1. How yu geh fi bee gud frenz wid sombadi?

FI BEE sombadi gud fren yu need fi spen taim wid dehn. Wen yu taak tu dehn bowt weh yu tink ahn how yu feel, yu wahn geh fi bee frenz. Bot ih noh eezi fi bee kloas frenz wid Jeezas. Wai?

2. Wat da di fers ting weh mek it haad fi bee Jeezas kloas fren?

² Di fers ting weh mek it haad fi bee Jeezas kloas fren da dat non a wi eva meet hihn fays tu fays. Wahn lata Kristyanz weh mi liv eena di apasl dehn taim neva meet ahn needa. Bot di apasl Peeta seh: “Aldoa yu neva si Jeezas Krais yet, yu stil lov ahn; ahn aldoa yu noh di si ahn now needa, yu bileev eena ahn.” (1 Peet. 1:8) Soh ih pasabl fi mek wi bee Jeezas kloas fren eevn if wi noh meet ahn.

3. Wat da di sekant ting weh mek it haad fi bee Jeezas kloas fren?

³ Di sekant ting weh mek it haad fi bee Jeezas kloas fren da dat wi kyaahn taak tu ahn. Wen wi pray, wi taak tu Jehoava. Da chroo dat wi pray eena Jeezas naym, bot wi noh taak tu Jeezas. Az a mata a fak, Jeezas noh waahn wi pray tu ahn. Wai? Bikaaz pryaa da wahn faam a wership, an onli Jehoava dizerv wi wership. (Mach. 4:10) Bot wi stil ku shoa Jeezas dat wi lov ahn.

4. Wat da di terd ting weh mek it haad fi bee Jeezas fren, ahn weh wi wahn diskos eena dis aatikl?

 ⁴ Di terd ting weh mek it haad fi bee Jeezas fren da dat Jeezas liv da hevn. Soh wi kyaahn akchwali spen taim wid ahn. Bot wi ku stil geh fi noa wahn lat bowt Jeezas widowt spen taim wid ahn. Eena dis aatikl wi wahn diskos foa tingz weh wi ku du fi mek wi schrentn wi frenship wid Jeezas. Bot fers, mek wi si wai ih reeli impoatant fi mek wi ga wahn kloas frenship wid Jeezas.

5. Wai wi need fi bee Jeezas fren? (Si di baks “ Frenship Wid Jeezas Leed tu Frenship Wid Jehoava” ahn “ Vyoo Jeezas Eena di Prapa Way.”)

⁵ Wi haftu bee Jeezas kloas fren if wi waahn ga wahn gud rilayshanship wid Jehoava. Wai? Mek wi kansida too reezn wai wi need fi du dis. Fers, Jeezas tel ih disaiplz: “Mai Faada ihself lov unu kaa unu mi lov mee.” (Jan 16:27) Hihn mi aalso seh: “Di oanli way peepl ku kohn tu Gaad di Faada da fi kohn chroo mee.” (Jan 14:6) Wen yu chrai fi bee Jehoava fren widowt bee Jeezas fren, da laik if yu di chrai get eena wahn bildin widowt yooz di doa. Jeezas mi yooz wahn egzampl jos laik dat wen hihn mi seh, “Ai da di gayt weh di sheep dehn hafu paas chroo.” (Jan 10:7) Di sekant reezn da dat Jeezas ga di saym kwalitiz laik ih pa. Hihn tel ih disaiplz: “Enibadi weh don si mee don si mai Faada tu.” (Jan 14:9) Soh wahn impoatant way how wi geh fi noa Jehoava da wen wi laan bowt Jeezas laif. Di moa wi laan bowt Jeezas di moa wi wahn lov ahn. Ahn di moa wi lov Jeezas, di moa wi wahn lov ih Pa.

6. Wat da wahn nada reezn wai wi haftu ga wahn rilayshanship wid Jeezas? Pleez eksplayn yu ansa.

 ⁶ Wi haftu ga wahn rilayshanship wid Jeezas if wi waahn Jehoava ansa wi pryaaz. Dat meenz wi haftu du moa dan jos seh di werdz, “eena Jeezas naym,” da di en a wi pryaa. Wi haftu andastan how Jehoava yooz Jeezas fi ansa wi pryaaz. Jeezas mi tel di apasl dehn dat eniting weh dehn pray fa eena fi hihn naym, hihn wahn du it fi dehn. (Jan 14:13) Aldoa Jehoava da di wan weh hyaa an ansa wi pryaaz, hihn giv Jeezas di atariti fi du weh Hihn disaid. (Mach. 28:18) Dats wai, bifoa Gaad ansa wi pryaa, ih chek if wi don aplai di kongsl weh Jeezas mi gi bowt fergivnis. Fi egzampl, Jeezas mi seh: “Soh, if unu fagiv peepl weh du unu rang, den unu Faada weh deh op da hevn wahn fagiv unu tu. Bot if unu noh fagiv ada peepl fi weh dehn du unu, den unu Faada noh wahn fagiv unu needa.” (Mach. 6:14, 15) Soh ih reeli impoatant fi mek wi chreet adaz di saym way how Jehoava ahn Jeezas chreet wee!

7. Hoo aal benifit fahn Jeezas ransom sakrifais?

⁷ Onli dehn wan weh ga wahn kloas frenship wid Jeezas wahn benifit fan ih ransom sakrifais. How wi noa dis? Jeezas seh dat hihn wuda ‘gi ih laif fi ih frenz.’ (Jan 15:13) Faytful peepl hoo mi liv bifoa Jeezas mi kohn pahn di ert wahn haftu geh fi noa ahn, an laan fi lov ahn tu. Peepl laik Aybraham, Sayra, Moaziz, ahn Rayhab wahn geh rayz op bak tu laif, an eevn dehn wahn need fi ga wahn rilayshanship wid Jeezas fi mek dehn ku liv fareva.—Jan 17:3; Aks 24:15; Heeb. 11:8-12, 24-26, 31.

8-9. Laik weh Jan 15:4, 5 seh, weh wi ku du if wee da Jeezas fren ahn wai dat impoatant?

⁸ Wi soh hapi dat wi geh fi werk lang wid Jeezas fi mek di gud nyooz a di Kingdom geh preech aal oava di werl. Wen Jeezas mi deh pahn di ert hihn da-mi wahn teecha. Ahn sins ih gaahn bak da hevn, hihn kantinyu fi dairek di preechin ahn teechin werk az di hed a di kangrigayshan. Hihn si an apreeshiayt how haad yu werk fi help az moch peepl az yu kud fi geh fi noa hihn, an ih Faada tu. Az a mata a fak, di onli way how wi ku du dis werk da wid di help a Jehoava ahn Jeezas.—Reed Jan 15:4, 5.

⁹ Gaad Werd teech wi dat wi haftu ga lov fi Jeezas fi mek wi ku pleez Jehoava. Soh mek wi kansida foa tingz weh wi ku du fi bee Jeezas fren.

10. Wat da di fers ting weh wi need fi du fi bil wahn frenship wid Jeezas?

¹⁰ (1) Geh fi noa Jeezas. Wi ku du dis wen wi reed di Baibl buk a Machyu, Maak, Look, ahn Jan. Wen wi meditayt pahn weh di Baibl seh bowt Jeezas laif, wi geh fi lov ahn rispek Jeezas bikaaz a di kain way how hihn mi deel wid peepl. Fi egzampl, eevn doa Jeezas da-mi di disaipl dehn maasta, hihn neva chreet dehn laik slayv. Insted hihn mi tel dehn egzakli weh hihn mi-di tink ahn how hihn mi-di feel. (Jan 15:15) Wen dehn mi feel sad Jeezas mi feel sad wid dehn tu. (Jan 11:32-36) Eevn Jeezas enimi dehn kuda mi si dat hoosoeva aksep Jeezas mesij mi get fi bee fi hihn fren tu. (Mach. 11:19) Wen wi fala Jeezas  eena di way how hihn mi deel wid ih disaiplz, wi rilayshanship wid adaz wahn geh beta ahn wi wahn feel moa hapi ahn wi wahn lov ahn rispek Jeezas moa.

11. Wat da di sekant ting weh wi need fi du fi bee Jeezas fren, ahn wai da step impoatant fi mek wi du?

¹¹ (2) Tink an ak laik Jeezas. Di moa wi fala di way how Jeezas tink, di kloasa wi frenship wid ahn wahn get. (1 Kor. 2:16) How wi ku tink laik Jeezas? Tink bowt dis egzampl. Jeezas mi tink bowt fi help adaz moa dan fi mek hihn mi pleez ihself. (Mach. 20:28; Roam. 15:1-3) Bikaaz hihn mi tink laik dis, hihn mi giv a ihself an ih mi fergivin. Hihn neva geh ofendid eezi bai weh peepl mi seh bowt ahn. (Jan 1:46, 47) Ahn hihn neva mek sombadi mistayk weh dehn mi mek lang taim chaynj fi hihn atichood tuwaadz dehn. (1 Tim. 1:12-14) Jeezas mi seh: “If unu lov wan anada, den evribadi wahn noa dat unu da fi mee disaipl.” (Jan 13:35) Ih gud fi aks yuself, “Ai di du aal weh Ah kud fi kip di pees wid mi bradaz ahn sistaz?”

12. Wat da di terd ting weh wi haftu du fi bee Jeezas fren, ahn how wi ku tek da step?

¹² (3) Sopoat Krais bradaz. Wateva wi du fi Jeezas anointid bradaz, da laik if wi du it fi hihn. (Mach. 25:34-40) Di mayn way how wi shoa dat wi di sopoat di anointid bradaz da wen wi du wi bes fi preech ahn teech tu adaz jos laik weh Jeezas mi du. (Mach. 28:19, 20; Aks 10:42) Di onli way Krais anointid bradaz ku mek di preechin werk hapm aal oava di werl tudeh da wid di help a di “ada sheep.” (Jan 10:16) If yoo da paat a di ada sheep, yu shoa yu lov fi Jeezas ahn di anointid bradaz wen yu tek paat eena di preechin werk.

13. How wi ku yooz di kongsl weh deh da Look 16:9 eena wi laif?

¹³ Wi aalso geh fi bee Jehoava ahn Jeezas fren wen wi gi doanayshan fi sopoat di werk weh dehn di dairek. (Reed Look 16:9, NW.) * Fi egzampl, wi ku mek valanteri doanayshan fi sopoat di werlwaid werk. Dehnya doanayshan geh yooz fi help wid di preechin a di gud nyooz eena sohn plays weh haad fi reech, fi bil ahn mantayn bildin weh sopoat chroo wership, ahn fi giv mateeryal sopoat fi di dizaasta rileef werk. Wi ku doanayt moni fi pay fi di ekspens eena wi oan kangrigayshan. Wi ku help owt wi bradaz ahn sistaz weh noh gat weh dehn need. (Prov. 19:17) Dehnya da wayz how wi ku sopoat Krais anointid bradaz.

14. Laik weh Ifeezhanz 4:15, 16 seh, wat da di foat ting weh wi need fi du fi bee Jeezas fren?

¹⁴ (4) Sopoat di araynjment weh Jehoava aaganaizayshan ga. Wen wi fala di dairekshan a di apointid bradaz eena di kangrigayshan, wi jraa kloasa tu Jeezas, hoo da di hed a di kangrigayshan. (Reed Ifeezhanz 4:15, 16.) Fi egzampl, now wi di chrai mek shoar dat aal Kingdom Haal geh yooz eena di bes way pasabl. Sayka dat, som a di kangrigayshan dehn jain wid wahn nada kangrigayshan ahn di teritori geh ajos fi mach dehn. Wen dehn du dis, di aaganaizayshan sayv wahn lata moni. Bot bikaaz  a dis, sohn poblishaz mi haftu ajos tu di chaynj a sichuwayshan. Dehn faytful poblishaz maita mi serv da wahn kangrigayshan fi yaaz ahn dehn maita mi geh kloas tu wahn lata bradaz ahn sistaz. Bot now dehn geh aks fi serv da wahn difrent kangrigayshan. Jeezas veri hapi fi si ih faytful disaiplz sopoat di araynjment eena di kangrigayshan!

15. How wi frenship wid Jeezas wahn geh schranga eena di fyoocha?

¹⁵ Kristyanz weh anointid wid hoali spirit ga di hoap fi deh wid Jeezas fareva di rool lang wid ahn eena Gaad Kingdom. Dehn wahn akchwali deh wid Krais; dehn wahn si ahn, taak tu ahn, an eevn spen taim wid ahn. (Jan 14:2, 3) Kristyanz weh ga di hoap fi liv pahn di ert wahn aalso feel Jeezas lov an atenshan. Eevn doa dehn noh wahn si Jeezas, dehn frenship wid ahn wahn geh schranga wail dehn injai di bes laif weh Jehoava ahn Jeezas set fi dehn.—Isa. 9:6, 7.

16. How wi frenship wid Jeezas help wi?

¹⁶ Wen Jeezas invait wi fi bee ih fren ahn wi aksep, wi geh wahn lata blesinz. Fi egzampl, wi di benifit fahn ih lov ahn sopoat rait now. Wi ga di apachooniti fi liv fareva. Ahn weh moa impoatant, da dat wi frenship wid Jeezas wahn leed wi tu di bes chrezha. Dat da wahn kloas rilayshanship wid Jeezas pa, Jehoava. Da wahn speshal gif fi mek Jeezas kaal wi fi hihn fren!