Eena wahn sichuwayshan laik dat, di kangrigayshan wuda andastan dat di fers marij mi en wen di man marid agen ahn dat di nyoo marij leegal. Fi andastan wai, mek wi luk pahn weh Jeezas mi seh bowt weh hapm wen sohnbadi divoas ahn geh marid agen.

Da Machyu 19:9, Jeezas tel wi wat da di onli reezn weh bays pahn di Baibl fi en wahn marij. Ih seh: “If wahn man divoas ih waif, ahn shee neva komit sekshwal imoraliti, ahn hihn marid wahn nada uman, hihn di komit adolchri.” Fahn weh Jeezas seh, wi laan dat (1) sekshwal imoraliti da di onli reezn di Baibl alow fi wahn divoas ahn (2) wahn man weh divoas ih waif fi wahn reezn weh noh bays pahn di Baibl ahn den marid sohnbadi els di komit adolchri. *

Yu tink Jeezas mi-di seh dat if wahn man komit sekshwal imoraliti ahn divoas ih waif, hihn free fi marid agen akaadn tu di Baibl? Noh reeli. If wahn hozban komit adolchri, di waif hoo da di inosent persn wahn geh fi disaid weda shee wahn fergiv ih hozban er nat. If shee chooz fi noh fergiv ahn, an dehn geh wahn leegal divoas, den di too a dehn free fi marid agen wans dehn don divoas.

Pahn di ada han, di waif hoo da di inosent persn mait waahn sayv ih marij, soh ih wilin fi fergiv ih hozban. Bot, sopoaz di gilti hozban rijek ih waif fergivnis ahn stil disaid fi divoas ahn? Akaadn tu di Baibl, hihn wudn bee free fi marid agen bikaaz shee mi wilin fi fergiv ahn, an fi stay marid tu ahn. If di gilti hozban noh disfeloship, an ih insis fi goh gens weh di Baibl seh ahn marid sohnbadi els eevn wen ih noh free fi du dat, ih komit adolchri agen. Den di eldaz eena di kangrigayshan wuda haftu faam wahn judishal komiti fi deel wid di mata.—1 Kor. 5:1, 2; 6:9, 10.

If wahn man marid agen wen ih noh free fi du dat, how di kangrigayshan shuda vyoo ih laas marij an ih nyoo marij? Akaadn tu di Baibl, ih laas marij stil valid? Di inosent persn ku stil disaid if weda er nat ih wahn fergiv di wan weh komit adolchri? Di kangrigayshan wuda vyoo di nyoo marij laik if dehn di komit adolchri?

Eena di paas, di kangrigayshan yoostu vyoo di nyoo marij laik if dehn di komit adolchri az lang az di inosent mayt stil alaiv, neva marid agen, ahn neva komit sekshwal imoraliti. Bot, Jeezas neva seh notn bowt di inosent persn wen ih mi taak bowt divoas ahn geh marid agen. Rada, hihn mi eksplayn dat wahn man weh divoas ih waif fi wahn reezn weh noh bays pahn di Baibl ahn den marid sohnbadi els, di komit adolchri. Soh, Jeezas seh dat wen wahn persn divoas ih inosent mayt ahn marid sohnbadi els, ih komit adolchri, ahn dat en di laas marij.

 Wen wahn marij en bikaaz di hozban divoas ih inosent waif ahn marid sohnbadi els, den ih noh pasabl fi di inosent mayt disaid if weda er nat ih wahn fergiv ahn bikaaz hihn don mek da disizhan wen hihn mi geh marid agen. Aalso, noh mata if di inosent persn ded, marid agen, er komit sekshwal imoraliti, ih noh wahn chaynj how di kangrigayshan vyoo di nyoo marij. *

Eena di egzampl weh wi jos diskos, di hozban komit adolchri ahn dehn en op di geh divoas. Weh wuda hapm if di hozban neva komit adolchri bot ih stil geh wahn divoas ahn marid sohnbadi els? Er weh wuda hapm if di hozban neva komit adolchri bifoa ih geh divoas bot ih mi komit adolchri afta di divoas, ahn den ih stil gaahn marid sohnbadi els eevn doa ih waif mi wilin fi fergiv ahn? Eena aala dehndeh egzampl, di divoas ahn di nyoo marij, weh da adolchri, wuda en di laas marij. Di nyoo marij wuda bee wahn leegal rilayshanship. Di Novemba 15, 1979, kapi a The Watchtower, payj 32, seh: “Now hihn staat wahn nyoo marij ahn soh ih kyaahn jos en it ahn goh bak tu di way tingz yoostu bee; di laas marij en wen ih geh divoas, wen ih komit adolchri ahn geh marid tu sohnbadi els.”

Dis ajosment tu wi andastandin noh meenz dat Kristyanz shuda tink dat marij noh saykrid er dat adolchri da noh wahn seeryos sin. Wen wahn man divoas ih waif widowt eni reezn ahn den marid sohnbadi els wen ih noh free fi du dat akaadn tu di Baibl, di eldaz wuda haftu faam wahn judishal komiti bikaaz ih komit adolchri. (If ih nyoo waif da wahn Kristyan, di eldaz wuda haftu faam wahn judishal komiti fi shee bikaaz shee komit adolchri tu.) Eevn doa di kangrigayshan wudn vyoo di nyoo marij laik if dehn di komit adolchri, di man noh wahn kwalifai fi eni speshal privilij eena di kangrigayshan fi wahn lata yaaz. Inof taim wuda haftu paas fi mek peepl stap feel opset oava di bad ting weh ih du ahn fi mek dehn noh feel laik hihn noh dizerv dehn rispek. Bifoa hihn ku geh eni privilij, di eldaz wuda aalso haftu tink bowt how ih laas waif di du bikaaz a weh ih gaahn chroo, ahn how di yong chiljren weh hihn mi praabli abandan di du tu.—Mal. 2:14-16.

Laik how divoas ahn marij weh noh bays pahn di Baibl soh seeryos, Kristyanz waiz fi kapi Jehoava egzampl ahn vyoo marij az sohnting saykrid.—Eccl. 5:4, 5; Heeb. 13:4.