1-2. How wi ku fala Jeezas futstep dehn? Ahn wat da wan iloschrayshan weh help wi fi andastan dis?

IMAJIN dat yoo da paat a wahn groop a peepl weh geh laas baka bush. Wahn gaid weh noa di ayrya gud kohn fi leed unu owt. Az hihn di waak fronta unu, yu ku si ih futstep dehn weh ih lef eena di mod. Hihn noa di ayrya gud, soh unu kyaahn aalwayz kip op wid ahn. Bot eevn wen hihn goh hed, unu noh geh frayd. Rada, unu fala fi hihn futstep dehn eena di mod az kloas az unu kud!

² Laif eena dis werl ku bee daynjaros jos laik how ih ku bee daynjaros fi geh laas baka bush. Dats wai wi soh tankful tu Jehoava bikaaz hihn gi wi di perfek gaid. Wee ku fala di futstep dehn weh fi hihn Son, Jeezas Krais, lef fi wi. (1 Peet. 2:21) Akaadn tu wan Baibl refrens, rait ya Peeta mi-di kompyaa Jeezas tu wahn gaid. Jos laik wahn gaid weh lef ih futstep dehn eena di mod, Jeezas lef fi hihn futstep dehn fi mek wi fala. Mek wi diskos dehnya chree kweschan: Weh ih meenz fi fala eena Jeezas futstep? Wai wi shuda du dat? Ahn how wi ku du dat?

3. Weh ih meenz fi fala eena sohnbadi futstep?

³ Weh ih meenz fi fala eena sohnbadi futstep? Sohntaim di Baibl yooz werdz laik “waak” ahn “fut” fi rifaa tu di way how wahn persn chooz fi liv ih laif. (Gen. 6:9; Prov. 4:26) Di egzampl weh wahn persn set da laik di futstep dehn weh ih lef bihain wen ih waak. Soh fi fala eena sohnbadi futstep meenz fi fala dehn egzampl.

4. Weh ih meenz fi fala eena Jeezas futstep?

 ⁴ Soh weh ih meenz fi fala eena Jeezas futstep? Ih meenz fi fala fi hihn egzampl. Eena wi teem skripcha, di apasl Peeta mi taak bowt di gud egzampl weh Jeezas mi set bikaaz hihn mi bayr op eevn wen ih mi-di sofa. Bot wi ku fala Jeezas egzampl eena ada wayz tu. (1 Peet. 2:18-25) Reeli, den, evriting weh Jeezas mi seh an evriting weh ih mi du da wahn gud egzampl fi mek wi fala.

5. How hyoomanz weh noh perfek ku fala Jeezas perfek egzampl?

⁵ Non a wi noh perfek, soh how wee ku fala Jeezas egzampl? Memba dat Peeta tel wi fi fala Jeezas futstep dehn kloas-wan, bot ih neva tel wi fi du it eena wahn perfek way. Soh yes, wee kud fala Jeezas futstep dehn. If wi fala fi hihn futstep dehn kloas-wan ahn du di bes wi kud eevn doa wi noh perfek, wi wahn di du weh di apasl Jan tel wi fi du wen ih seh fi “liv jos laik how Jeezas mi liv.”—1 Jan 2:6.

6-7. Wai wi ku seh dat wi wahn jraa kloasa tu Jehoava wen wi fala eena Jeezas futstep?

⁶ Wi wahn jraa kloasa tu Jehoava wen wi fala eena Jeezas futstep. Wai wi ku seh dat? Fers, bikaaz Jeezas set di bes egzampl a how fi liv eena wahn way weh pleez Gaad. (Jan 8:29) Soh wen wee fala eena Jeezas futstep dehn, wi wahn pleez Jehoava. Ahn wi ku bee shoar dat wi hevnli Faada wahn jraa kloas tu enibadi weh chrai haad fi bee fi hihn fren.—Jay. 4:8.

⁷ Sekant, bikaaz Jeezas mi kapi fi hihn Faada egzampl eena wahn perfek way. Dat da wai Jeezas kuda mi seh: “Hooeva si mee, don si di Faada tu.” (Jan 14:9)  Wee ku kapi Jeezas kwaliti dehn ahn di way how hihn mi chreet ada peepl. Fi egzampl, hihn mi tek piti pahn wahn man weh mi ga leprosi. Ih mi feel kompashan fi wahn uman weh mi ga wahn seeryos siknis. An ih haat gaan owt tu ih fren dehn wen dehn mi feel sad bikaaz sohnbadi weh dehn lov mi ded. Wen wi kapi Jeezas egzampl, wi di kapi Jehoava egzampl tu. (Maak 1:40, 41; 5:25-34; Jan 11:33-35) Ahn di moa wi kapi Jehoava egzampl, di kloasa wi wahn bee tu ahn.

8. Wen wi fala eena Jeezas futstep, how dat wahn help wi fi “kanka di werl”?

⁸ Wen wi fala eena Jeezas futstep, wi noh wahn mek notn eena dis wikid werl stap wi fahn foakos pahn wi servis tu Jehoava. Pahn di laas nait a Jeezas laif pahn di ert, hihn mi aybl fi seh: “Ai don kanka di werl aredi.” (Jan 16:33) Weh Jeezas mi meen wen ih seh dat? Hihn mi meen dat hihn neva mek di goalz weh peepl eena dis werl set, er di way dehn tink an ak stap hihn fahn foakos pahn di reezn wai hihn mi kohn tu di ert—fi klayr Jehoava naym. How bowt wee? Lata tingz deh eena dis werl weh ku dischrak wi. Bot if wi kip wi foakos pahn wi servis tu Jehoava, den wee ku “kanka di werl” jos laik weh Jeezas mi du.—1 Jan 5:5.

9. Weh wi haftu du fi stay pahn di road tu evalastin laif?

⁹ Wen wi fala eena Jeezas futstep, wi ku geh evalastin laif. Wen wahn rich yong man mi aks Jeezas weh ih mi need fi du fi geh evalastin laif, Jeezas mi tel ahn: “Kohn bee mi disaipl.” (Mach. 19:16-21) Wen Jeezas mi-di taak tu sohn Jooz weh neva bileev dat hihn da di Krais, Jeezas tel dehn: “Mai sheep . . . fala mi. Ai wahn gi dehn evalastin laif.” (Jan 10:24-29) Ahn wahn neks taim, Jeezas mi-di taak tu Nikodeemos, hoo da-mi wahn memba a di Jooish Sopreem Koat weh mi waahn noa moa bowt weh Jeezas mi-di teech. Weh Jeezas mi tel ahn? Hihn mi tel ahn dat “evribadi weh shoa fayt eena ahn . . . wahn liv fareva.” (Jan 3:16) Wee shoa dat wi ga fayt eena Jeezas wen wi fala ih teechinz ahn wen wi kapi fi hihn egzampl. If wi du dat, wi wahn stay pahn di road tu evalastin laif.—Mach. 7:14.

10. How wi ku get fi noa Jeezas beta? (Jan 17:3)

¹⁰ Bifoa wi ku fala eena Jeezas futstep dehn kloas-wan, wi haftu geh fi noa ahn. (Reed Jan 17:3.) Ahn wi haftu kantinyu “get fi noa” Jeezas beta ahn beta. Wi haftu laan bowt ih kwalitiz, ih tinkin, an ih standadz. Noh mata how lang wi deh eena di chroot, wi haftu kantinyu “get fi noa” Jehoava an ih Son.

11. Weh deh eena di foa Gaspl dehn?

 ¹¹ Bikaaz Jehoava lov wi, an ih waahn mek wi noa fi hihn Son, hihn mi inklood di foa Gaspl dehn eena fi Hihn Werd. Di Gaspl dehn tel wi bowt Jeezas laif ahn minischri. Dehn tel wi weh Jeezas mi seh, weh ih mi du, ahn how ih mi feel. Dehnya foa buk help wi fi “tink bowt di egzampl” weh Jeezas set. (Heeb. 12:3) Da laik dehn gat een di futstep dehn weh Jeezas lef bihain. Soh if wi stodi di Gaspl dehn, wi ku geh fi noa Jeezas beta ahn beta. Ahn den wi wahn ku fala fi hihn futstep dehn kloas-wan.

12. How wi ku reeli benifit fahn di Gaspl dehn?

¹² If wi reeli waahn benifit fahn di Gaspl dehn, wi haftu du moa dan jos reed dehn. Wi haftu tek di taim fi stodi dehn gud ahn meditayt pahn weh wi reed. (Kompyaa Joshua 1:8, futnoat.) Mek wi diskos too sojeshan weh ku help wi fi meditayt pahn di Gaspl dehn ahn yooz weh wi laan.

13. How yu ku mek weh yu reed eena di Gaspl dehn bee moa reel tu yu?

¹³ Fers, mek weh yu reed eena di Gaspl dehn bee moa reel tu yu. Yooz yu imajinayshan fi si, hyaa, ahn feel weh di hapm. Fi help yu du dat, yu ku du sohn risaach eena di poblikayshan dehn weh Jehoava aaganaizayshan gi wi. Luk pahn di tingz weh mi hapm bifoa an afta di pasij weh yu di stodi. Luk fi moa infamayshan bowt di peepl ahn di plays dehn weh menshan eena di Baibl pasij yu di reed. Kompyaa weh yu reed eena wan Gaspl wid weh wahn nada Gaspl seh bowt di saym ivent. Sohntaim wan Gaspl raita inklood inchrestin infamayshan weh wahn nada wan noh menshan.

14-15. How wi ku yooz weh wi laan fahn di Gaspl dehn eena wi laif?

¹⁴ Sekant, yooz weh yu laan fahn di Gaspl dehn eena yu laif. (Jan 13:17) Afta yu stodi wahn pasij fahn wan a di Gaspl dehn, aks yuself: ‘Wat da di lesn eena dis  pasij weh Ai ku yooz eena mai laif? How Ai ku yooz dis pasij fi help sohnbadi els?ʼ Chrai tink bowt wahn spesifik persn weh yu noa ahn den, eena wahn lovin ahn kain way, tel ahn di lesn weh yu laan.

¹⁵ Mek wi luk pahn wan egzampl a how wi ku fala dehnya too sojeshan. Wi wahn luk pahn di pasij bowt di poa wido weh Jeezas mi si eena di templ.

16. Eksplayn weh mi-di hapm da Maak 12:41.

¹⁶ Mek it reel. (Reed Maak 12:41.) Imajin weh mi-di hapm. Da-mi Naisan 11, 33 C.E. Dis da-mi les dan wan week bifoa Jeezas mi ded. Jeezas mi spen moas a di day di teech eena di templ. Bot di rilijos leedaz neva mek it eezi far ahn. Erliya eena di day, som a dehn mi kweschan Jeezas atariti. Adaz mi-di chrai chrik ahn wid kweschanz weh dehn mi tink hihn kudn ansa. (Maak 11:27-33; 12:13-34) Now Jeezas mi deh eena wahn nada paat a di templ. Ih mi praabli deh da di chrezhri, bikaaz hihn kuda mi si di moni baks dehn fahn wehpaat ih mi deh. Hihn mi sidong ahn staat tu wach di peepl az dehn put dehn kanchribyooshan eena di moni baks dehn. Ih mi si lata rich peepl di put een lata moni. Maybi hihn mi eevn deh kloas inof fi hyaa wen di moni jrap eena di baks.

17. Weh di poa wido weh wi reed bowt da Maak 12:42 mi du?

¹⁷ Reed Maak 12:42. Afta wahn wail, Jeezas mi noatis wahn poa wido. (Look 21:2) Shee mi liv wahn haad laif. An ih praabli neva eevn ga inof moni fi bai di baysik tingz weh ih need fi liv. Stilyet, shee gaahn tu wan a di moni baks ahn put een too smaal koin, ahn yu praabli kudn eevn hyaa wen di moni jrap eena di baks. Bot Jeezas mi noa weh shee mi put een deh. Shee mi put een too lepta koin, di smaalis koin weh dehn yoostu yooz eena dehn dayz. Dat da neva eevn inof moni fi bai wan sparo, wahn cheep berd weh peepl yoostu sel fi food.

18. Akaadn tu Maak 12:43, 44, weh Jeezas mi seh bowt di wido kanchribyooshan?

¹⁸ Reed Maak 12:43, 44. Dis wido mi reeli impres Jeezas. Soh hihn mi kaal ih disaipl dehn ahn point tu di wido ahn tel dehn: “Dis poa wido put een moa moni eena di kanchribyooshan baks dan aala di ada peepl.” Den ih seh: “Dehn [espeshali di rich peepl] gi fahn owta dehn richiz, bot shee, eevn doa ih soh poa, giv evriting weh shee mi gat.” Wen dis faytful wido mi giv op di laas lee bit a moni weh ih mi gat da day, shee mi-di put ih laif eena Jehoava lovin han.—Ps. 26:3.

19. Weh impoatant lesn wi ku laan fahn weh Jeezas mi seh bowt di poa wido?

¹⁹ Yooz weh yu laan eena yu laif. Aks yuself, ‘Weh lesn Ai ku laan fahn weh Jeezas mi seh bowt di poa wido?ʼ Tink bowt da wido. Shee mi praabli waahn gi Jehoava moa, bot shee mi du weh ih kud. Shee mi gi Jehoava ih bes! Ahn Jeezas mi noa dat fi shee kanchribyooshan mi preshos tu fi hihn Faada. Soh den dis da wahn impoatant lesn fi wee: Jehoava pleez wid wi wen wi giv ahn wi bes, wen wi serv ahn wid aala wi haat an aala wi soal. (Mach. 22:37; Kol. 3:23) Jehoava hapi wen ih si wi di du aal weh wi kud! Soh wen wi spen wi taim an enerji pahn wi wership, inkloodin di minischri ahn di meetin dehn, Jehoava wahn pleez wid wi.

20. How yu ku yooz di lesn weh yu laan fahn di pasij bowt di poa wido? Yooz di egzampl eena di paragraaf.

 ²⁰ How yu ku yooz di lesn weh yu laan fahn di pasij bowt di poa wido? Chrai tink bowt spesifik peepl weh wuda feel inkorij if yu rimain dehn how Jehoava hapi wid weh dehn ku du. Fi egzampl, yoo noa wahn oalda sista weh praabli feel gilti er yoosles bikaaz ih noh ga di helt er enerji fi du weh ih yoostu du eena di minischri? Er yoo noa wahn brada weh kyaahn mek it tu aala di meetin dehn bikaaz ih ga helt prablemz? Yu ku help peepl laik dat if yu “seh gud tingz weh wahn schrentn [dehn].” (Ifee. 4:29) Yu ku tel dehn di inkorijin lesn weh yu laan fahn di poa wido. Yu inkorijin werdz ku rimain dehn dat Jehoava pleez wid wi wen wi giv ahn wi bes. (Prov. 15:23; 1 Tes. 5:11) Wen yu komen adaz bikaaz dehn giv Jehoava dehn bes, noh mata humoch ih mait bee, yu di fala Jeezas futstep dehn kloas-wan.

21. Weh yoo mek op yu main fi du?

²¹ Wi veri tankful dat di Gaspl dehn gi wi soh moch deetayl bowt Jeezas laif, bikaaz dis help wi fi kapi fi hihn egzampl ahn fi fala fi hihn futstep dehn kloas-wan. Maybi yu ku du wahn persnal stodi er famili wership proajek pahn di Gaspl dehn. Bot memba dat fi reeli benifit, yu haftu mek it reel ahn yooz weh yu laan eena yu laif. Wi haftu kapi weh Jeezas mi du, bot wi aalso haftu lisn tu weh ih mi seh. Eena di neks aatikl, wi wahn si weh wi ku laan fahn di laas tingz weh Jeezas mi seh bifoa ih mi ded.