Jos bifoa Jeezas mi ded, hihn mi seh, “Mai Gaad, mai Gaad, wai yu lef mi?” Wai hihn mi seh dat?

Jos bifoa Jeezas mi ded, hihn mi seh di werdz weh wi fain da Machyu 27:46: “Mai Gaad, mai Gaad, wai yu lef mi?” Wen Jeezas mi seh dis, hihn mi-di fulfil weh di saamis Dayvid mi seh da Psalm 22:1. (Maak 15:34) Jeezas neva koat dehnya werdz bikaaz hihn mi disapointid eena Jehoava er bikaaz hihn mi looz fayt fi wahn lee wail. Jeezas mi andastan di reezn wai hihn mi haftu ded, ahn hihn mi wilin fi du it. (Mach. 16:21; 20:28) Hihn mi aalso noa dat wen hihn mi wahn ded, Jehoava wuda haftu stap protek ahn. (Job 1:10) Soh Jehoava mi stap protek Jeezas soh dat Jeezas kuda mi proov dat hihn wuda stay faytful eevn doa hihn mi wahn ded eena soch a terabl way.—Maak 14:35, 36.

Soh wai Jeezas mi koat di werdz a dis saam? Wi noh noa fi shoar, bot mek wi diskos wat kuda bee som a di reezn wai hihn mi seh dis. *

Ih ku bee dat wen Jeezas mi seh dehnya werdz hihn mi-di seh dat Jehoava neva mi wahn stap ahn fahn ded. Jeezas mi need fi pay di ransom widowt Jehoava help. Dat da wai hihn mi haftu ded, soh dat hihn kuda mi “gaahn chroo det fi evribadi.”—Heeb. 2:9.

Ih ku bee dat wen Jeezas mi koat wahn fyoo werdz fahn da saam hihn mi waahn mek peepl tink bowt di res a di saam. Eena  dehn dayz, Jooish peepl yoostu laan lata di saamz bai haat. Soh if yu wuda rimain dehn a wan vers fahn wahn saam, dehn wuda tink bowt di hoal saam. If dis da weh Jeezas mi waahn du, den hihn wuda mi help ih Jooish falowaz fi memba aala di prafesi dehn eena dis saam weh taak bowt tingz weh mi wahn hapm wen hihn ded. (Ps. 22:7, 8, 15, 16, 18, 24) Aalso, di laas fyoo vers a di saam prayz Jehoava ahn diskraib hihn az di King oava evriting.—Ps. 22:27-31.

Ih ku bee dat wen Jeezas koat weh Dayvid mi seh, hihn mi-di seh dat hihn inosent. Bifoa Jeezas mi ded, di Jooish Sopreem Koat mi chaaj ahn bays pahn faals evidens dat hihn mi taak gens Gaad. (Mach. 26:65, 66) Di Jooish Sopreem Koat mi hori kohn tugeda fi di chraiyal layt da nait ahn dehn neva fala leegal standadz. (Mach. 26:59; Maak 14:56-59) Soh wen Jeezas mi koat Psalm 22:1, da laik hihn mi-di seh, “Mai Gaad, mai Gaad, wai yu lef mi if Ah neva du notn rang?” Dis wuda mi mek it klyaa dat hihn neva du notn weh dizerv dis kaina ponishment.

Ih ku bee dat Jeezas mi-di rimain adaz dat eevn doa Jehoava mi alow Dayvid fi sofa, dis neva meen dat Jehoava neva pleez wid Dayvid. Jos bikaaz Dayvid aks da kweschan, dat noh meenz Dayvid neva ga fayt eena Gaad. Afta dat, hihn mi seh dat hihn chros dat Jehoava kuda sayv ih peepl, ahn Jehoava mi kantinyu fi bles ahn. (Ps. 22:23, 24, 27) Saym way soh, eevn doa Jeezas, “di Son a Dayvid,” mi sofa pahn di taacha stayk, dat noh meenz dat Jehoava neva pleez wid Jeezas.—Mach. 21:9.

Ih ku bee dat Jeezas mi-di shoa how sad ih mi feel dat Jehoava mi haftu stap protek ahn soh dat hihn kuda proov dat hihn mi faytful eevn op tu det. Da neva Jehoava orijinal perpos dat fi hihn Son mi wahn sofa ahn ded. Dat onli mi haftu hapm bikaaz Adam ahn Eev mi ribel. Jeezas neva du notn rang, bot hihn mi haftu sofa ahn ded fi ansa Saytan chalenj ahn fi pay di ransom prais fi bai bak weh Adam mi laas. (Maak 8:31; 1 Peet. 2:21-24) Dis onli kuda mi hapm if, fi di fers taim eena Jeezas laif, Jehoava mi stap protek ahn fi wahn lee wail.

Ih ku bee dat Jeezas mi-di chrai help ih falowaz fi foakos pahn di reezn wai Jehoava mi alow hihn fi ded pahn di taacha stayk. * Jeezas mi noa dat lata peepl wuda mi stombl bikaaz hihn mi ded az wahn kriminal pahn wahn taacha stayk. (1 Kor. 1:23) Bot if fi hihn falowaz mi foakos pahn di reel reezn wai hihn mi ded, den dehn wuda andastan weh fi hihn det reeli meenz. (Gal. 3:13, 14) Den dehn wuda mi noa dat hihn da-mi dehn Sayvya, hihn da neva wahn kriminal.

Noh mata wai Jeezas mi koat dehndeh werdz, hihn mi noa dat wen hihn ded pahn di taacha stayk, hihn mi-di du Jehoava wil. Lee wail afta hihn mi koat dis saam, hihn mi seh: “Ah don du evriting weh yu aks mi fi du!” (Jan 19:30; Look 22:37) Yes, di fak dat Jehoava mi stap help Jeezas fi wahn lee wail mi alow Jeezas fi du evriting weh hihn mi kohn tu di ert fi du. Ih mi aalso alow hihn fi fulfil aala di prafesi dehn bowt hihn weh deh eena “di Laa a Moaziz” an eena “di buk a di Prafits ahn di buk a Saamz.”—Look 24:44.