1-2. Weh mi hapm rait bifoa Jeezas ded?

DI DAY da-mi Naisan 14, eena di yaa 33 C.E. Peepl mi akyooz Jeezas ahn seh dat ih mi gilti a wahn kraim weh hihn neva komit. Dehn mi mak ahn, taacha ahn, an den nayl ahn tu wahn taacha stayk. Di nayl dehn eena ih han an ih fut mosi mi kaaz ahn eevn moa payn wen ih mek eni lee moov, an ih mosi mi paynful fi eevn taak. Bot ih mi haftu taak, bikaaz ih mi ga impoatant tingz fi seh.

² Mek wi diskos di laas tingz weh Jeezas mi seh bifoa ih ded pahn di taacha stayk ahn di lesn dehn weh wi ku laan fahn weh ih mi seh. In ada werdz, mek wi “lisn tu ahn.”—Mach. 17:5.

3. Hoo Jeezas praabli mi-di taak bowt wen ih mi seh: “Faada, fergiv dehn”?

³ Weh Jeezas mi seh? Wen Jeezas mi dehn pahn di taacha stayk, ih mi pray: “Faada, fergiv dehn.” Hoo hihn mi-di aks ih Faada fi fergiv? Di neks ting weh Jeezas mi seh help wi fi andastan hoo ih mi-di taak bowt. Hihn mi seh: “Kaaz dehnya peepl noh noa weh dehn di du.” (Look 23:33, 34) Jeezas praabli mi-di taak bowt di Roaman soalja dehn weh mi nayl ih han ahn fut tu di stayk. Dehn neva reeli noa da hoo hihn. Hihn aalso kuda mi-di tink bowt som a di peepl eena di krowd weh mi diman di govna fi mek dehn kil ahn. Maybi laytaraan som a dehn wuda  put fayt eena ahn. (Aks 2:36-38) Jeezas neva dizerv fi ded. Bot hihn neva geh beks ahn rifyooz fi fergiv di peepl weh mi-di persikyoot ahn needa. (1 Peet. 2:23) Insted, hihn mi aks Jehoava fi fergiv di peepl weh mi kil ahn.

4. Weh wi ku laan fahn how wilin Jeezas mi wilin fi fergiv peepl weh mi persikyoot ahn?

⁴ Weh wi ku laan fahn weh Jeezas mi seh? Wi need fi bee laik Jeezas ahn bee wilin fi fergiv adaz. (Kol. 3:13) Som peepl, inkloodin wi faamli, mait persikyoot wi bikaaz dehn noh andastan weh wi bileev er dehn mait noh andastan di way wi chooz fi liv wi laif. Dehn mait tel lai bowt wi, shaym wi fronta ada peepl, dischrai wi lichricha, er eevn chretn fi hert wi. Bot insteda geh beks ahn hoal malis, wi ku aks Jehoava fi help peepl weh persikyoot wi fi laan an aksep di chroot. (Mach. 5:44, 45) Sohntaim ih mait bee haad fi fergiv dehn, espeshali if dehn chreet wi reeli bad. Bot if wi stay beks wid dehn ahn wi noh wilin fi fergiv dehn, wi onli di hert wiself. Wan sista mi seh: “Ah riyalaiz dat wen Ah fergiv adaz, ih noh meenz dat Ai agree wid weh dehn du mi er dat Ai alow dehn fi chreet mi bad. Ih jos meenz dat Ai chooz fi noh hoal malis.” (Ps. 37:8) Wen wi disaid fi fergiv, wi di chooz fi noh geh beks er hoal malis wen eniting bad hapm tu wi.—Ifee. 4:31, 32.

5. Weh Jeezas mi pramis di kriminal weh mi deh pahn wahn stayk langsaid ahn, an wai hihn mi mek da pramis?

⁵ Weh Jeezas mi seh? Too kriminal mi deh pahn taacha stayk langsaid Jeezas. Fers, di too a dehn mi jain di krowd ahn mak Jeezas. (Mach. 27:44) Bot laytaraan wan a dehn mi stap. Hihn mi riyalaiz dat Jeezas “neva du notn rang.” (Look 23:40, 41) Bot moa dan dat, hihn mi aalso shoa dat hihn bileev dat Jeezas mi wahn geh rayz op bak tu laif ahn dat eena di fyoocha hihn mi wahn bee wahn king. Soh hihn mi tel Jeezas: “Memba mi wen yu get eena yu Kingdom.” (Look 23:42) Da man mi shoa lata fayt! Jeezas mi ansa ahn: “Ah di pramis yu tudeh, yu wahn deh wid mi eena Paradais.” (Look 23:43) * Noatis dat Jeezas mi mek wahn veri persnal pramis. Ih mi tel di man: “[Ai] di pramis yu,” ahn den ih tel ahn “yu wahn deh wid mi.” Jeezas kuda mi gi dis kriminal wahn hoap fi di fyoocha bikaaz hihn mi noa dat fi hihn Faada mersiful.—Ps. 103:8.

6. Weh wi laan fahn weh Jeezas mi tel di kriminal?

⁶ Weh wi ku laan fahn weh Jeezas mi seh? Jeezas da jos laik ih Faada. (Heeb. 1:3) Jehoava eega fi fergiv wi ahn fi shoa wi mersi, bot hihn wahn onli fergiv wi if wi reeli sari fi di bad tingz weh wi du eena di paas an if wi ga fayt eena di sakrifais a Jeezas Krais. (1 Jan 1:7) Som peepl mait fain it haad fi bileev dat Jehoava kuda eva fergiv dehn fi di mistayk dehn weh dehn mek eena di paas. If yoo eva feel da way deh, tink bowt dis: Jos bifoa Jeezas mi ded, hihn mi shoa mersi tu di kriminal weh jos mi-di staat tu shoa fayt. Soh humoch moa Jehoava wuda bee wilin fi shoa mersi tu fi hihn faytful servant dehn, hoo di du dehn bes fi obay fi hihn komanment dehn!—Ps. 51:1; 1 Jan 2:1, 2.

7. Akaadn tu Jan 19:26, 27, weh Jeezas mi tel Mayri ahn Jan, ahn wai hihn mi tel dehn dat?

⁷ Weh Jeezas mi seh? (Reed Jan 19:26, 27.) Jeezas mi waahn tek kayr a ih ma, hoo da-mi praabli wahn wido. Jeezas breda ahn sista dehn praabli kuda mi help shee geh weh ih need fi liv. Bot hoo wuda mi help ahn fi stay faytful tu Jehoava? Ih noh luk laik non a fi hihn breda dehn da-mi fi hihn disaipl yet. Bot Jan da-mi wahn faytful apasl ahn wan a Jeezas kloasis fren. Jeezas mi kansida enibadi weh wership Jehoava lang wid hihn az paat a ih spirichwal famili. (Mach. 12:46-50) Jeezas mi lov  Mayri an ih mi waahn tek kayr a ahn. Soh hihn mi aks Jan fi luk afta ahn bikaaz hihn mi noa dat Jan wuda help shee fi stay faytful. Soh Jeezas tel ih ma: “Hihn da yu son!” An ih tel Jan: “Shee da yu ma!” Fahn den, Jan mi tek kayr a Mayri laik if shee da-mi fi hihn reel ma. Jeezas mi shoa lata lov fi dis preshos uman weh mi lov ahn, an weh mi tek kayr a ahn fan ih baan. Ahn shee stil mi dehdeh far ahn op tu wen hihn mi ded!

8. Weh wi ku laan fahn weh Jeezas mi tel Mayri ahn Jan?

⁸ Weh wi ku laan fahn weh Jeezas mi seh? Wi rilayshanship wid wi Kristyan bradaz ahn sistaz ku bee schranga dan wi rilayshanship wid wi kloas famili. Wi faamli mait persikyoot wi er eevn abandan wi, bot Jeezas mi pramis dat if wi stik tu Jehoava ahn fi Hihn aaganaizayshan, wi wahn “geh 100 taimz moa” dan weh wi laas. Lata wi bradaz ahn sistaz wahn bee az kloas tu wi az wahn son, wahn daata, wahn ma, er wahn pa. (Maak 10:29, 30) How yoo feel fi bee paat a wahn spirichwal famili weh yoonaitid bikaaz dehn ga fayt ahn bikaaz dehn lov Jehoava ahn wan anada?—Kol. 3:14; 1 Peet. 2:17.

9. Weh wi laan fahn weh Jeezas mi seh da Machyu 27:46?

⁹ Weh Jeezas mi seh? Lee bit bifoa Jeezas mi ded, hihn mi hala owt: “Mai Gaad, mai Gaad, wai yu lef mi?” (Mach. 27:46) Di Baibl noh tel wi wai Jeezas mi seh dis. Bot tink bowt weh wi ku laan fahn weh hihn mi seh. Wan ting weh wi laan wen Jeezas mi seh dehndeh werdz da dat hihn mi-di mek di prafesi da Psalm 22:1 kohn chroo. * Aalso, dat mek it klyaa dat Jehoava neva kip wahn “fens” rong ih Son. (Job 1:10) Jeezas mi andastan dat fi hihn Faada mi alow peepl weh hayt Jeezas fi tes ih fayt eevn op tu det. No ada hyooman eva fays wahn tes az haad az di tes weh Jeezas mi fays. Pahn tap a dat, dehnya werdz proov dat hihn neva komit no kraim ahn soh hihn neva dizerv fi ded.

10. Weh lesn wi ku laan fahn weh Jeezas mi seh tu ih Faada?

¹⁰ Weh wi ku laan fahn weh Jeezas mi seh? Wan lesn weh wi ku laan da dat wi noh fi ekspek Jehoava fi protek wi fahn evri chalenj weh tes wi fayt. Jos laik how Jeezas fayt mi geh tes eevn op tu det, wee haftu pripyaa wiself fi stay faytful eevn op tu det. (Mach. 16:24, 25) Bot wi ku bee shoar dat Gaad noh wahn mek wi fays eni tes weh soh bad dat wi kyaahn bayr it. (1 Kor. 10:13) Wahn nada lesn weh wi ku laan da dat, jos laik Jeezas, wee mait haftu sofa eevn if wi neva du notn rang. (1 Peet. 2:19, 20) Peepl weh persikyoot wi du dat, noh bikaaz wi du sohnting rang, bot bikaaz wee da noh paat a di werl ahn wee taak bowt di chroot. (Jan 17:14; 1 Peet. 4:15, 16) Jeezas mi andastan wai Jehoava mi alow ahn fi sofa. Bot sohntaim ada faytful servants a Jehoava wanda wai Jehoava alow dehn fi sofa wen dehn deh anda chraiyal. (Hab. 1:3) Wi mersiful ahn payshent Gaad andastan dat di reezn wai dehn feel da way da noh bikaaz dehn noh ga fayt, dehn jos need di komfert weh onli hihn ku gi dehn.—2 Kor. 1:3, 4.

11. Wai Jeezas mi seh weh deh da Jan 19:28?

¹¹ Weh Jeezas mi seh? (Reed Jan 19:28.) Wai Jeezas mi seh: “Ah feel tersti”? Ih seh dis soh dat di skripcha da Psalm 22:15 ku kohn chroo. Da vers seh: “Ah noh ga no schrent, Ah da laik wahn brok pees a klay pat; mi tong stik tu mi gom.” Aalso, afta aal weh Jeezas mi sofa, inkloodin di terabl payn pahn di taacha stayk, hihn mosi mi feel veri tersti. Hihn mi need sohnbadi fi giv ahn sohnting fi jrink.

12. Weh wi ku laan fahn weh Jeezas mi seh da Jan 19:28?

¹² Weh wi ku laan fahn weh Jeezas mi seh? Jeezas neva feel laik ih mi wahn luk week if ih aks fi help, ahn wee shudn feel da way needa. Fi moas a wi laif, wi praabli prifaa noh fi tel peepl weh wi need. Bot if wi need help, wi shudn hoal bak fahn aks adaz fi help wi. Fi egzampl, if wi di geh oalda er if wi ga helt prablemz, wi mait need fi aks wahn fren fi gi wi wahn raid fi goh da shap er fi goh da dakta. If wi feel diskorij, wi mait need fi aks wahn elda er wahn nada machoar Kristyan weh wi kloas tu fi lisn tu wi er fi shayr “wahn gud werd” fi inkorij wi. (Prov. 12:25) Mek wi memba dat wi bradaz ahn sistaz lov wi ahn dehn waahn help wi “wen taimz haad.” (Prov. 17:17) Bot dehn kyaahn reed wi main. Dehn noh mait noa dat wi need help anles wi tel dehn dat wi need help.

13. Weh Jeezas mi du wen ih mi stay faytful eevn op tu det?

¹³ Weh Jeezas mi seh? Rong chree aklak di aftanoon pahn Naisan 14, Jeezas mi hala owt: “Ah don du evriting weh yu aks mi fi du!” (Jan 19:30) Jos bifoa Jeezas mi ded, hihn mi noa dat hihn mi finish du aal weh Jehoava mi ekspek ahn fi du. Wen Jeezas mi stay faytful tu ih Faada til ih ded, Jeezas mi du sevral tingz. Fers, hihn mi proov dat Saytan laiyad. Jeezas mi shoa dat wahn perfek hyooman kud stay faytful tu Jehoava noh mata weh Saytan du dehn. Sekant, Jeezas mi giv op ih laif az wahn ransom. Bikaaz hihn mi sakrifais ih laif fi wi, wee ku ga wahn raichos standin fronta Gaad, ahn wi ga di hoap fi liv fareva. Terd, Jeezas mi proov dat Jehoava da wahn raichos roola an ih mi klayr ih Faada naym.

14. How wee shuda liv eech day a wi laif?

¹⁴ Weh wi ku laan fahn weh Jeezas mi seh? Wee haftu mek op wi main fi stay faytful evri singl day a wi laif. Kansida weh Brada Maxwell Friend, wahn inschrokta fi di Wachtowa Baibl Skool a Gilyad, mi seh eena wahn taak bowt fayt da wahn intanashanal asembli. Hihn mi seh: “Noh wayt til tumaaro fi du er seh weh yu ku du er seh tudeh. Yoo shoar yu wahn stil bee alaiv tumaaro? Liv eech day laik if da mi yu laas chaans fi proov dat yoo dizerv fi liv fareva! Den, eevn if wi fays det, wi wahn ku seh: “Jehoava, Ah du mi bes fi stay faytful, fi proov dat Saytan laiyad, ahn fi klayr yu naym ahn sopoat yu sovrenti!”

15. Akaadn tu Look 23:46, weh Jeezas mi noa fi shoar?

¹⁵ Weh Jeezas mi seh? (Reed Look 23:46.) Wid ful kanfidens, Jeezas mi seh: “Faada, Ah put mi laif eena yu han.” Jeezas  mi noa dat fi hihn fyoocha laif pen pahn Jehoava, ahn hihn mi shoar dat fi hihn Faada wuda memba hihn.

16. Weh yu laan fahn weh mi hapm tu wahn 15-yaa-oal brada?

¹⁶ Weh wi ku laan fahn weh Jeezas mi seh? Bee wilin fi put yu laif eena Jehoava han. Fi du dat, yu haftu “chros eena Jehoava wid aala yu haat.” (Prov. 3:5) Kansida di egzampl a Joshua, wahn 15-yaa-oal brada weh mi sofa fahn wahn dedli dizeez. Hihn mi rifyooz fi aksep eni medikal chreetment weh brok Gaad laa. Noh tu lang bifoa hihn mi ded, ih mi tel ih ma: “Ma, Ah deh eena Jehoava han. . . . Ah ku tel yu dis fi shoar: Ai noa dat Jehoava wahn definaytli bring mi bak eena di rezorekshan. Hihn noa weh deh eena mi haat, an Ai reeli lov ahn.” * Eech wan a wi shuda aks wiself, ‘If mai fayt eva geh tes bai sohnting weh ku mek Ah ded, Ai wahn stay laayal tu Jehoava ahn chros hihn fi memba mi?ʼ

17-18. Weh wi laan? (Si di baks “ Weh Wi Laan Fahn Weh Jeezas Mi Seh Bifoa Ih Ded.”)

¹⁷ Wi ku laan sohn impoatant lesn fahn di laas tingz weh Jeezas mi seh bifoa ih ded! Dehn rimain wi dat wi need fi fergiv adaz, ahn wi need fi chros dat Jehoava wahn fergiv wee. Wee ga di privilij fi bee paat a wahn wandaful spirichwal famili a bradaz ahn sistaz weh redi fi help wi. Bot wen wi need help, wi mos aks dehn far it bikaaz dehn kyaahn reed wi main ahn haat. Wi noa dat Jehoava wahn help wi fi bayr op anda eni chraiyal weh wi fays. Ahn wi si how impoatant ih impoatant fi liv eech day laik if da mi di laas day a wi laif fi proov dat wi laayal tu Jehoava ahn dat wi shoar dat Jehoava wahn rezorek wi if wi ded.

¹⁸ Di laas tingz weh Jeezas mi seh wen hihn mi-di ded pahn di taacha stayk ku teech wi lata tingz fi chroo! Ahn wen wi yooz weh wi laan eena wi laif, wi shoa dat wi di obay weh Jehoava mi seh bowt ih Son wen ih tel wi: “Lisn tu ahn.”—Mach. 17:5.