1. Wai wi koment da wi meetin dehn?

 WAI wi goh da wi kangrigayshan meetin dehn? Di mayn reezn da fi prayz Jehoava. (Ps. 26:12; 111:1) Wi aalso goh fi bil op eech ada wail wi di liv joorin dehnya haad taimz. (1 Tes. 5:11) Wen wi koment da di meetin dehn, wi du dehnya too ting.

2. Wen wi ku koment da meetin?

² Evri week wi geh wahn lata chaans fi koment da meetinz. Fi egzampl, pahn di weeken, wi ku koment joorin di Wachtowa Stodi. Joorin di midweek meetin, wi ku koment fi di Spirichwal Chrezhaz, di Kangrigayshan Baibl Stodi, an ada diskoshan paats a di meetin.

3. Weh ku mek it haad fi mek wi gi wahn koment, ahn how Heebrooz 10:24, 25 ku help wi deel wid dehndeh chalenjiz?

³ Eech wan a wi waahn prayz Jehoava an inkorij wi bradaz ahn sistaz. Bot dehn ga tingz weh ku mek it haad fi mek wi gi wahn koment. Wi mait feel nervos wen da taim fi koment, er wi mait reeli waahn koment bot di bradaz noh aalwayz pik wi wen wi put op wi han. Weh ku help wi deel wid dehnya chalenjiz? Di ansa deh eena di leta weh di apasl Paal mi rait tu di Heebrooz. Paal mi taak bowt wai ih impoatant fi goh da meetin, an ih seh dat wi need fi “inkorij wan anada.” (Reed Heebrooz 10:24, 25.) Wi mait feel les nervos fi koment if wi kip in  main dat dis ku inkorij wi bradaz ahn sistaz. An eevn if dehn noh pik wi, wi ku stil bee hapi bikaaz adaz geh di chaans fi koment.—1 Peet. 3:8.

4. Weh chree tingz wi wahn diskos eena dis aatikl?

⁴ Di fers ting wi wahn diskos eena dis aatikl da how wi ku inkorij eech ada eena wahn smaal kangrigayshan weh noh ga wahn lata peepl fi koment. Den wi wahn taak bowt how wi ku inkorij eech ada eena wahn big kangrigayshan weh ga lata peepl weh laik koment. Wi wahn aalso diskos wayz how wi ku bil op eech ada bai weh wi seh eena wi koments.

5. Weh wee ku du fi inkorij adaz if wi deh eena wahn smaal kangrigayshan er groop?

⁵ Eena wahn smaal kangrigayshan, di kandokta noh mait ga wahn lata peepl fi kaal pan wen da taim fi koment. Ahn sohntaim, ih haftu wayt wahn lee wail bifoa sohnbadi put op dehn han. Wen dat hapm, di meetin ku feel boarin, ahn dat noh inkorijin. Weh yoo ku du? Bee wilin fi put op yu han moa dan wan taim. Wen yu du dat, yu ku inkorij adaz fi put op dehn han tu.

6-7. Weh ku help wi fi feel les nervos wen wi gi wahn koment?

⁶ Yoo feel tu nervos fi giv wahn koment? Wahn lata peepl feel laik dat. Bot di koments weh wi giv ku inkorij wi bradaz ahn sistaz. Soh weh wi ku du soh dat wi ku feel les nervos wen wi gi wahn koment?

⁷ Sohnting weh ku help da fi goh oava som a di sojeshan dehn weh deh eena sohn ada kapi a Di Wachtowa. b Wan a di sojeshan da fi pripyaa gud. (Prov. 21:5) If yu tek taim fi stodi di mateeryal, dat wahn help yu fi feel les nervos wen da taim fi put op yu han fi koment. Yu ku aalso mek yu koment dehn shaat. (Prov. 15:23; 17:27) If yu gi wahn lang koment, dat ku mek yu feel moa nervos. Wahn lang koment weh gat een lata points ku bee haad fi andastan, bot wahn shaat koment wid onli wan er too sentens ku mek it eeziya fi mek yu bradaz ahn sistaz andastan. Wen yu pripyaa wahn shaat koment eena yu oan werdz, yu shoa dat yu mi pripyaa gud ahn dat yu andastan weh yu mi stodi.

8. How Jehoava feel wen wi du wi bes fi koment?

⁸ Wat if yu chrai som a dehnya sojeshan bot yu stil feel nervos fi koment moa dan wan taim? Yu ku bee shoar dat Jehoava wahn apreeshiayt evriting weh yu du fi gi wahn koment. (Look 21:1-4) Fi gi yu bes noh meenz yu haftu put tu moch presha pahn yuself. (Fil. 4:5) Figa owt humoch koment yu waahn giv, mek it wahn goal fi du it, an aks Jehoava fi help yu stay kaam. Maybi di fers goal weh yu ku set da fi gi jos wan shaat koment.

9. Weh prablem mait kom op eena wahn big kangrigayshan?

⁹ If yu deh eena wahn big kangrigayshan, yu mait fays wahn difrent prablem. Maybi som a di bradaz ahn sistaz  laik koment, soh di kandokta wuda mis yu han wahn lat. Fi egzampl, wahn sista weh naym Danielle lov giv koments da meetin. c Shee seeʼt az paat a ih wership tu Jehoava, wahn way fi inkorij adaz, ahn wahn way weh shee ku schrentn ih fayt eena weh di Baibl teech. Bot wen shee mi moov tu wahn biga kangrigayshan, shee mi bayli koment da meetin. Sohntaim, dehn neva pik shee non ataal. Shee seh: “Ah mi feel foschraytid. Ah mi feel laik Ah di mis owt pahn wahn privilij. Ahn wen ih hapm oava ahn oava agen, yu staat feel laik if dehn du it fi spait.”

10. Wat els wi ku du fi gi moa koments?

¹⁰ Yoo eva feel laik Danielle? If yu eva feel laik shee, ih ku bee eezi fi giv op ahn disaid fi jos lisn tu di meetin. Bot noh du dat. Kip aan di chrai koment. Weh yoo ku du? Pripyaa moa dan wan koment fi eech meetin. Chrai koment erli eena di stodi soh dat if dehn noh kaal pahn yu di fers taim, yu wahn stil ga lata chaans fi koment joorin di res a di meetin. Wen yu di pripyaa fi di Wachtowa Stodi, chrai si how eech paragraaf goh lang wid di teem fi di aatikl. If yu du dat, yu wahn ga sohn gud koments fi shayr joorin di stodi. Pahn tap a dat, yu ku pripyaa fi koment pahn di paragraaf dehn weh taak bowt deep Baibl teechinz weh haada fi eksplayn. (1 Kor. 2:10) Wai dat da wahn gud aidyaa? Bikaaz les peepl wuda koment pahn paragraaf laik dehndeh. Bot wat if yu chrai aala dehnya sojeshan ahn stil noh geh wahn chaans fi koment da meetin? Bifoa di meetin, yu ku taak tu di brada weh wahn kandok di stodi ahn tel ahn wich kweschan yu wuda waahn ansa.

11. Weh Filipiyanz 2:4 inkorij wi fi du?

¹¹ Reed Filipiyanz 2:4. Jehoava mi mek di apasl Paal inkorij di Kristyanz fi shoa kansaan fi ada peepl. How wi ku du dis da di meetin dehn? Wi ku du dis wen wi memba dat wi bradaz ahn sistaz waahn gi wahn koment, jos laik wee.

12. How wi ku inkorij adaz da di meetin? (Koment pahn di picha.)

 ¹² Tink bowt dis. Wen yu ga wahn kanvasayshan wid yu frenz, yoo noh du aal di taakin, noh chroo? Yu gi dehn wahn chaans fi taak tu. Saym way soh, wen wi deh da meetin, wi waahn gi wi bradaz ahn sistaz wahn chaans fi koment. Wan a di bes way fi inkorij wi bradaz ahn sistaz da fi gi dehn wahn chaans fi ekspres dehn fayt. (1 Kor. 10:24) Mek wi si how wi ku du dat.

13. Weh wi ku du fi giv adaz moa chaans fi koment?

¹³ Wan ting wi ku du da kip wi koment shaat, soh dat wi ku alow adaz fi ga moa taim fi koment. Eldaz an ada poblishaz weh ga ekspeeryens ku set wahn egzampl fi di kangrigayshan. Eevn if yu koment shaat, chrai noh shayr tu moch points. If yu taak bowt evriting eena di paragraaf, den notn wahn lef fi mek adaz koment pan. Fi egzampl, dis paragraaf gat een too sojeshan. Di fers wan da fi kip yu koment shaat, ahn di sekant wan da fi chrai noh shayr tu moch points. Soh if yoo da di fers wan fi koment pahn dis paragraaf, maybi yu ku shayr jos wan a di points.

14. Weh ku help wi disaid humoch taim wi wahn put op wi han fi chrai gi wahn koment? (Koment pahn di picha.)

¹⁴ Yoo ku disaid humoch taim yu wahn put op yu han fi koment. Bot memba, if yu put op yu han tu moch, yu ku mek di kandokta feel laik ih haftu pik yu oava ahn oava agen eevn if adaz noh geh wahn chaans fi koment yet. Dis ku diskorij adaz ahn mek dehn noh waahn put op dehn han.—Eccl. 3:7.

15. (a) Weh wi shudn du if dehn noh pik wee fi koment? (b) Weh di bradaz weh kandok di stodi shuda memba? (Koment pahn di baks “ If Yoo Da di Kandokta.”)

¹⁵ Wen lata bradaz ahn sistaz put op  dehn han fi koment, yu noh mait geh fi koment az moch az yu wuda waahn. Sohntaim, di kandokta mait noh eevn pik yu. Dat ku mek wi feel bad, bot wi shudn kech feelinz wen dehn noh kaal pahn wi.—Eccl. 7:9.

16. How wi ku inkorij wi bradaz ahn sistaz weh koment?

¹⁶ If yu kyaahn koment az moch az yu wuda waahn, maybi yu ku lisn gud tu yu bradaz ahn sistaz koments soh dat yu ku komen dehn afta di meetin. Yu bradaz ahn sistaz ku geh wahn lata inkorijment wen yu komen dehn, jos laik how yu koment wuda inkorij dehn. (Prov. 10:21) Dis da wahn nada way how wi ku bil op wan anada.

17. (a) How payrents ku help dehn pikni pripyaa fi di meetin dehn? (b) Akaadn tu di veedyo, wat da foa steps weh ku help yu pripyaa wahn koment? (Koment pahn di futnoat.)

¹⁷ Wat els wi ku du fi inkorij wan anada da wi meetin dehn? If yu ga pikni, yu ku help dehn fi pripyaa wahn koment weh prapa fi dehn ayj. (Mach. 21:16) Sohntaim wi taak bowt seeryos tingz da wi meetin dehn, laik marij prablemz er tingz weh goh gens Jehoava moaral standadz, bot dehn wahn aalwayz ga wan er too kweschan weh wahn lee pikni ku ansa. Help yu pikni fi andastan wai di kandokta noh wahn aalwayz pik dehn fi gi wahn koment. Wen yu eksplayn dat tu  dehn, yu wahn help dehn fi noh feel bad wen di kandokta pik sohnbadi els.—1 Tim. 6:18. d

18. How wi ku mek shoar wi noh jraa tu moch atenshan tu wiself wen wi di koment? (Proverbs 27:2)

¹⁸ Aala wi ku pripyaa wahn koment weh wahn bring prayz tu Jehoava ahn weh wahn inkorij wi bradaz ahn sistaz. (Prov. 25:11) Sohntaim wi mait shayr wahn lee ekspeeryens, bot ih gud fi mek wi noh taak tu moch bowt wiself. (Reed Proverbs 27:2; e 2 Kor. 10:18) Insted, wi waahn kip di foakos pahn Jehoava, fi hihn Werd, an ih peepl. (Rev. 4:11) Bot if di kweschan fi di paragraaf da wahn persnal kweschan, den af koars wi ku gi wahn persnal ansa. Wahn egzampl a dis deh eena di kweschan fi di neks paragraaf.

19. (a) Weh wahn hapm wen wi shoa kansaan fi wan anada? (Roamanz 1:11, 12) (b) How yoo feel bowt di privilij fi koment da wi meetin dehn?

¹⁹ Eevn doa dehn noh ga no schrik roolz pahn how fi gi wahn koment, aala wi ku mek shoar wi inkorij adaz wid wi koment dehn. Sohntaim dis mait meen dat wi ku gi moa dan wan koment. Er sohntaim wi ku jos bee hapi dat wi geh wahn chaans fi koment ahn dat adaz geh wahn chaans fi koment tu. Aala wi ku “inkorij wan anada” if wi foakos pahn how wi ku shoa kansaan fi adaz da wi meetin dehn.—Reed Roamanz 1:11, 12.