1. Weh wi ku bee shoar bowt?

 AZ SERVANTS a Jehoava wee noa dat hihn lov wi ahn dat hihn waahn wi injai di bes laif eva. (Roam. 8:35-39) Wi aalso noa dat wen wi fala Baibl prinsiplz, wi aalwayz benifit. (Isa. 48:17, 18) Bot wat if wi fays prablemz weh wi noh ekspek?

2. Weh kaina prablemz som a wi mait di goh chroo, ahn weh kweschanz wi mait aks wiself?

² Aala Jehoava peepl fays prablemz eena laif. Fi egzampl, wahn famili memba mait disapoint wi, er wi mait ga wahn seeryos helt prablem weh mek it haad fi du moa fi Jehoava. Maybi wi gaahn chroo wahn terabl nachral dizaasta er di fays persikyooshan fi weh wi bileev eena. Lata taimz wen wi di goh chroo prablemz laik dehndeh wi mait aks wiself: ‘Wai dis di hapm tu mee? Ai du sohnting rang? Ai du sohnting fi mek Jehoava noh bles mi?ʼ Yoo eva feel dis way? If yu ansa da yes, noh feel diskorij. Lata Jehoava laayal servants ga dehnya saym feelinz.—Ps. 22:1, 2; Hab. 1:2, 3.

3. Weh wi ku laan fahn Psalm 34:19?

³ Psalms 34:19 bring owt dehnya too impoatant point. (Reed.) b (1) Di raichos fays wahn lata prablemz. (2) Jehoava sayv wi fahn aala wi prablemz. How Jehoava sayv wi? Wan way how hihn du dat da wen ih help wi fi andastan dat laif eena dis werl noh eezi. Hihn pramis wi dat wi  wahn hapi di serv ahn, bot wi kyaahn ekspek fi noh ga prablemz. (Isa. 66:14) Hihn inkorij wi fi foakos pahn di fyoocha weh hihn waahn fi wi, wen wi wahn ku reeli injai laif fareva. (2 Kor. 4:16-18) Bot fi now, Hihn di help wi soh dat wi ku kip aan di serv ahn.—Lam. 3:22-24.

4. Weh wi wahn diskos eena dis aatikl?

⁴ Mek wi taak bowt weh wi ku laan fahn Jehoava faytful servants weh mi liv eena di paas ahn wi bradaz ahn sistaz weh di liv tudeh day. Wi wahn geh fi si dat wi mait goh chroo prablemz weh wi noh ekspek. Bot wen wi pen pahn Jehoava, hihn wahn aalwayz help wi. (Ps. 55:22) Az wi luk pahn dehnya egzampl, aks yuself: ‘How Ai wuda ak if Ai mi deh eena dehnya saym sichuwayshan? How dehnya egzampl ku schrentn mai chros eena Jehoava? How Ai ku kapi fi dehn egzampl eena mai laif?ʼ

5. Weh prablemz Jaykob mi gaahn chroo bikaaz a Layban? (Koment pahn di picha pahn di kova.)

⁵ Jehoava servants eena Baibl taimz mi gaahn chroo wahn lata chalenjiz weh dehn neva ekspek. Mek wi luk pahn Jaykob egzampl. Fi hihn pa mi tel ahn fi marid wan a Layban daata bikaaz dehn mi serv Jehoava. Hihn mi aalso tel ahn dat Jehoava mi wahn bles ahn wahn lat. (Jen. 28:1-4) Soh Jaykob mi lisn tu ih pa. Ih lef Kaynan an ih gaahn wehpaat Layban an ih too daata, Leeya ahn Raychel, mi liv. Jaykob mi faal in lov wid Layban yonga daata, Raychel, an ih mi agree fi werk sevn yaaz bifoa ih ku marid ahn. (Jen. 29:18) Bot dat da noh di way tingz mi hapm. Layban mi chrik Jaykob an ih mi mek ih marid ih oalda daata, Leeya. Layban mi mek Jaykob marid Raychel wahn week layta, bot onli if ih mi werk far ahn wahn neks sevn yaaz. (Jen. 29:25-27) Layban mi chaansi Jaykob ahn chreet ahn bad fi 20 yaaz!—Jen. 31:41, 42.

6. Weh ada prablemz Jaykob mi fays?

⁶ Laytaraan, Jaykob mi gaahn chroo sohn ada prablemz. Hihn mi ga wahn big faamli, an ih son dehn neva aalwayz gree wid wan anada. Dehn mi en-op di sel dehn oan breda Joazef az wahn slayv. Too a Jaykob son, Saiman ahn Leevai, mi bring shaym pahn dehn famili ahn pahn Jehoava naym. Pahn tap a dat, Raychel mi ded wail ih mi-di ga ih sekant baybi. Ahn wen Jaykob mi oal, ih mi haftu moov tu Eejip bikaaz a wahn reeli bad famin weh mi afek di lan a Kaynan.—Jen. 34:30; 35:16-19; 37:28; 45:9-11, 28.

7. How Jehoava shoa Jaykob dat ih mi pleez wid ahn?

⁷ Eevn wid evriting weh Jaykob mi gaahn chroo, hihn neva looz ih fayt eena Jehoava an ih pramis dehn. Ahn Jehoava mi shoa Jaykob dat ih mi pleez wid ahn. Fi egzampl, eevn doa Layban mi chreet Jaykob bad, Jehoava mi bles Jaykob wid wahn lata tingz. Jehoava mi aalso mek Jaykob geh fi si ih son Joazef agen. Jos imajin how hapi ahn tankful Jaykob mi feel fi si ih son weh hihn mi tink mi don ded. Jaykob kuda mi bayr op wid di prablemz weh ih mi-di goh chroo bikaaz hihn mi ga wahn kloas frenship wid Jehoava. (Jen. 30:43; 32:9, 10; 46:28-30) Jos laik Jaykob, wee ku bayr op wid prablemz weh wi neva ekspek if wi ga wahn kloas frenship wid Jehoava.

8. Weh King Dayvid mi waahn du fi Jehoava?

 ⁸ King Dayvid mi kyaahn du evriting weh ih mi waahn du eena Jehoava servis. Fi egzampl, Dayvid mi reeli waahn bil wahn templ fi Jehoava, ih Gaad. Hihn mi tel Naytan weh ih mi waahn du. Ahn Naytan mi tel Dayvid: “Du wateva deh eena yu haat, bikaaz di chroo Gaad deh wid yu.” (1 Chron. 17:1, 2) Wi ku onli imajin how dehndeh werdz mi inkorij Dayvid. Soh hihn mi praabli staat tu mek planz fi dis big proajek rait afta dat.

9. How Dayvid mi ak wen ih mi geh di nyooz dat hihn neva mi wahn bee di wan fi bil di templ?

⁹ Pahn “da sayhn nait,” Jehoava tel Naytan dat Dayvid neva mi wahn bil di templ, bot wan a ih son mi wahn bil it. Soh wen Naytan geh dis nyooz, hihn gaahn bak tu Dayvid fi tel ahn weh Jehoava seh. (1 Chron. 17:3, 4, 11, 12) Bot how Dayvid mi ak wen Naytan giv ahn da mesij? Wel, hihn mi haftu chaynj ih planz. Soh hihn mi foakos pahn di geh di moni ahn di mateeryal weh ih son Salaman mi wahn need fi bil di templ.—1 Chron. 29:1-5.

10. How Jehoava mi bles Dayvid?

¹⁰ Rait afta Dayvid mi geh di nyooz dat hihn neva mi wahn bee di wan fi bil di templ, Jehoava mi mek wahn kovenant wid ahn. Jehoava mi pramis Dayvid dat wan a ih disendant mi wahn rool fareva. (2 Sam. 7:16) Eena di nyoo werl, joorin di Towzn-Yaa Rool, imajin how hapi Dayvid wahn bee wen ih fain owt dat di King, Jeezas, da wan a ih disendant! Dis help wi fi si dat eevn if wi kyaahn du weh wi waahn du fi wi Gaad Jehoava, hihn ku stil bles wi wid ada tingz weh wi wuda neva ekspek.

11. Eevn doa di Kingdom neva staat rool yet, weh gud tingz di Kristyanz eena di fers senchri mi ekspeeryens? (Aks 6:7)

¹¹ Di Kristyanz eena di fers senchri mi ga prablemz weh dehn neva ekspek. Fi egzampl, dehn mi reeli waahn Gaad Kingdom fi kohn, bot dehn neva noa wen dat mi wahn hapm. (Aks 1:6, 7) Soh, weh dehn mi du? Dehn mi kip dehnself bizi eena di preechin werk. Wail dehn mi-di preech eena difrent ayrya, dehn mi si how Jehoava mi-di help dehn.—Reed Aks 6:7.

12. Weh di Kristyanz eena di fers senchri mi du wen dehn mi ga wahn famin?

¹² Dehn mi ga wahn taim wen wahn grayt famin mi kohn “aal oava di lan.” (Aks 11:28) Da famin mi aalso afek di Kristyanz weh mi liv eena di fers senchri. Jos imajin humoch dehn mi sofa bikaaz a da grayt famin. Payrents mi-di wori how dehn mi wahn fain food fi dehn famili. Ahn wat bowt di yong peepl weh mi-di plan fi du moa eena di minischri? Maybi dehn mi-di wanda if dehn shuda mi wayt til afta di famin paas fi kantinyu wid dehn planz. Eevn doa di Kristyanz mi deh eena wahn haad sichuwayshan, dehn mi laan fi deel wid weh dehn mi-di goh chroo. Dehn mi kantinyu fi preech eena eni way dehn kud, ahn dehn mi hapi fi shayr weh dehn mi ga wid dehn bradaz ahn sistaz da Judeeya.—Aks 11:29, 30.

13. Weh gud tingz Jehoava mi du fi di Kristyanz joorin di famin?

¹³ Weh gud tingz Jehoava mi du fi di Kristyanz joorin di famin? Di Kristyanz mi geh fi si how Jehoava mi-di help dehn wen dehn mi geh di tingz weh dehn need. (Mach. 6:31-33) Dehn mosi mi feel kloasa tu dehn bradaz ahn sistaz weh mi help  dehn. Dehn wan weh mi gi doanayshan er help owt eena di rileef werk mi feel hapi bikaaz dehn mi redi fi giv. (Aks 20:35) Jehoava mi bles aala dehn fi how dehn mi handl di sichuwayshan joorin dehndeh haad taimz.

14. Weh mi hapm tu Baarnabas ahn di apasl Paal, ahn wat da-mi di rizolt? (Aks 14:21, 22)

¹⁴ Di Kristyanz eena di fers senchri mi fays lata persikyooshan, sohntaim wen dehn neva ekspek it. Mek wi luk pahn weh hapm tu Baarnabas ahn di apasl Paal wail dehn mi-di preech da Lischra. At fers, di peepl mi welkom dehn ahn lisn. Bot laytaraan, di Jooz weh neva waahn lisn tu dehn mi “kanvins di krowd” fi ton gens Paal. An afta dat, som a dehn saym peepl weh mi welkom Paal mi stoan ahn an lef ahn fi ded. (Aks 14:19) Bot dat neva stap Paal ahn Baarnabas fahn preech. Insted, dehn mi gaahn da wahn neks siti. Wat da-mi di rizolt? Dehn mi mek wahn “lata nyoo disaiplz.” Fi dehn egzampl ahn di tingz weh dehn seh mi aalso schrentn dehn bradaz ahn sistaz. (Reed Aks 14:21, 22.) Wahn lata Kristyanz mi benifit fahn Paal ahn Baarnabas egzampl bikaaz dehn neva stap preech eevn doa dehn mi-di fays persikyooshan. Jehoava wahn bles wi az lang az wi noh giv op eena di werk weh hihn aks wi fi du.

15. Weh yoo laan fahn Brada Macmillan egzampl?

¹⁵ Bifoa 1914, Jehoava peepl mi ekspek sohnting fi hapm. Mek wi luk pahn Brada Alexander Hugh Macmillan egzampl. Jos laik wahn lata bradaz ahn sistaz rong da taim, Brada Macmillan mi tink dat hihn mi gwehn da hevn soon. Eena Septemba 1914, hihn mi giv wahn taak ahn seh: “Dis da praabli di laas poblik taak Ai wahn eva giv.” Af koars, dat da neva ih laas taak. Laytaraan, Brada Macmillan mi rait: “Som a wi mi hori fi tink dat wi mi gwehn da hevn rait away.” Hihn mi seh: “Weh wi need fi du da fi kip bizi eena di preechin werk.” Brada Macmillan mi kip bizi eena di minischri. Hihn mi ga di privilij fi inkorij di bradaz weh mi deh eena prizn bikaaz dehn neva waahn jain di aami. Eevn eena ih oal ayj hihn mi stil yoostu goh da di kangrigayshan meetinz. How Brada Macmillan mi benifit wen ih mi kip bizi di serv Jehoava? Bifoa ih mi ded eena 1966, hihn mi seh: “Mai fayt jos az schrang az eva.” Hihn mi set wahn gud egzampl fi mek wi fala, espeshali if wi di bayr op chroo lata prablmz fi wahn lang taim.—Heeb. 13:7.

16. Weh haad sichuwayshan Brada Jennings an ih waif mi gaahn chroo? (Jaymz 4:14)

¹⁶ Wahn lata Jehoava peepl sofa fahn helt prablemz weh dehn noh ekspek. Fi egzampl, eena Brada Herbert Jennings c laif stoari, hihn mi diskraib how hihn an ih waif mi-di injai dehn asainment az mishineriz eena Ghana. Bot afta wahn wail, di dakta mi tel ahn dat hihn mi ga wahn seeryos mood disaada. Bays pahn di skripcha eena Jaymz 4:14, Brada Jennings mi eksplayn dat fi hihn nyoo sichuwayshan da-mi “wahn ‘tumaaroʼ weh wi neva ekspek.” (Reed.) Hihn mi seh: “Bikaaz a dis sichuwayshan, wi mi haftu lef Ghana ahn wi kloas frenz fi goh bak hoam da Canada [fi geh medikal chreetment].” Jehoava mi help Brada Jennings  an ih waif fi kantinyu serv ahn stay faytful eevn doa dehn mi-di goh chroo wahn haad sichuwayshan weh dehn neva ekspek.

17. How bradaz ahn sistaz mi benifit fahn Brada Jennings egzampl?

¹⁷ Weh Brada Jennings mi seh eena ih laif stoari mi help di bradaz ahn sistaz wahn lat. Wahn sista mi rait: “Wen Ah mi reed brada Jennings laif stoari, ih mi reeli toch mi haat. Di way how brada Jennings mi haftu giv op ih asainment bikaaz ih mi haftu tek kayr a ih siknis mi help mi fi si mi sichuwayshan eena wahn difrent way.” Wahn brada weh mi-di goh chroo di saym sichuwayshan laik brada Jennings mi rait: “Ai da-mi wahn kangrigayshan elda fi ten yaaz, bot den Ah mi haftu stap bee wahn elda bikaaz a mi mental helt kandishan. Ah mi aalwayz di feel laik Ah neva di du eniting rait, ahn dat mi mek Ah feel soh dipres dat Ah nat eevn mi waahn reed di laif stoari dehn. . . . Bot Brada Jennings egzampl mi inkorij mi.” Dis rimain wi dat wen wi di goh chroo prablemz weh wi noh ekspek, wi ku inkorij adaz. Eevn wen tingz noh di goh di way wi ekspek, wi ku stil bee wahn egzampl a fayt fi adaz ahn help dehn fi bayr op.—1 Peet. 5:9.

18. Az wi si eena di pichaz, weh wi ku laan fahn di egzampl a wahn wido fahn Nigeria?

¹⁸ Di COVID-19 pandemik mi afek wahn lata Jehoava peepl. Fi egzampl, wahn wido fahn Nigeria mi onli ga wahn lee bit a food ahn moni lef. Wahn maanin, ih daata aks ahn weh dehn mi wahn eet afta dehn kuk dehn laas kop a rais. Shee mi tel ih daata dat dehn neva ga nohmoh moni er food lef, bot ih mi tel ahn dat dehn shuda fala di egzampl a di wido fahn Zarefat, hoo mi pripyaa fi shee laas meel ahn put ih chros eena Jehoava. (1 Ki. 17:8-16) Bifoa dehn  mi eevn staat tu tink bowt weh dehn mi wahn eet fi lonch da day, dehn mi geh wahn bag a food fahn dehn brada ahn sistaz. Di food mi inof fi laas fi moa dan too weeks. Di sista neva riyalaiz humoch Jehoava mi-di lisn tu dehn. Fi shoar, wen wi rilai pahn Jehoava wen wi di fays prablemz weh wi noh ekspek, ih help wi fi jraa kloasa tu hihn.—1 Peet. 5:6, 7.

19. Weh kaina persikyooshan Aleksey Yershov mi fays?

¹⁹ Fi di laas fyoo yaaz,wahn lata wi bradaz ahn sistaz di bayr op chroo persikyooshan weh dehn neva ekspek. Mek wi luk pahn di egzampl a Brada Aleksey Yershov, weh liv da Russia. Brada Yershov mi geh baptaiz eena 1994. Rong da taim Jehoava Witnisiz mi stil ga wahn lee bit a freedom. Bot, sohn yaaz layta, tingz mi chaynj da Russia. Eena 2020, di polees dehn saach ahn rayd Brada Yershov hows ahn tek weh lata tingz weh mi bilangz tu hihn. Sohn monts layta, di govament mi chaaj ahn laik if hihn da-mi wahn kriminal. Fi mek mataz wers, dehn chaaj ahn bikaaz a sohn veedyo rikaadn weh dehn geh fahn sohnbadi weh mi priten fi stodi di Baibl fi oava wahn yaa wid Jehoava Witnisiz. Dat da-mi wahn terabl ting fi du, noh chroo?

20. Weh mi help Brada Yershov fi ga wahn schrang rilayshanship wid Jehoava?

²⁰ Yoo tink Brada Yershov mi geh bles bikaaz ih mi bayr op chroo persikyooshan? Yes. Fi hihn rilayshanship wid Jehoava mi schranga dan eva. Hihn seh: “Mee ahn mi waif pray tugeda wahn lat moa, an Ah geh fi si dat Ah mi wahn kyaahn bayr op chroo dis sichuwayshan if Ah neva ga Jehoava help. Wen Ah du mi persnal stodi, ih help mi fi fait gens diskorijment. Ah meditayt pahn di egzampl a faytful servants eena di paas. Ah geh fi laan fahn di difrent Baibl egzampl dehn dat ih impoatant fi kip kaam ahn chros eena Jehoava.”

21. Weh wi laan eena dis aatikl?

²¹ Weh wi laan eena dis aatikl? Sohntaim, wi mait goh chroo tingz weh wi noh ekspek eena dis werl. Bot, wi ku bee shoar dat Jehoava wahn aalwayz help ih faytful servants weh chros eena ahn. Laik weh di teem skripcha seh, “di raichos wan fays wahn lata prablemz, bot Jehoava sayv ahn fahn aala ih prablem.” (Ps. 34:19) Mek wi kip aan di foakos pahn how Jehoava yooz ih powa fi sopoat wi ahn noh foakos pahn di prablemz weh wi gat. Den jos laik di apasl Paal, wi wahn ku seh: “Ah geh di schrent fi fays evriting bikaaz a di wan weh gi mi powa.”—Fil. 4:13.