1. How Matthew mi feel bowt di rezorekshan hoap?

 WAHN lee bwai weh naym Matthew ga wahn seeryos helt kandishan, ahn bikaaz a dat ih don geh wahn lata serjri. Wen hihn mi sevn, hihn an ih famili mi-di wach di JW Braadkyaastin fi da mont. Kloas tu di en a di proagram, dehn mi shoa wahn myoozik veedyo bowt bradaz ahn sistaz weh di welkom bak dehn famili ahn frenz weh ded. b Afta dehn wach di braadkyaas, hihn gaahn kloas tu ih ma ahn pa an ih hoal dehn han ahn seh: “Unu si, eevn if Ah ded, Ah wahn kohn bak tu laif joorin di rezorekshan. Unu ku wayt fi mi; ih wahn bee aarait.” Jos imajin how hapi fi hihn payrents mi feel fi noa dat dehn son mi reeli bileev eena di rezorekshan hoap.

2-3. Wai ih gud fi mek wi tink bowt di rezorekshan hoap?

² Ih gud fi mek wi tink bowt di pramis a di rezorekshan. (Jan 5:28, 29) Wai? Bikaaz wi ku geh wahn seeryos siknis enitaim er sohnbadi weh wi lov ku ded sodn-wan. (Eccl. 9:11; Jay. 4:13, 14) Wen tingz laik dehndeh hapm, wi hoap fi di rezorekshan ku help wi bayr op. (1 Tes. 4:13) Di Baibl kanvins wi dat wi Pa, Jehoava, noa wi gud an ih reeli lov wi. (Look 12:7) Fi shoar, Jehoava haftu noa wi reeli gud soh dat ih ku bring wi bak tu laif wid wi saym persnaliti ahn memriz. Jehoava lov wi soh moch dat ih mek it pasabl fi mek wi liv fareva. Eevn if wi ded, hihn wahn rezorek wi!

³ Eena dis aatikl, wi wahn diskos sohn reezn wai wi ku bileev eena di pramis a di rezorekshan. Den, wi wahn si how wi fayt geh schranga az wi diskos di Baibl pasij weh  wi fain di teem teks fi dis aatikl: “Yu breda wahn rayz op bak.” (Jan 11:23) Wi wahn aalso laan how wi ku mek di rezorekshan hoap moa reel tu wi.

4. Fi chros eena sombadi pramis, weh wi need fi bee shoar bowt? Yooz di egzampl eena di paragraaf.

⁴ Fi mek wi ku chros eena sombadi pramis, wi haftu bee shoar dat ih ga di dizaiya ahn di powa, er di abiliti, fi kip ih pramis. Fi egzampl, lesgoh seh dat wahn fren pramis yu fi bil bak yu hows afta ih geh dischrai eena wahn staam. Yu noa dat yu ku chros ahn, an dat ih ga di dizaiya fi help yu. Pahn tap a dat yu noa dat ih ga di abiliti bikaaz ih da wahn bilda an ih gat aal di toolz weh ih need. Dats wai yu bileev ih pramis. How bowt Gaad pramis a di rezorekshan hoap? Yu tink hihn reeli ga di dizaiya ahn di powa fi mek ih hapm?

5-6. How wi noa dat Jehoava reeli ga di dizaiya fi bring peepl bak tu laif?

⁵ Yu tink Jehoava ga di dizaiya fi bring peepl weh ded bak tu laif? Yes! In fak, hihn kyaahn wayt. Hihn mi mek lata Baibl raitaz menshan di pramis a di rezorekshan. (Isa. 26:19; Hos. 13:14; Rev. 20:11-13) Ahn wen Jehoava pramis sohnting, hihn aalwayz mek ih hapm. (Josh. 23:14) Fi shoar Jehoava redi ahn kyaahn wayt fi bring peepl weh ded bak tu laif. How wi noa dat?

⁶ Tink bowt weh Joab mi seh. Hihn mi shoar dat eevn if ih ded, Jehoava mi wahn bring ahn bak tu laif. (Job 14:14, 15) Jehoava feel di saym way bowt aala ih servants weh ded. Hihn kyaahn wayt fi bring dehn bak tu laif soh dat dehn ku liv wahn hapi ahn helti laif. How Jehoava feel bowt aal dehn wan weh ded ahn neva geh wahn chaans fi laan di chroot bowt hihn? Jehoava waahn rezorek dehn tu. (Aks 24:15) Hihn waahn mek dehn geh di chaans fi bee ih fren ahn fi liv fareva pahn ert. (Jan 3:16) Ih klyaa fi si dat Jehoava ga di dizaiya fi rezorek dehn wan weh ded.

7-8. Wai wi ku bee shoar dat Jehoava ga di powa fi rezorek peepl weh ded?

⁷ Yoo tink Jehoava ga di powa fi bring peepl bak tu laif? Af koars! Hihn da “di Almaiti Gaad.” (Rev. 1:8) Soh hihn ga di powa fi dischrai eni enimi, eevn det. (1 Kor. 15:26) Dis gi wi schrent ahn komfert. Mek wi luk pahn Sista Emma Arnold egzampl. Fi shee famili mi gaahn chroo sohn terabl tingz weh tes dehn fayt joorin Werl Waar II. Emma mi komfert ih daata bikaaz wahn lata peepl weh ih lov mi ded da di Nazi kansenchrayshan kyamp dehn. Shee mi tel ahn: “If peepl weh ded kyaahn liv agen, den dat wuda meen dat det schranga dan Gaad. Bot dat da noh chroo.” Fi shoar, notn schranga dan Jehoava! Di almaiti Gaad weh kriyayt laif ga di powa fi mek peepl weh ded kohn bak tu laif.

⁸ Wahn nada reezn wai wi noa dat Jehoava ga di powa fi rezorek di ded da bikaaz fi hihn memri perfek, ahn hihn ku memba evriting. Hihn eevn ga wahn naym fi eech staar eena di yoonivers. (Isa. 40:26) Ahn hihn memba eech persn weh ded. (Job 14:13; Look 20:37, 38) Soh ih noh haad fi mek hihn memba evri singl ting bowt dehn wan weh hihn wahn bring bak tu laif. Dis inklood how dehn luk, dehn persnaliti, dehn memriz, an eevn dehn ekspeeryens.

9. Wai yu bileev Jehoava pramis bowt di rezorekshan?

 ⁹ Wi ku reeli bileev dat Jehoava pramis bowt di rezorekshan wahn hapm bikaaz wee noa dat hihn ga di dizaiya ahn di powa fi du it. Tink bowt wahn nada reezn wai wi ku bileev ih pramis. Jehoava don rezorek peepl. Bak eena Baibl taimz, hihn mi gi sohn man di powa fi bring di ded bak tu laif. Wan a dehn da-mi Jeezas. Mek wi luk pahn wan a di rezorekshan weh Jeezas mi du weh wi fain eena Jan chapta 11.

10. Weh hapm da Betani wail Jeezas mi-di preech pahn di ada said a di Jaadn, ahn weh hihn mi du? (Jan 11:1-3)

¹⁰ Reed Jan 11:1-3. Tink bowt weh mi hapm da Betani rong di yaa 32 C.E. Lazaros an ih too sista, Mayri ahn Marta, mi liv eena dis vilij, ahn dehn da-mi Jeezas kloas fren. (Look 10:38-42) Lazaros mi geh sik, an ih sista dehn mi-di wori, soh dehn sen wahn mesinja fi tel Jeezas bowt weh di hapm. Bot hihn mi deh pahn di ada said a di Jaadn an ih mi wahn tek too dayz fi waak tu Betani. (Jan 10:40) Sad fi seh, Lazaros mi ded rong di saym taim di mesinja reech Jeezas. Eevn doa Jeezas mi noa dat ih fren mi jos ded, hihn neva lef rait away. Hihn mi stay fi too moa dayz ahn den ih gaahn da Betani. Soh bai di taim Jeezas reech Betani, Lazaros mi don ded fi foa dayz. Jeezas mi plan fi du sohnting fi help ih frenz ahn fi bring gloari tu Jehoava.—Jan 11:4, 6, 11, 17.

11. Weh dis Baibl pasij teech wi bowt frenship?

¹¹ Weh wi laan bowt frenship eena dis Baibl pasij? Wen Mayri ahn Marta mi sen di mesij tu Jeezas, dehn neva aks ahn fi kohn da Betani. Dehn mi jos waahn ih noa dat ih gud fren mi sik. (Jan 11:3) Wen Lazaros mi ded, Jeezas kuda mi rezorek ahn eevn doa hihn mi deh faar. Insteda dat, Jeezas mi chooz fi goh da Betani soh dat ih kuda deh wid ih frenz, Mayri ahn Marta. Yoo ga wahn gud fren weh wuda kohn help yu widowt yu eevn aks ahn fi kohn? If yes, den yu noa yu ku aalwayz pen pan ahn, eevn “wen taimz haad.” (Prov. 17:17) Chrai yu bes fi bee wahn gud fren laik Jeezas! Now, mek wi si weh hapm neks.

12. Weh Jeezas mi pramis Marta, ahn wai shee kuda mi chros ih pramis? (Jan 11:23-26)

¹² Reed Jan 11:23-26. Marta fain owt dat Jeezas mi deh kloas tu Betani. Shee hori gaahn meet ahn, an tel ahn: “Laad, mai breda neva mi wahn ded if yoo mi deh ya.” (Jan 11:21) Da chroo, Jeezas kuda mi heel Lazaros bifoa ih ded, bot hihn mi waahn du sohnting moa amayzin. Hihn pramis Marta: “Yu breda wahn rayz op bak.” Jeezas giv Marta eevn moa reezn fi chros ih pramis wen ih tel ahn: “Ai da di rezorekshan an Ai da di wan weh wahn gi peepl laif.” Yes, Gaad giv ahn di powa fi bring peepl bak tu laif. Erliya,  hihn mi rezorek wahn lee gyal rait afta shee mi ded. Ahn hihn mi rezorek wahn yong man di saym day ih mi ded. (Look 7:11-15; 8:49-55) Bot yu tink hihn kuda rezorek sombadi weh mi ded fi foa dayz ahn weh mi don staat tu ratn?

13. Akaadn tu Jan 11:32-35, weh Jeezas mi du wen hihn si Mayri an evribadi els di baal? (Koment pahn di picha.)

¹³ Reed Jan 11:32-35. Imajin weh hapm neks. Lazaros ada sista, Mayri, gaahn owt fi meet Jeezas. Shee tel ahn di saym ting Marta mi tel ahn erliya: “Laad, mai breda neva mi wahn ded if yoo mi deh ya.” Shee ahn di peepl rong ahn mi reeli sad. Wen Jeezas si dehn di baal, ih mi feel wahn deep sadnis. Ih haat gaahn owt tu dehn an ih staat tu krai. Hihn mi andastan humoch ih hert wen sohnbadi weh wi lov ded, an ih mi waahn geh rid a di reezn wai dehn mi-di krai.

14. Weh wi laan bowt Jehoava fahn di way Jeezas mi feel wen ih si Marta di krai?

¹⁴ Di way Jeezas mi feel wen hihn mi si Mayri di krai teech wi dat Jehoava da wahn Gaad weh ga kompashan. Wai wi ku seh dat? Jos laik weh wi si eena di laas aatikl, Jeezas kapi di way ih Pa tink ahn feel eena wahn perfek way. (Jan 12:45) Soh wen wi reed bowt how Jeezas haat mi gaahn owt fi ih frenz ahn dat ih krai anaal wen dehn mi-di baal, wi ku bee shoar dat Jehoava feel di saym way wen ih si wee di krai. (Ps. 56:8) Dat noh mek yu waahn geh kloasa tu wi lovin Gaad?

15. Akaadn tu Jan 11:41-44, weh mi hapm da Lazaros toom? (Koment pahn di picha.)

¹⁵ Reed Jan 11:41-44. Wen Jeezas get da Lazaros toom, ih mi aks fi mek dehn moov di stoan weh mi-di kova it. Bot Marta neva waahn dehn du dat. Shee seh: “Bai now ih mosi stink.” Den Jeezas tel ahn: “Ah neva tel yu dat if yu bileev yu wahn geh fi si di grayt powa a Gaad?” (Jan 11:39, 40) Jeezas luk op da hevn ahn pray fronta evribadi. Hihn mi waahn mek dehn noa dat Jehoava dizerv di gloari fi weh mi wahn hapm neks. Den Jeezas hala: “Lazaros, kom owt!”  Ahn Lazaros waak owta di toom! Jeezas mi du sohnting weh adaz mosi mi tink neva pasabl fi du.—Si di stodi noat fi Jan 11:17.

16. How Jan chapta 11 help wi fi ga schranga fayt eena di rezorekshan hoap?

¹⁶ Weh mi hapm eena Jan chapta 11 help wi fi bileev dat di rezorekshan wahn hapm fi chroo. Memba weh Jeezas mi pramis Marta? Ih mi seh: “Yu breda wahn rayz op bak.” (Jan 11:23) Jos laik Jehoava, Jeezas ga di dizaiya ahn di powa fi mek da pramis kohn chroo. Di fak dat hihn mi krai proov dat hihn kyaahn wayt fi bring peepl bak tu laif ahn geh rid a di payn weh det kaaz. Wen Jeezas mi rezorek Lazaros, hihn mi proov dat ih ga di powa fi bring di ded bak tu laif. Ahn tink bowt weh Jeezas mi rimain Marta: “Ah neva tel yu dat if yu bileev yu wahn geh fi si di grayt powa a Gaad?” (Jan 11:40) Wi ga lata proof wai wi ku bileev eena Gaad pramis bowt di rezorekshan. Bot weh wee ku du fi ga schranga fayt eena di rezorekshan hoap?

17. Weh wi shuda memba wen wi reed bowt di rezorekshan dehn eena di Baibl?

¹⁷ Reed ahn meditayt pahn di difrent rezorekshan weh mi hapm. Di Baibl taak bowt ayt rezorekshan. c Maybi yu ku stodi eech wan a dehn. Wail yu du dat, memba dat di man, wuman, ahn chiljren dehn weh yu reed bowt da-mi reel peepl. Chrai si weh yu ku laan. Foakos pahn how eech egzampl proov dat Jehoava ga di dizaiya ahn di powa fi bring peepl bak tu laif. Ahn mek shoar dat yu tek yu taim fi tink bowt Jeezas rezorekshan, weh da di moas impoatant wan owta aala dehn. Memba dat honjridz a peepl mi si Jeezas afta ih geh rezorek, ahn dat da wahn  gud reezn fi ga fayt eena di rezorekshan hoap.—1 Kor. 15:3-6, 20-22.

18. How wi ku yooz di sang dehn weh taak bowt di rezorekshan hoap? (Koment pahn di futnoat.)

¹⁸ Yooz di “spirichwal sang dehn” weh taak bowt di rezorekshan hoap. d (Ifee. 5:19) Dehnya sang help wi fi imajin weh di rezorekshan wahn bee laik. Ahn dehn help wi fi ga schranga fayt dat ih wahn hapm fi chroo. Lisn tu dehn, praktis dehn, ahn joorin famili wership diskos weh unu laan fahn di werdz eena di sang dehn. Chrai memoraiz dehn. Den, if yu goh chroo wahn sichuwayshan weh chretn yu laif er if sohnbadi weh yu lov ded, Jehoava spirit wahn help yu memba dehndeh sang ahn dehn wahn komfert yu ahn gi yu di schrent weh yu need.

19. How wi ku yooz wi imajinayshan fi tink bowt di rezorekshan? (Si di baks “ Weh Yoo Wuda Aks Dehn?”)

¹⁹ Yooz yu imajinayshan. Jehoava gi wi di abiliti fi si wiself eena Paradais. Wahn sista seh: “Ah spen soh moch taim di imajin miself eena di nyoo werl dat da laik Ah ku eevn smel di roaz dehn eena Paradais.” Imajin weh ih wahn bee laik fi meet Jehoava faytful servants weh di Baibl taak bowt. Hoo yu wuda waahn meet? Ahn weh kweschanz yu wuda aks ahn? Tink bowt how hapi yu wahn feel wen yu geh fi si di peepl weh yu lov kom bak tu laif. Chrai tink bowt di fers ting weh yu wuda seh, bowt di tait hog weh yu wuda gi dehn, ahn bowt how hapi yu wuda feel fi si dehn agen.

20. Weh wi shuda mek op wi main fi du?

²⁰ Wi soh tankful tu Jehoava fi di pramis a di rezorekshan! Wi noa dat dis pramis wahn reeli kohn chroo bikaaz Jehoava ga di powa ahn di dizaiya fi du it. Da laik if hihn tel eech wan a wi: ‘Fi shoar, di peepl weh yu lov wahn kohn bak tu laif.ʼ Mek wi kantinyu schrentn wi fayt eena dis preshos hoap. Wen wi du dis, wi wahn geh kloasa tu Jehoava, di wan weh gi eech wan a wi dis wandaful pramis.