1-2. Wat da di ransom, ahn wai wi need it?

WEN di perfek man Adam mi sin, ih mi looz owt pahn di chaans fi liv fareva noh jos fi ihself bot aalso fi ih chiljren weh ih mi wahn gat. Adam neva ga no ekskyoos fi weh ih mi du. Hihn mi chooz fi sin. Bot fi hihn chiljren neva du notn rang, ahn dehn neva du notn fi mek Adam sin. (Roam. 5:12, 14) Adam mi dizerv fi ded, bot yu tink Jehoava kuda mi du eniting fi Adam chiljren soh dat dehn kuda liv fareva? Yes! Soon afta Adam mi sin, Jehoava mi staat tu shoa how hihn wuda sayv milyanz a Adam chiljren fahn sin ahn det. (Gen. 3:15) Wen di rait taim kohn, Jehoava wuda sen ih Son fahn hevn “fi giv ih laif az wahn ransom fi sayv lata peepl.”—Maak 10:45; Jan 6:51.

² Wat da di ransom? Wen di Kristyan Greek Skripchaz taak bowt di ransom, dehn di taak bowt di prais weh Jeezas mi pay fi bai bak weh Adam laas. (1 Kor. 15:22) Wai wi need di ransom? Bikaaz Jehoava Laa tel wi dat akaadn tu fi hihn standad a jostis, wi haftu pay laif fi laif. (Ex. 21:23, 24) Adam mi looz fi hihn perfek hyooman laif. Soh fi satisfai Gaad jostis, Jeezas mi sakrifais fi hihn perfek hyooman laif. (Roam. 5:17) Bikaaz hihn du dat, hihn da “di Wan weh da Faada Fareva” tu enibadi weh ga fayt eena di ransom.—Isa. 9:6; Roam. 3:23, 24.

3. Akaadn tu Jan 14:31 ahn 15:13, wai Jeezas mi wilin fi sakrifais fi hihn perfek hyooman laif?

³ Jeezas mi wilin fi sakrifais fi hihn laif bikaaz hihn reeli  lov ih hevnli Faada an ih lov wee tu. (Reed Jan 14:31; 15:13.) Hihn lov Jehoava an ih lov wee soh moch dat hihn mi mek op ih main fi stay faytful fi ih hoal laif ahn fi du evriting weh ih Faada waahn ih du. Sayka weh hihn mi du dat, Jehoava orijinal perpos fi hyoomanz ahn fi di ert wahn stil kohn chroo. Eena dis aatikl, wi wahn diskos wai Gaad mi alow Jeezas fi sofa soh moch bifoa ih ded. Wi wahn aalso tek wahn luk pahn di egzampl a wahn Baibl raita weh mi apreeshiayt di ransom wahn lat. Ahn fainali, wi wahn diskos how wee ku shoa wi apreeshiayshan fi di ransom, ahn weh wi ku du fi shoa eevn moa apreeshiayshan fi di ransom sakrifais weh Jehoava ahn Jeezas gi wi.

4. How Jeezas mi ded? Pleez eksplayn yu ansa.

⁴ Tink bowt weh mi hapm pahn di laas day a Jeezas laif pahn di ert. Eevn doa hihn kuda mi kaal wahn lata aynjelz fi protek ahn, hihn mi alow di Roaman soalja dehn fi ares ahn, an fi beet ahn widowt mersi. (Mach. 26:52-54; Jan 18:3; 19:1) Dehn beet ahn wid wahn wip weh tayr ih skin. Laytaraan, dehn mek ih bak di hevi taacha stayk weh dehn mi wahn heng ahn pan. Jeezas mi chrai bak di stayk tu wehpaat dehn mi wahn kil ahn, bot afta wahn lee wail di Roaman soalja dehn mi foas wahn nada man fi kehr it far ahn. (Mach. 27:32) Wen Jeezas mi reech di plays wehpaat ih mi wahn ded, di soalja dehn nayl ih han ahn fut tu di stayk. Wen dehn lif op di stayk, di wayt a fi hihn badi mi pul pahn di nayl dehn weh mi deh eena ih han ahn fut. Ih ma an ih fren dehn mi dehdeh ahn dehn mi-di krai, bot di Jooish roola dehn mi-di mak ahn. (Look 23:32-38; Jan 19:25) Jeezas mi sofa fi owaz. Di pozishan weh ih mi deh eena mi mek ih haat ahn longz haftu werk ekschra haad an ih mi haad fi mek ih breed. Jeezas mi noa dat hihn mi faytful tu di en, ahn jos bifoa ih mi ded ih mi seh wan laas pryaa tu Jehoava. Den ih bow ih hed an ih ded. (Maak 15:37; Look 23:46; Jan 10:17, 18; 19:30) Dat da-mi wahn reeli sloa, paynful, ahn kruwil way fi ded!

5. Weh mi opset Jeezas di moas?

⁵ Fi Jeezas, di way how dehn mi kil ahn da neva di wers paat a aal weh ih gaahn chroo. Hihn mi moa opset oava di reezn wai dehn mi-di kil ahn. Dehn mi akyooz Jeezas dat hihn neva ga no rispek fi Gaad er fi Gaad naym, ahn dat neva chroo non ataal. (Mach. 26:64-66) Jos di aidyaa dat peepl wuda akyooz hihn dat ih noh ga no rispek fi Gaad mi opset hihn soh moch dat hihn mi hoap dat ih Faada neva mi wahn alow ahn fi sofa eena dis way. (Mach. 26:38, 39, 42) Wai Jehoava mi alow fi hihn Son fi sofa ahn ded? Mek wi kansida chree reezn.

6. Wai dehn mi haftu heng Jeezas pahn wahn taacha stayk?

⁶ Fers, Jeezas mi haftu ded pahn wahn stayk fi set di Jooz free fahn wahn kers. (Gal. 3:10, 13) Dehn mi deh anda dis kers bikaaz dehn mi agree fi obay Gaad Laa bot dehn neva obay it. Soh dehn mi dizerv fi ded bikaaz dehn mi deh anda da kers ahn bikaaz dehn da-mi Adam chiljren. (Roam. 5:12) Di Laa weh Gaad mi giv Izrel seh dat if wahn man mi komit wahn sin weh ih dizerv fi ded fa dehn shuda kil ahn. Sohntaim dehn wuda heng ih ded badi pahn wahn stayk aftawodz. *  (Deut. 21:22, 23; 27:26) Soh bikaaz Jeezas mi ded pahn wahn stayk, dat wuda set di Jooz free fahn di kers ahn fi hihn sakrifais wuda help dehn eevn doa dehn rijek ahn.

7. Wat da wahn sekant reezn wai Gaad mi alow ih Son fi sofa?

⁷ Mek wi kansida wahn sekant reezn wai Gaad mi alow ih Son fi sofa. Hihn mi-di chrayn Jeezas fi wen ih mi wahn bee fi wee Hai Prees eena di fyoocha. Jeezas mi geh fi ekspeeryens fi ihself how haad ih ku bee fi obay Gaad wen wi goh chroo seeryos chraiyalz. Hihn mi deh anda soh moch presha dat hihn mi pray fi help “wid wahn lowd vais, lang wid tyaaz.” Bikaaz Jeezas mi sofa soh moch, hihn andastan weh wi need an ih “ku help [wi] owt” wen wi “fays difrent tes.” Wi veri tankful tu Jehoava bikaaz hihn gi wi wahn mersiful Hai Prees weh ku “andastan fi wee weeknis dehn.”—Heeb. 2:17, 18; 4:14-16; 5:7-10.

8. Wat da wahn terd reezn wai Gaad mi alow Jeezas fi gaahn chroo dis haad tes?

⁸ Di terd reezn wai Jehoava mi alow Jeezas fi sofa soh moch da-mi soh dat ih kuda ansa dis impoatant kweschan: Hyoomanz kuda stay faytful eevn wen dehn goh chroo wahn haad tes? Saytan seh no! Hihn seh dat hyoomanz onli serv Gaad fi weh dehn ku geh fan ahn. Hihn bileev dat wee da jos laik Adam, dat wi noh lov Jehoava. (Job 1:9-11; 2:4, 5) Bikaaz Jehoava mi shoar dat Jeezas mi wahn stay faytful, hihn mi alow Jeezas fi gaahn chroo da haad tes. Ahn Jeezas mi did stay faytful ahn proov dat Saytan onli laiyad.

9. Weh egzampl di apasl Jan set fi wi?

⁹ Di teechin a di ransom schrentn di fayt a wahn lata Kristyanz. Dehn kip aan di preech eevn anda persikyooshan ahn dehn gaahn chroo aal kaina chraiyalz joorin dehn laif. Kansida di egzampl a di apasl Jan. Hihn mi laayal an ih preech di chroot bowt Krais ahn di ransom fi praabli moa dan 60 yaaz. Wen ih mi eena ih layt 90ʼs, di Roaman govament mi tink dat hihn soh daynjaros dat dehn put ahn eena prizn pahn di ailan a Patmos. Weh hihn mi du rang? Ih “mi-di taak bowt Gaad ahn di chroot bowt Jeezas.” (Rev. 1:9) Jan mi bayr op ahn stay faytful chroo ih hoal laif. Hihn set wahn ekselent egzampl fi wee!

10. How di buk dehn weh Jan rait shoa dat hihn mi apreeshiayt di ransom?

¹⁰ Eena di Baibl buk dehn weh Jan rait, hihn mi seh humoch ih lov Jeezas ahn humoch ih apreeshiayt di ransom. Hihn mi rait bowt di ransom ahn di blesinz weh kohn fahn di ransom oava 100 taimz. Fi egzampl, Jan mi rait: “If wan a unu sin, wi ga wahn helpa wid di Faada. Da di wan weh du weh rait eena Gaad sait, Jeezas Krais.” (1 Jan 2:1, 2) Jan mi aalso rait bowt how impoatant ih impoatant fi “preech di chroot bowt Jeezas.” (Rev. 19:10) Soh ih klyaa fi si dat Jan mi reeli apreeshiayt di ransom. How wee ku shoa dat wi apreeshiayt di ransom tu?

11. Weh ku help wi fi noh giv een tu temtayshan?

¹¹ Noh giv een tu di temtayshan fi sin. If wi reeli apreeshiayt di ransom, wi noh  wahn tink tu wiself: ‘Ah noh haftu fait soh haad gens di temtayshan fi sin. Ai ku goh hed ahn komit wahn sin, ahn den Ah jos wahn aks Gaad fi fergivnis.ʼ Insteda dat, wen wi temtid fi du sohnting rang, wi wahn seh: ‘No! How Ai kuda du sohnting laik dat afta evriting weh Jehoava ahn Jeezas du fi mi?ʼ Ahn fi help wi fait temtayshan, wi ku aks Jehoava fi schrent ahn bayg ahn: ‘Pleez help mi noh giv een tu temtayshan.ʼ—Mach. 6:13.

12. How wi ku fala di kongsl da 1 Jan 3:16-18?

¹² Lov yu bradaz ahn sistaz. Wen wi shoa lov fi wi bradaz ahn sistaz, wi di shoa apreeshiayshan fi di ransom tu. Wai? Bikaaz Jeezas neva jos giv ih laif fi wee, ih giv ih laif fi wi bradaz ahn sistaz tu. Jeezas mi wilin fi ded fi dehn, soh dat meenz hihn lov dehn wahn lat. (Reed 1 Jan 3:16-18.) Wi shoa wi lov fi wi bradaz ahn sistaz bai di way how wi chreet dehn. (Ifee. 4:29, 31–5:2) Fi egzampl, wi help dehn wen dehn sik er wen dehn goh chroo haad chraiyalz, inkloodin nachral dizaasta. Bot weh wi shuda du if wahn brada er sista du er seh sohnting weh ofen wi?

13. Wai wi shuda bee wilin fi fergiv?

¹³ Yoo eva fain it haad fi fergiv wahn brada er sista? (Lev. 19:18) If yu eva feel laik dat, fala dis advais: “Kantinyu fi put op wid wan anada ahn fergiv wan anada wid aala unu haat, eevn if sombadi du sohnting fi hert unu. Jos laik how Jehoava fergiv unu wid aala fi hihn haat, unu mos fergiv wan anada di saym way.” (Kol. 3:13) Evri taim wi fergiv wi brada er sista, wi proov tu wi hevnli Faada dat wi reeli apreeshiayt di ransom. How wi ku kantinyu apreeshiayt dis gif fahn Gaad eevn moa?

14. Weh wi ku du soh dat wi apreeshiayt di ransom eevn moa?

¹⁴ Tank Jehoava fi di ransom. Joanna, wahn 83-yaa-oal sista fahn India, seh: “Ai tink dat ih veri impoatant fi menshan di ransom evri day eena mi pryaaz ahn fi tank Jehoava far it.” Wen yu pray bai yuself, taak tu Jehoava bowt eniting weh yu du rang, an aks ahn fi fergiv yu. Af koars, if yu komit wahn seeryos sin, yu wahn aalso need di help a di eldaz. Dehn  wahn lisn tu yu an aafa lovin kongsl fahn Gaad Werd. Dehn wahn pray wid yu an aks Jehoava fi fergiv yu soh dat yu ku ga wahn gud rilayshanship wid Jehoava agen.—Jay. 5:14-16.

15. Wai wi shuda tek di taim fi reed bowt di ransom ahn meditayt pahn weh wi reed?

¹⁵ Meditayt pahn di ransom. Rajamani, wahn 73-yaa-oal sista, seh: “Wen Ah reed bowt di sofarin weh Jeezas gaahn chroo, Ah krai anaal.” Wen yu tink bowt how Gaad Son mi sofa soh moch, yoo mait feel hert tu. Bot di moa yu meditayt pahn di sakrifais weh Jeezas mek, di moa yu wahn lov hihn an ih Faada. Di ransom da wahn gud tapik fi wahn stodi proajek.

16. How wee benifit wen wi teech adaz bowt di ransom? (Koment pahn di picha pahn di kova.)

¹⁶ Teech adaz bowt di ransom. Eech taim wi tel adaz bowt di ransom, fi wee apreeshiayshan far it wahn groa. Wi ga sohn ekselent poblikayshan ahn veedyo weh ku help wi teech adaz wai Jeezas mi haftu ded fi wi. Fi egzampl, wi ku yooz di Gud Nyooz Fahn Gaad! broashoar ahn goh da lesn 4, weh naym “Hoo Da Jeezas Krais?” Er wi ku yooz di Weh di Baibl Ku Teech Wi? buk ahn goh da chapta 5, weh naym “Di Ransom Da di Graytis Gif Fahn Gaad.” Ahn wi apreeshiayt di ransom eevn moa wen wi goh da di Memoaryal a Jeezas det evri yaa ahn wen wi invait az moch peepl az wi kud fi jain wi fi da speshal ivent. Jehoava gi wi wahn wandaful privilij fi teech adaz bowt fi hihn Son!

17. Wai di ransom da di bes gif Gaad eva gi wi?

¹⁷ Fi shoar, wi ga gud reezn fi aalwayz apreeshiayt di ransom. Bikaaz a di ransom, wi ku bee kloas fren wid Jehoava eevn doa wi noh perfek. Bikaaz a di ransom, evriting weh di Devl du wahn geh dischrai. (1 Jan 3:8) Ahn bikaaz a di ransom, Jehoava orijinal perpos fi di ert wahn stil kohn chroo. Di hoal ert wahn bee wahn paradais. Evribadi weh yu meet wahn lov Jehoava ahn serv ahn. Soh den, mek wi luk fi wayz fi shoa wi apreeshiayshan fi di ransom eech day. Dis da di bes gif Gaad eva gi wi!