Sad fi seh, wen Ah mi bowt 13 yaaz oal, mi kloas rilayshanship wid Jehoava mi staat tu geh week. Ah mi feel laik mi klaasmayt dehn mi free fi du eniting weh dehn waahn. An Ai mi waahn da kaina freedom. Ah mi feel laik mi payrents roolz ahn Kristyan standadz mi tu schrik. An Ah mi tink dat fi wership Jehoava da-mi haad werk. Ai mi aalwayz noa dat Jehoava egzis, bot Ah jos neva feel kloas tu ahn.

Ah neva stap preech kompleetli, bot Ah stil neva giv Jehoava mi bes. Wen Ah wuda goh preech, Ah wudn pripyaa heda taim. Soh Ah mi fain it haad fi staat ahn kantinyu wahn kanvasayshan. Sayka dat, Ah neva ga no ritern vizit er Baibl stodi an Ah neva injai feel servis. Soh wers Ah neva waahn goh owt goh preech. Ah wuda aks miself, ‘How sohnbadi ku du dis week afta week ahn mont afta mont?ʼ

Wen Ah ton 17, Ah mi ga wahn schrang dizaiya fi bee free. Soh Ah pak op mi tingz, lef hoam, ahn moov da Australia. Mi payrents  mi sad wen Ah moov owta di hows. Ahn dehn mi wori bowt mi, bot dehn mi tink dat Ah wuda kantinyu serv Jehoava.

Da Australia, mi rilayshanship wid Jehoava mi geh weeka ahn weeka. Ah staat tu mis lata meetin, an Ah mi mek frenz wid yonga peepl hoo da-mi laik mee. Dehn mi hapi fi goh da meetin wan day ahn den goh owt goh jrink ahn paati da naitklob di day afta dat. Wen Ah tink bowt da taim eena mi laif, Ah riyalaiz dat Ah mi deh eena di chroot an eena di werl saym taim, bot Ah neva feel laik Ah mi bilangz eena eeda wan.

Bowt too yaaz layta, Ah meet wahn kain sista weh neva noa humoch shee mi help mi fi staat tu tink bowt how Ah mi-di liv mi laif. Ai mi-di liv eena wahn hows wid faiv singl sistaz. Wi mi invait di serkit oavaseeya an ih waif, Tamara, fi stay da wi hows fi wan week. Wail ih hozban mi bizi di du tingz fi di kangrigayshan, Tamara mi spen taim wid wi ahn wi mi ga lata fon tugeda. Ai mi laik dat! Shee mi hombl, an ih mi eezi fi taak tu ahn get lang wid. Ah mi fain it inchrestin dat sombadi weh soh spirichwal ku bee soh moch fon fi spen taim wid.

Tamara mi hapi fi serv Jehoava ahn shee mi lov di chroot ahn di minischri. Shee mi soh hapi fi gi Jehoava ih bes. An Ai neva hapi, bikaaz Ai neva mi-di du mi bes eena mi servis tu Jehoava. Fi shee pazitiv atichood mi help mi wahn lat. Bikaaz shee mi soh hapi di serv Jehoava, fi shee egzampl mek Ah tink bowt wahn impoatant chroot eena di Baibl: Jehoava waahn aala wi rijais az wi serv ahn, an ih waahn aala wi hala owt wid jai eena wi haat.—Ps. 100:2.

Ah mi waahn ga di saym kaina jai weh Tamara mi gat, bot Ah mi need fi mek sohn big chaynjiz. Ih mi tek sohn taim, bot Ah mi staat aaf di mek smaal chaynjiz eena mi laif.  Ah mi staat tu pripyaa fi di minischri, an Ah agzilari painyaa fahn taim tu taim. Dis mi help mi fi noh feel tu nervos. Bikaaz Ah mi yooz di Baibl moa ahn moa eena di minischri, Ah mi geh fi injai di minischri moa tu. Noh tu lang afta dat, Ah mi-di agzilari painyaa evri mont.

Ah mi staat tu mek frenz wid peepl fahn difrent ayj groop weh mi-di injai dehn servis tu Jehoava ahn weh mi-di giv ahn dehn bes. Fi dehn egzampl mi help mi fi tink bowt weh moa impoatant eena mi laif ahn fi staat tu reed di Baibl evri day. Ah mi staat tu injai di minischri eevn moa, ahn soon Ah mi staat tu regyula painyaa. Fi di fers taim afta soh moch yaaz, Ah mi feel hapi an Ah mi feel laik Ah bilangz eena di kangrigayshan agen.

Wan yaa layta, Ah meet Alex, wahn kain brada weh lov Jehoava ahn di minischri. Hihn mi-di serv az wahn ministeeryal servant an ih don mi-di painyaa fi siks yaaz. Alex mi aalso preech fi sohn taim da Malawi, wehpaat dehn mi ga wahn need fi moa Kingdom poblishaz. Rait deh, hihn mi spen taim wid mishineriz weh mi set wahn reeli gud egzampl fi hihn ahn weh mi inkorij ahn fi kantinyu put Jehoava fers plays eena ih laif.

Eena 2003, mee an Alex geh marid, ahn wi kantinyu eena ful-taim servis. Wi laan wahn lata wandaful lesn, ahn Jehoava bles wi eena lata difrent wayz.

Eena 2009, wi mi geh invaitid fi serv az mishineriz da Timor-Leste. Wi mi veri hapi fi geh dis asainment, bot wi mi nervos tu. Faiv monts layta, wi mi reech da di kyapital siti, Dili.

Laif eena wi nyoo hoam mi veri difrent fahn wi laif bifoa. Wi mi haftu adap tu di nyoo kolcha, langwij, food, ahn way a laif.  Eena di minischri, wi mi si how di peepl mi liv wahn haad laif. Lata dehn mi poa ahn neva ga wahn gud ejukayshan, ahn lata dehn mi ga fizikal an imoashanal prablemz bikaaz a waar ahn vailens. *

Di minischri mi amayzin! Wan taim Ah meet wahn lee gyal weh naym Maria, shee mi onli 13 yaaz oal. * Shee mi sad bikaaz fi shee ma mi ded wahn fyoo yaaz erliya, ahn shee mi haadli eva get fi si ih pa. Jos laik wahn lata chiljren rong fi shee ayj, Maria neva noa weh ih mi wahn du wid ih laif. Ah memba wahn taim wen ih mi-di krai an eksplayn how ih mi feel, bot Ah neva andastan weh shee mi-di seh bikaaz Ah kudn taak ih langwij gud yet. Ah mi pray tu Jehoava an aks ahn fi help mi komfert Maria. An Ah staat tu reed sohn inkorijin skripchaz fi shee. Oava di neks fyoo yaaz, Ah si how hapi Maria mi hapi. Ih atichood ahn laif chaynj kompleetli. Shee mi en op di geh baptaiz, ahn now shee di kandok ih oan Baibl stodiz. Tudeh, Maria ga wahn big spirichwal famili an ih ku feel humoch dehn lov ahn.

Jehoava di bles di preechin werk da Timor-Leste. Eevn doa moas a di poblishaz jos geh baptaiz eena di laas ten yaaz, lata dehn di serv az painyaa, ministeeryal servant, er elda. Adaz di werk da di rimoat chranslayshan aafis wehpaat dehn help fi chranslayt Baibl poblikayshanz eena di loakal langwij dehn. Ih mi mek Ah feel soh hapi fi hyaa dehn sing da di meetin dehn, fi si di big smail pahn dehn fays, ahn fi si how dehn groa az spirichwal peepl.

Wi laif da Timor-Leste mi veri difrent fahn wi laif da Australia, bot wi mi veri hapi. Sohntaim, wi wuda chravl pahn wahn smaal lee bos weh mi pak op wid lata peepl, ahn weh mi-di kehr jrai fish ahn lata vejitablz fahn di loakal maakit. Ahn sohn dayz ih mi hat bad, ahn wi wuda kandok Baibl stodiz da sohn hows weh mi ga dert floa ahn weh mi ga chikin di ron aal bowt di plays. Bot noh mata di chalenjiz, Ah mi aalwayz seh, ‘Dis da di bes laif eva!ʼ

Wen Ah tink bowt mi paas, Ah onli graytful dat mi payrents mi du dehn bes fi teech mi Jehoava wayz, ahn fi help mi eevn wen mi rilayshanship wid hihn mi week. Proverbs 22:6 proov chroo eena mai laif. Mi payrents prowd a mee an Alex ahn dehn hapi fi si wi di serv Jehoava. Sins 2016, wi deh eena di serkit werk da di Australasia branch teritori.

Ih haad fi bileev dat Ah neva yoostu injai di minischri. Bot now Ah lov di minischri! Ah riyalaiz dat noh mata weh hapm eena wi laif, wi geh chroo jai wen wi serv Jehoava wid wi hoal haat. Di laas 18 yaaz Ah spen di serv Jehoava lang wid Alex da di bes yaaz a mi laif. Now Ai andastan weh di saamis Dayvid mi tel Jehoava: “Enibadi weh luk tu yoo fi protekshan wahn rijais; dehn wahn aalwayz sing bikaaz dehn hapi. . . . An enibadi weh lov yu naym wahn rijais.”—Ps. 5:11.