskos eena di neks aatikl?

²⁰ Da wahn privilij fi noa di chroot bowt weh wahn hapm tu wi wen wi ded! (Jan 5:28, 29) Eena wateva wi seh ahn du, mek wi stan op fi Baibl chroot wid korij ahn shayr it wid adaz eena evri apachooniti wi geh. Eena di neks aatikl wi wahn luk pahn wahn nada way how Saytan chrai fi kip peepl eena spirichwal daaknis. Wi wahn si wai wi need fi kip weh fahn kostom ahn entataynment weh ga fi du wid spiritizm.