Wahn oat da “wahn veri seeryos, ofishal pramis fi du sohnting, an ih aafn menshan Gaad . . . az witnis.” Dis ku bee sohnting weh sohnbadi seh er weh dehn put eena raitin.

Sohn peepl mait seh dat ih rang fi swayr wahn oat bikaaz Jeezas mi seh: “Noh swayr [wahn oat] non ataal . . . Bot wen yu seh ‘Yes,ʼ mek ih meen yes, ahn wen yu seh ‘No,ʼ mek ih meen no, kaaz eniting els bisaidz dat da fahn di wikid wan.”(Mach. 5:33-37) Af koars, Jeezas mi noa dat som a Gaad faytful servants eena di paas mi swayr difrent oat ahn dat di Laa weh Gaad mi gi Moaziz mi seh dat di Izrelait dehn mi haftu swayr sertn oat. (Gen. 14:22, 23; Ex. 22:10, 11) Ahn hihn mi noa dat Jehoava ihself swayr oat tu. (Heeb. 6:13-17) Soh Jeezas neva meen dat wi shuda neva swayr wahn oat. Rada, hihn mi-di waan wi dat wi noh fi swayr wahn oat fi tingz weh noh impoatant er fi eni lee ting. Wi shuda aalwayz du weh wi pramis fi du, bikaaz dat da weh Jehoava waahn wi du.

Soh den, weh yu shuda du if sohnbadi aks yu fi swayr wahn oat? Fers, mek shoar yu ku du weh yu swayr fi du. If yu noh shoar, ih wuda beta if yu noh swayr di oat. Gaad Werd waan wi: “Ih beta yu noh mek wahn vow dan yu mek wahn vow weh yu kyaahn pay.” (Eccl. 5:5) Den, tink bowt sohn Baibl prinsiplz weh ku help yu disaid weda er nat yu ku swayr di oat ahn den mek yu disizhan weh bays pahn Baibl prinsiplz. Wat da sohn Baibl prinsiplz weh ku help yu?

Sohn oat noh goh gens Gaad wil. Fi egzampl, Jehoava Witnisiz seh wahn vow wen dehn geh marid. Dehnya vow da wahn kaina oat. Di braid ahn di groom mek wahn vow fronta Gaad an evribadi weh deh da di wedn serimoni fi lov, cherish, ahn rispek eech ada “fi az lang az di too a [dehn] liv tugeda pahn di ert.” (Ada koplz mait noh seh dehnya egzak werdz wen dehn geh marid, bot dehn stil mek wahn vow fronta Gaad.) Afta dat, dehn da hozban ahn waif, ahn dehn sopoas tu stay marid tu eech ada fi di res a dehn laif. (Gen. 2:24; 1 Kor. 7:39) Dis da wahn prapa araynjment, an ih goh lang wid Gaad wil.

Sohn oat goh gens Gaad wil. Wahn chroo Kristyan wuda neva swayr wahn oat fi yooz wepan fi difen wahn konchri er fi giv op dehn fayt eena Gaad. Dat wuda brok Gaad komanment dehn. Kristyanz noh fi bee “laik di peepl a dis werl,” soh wi noh fi get involv eena eni ishu er waar weh kom op eena di werl.—Jan 15:19; Isa. 2:4; Jay. 1:27.

 Kristyanz haftu disaid akaadn tu dehn kanshans weda er nat dehn wahn tek sohn oat. Sohntaim, wi haftu tink gud bowt di kongsl weh Jeezas gi wi fi “pay bak Seeza tingz tu Seeza, bot pay bak Gaad tingz tu Gaad” bifoa wi disaid if weda er nat wi ku swayr wahn oat.—Look 20:25.

Fi egzampl, sopoaz wahn Kristyan aplai fi wahn paaspoat er fi bee wahn sitizn a wahn konchri an ih fain owt dat ih haftu swayr wahn oat tu da konchri. If ih fain owt dat di oat da wahn pramis fi du sohnting weh goh gens Gaad laa, ih kanshans weh chrayn bai di Baibl noh wahn alow ahn fi tek da oat. Bot, di govament mait alow ahn fi mek wahn lee chaynj tu di oat soh dat ih noh bada ih kanshans.

Wahn Kristyan weh tek wahn oat weh di govament chaynj ahn weh noh goh gens Gaad laa di fala di prinsipl da Roamanz 13:1, weh seh: “Evribadi fi bee wilin fi obay peepl weh ga atariti.” Soh di Kristyan mait disaid dat notn rang fi swayr wahn oat fi du sohnting weh Gaad don tel ahn fi du aredi.

Ih impoatant fi obay wi kanshans weh chrayn bai di Baibl if dehn aks wi fi swayr pahn sohnting er fi mek wahn jescha wen wi di swayr wahn oat. Di aynshent Roaman ahn Sitiyan dehn yoostu swayr pahn dehn soad di yooz wahn simbol weh reprizent wahn gaad a waar az wahn garantee dat yu ku chros di persn. Di Greek dehn yoostu lif op dehn han tu hevn wen dehn swayr wahn oat. Dat da weh dehn yoostu du fi shoa dat dehn rekonaiz dat wahn gaad deh weh pay atenshan tu weh peepl seh ahn du, ahn weh peepl haftu ansa tu.

Af koars, non a Jehoava servants wuda eva swayr wahn oat pahn eni nashanal simbol weh ga eniting fi du wid faals wership. Bot wat if dehn aks yu fi testifai eena wahn koat kays ahn dehn aks yu fi put yu han pahn wahn Baibl fi swayr dat yu wahn tel di chroot? Eena da kays, yu mait disaid fi du it, laik how di Skripchaz tel wi bowt faytful peepl weh mi yooz jeschaz wen dehn swayr wahn oat. (Gen. 24:2, 3, 9; 47:29-31) Ih impoatant fi memba dat if yu doo swayr wahn oat laik dat, yu di swayr fronta Gaad dat yu wahn tel di chroot. Yu haftu bee redi fi gi wahn aanis ansa tu eni kweschan weh dehn aks yu.

Wi rilayshanship wid Jehoava preshos tu wee, soh wi shuda pray ahn tink gud bowt eni oat weh dehn aks wi fi tek bikaaz wi waahn mek shoar dat ih noh goh gens wi kanshans er gens Baibl prinsiplz. If yu doo disaid fi swayr wahn oat, yu haftu mek shoar yu kip it.—1 Peet. 2:12.