1. How Jehoava mi aaganaiz ih peepl eena di fers senchri?

 WENEVA Jehoava giv ih peepl wahn asainment fi du, hihn ekspek dehn fi du it eena wahn aadali way. (1 Kor. 14:33) Fi egzampl, Gaad waahn mek fi hihn peepl preech di gud nyooz tu evribadi aal oava di werl. (Mach. 24:14) Jehoava put Jeezas in chaaj a dis werk, ahn Jeezas mek shoar dat dis werk get don eena wahn aadali way. Eena di fers senchri, wen wahn nyoo kangrigayshan wuda staat op, dehn wuda apoint eldaz fi tek di leed. (Aks 14:23) Di apaslz an eldaz da Jeroosalem yoostu mek sertn disizhanz fi aala di kangrigayshan dehn. Di eldaz eena di kangrigayshan dehn wuda tel di bradaz ahn sistaz bowt di disizhanz weh di apaslz an eldaz da Jeroosalem mek. (Aks 15:2; 16:4) Di bradaz ahn sistaz mi obay di inschrokshanz weh dehn get, ahn “dis mi schrentn di fayt a di kangrigayshan dehn, ahn di nomba a bileevaz mi-di groa evri day.”—Aks 16:5.

2. Sins 1919, how Jehoava di gaid ih peepl ahn gi dehn spirichwal food?

² Jehoava kantinyu fi aaganaiz di werk weh ih peepl di du tudeh. Sins 1919, Jeezas di yooz wahn smaal groop a anointid bradaz fi tek di leed eena di preechin werk ahn fi gi spirichwal food tu fi hihn falowaz. a (Look 12:42) Ih klyaa fi si dat Jehoava di bles di werk weh dehn di du.—Isa. 60:22; 65:​13, 14.

3-4. (a) How wee benifit wen wi du tingz eena wahn aadali way? (b) Weh wi wahn taak bowt eena dis aatikl?

 ³ Wee mi wahn kyaahn du di werk weh Jeezas gi wi fi du if di aaganaizayshan neva du tingz eena wahn aadali way. (Mach. 28:​19, 20) Fi egzampl, imajin if aala wi kuda mi preech eni way wi waahn. If dat da-mi di kays, den som a wi praabli mi wahn di preech eena di saym ayrya oava ahn oava agen, ahn maybi wi neva mi wahn preech eena sohn ada ayryaz non ataal. Yoo ku tink bowt ada wayz how wi benifit wen wi du tingz eena wahn aadali way?

⁴ Jos laik how Jeezas mi aaganaiz di werk weh ih falowaz mi du wen hihn mi deh ya pahn di ert, da rait soh hihn aaganaiz di werk weh Gaad peepl di du tudeh. Eena dis aatikl, wi wahn taak bowt di egzampl weh Jeezas set ahn how fi wee aaganaizayshan di fala da egzampl. Ahn wi wahn diskos how wi ku shoa dat wi chros Jehoava aaganaizayshan.

WI AAGANAIZAYSHAN FALA JEEZAS EGZAMPL

5. Wat da wan way how wi ku fala Jeezas egzampl? (Jan 8:28)

⁵ Jeezas mi noa weh fi seh ahn du bikaaz ih laan fahn ih Pa egzampl. Jehoava aaganaizayshan fala Jeezas egzampl wen dehn yooz Gaad Werd fi gaid wi ahn help wi fi noa weh rait ahn weh rang. (Reed Jan 8:28; 2 Tim. 3:​16, 17) Wi stay di geh rimaindaz fi reed wi Baibl evri day ahn yooz weh wi laan eena wi laif. Bot how dis ku help wi?

6. How di Baibl help wi wen wi stodi it?

⁶ Wen wi stodi di Baibl lang wid wi poblikayshan dehn, ih help wi wahn lat. Fi egzampl, wi ku kompyaa weh di Baibl seh wid di dairekshanz wi get fahn di aaganaizayshan. Wi kanfidens eena di aaganaizayshan groa wen wi si dat aala di gaidans weh wi get kohn fahn di Skripchaz.—Roam. 12:2.

7. Weh mesij Jeezas mi preech, ahn how Jehoava aaganaizayshan kapi Jeezas egzampl?

⁷ Jeezas mayn goal da-mi fi preech “di gud nyooz a di Kingdom a Gaad.” (Look 4:​43, 44) Hihn koman ih disaiplz fi preech bowt Gaad Kingdom tu. (Look 9:​1, 2; 10:​8, 9) Soh ih noh mata wehpaat wi liv er weh rispansabiliti wi gat eena di kangrigayshan, evribadi weh da paat a Jehoava aaganaizayshan wahn preech di gud nyooz.

8. Weh privilij wi gat?

⁸ Wee ga di privilij fi preech bowt Gaad Kingdom! Noh evribadi ga da privilij. Tek, fi egzampl, di deemonz. Jeezas neva alow dehn fi preech bowt ahn. (Look 4:41) Saym way soh, wee need fi kwalifai fi preech bowt Gaad Kingdom. Wi shoa dat wi cherish dis privilij wen wi tek eni chaans weh wi get fi preech, noh mata wehpaat wi deh. Jos laik Jeezas, fi wee goal da fi preech ahn teech peepl bowt di chroot.—Mach. 13:​3, 23; 1 Kor. 3:6.

9. How Jehoava aaganaizayshan mek peepl noa Gaad naym?

⁹ Jeezas mek peepl noa bowt ih Pa naym. Hihn tel ih Pa: “Ah teech dehn bowt yu naym.” (Jan 17:26) Saym way soh, Jehoava aaganaizayshan du aal weh dehn kud fi teech peepl bowt Jehoava naym. Di New World Translation of the Holy Scriptures put bak Jehoava naym wehpaat ih bilangz. Dis chranslayshan a di Baibl avaylabl eena oava 270 langwij. Som a dehndeh langwij ga di hoal Baibl,  bot aala dehn ga at lees paat a it. Eena Appendix A4 an A5, yu ku laan wai dehn mi put bak Gaad naym eena di Baibl ahn how dehn mi noa wehpaat fi put it. Ahn di Study Bible gat een Appendix C tu, weh gi wi lata proof dat Gaad naym fi deh eena di Kristyan Greek Skripchaz 237 taimz.

10. Weh wi laan fahn wahn laydi fahn Myanmar?

¹⁰ Jos laik Jeezas, wi waahn lata peepl laan bowt Jehoava naym. Wen wahn laydi fahn Myanmar weh 67 yaaz oal mi fain owt dat Gaad ga wahn naym, shee krai ahn seh: “Fi di fers taim eena mi laif Ah geh fi laan dat Gaad naym da Jehoava. . . . Yoo teech mi di moas impoatant ting dat Ai ku eva laan.” Fi shee egzampl teech wi dat wen peepl laan Jehoava naym, ih ku chaynj dehn hoal laif.

KANTINYU SHOA DAT YU CHROS JEHOAVA AAGANAIZAYSHAN

11. How eldaz shoa dat dehn chros Jehoava aaganaizayshan? (Koment pahn di picha.)

¹¹ Wat da wan way how eldaz shoa dat dehn chros Jehoava aaganaizayshan? Wen di aaganaizayshan gi di eldaz inschrokshanz, di eldaz du dehn bes fi andastan it ahn fi fala it. Fi egzampl, dehn geh inschrokshanz pahn how fi du dehn paat ahn how fi pray da di meetin dehn. Pahn tap a dat, Jehoava aalso chrayn dehn how fi tek kayr a Jeezas sheep. Wen eldaz fala di aaganaizayshan dairekshan, dehn mek di kangrigayshan feel Jehoava lov ahn noa dat hihn di tek kayr a dehn.

12. (a) Wai wi need fi bee wilin fi obay di eldaz? (Heebrooz 13:​7, 17) (b) Wai ih impoatant fi foakos pahn di eldaz pazitiv kwalitiz?

¹² Wi need fi bee wilin fi obay di eldaz wen dehn gi wi inschrokshanz. Wen wi du dat, di eldaz wahn bee hapi fi kantinyu tek di leed. Di Baibl tel wi dat wi fi aalwayz obay ahn bee wilin fi deh anda fi dehn atariti. (Reed Heebrooz 13:​7, 17.) Bot ih noh aalwayz eezi fi du dat. Wai? Bikaaz dehn noh perfek. Soh insteda foakos pahn fi dehn negitiv kwalitiz, wi waahn foakos pahn dehn pazitiv kwalitiz. Peepl weh deh gens wi waahn mek wi bileev dat da noh Jehoava di gaid di aaganaizayshan. Soh if wee bileev dehn ahn stap chros di eldaz, dehn mait ku eevn kanvins wi fi stap chros di aaganaizayshan tu. Wi noh waahn gi wi enimiz wahn chaans fi du dat. Weh ku help wi fi noa wen peepl di tel lai bowt Jehoava aaganaizayshan ahn how fi rijek dehndeh laiz?

NOH LOOZ YU CHROS EENA JEHOAVA AAGANAIZAYSHAN

13. How Gaad enimi dehn chrai fi mek ih aaganaizayshan luk bad?

¹³ Gaad enimi dehn chrai fi mek di tingz weh gud bowt ih aaganaizayshan luk bad. Fi egzampl, di Baibl tel wi mek wi kip wi badi ahn wi kandok kleen ahn fi mek wi serv Jehoava di way hihn aksep. Soh if enibadi sin ahn noh waahn obay Jehoava standadz, ih kyaahn bee paat a di kangrigayshan nohmoh. (1 Kor. 5:​11-13; 6:​9, 10) Dis da wahn koman fahn di Baibl, soh az Kristyanz wee du wi bes fi obay it. Bot wen sohnbadi geh disfeloship, wi enimi dehn seh dat wi noh lov peepl bikaaz wi kandem dehn fi di way dehn liv ahn wi noh talarayt enibadi weh difrent fahn wee.

14. Hoo di tel lai bowt Gaad aaganaizayshan?

¹⁴ Wi need fi noa hoo reeli di atak di aaganaizayshan.  Saytan da di wan weh deh bihain aala dehnya lai. In fak, hihn da di “faada a di lai dehn.” (Jan 8:44; Jen. 3:​1-5) Soh wi shudn bee sopraiz dat Saytan yooz peepl fi tel lai bowt Gaad aaganaizayshan. Dat da egzakli weh mi hapm eena di fers senchri.

15. Weh di rilijos leedaz mi du tu Jeezas an ih falowaz?

¹⁵ Eena di fers senchri, Saytan mi yooz peepl fi tel wan lai afta di ada bowt di mirakl dehn weh Gaad Son mi du. Fi egzampl, di rilijos leedaz mi tel di peepl dat Jeezas mi geh di powa fi heel fahn “di roola a di deemonz.” (Maak 3:22) Wen dehn mi ares Jeezas ahn put ahn pahn chraiyal, dehn saym rilijos leedaz mi seh dat Jeezas disrispek Gaad, ahn dehn kanvins di peepl fi kil ahn. (Mach. 27:20) Ahn layta, wen Jeezas disaiplz mi kantinyu preech di gud nyooz, dehn wan weh mi deh gens dehn “ster op di peepl a di nayshanz” ahn mek dehn hayt Jeezas falowaz. (Aks 14:​2, 19) Di Disemba 1, 1998, kapi a The Watchtower help wi fi andastan Aks 14:2. Ih seh: “Som a di Jooz mi rijek di mesij weh di Kristyanz mi preech, ahn pahn tap a dat dehn mi tel lai bowt di Kristyanz soh dat peepl hayt dehn ahn noh lisn tu dehn.”

16. Weh wi need fi memba wen wi hyaa peepl tel lai bowt Gaad servants?

¹⁶ Saytan neva stap tel lai eena di fers senchri, ahn tudeh ih di kantinyu du di saym ting. Hihn stil di “fool op di hoal ert.” (Rev. 12:9) Weh wi ku du if wi hyaa peepl tel lai bowt di bradaz weh di tek di leed? Wi need fi memba how Gaad enimiz mi chreet Jeezas an ih disaiplz. Jeezas mi seh dat peepl wahn tel lai bowt  Jehoava servants. Dat da di saym ting weh dehn di du Jehoava peepl tudeh. (Mach. 5:​11, 12) Wi need fi memba da hoo tel lai ahn spred faals stoari bowt Jehoava peepl, ahn wi need fi protek wiself az soon az wi hyaa dehn. Den nobadi wahn ku chrik wi wid faals stoariz. How wi ku protek wiself?

17. Weh wi need fi du fi protek wiself fahn faals stoari? (2 Timoti 1:13) (Koment pahn di baks weh naym “ Weh Wi Ku Du Wen Wi Hyaa Faals Stoari?”)

¹⁷ Rijek faals stoariz. Di apasl Paal mi tel wi egzakli weh fi du wen wi hyaa faals stoariz. Hihn mi tel Timoti fi “rijek eni faals stoari.” (1 Tim. 4:7) Pahn tap a dat, ih tel ahn fi “koman sertn peepl noh fi . . . pay atenshan tu faals stoari.” (1 Tim. 1:​3, 4) Tink bowt it laik dis: Wahn baybi mait pik op sohnting aafa di floa ahn put it eena ih mowt kaaz ih noh noa beta. Bot yu noh ekspek wahn adolt fi du dat, bikaaz hihn noa beta an andastan weh ku hapm if ih du dat. Rait soh, wee rijek eni faals stoari weh wi hyaa bikaaz wi noa wehpaat ih kohn fram. Insted, wee hoal aan tait tu di “gud werdz” a di chroot.—Reed 2 Timoti 1:13.

18. How wi ku shoa dat wi chros Jehoava aaganaizayshan?

¹⁸ Eena dis aatikl, wi mi diskos chree wayz how Jehoava aaganaizayshan di kapi Jeezas egzampl. Az yu stodi di Baibl, chrai luk fi ada wayz how di aaganaizayshan di fala Jeezas egzampl. Help di bradaz ahn sistaz eena yu kangrigayshan fi bil op fi dehn fayt eena Jehoava aaganaizayshan. Ahn kantinyu werk haad fi stay laayal tu Jehoava ahn sopoat di aaganaizayshan weh hihn yooz fi du fi hihn wil. Wen yu du dis, yu shoa dat yu chros Jehoava aaganaizayshan. (Ps. 37:28) Soh mek wi cherish di wandaful privilij weh wi gat fi bee paat a Jehoava lovin peepl.