STODI AATIKL 19
How Wi Ku Schrentn Wi Fayt Eena di Paradais Weh Jehoava Pramis Wi?
“Wen [Jehoava] seh sohnting, yu noh tink ih wahn du it?”—NUM. 23:19.
SANG 142 Hoal Aan tu di Hoap Weh Gaad Gi Wi
WEH WI WAHN DISKOS? a
1-2. Weh wi need fi du wail wi di wayt fi mek Gaad ton di ert intu wahn paradais?
WI TANKFUL fi aala di pramis dehn weh Jehoava mek fi geh rid a dis oal sistem a tingz ahn ton di ert intu wahn paradais. (2 Peet. 3:13) Wi noh noa di egzak taim wen hihn wahn mek di ert bee wahn paradais. Bot wi ga lata proof weh shoa wi dat wi noh haftu wayt moch langa.—Mach. 24:32-34, 36; Aks 1:7.
2 Wail wi di wayt, noh mata how lang wi deh eena di chroot, aala wi need fi schrentn wi fayt eena di pramis weh Jehoava mek. Wai? Bikaaz eevn schrang fayt ku geh week. Di apasl Paal seh dat “di sin weh eezi fi chrap wi” da wen wi noh ga inof fayt. (Heeb. 12:1) Fi help wi soh dat wi fayt noh geh week, wi need fi aalwayz goh oava di tingz weh proov dat Jehoava wahn soon mek di ert intu wahn paradais.—Heeb. 11:1.
3. Weh wi wahn diskos eena dis aatikl?
3 Eena dis aatikl, wi wahn diskos chree wayz how wi ku schrentn wi fayt eena Jehoava pramis fi mek di ert wahn paradais. Wi ku (1) meditayt pahn di ransom, (2) tek taim fi tink bowt Jehoava powa, ahn (3) spen taim di du tingz weh wahn help wi jraa kloasa tu Jehoava. Den wi wahn diskos how di mesij weh Jehoava gi Habakok ku schrentn fi wee fayt. Tudeh wi fays sohn tof sichuwayshan weh wi need fi ga schrang fayt eena Gaad pramis fi wahn paradais. Mek wi luk pahn sohn sichuwayshan weh wi mait di fays.
WEN WI NEED SCHRANG FAYT
4. Wi wahn need fi ga schrang fayt wen wi mek weh kaina disizhanz?
4 Wi need fi ga schrang fayt bikaaz wi haftu mek disizhanz evri day. Fi egzampl, wi mek disizhan bowt entataynment, ejukayshan, marij, chiljren, ahn di kaina werk wi chooz. Wi ku aks wiself: ‘Di disizhanz Ai mek shoa dat Ai shoar dat dis sistem noh wahn laas lang, ahn dat Gaad wahn soon mek di ert intu wahn paradais? Er Ai bihayv di saym way how adaz bihayv weh noh bileev dat dehn ku liv fareva?ʼ (Mach. 6:19, 20; Look 12:16-21) If wi schrentn wi fayt dat di Paradais weh Gaad pramis soon kohn, wi fayt wahn help wi fi mek beta disizhanz.
5-6. Wai wi need schrang fayt wen wi fays chraiyalz? Yooz di egzampl eena di paragraaf.
5 Wi need schrang fayt wen wi fays chraiyalz. Wi mait fays persikyooshan, wahn seeryos helt prablem, er ada tingz weh mait mek wi feel diskorij. Wen wi goh chroo chraiyalz laik dehndeh, eena di biginin wi mait feel laik wi ku bayr op. Bot fi chraiyalz laik dat yu haftu bayr op fi wahn lang taim, soh yu need schrang fayt fi bayr op ahn fi kip di serv Jehoava wid jai.—Roam. 12:12; 1 Peet. 1:6, 7.
6 Wen wi di goh chroo wahn chraiyal, wi mait feel laik Jehoava pramis fi di Paradais wahn neva kohn chroo. If wi feel laik dat, yu tink dat wi fayt week? Noh reeli. Mek wi luk pahn wahn egzampl. Wen ih di rayn fi wahn lata dayz, yu mait feel laik ih wahn neva stap. Bot, di rayn doo stap ahn di son kom owt. Sayhn way soh, wen wi feel diskorij, wi mait feel laik di Paradais wahn neva kohn. Bot if wi fayt schrang, wee noa fi shoar dat di pramis weh Gaad mek bowt di Paradais wahn kohn chroo. (Ps. 94:3, 14, 15; Heeb. 6:17-19) Wen wi ga kanfidens eena Jehoava pramis dehn, wi wahn ku kantinyu put wi wership tu Jehoava fers eena wi laif.
7. Weh kaina tinkin wi waahn avoid?
7 Wahn nada taim wen wi need fi ga schrang fayt da wen wi goh preech. Wahn lata peepl weh wi preech tu feel dat di “gud nyooz” bowt di Paradais weh Gaad pramis noh wahn kohn chroo. (Mach. 24:14; Ezek. 33:32) Wi noh waahn bee laik dehn peepl weh dowt di tingz weh Jehoava teech wi. Fi mek shoar dat dis noh hapm, wi need fi kip di schrentn wi fayt. Mek wi luk pahn chree wayz how wi ku du dis.
MEDITAYT PAHN DI RANSOM
8-9. How wi ku schrentn wi fayt wen wi tink bowt di ransom?
8 Wan way wi ku schrentn wi fayt da fi tek taim ahn meditayt pahn di ransom. Di ransom da weh mek wi ku bee shoar dat aal di pramis weh Gaad mek wahn kohn chroo. Wi need fi tek taim fi tink bowt aal weh Jehoava mi du fi giv ih Son az wahn ransom ahn wai hihn mi du it. Wen wi du dis, wi wahn schrentn wi fayt eena Gaad pramis fi liv fareva eena paradais. Wai wi ku seh dat?
9 Wel, weh aal Jehoava ahn Jeezas mi du fi provaid di ransom? Jehoava sen ih fersbaan Son, di wan weh ih mi kloasis tu, fahn hevn fi bee baan az wahn perfek hyooman pahn di ert. Wen Jeezas mi deh pahn ert, ih gaahn chroo aal kaina haad chraiyalz. Hihn sofa wahn lat an ih gaahn chroo wahn paynful det. Jehoava mi pay wahn hai prais fi chroo! Wi lovin Gaad wuda neva alow fi hihn Son fi sofa ahn ded soh wi ku liv wahn beta laif jos fi wahn shaat lee wail. (Jan 3:16; 1 Peet. 1:18, 19) Sins Jehoava pay wahn hai prais, hihn wahn mek shoar dat ih pramis fi mek wee liv fareva eena Paradais kohn chroo.
TINK BOWT JEHOAVA POWA
10. Akaadn tu Ifeezhanz 3:20, weh Jehoava ga di powa fi du?
10 Wahn sekant way how wi ku schrentn wi fayt da fi tek di taim fi tink bowt Jehoava powa. Hihn ga di powa fi mek aal di pramis dehn weh ih mek kohn chroo. Wahn lata peepl feel laik di pramis fi liv fareva eena Paradais noh wahn kohn chroo. Bot wahn lata taim Jehoava mek pramis weh hyoomanz kuda neva du. Hihn ga di powa fi du dis bikaaz hihn da di Almaiti Gaad. (Job 42:2; Maak 10:27) Soh wi noh fi bee sopraiz dat fi hihn pramis dehn da moa dan weh wi ku eva imajin!—Reed Ifeezhanz 3:20.
11. Gi wahn egzampl a wahn pramis weh Gaad mek weh mi kohn chroo. (Koment pahn di baks “ Sohn Amayzin Pramis Weh Don Kohn Chroo.”)
11 Mek wi luk pahn sohn tingz weh Jehoava mi pramis eena di paas weh mi luk laik dehn wuda neva hapm. Wen Aybraham ahn Saara mi don oal, Jehoava mi pramis dehn dat dehn mi wahn ga wahn son. (Jen. 17:15-17) Jehoava mi aalso pramis Aybraham dat ih mi wahn gi di lan a Kaynan tu ih disendant dehn. Fi wahn lang taim, Aybraham disendant dehn, di Izrelaits, da-mi slayv da Eejip, soh ih mi luk laik da pramis neva mi wahn kohn chroo. Bot ih mi did kohn chroo. Laytaraan, Jehoava mi mek Ilizabet noa dat shee mi wahn ga wahn baybi eevn doa shee mi don oal. Ih mi aalso tel Mayri, weh da-mi wahn verjin, dat shee mi wahn gi bert tu fi hihn Son, Jeezas. Dis mi wahn fulfil wahn pramis weh hihn mi mek towznz a yaaz erliya eena di gyaadn a Eedn.—Jen. 3:15.
12. How Joshua 23:14 ahn Isaiah 55:10, 11 schrentn wi fayt eena Jehoava powa?
12 Wen wi tek di taim fi tink bowt som a di pramis weh Jehoava mek weh don kohn chroo, ih reeli schrentn wi fayt eena Jehoava powa fi mek di ert eena wahn paradais. (Reed Joshua 23:14; Isaiah 55:10, 11.) b c If wi du dis, wi wahn ku help adaz fi si dat di pramis fi mek di ert wahn paradais da noh jos wahn jreem er wahn mek op stoari. Ih wahn hapm fi chroo. Dis da weh Jehoava seh bowt di nyoo hevn ahn di nyoo ert: ‘Dehnya werdz da di chroot, ahn peepl ku bileev weh Ah di seh.ʼ—Rev. 21:1, 5.
DU TINGZ WEH KU HELP YU JRAA KLOASA TU JEHOAVA
How kangrigayshan meetinz ku schrentn fi yoo fayt?
(Paragraaf 13)
13. How di kangrigayshan meetin dehn ku schrentn wi fayt? Pleez eksplayn yu ansa.
13 Wahn terd way how wi ku schrentn wi fayt da fi spen taim di du tingz weh wahn help wi jraa kloasa tu Jehoava. Fi egzampl, mek wi luk pahn how wi ku benifit fahn di kangrigayshan meetin dehn. Anna da wahn sista weh spen lata yaaz eena di ful-taim minischri, ahn dis da weh shee seh: “Di meetin dehn help mi fi kip mi fayt schrang. Eevn if di speeka noh ga lata ekspeeryens di teech er ih noh teech eniting nyoo, wahn lata taimz di tingz weh Ah hyaa help mi fi andastan di Baibl beta ahn fi schrentn mi fayt.” d Wee aalso schrentn wi fayt wen wi lisn wen wi bradaz ahn sistaz gi koments da di meetinz.—Roam. 1:11, 12; 10:17.
How di preechin werk ku schrentn fi yoo fayt?
(Paragraaf 14)
14. Wen wi tek paat eena di preechin werk, how dat schrentn wi fayt?
14 Wi ku aalso schrentn wi fayt wen wi tek paat eena di preechin werk. (Heeb. 10:23) Barbara, wahn sista weh serv Jehoava fi oava 70 yaaz, seh: “Ai fain dat wen Ai tek paat eena di preechin werk, ih reeli schrentn mai fayt. Di moa Ai taak tu peepl bowt Jehoava wandaful pramis dehn, di moa mai fayt groa ahn geh schranga.”
How persnal stodi ku schrentn fi yoo fayt?
(Paragraaf 15)
15. How persnal stodi schrentn wi fayt? (Koment pahn di picha dehn.)
15 Persnal stodi ku aalso help wi fi schrentn wi fayt. Susan seh dat weh mi help shee da wen ih mek wahn skejul fi wen ih wahn du ih persnal stodi. Shee seh: “Evri Sondeh, Ai wuda pripyaa di Wachtowa Stodi fi di neks week. Evri Mondeh ahn Choozdeh, Ai pripyaa fi di midweek meetin. Fi di res a di dayz, Ai du wahn persnal stodi proajek.” Bikaaz Susan stik tu ih skejul fi ih stodi, dis help ahn fi schrentn ih fayt. Irene, wahn sista weh werk da di werl hedkwaataz fi wahn lata yaaz, fain dat wen shee stodi Baibl prafesi, ih schrentn fi shee fayt. Shee seh, “Ai fain it amayzin dat eevn di smaalis deetayl bowt Jehoava prafesi dehn kohn chroo.” e
“FI SHOAR IH WAHN KOHN CHROO”
16. How di werdz weh Jehoava pramis tu Habakok ga meenin fi wee tudeh? (Heebrooz 10:36, 37)
16 Som a Jehoava servant dehn di wayt fahn lang taim mek di en kohn. Sohn peepl tink dat di en di tek tu lang fi kom. Bot, Jehoava noa egzakli how ih servants feel. Az a mata a fak, hihn mi tel ih servant Habakok: “Di vizhan wahn kohn chroo da di taim weh Ai don set, an di taim di kohn kwik-wan, an ih noh wahn tel no lai. Eevn if ih wuda tek lang, kip di luk owt far it! Bikaaz fi shoar ih wahn kohn chroo. Ih noh wahn bee layt!” (Hab. 2:3) Yu tink Gaad mi gi da pramis onli tu Habakok? Er yu tink dehndeh werdz ga meenin fi wee tudeh? Jehoava mi tel Paal fi aplai dehndeh werdz tu Kristyanz, hoo di wayt fi di nyoo werl. (Reed Heebrooz 10:36, 37.) Eevn if wi feel dat Jehoava pramis fi sayv wi di tek tu lang fi kohn, wi ku bee “shoar ih wahn kohn chroo. Ih noh wahn bee layt!”
17. How sista Louise mi fala di advais weh Jehoava gi Habakok?
17 Lata Jehoava servants di fala di advais weh hihn mi giv tu Habakok fi “kip di luk owt far it.” Som a dehn di du dis fi wahn lata yaaz. Fi egzampl, eena 1939 wahn sista weh naym Louise mi staat serv Jehoava. Dis da weh shee seh: “Dehndeh taim, Ai mi tink Armagedon mi wahn kohn bifoa Ai finish hai skool. Bot dat neva hapm. Weh help mi oava di yaaz da fi reed bowt Jehoava servant dehn hoo mi haftu tu wayt wahn lang taim fi mek ih pramis dehn kohn chroo, laik Noawa, Aybraham, ahn Joazef. Bikaaz Ai bileev dat di pramis dehn wahn kohn chroo, ih help mee an adaz fi bee shoar dat di Paradais weh Gaad pramis wahn soon kohn.” Lata bradaz ahn sistaz weh di serv Jehoava fi wahn lang taim seh di saym ting!
18. How kriyayshan ku schrentn wi fayt eena di Paradais weh Gaad pramis?
18 Da chroo dat paradais noh deh ya yet. Bot tink bowt tingz weh deh ya weh wi ku injai now, laik di staarz, di chreez, animalz, an eevn peepl laik wiself. Nobadi kyaahn seh dat dehnya tingz noh reel, eevn doa dehn mi ga wahn taim wen dehnya tingz neva egzis. Dehn egzis now bikaaz Jehoava kriyayt dehn. (Jen. 1:1, 26, 27) Jehoava wi Gaad aalso pramis fi mek di hoal ert intu wahn paradais. Ahn hihn wahn mek da pramis kohn chroo. Joorin da taim peepl wahn bee perfek ahn dehn wahn liv fareva. Soh wi ku bee shoar dat di Paradais wahn kohn rait pahn taim, jos laik weh Gaad pramis.—Isa. 65:17; Rev. 21:3, 4.
19. How yoo ku mek yu fayt schranga?
19 Wail yu di wayt, du evriting yu kud fi mek yu fayt geh schranga. Aalwayz bee tankful fi di ransom. Mek taim fi tink bowt Jehoava powa. Ahn du spirichwal tingz weh wahn jraa yu kloasa tu Jehoava. Wen yu du dis, yoo ku bee monks “dehn wan weh don geh di pramis dehn bikaaz a dehn fayt ahn payshens.”—Heeb. 6:11, 12; Roam. 5:5.
SANG 139 Imajin Yuself Wen Evriting Nyoo
a Lata peepl noh bileev weh di Baibl pramis bowt di Paradais. Ahn dehn feel da way bikaaz fi dehn da loan mek op stoari; dehn seh ih song tu gud fi bee chroo. Bot wi ku bee shoar dat Jehoava pramis dehn wahn kohn chroo. Eevn doa wi noa dat fi hihn pramis dehn wahn kohn chroo, wi stil need fi kip di schrentn wi fayt. How wi ku du dat? Dis aatikl wahn eksplayn how.
b Joshua 23:14: “Unu lisn ya! Ai wahn ded soon, an unu wel noa wid aal unu haat ahn wid aala unu soal dat owta aala di gud pramis dehn weh Jehoava unu Gaad mek, evri singl werd kohn chroo. Ih noh brok nat wan werd owta aala ih pramis dehn. Aala dehn kohn chroo fi unu.”
c Isaiah 55:10, 11: “Jos laik how di rayn ahn snoa poar dong fahn hevn ahn noh goh bak op til di ert soak op wid waata, soh dat tingz ku groa ahn bayr, ahn di faama ga seed fi plaant, ahn di peepl ga food fi eet, 11 Da rait soh evriting weh kom owta mi mowt wahn kohn chroo. Ih noh wahn kohn bak tu mi widowt rizolts. Fi shoar ih wahn du wateva Ai dizaiya. Ahn fi shoar ih wahn ga sokses eena weh Ai sen it fi du.”
d Som a di naym dehn chaynj.
e Yu ku fain wahn lata aatikl pahn Baibl prafesi eena di Watch Tower Publications Index anda di hedin “Prophecy.” Fi egzampl, si di aatikl “What Jehovah Foretells Comes to Be” eena di Janiweri 1, 2008, kapi a The Watchtower.
