1. Weh di frayz “spirichwal paradais” meen, ahn weh shuda bee wi goal?

 JEHOAVA ga wahn spirichwal paradais a rait ya pahn ert. Eena dis paradais, milyanz a peepl bizi di du gud tingz ahn dehn werk tugeda eena pees. Dehn mek it dehn goal fi neva lef Jehoava spirichwal paradais. Ahn dehn waahn mek lat moa peepl jain dehn. Da weh wi meen wen wi seh spirichwal paradais?

2. Wai di spirichwal paradais amayzin?

² Eevn doa Saytan ful op dis werl wid haychrid ahn daynja, Jehoava set op wahn spirichwal paradais weh mek it pasabl fi wi injai pees ahn yooniti. (1 Jan 5:19; Rev. 12:12) Jehoava si how Saytan werl hert wi op, an az wahn lovin Gaad hihn help wi feel sayf soh dat wi ku kip aan di serv ahn. Wen di Baibl taak bowt di spirichwal paradais, ih kaal it wahn shelta ahn wahn gyaadn weh ga plenti waata. (Isa. 4:6; 58:11) Eevn doa di laas dayz haad fi deel wid, di Baibl seh dat Jehoava bles ih peepl weh stay eena di spirichwal paradais. (2 Tim. 3:1) Dis meenz dehn feel hapi ahn sayf.—Isa. 54:14.

3. How di prafesi da Isaiah chapta 65 mi kohn chroo?

³ Jehoava mi yooz ih prafit Aizaiya fi help wi andastan weh laif wahn bee laik eena di spirichwal paradais. Yu ku reed bowt dis eena Isaiah chapta 65. Dis prafesi mi kohn chroo eena 537 B.C.E. wen di Jooz mi geh free fahn Babilan ahn gaahn bak hoam. Jehoava mi bles ih peepl ahn help  dehn bil bak Jeroosalem ahn mek it byootiful agen. Ahn dehn mi bil bak di templ, di mayn plays wehpaat dehn mi wahn wership Jehoava.—Isa. 51:11; Zech. 8:3.

4. How Isaiah chapta 65 di kohn chroo tudeh?

⁴ Di prafesi eena Isaiah mi kohn chroo agen eena 1919 C.E. wen Jehoava mi free ih peepl fahn Babilan di Grayt. Afta dis hapm, di spirichwal paradais mi staat tu groa. Di bradaz ahn sistaz eena kangrigayshanz rong di werl mi werk haad fi preech ahn shoa Kristyan kwalitiz. Peepl weh yoostu ak eena wahn vailent an imoaral way mi staat tu liv di “nyoo way a laif akaadn tu [Gaad] wil.” (Ifee. 4:24) Eena di fyoocha, dehnya blesinz wahn kohn chroo eena wahn grayta way, bot fi rait now dehn ga lata blesinz weh wi di injai bikaaz wi deh eena di spirichwal paradais. Mek wi diskos dehnya blesinz ahn wai wi shuda neva lef di spirichwal paradais.

HOW IH FEEL FI LIV EENA DI SPIRICHWAL PARADAIS?

5. Bays pahn Isaiah 65:​13, weh wee di injai eena di spirichwal paradais?

⁵ Wi spirichwali helti ahn schrang. Di prafit Aizaiya tel wi how laif wahn stan fi peepl weh liv eena di spirichwal paradais ahn fi peepl weh liv owtsaida di spirichwal paradais. (Reed Isaiah 65:13.) Jehoava gi wi lata tingz soh dat wi ku stay kloas tu ahn. Fi egzampl, hihn gi wi ih hoali spirit, di Baibl, ahn wahn lata spirichwal food soh dat wi ku “eet, . . . jrink, . . . [ahn] rijais.” (Kompyaa Revilayshan 22:17.) Bot da di opozit fi peepl weh noh deh eena di spirichwal paradais. Dehn noh ga weh dehn need fi geh kloas tu Jehoava. (Amos 8:11) Soh dehn “goh hongri . . . , goh tersti . . . , [ahn] feel shaym.”

6. (a) Bays pahn Joel 2:​21-24, wat da som a di tingz Jehoava bles wi wid? (b) How wee ku benifit fahn dehndeh blesinz?

⁶ Eena Joawel prafesi, hihn mi taak bowt tingz laik grayn, wain, an aliv ail fi shoa dat Jehoava noh stinji wid wi, bikaaz hihn giv ih peepl weh dehn need. (Joel 2:​21-24) Dis inklood di spirichwal food weh Jehoava gi wi tudeh. Fi egzampl, Jehoava gi wi di Baibl, wi poblikayshan dehn, wi websait, wi meetinz, ahn wi asembli ahn kanvenshan dehn. Evri day wi ku feed wiself fahn dehnya spirichwal food ahn dis wahn kip wi spirichwali helti ahn schrang.

7. Wai wi ga wahn “gud kandishan a di haat”? (Isaiah 65:14)

⁷ Wi feel hapi. Jehoava peepl “showt eena jai” bikaaz dehn tankful fi aal weh ih du fi dehn. (Reed Isaiah 65:14.) Laik weh Aizaiya seh, wi ga wahn “gud kandishan a di haat” bikaaz a di chroot ahn di pramis dehn weh deh eena di Baibl. Ahn wi shoar dat di pramis dehn fi di fyoocha wahn kohn chroo bikaaz a di ransom sakrifais. Wi onli hapi fi taak bowt dehnya tingz wid wi bradaz ahn sistaz!—Ps. 34:8; 133:​1-3.

8. Weh too impoatant tingz wi fain eena di spirichwal paradais?

⁸ Too impoatant tingz wi fain eena di spirichwal paradais monks Jehoava peepl da lov ahn yooniti. Wen wi si how dehnya kwalitiz “bring peepl tugeda,” wi ku jos imajin weh laif wahn bee laik eena di nyoo werl wen Jehoava peepl wahn bee moa yoonaitid ahn shoa moa lov. (Kol. 3:14) Wahn sista seh weh shee mi noatis bowt Jehoava peepl wen ih mi fers meet dehn. Shee seh: “Ai neva noa how fi bee hapi, nat eevn eena mi oan famili. Di fers taim Ai si chroo chroo lov da-mi monks Jehoava Witnisiz.” If sohnbadi waahn bee  reeli hapi, dehn need fi bee paat a di spirichwal paradais. Noh mata weh peepl eena dis werl tink bowt Gaad servants, fi hihn peepl ga wahn gud naym wid ahn an wid evribadi weh wership hihn.—Isa. 65:15.

9. Eena Isaiah 65:​16, 17, weh Jehoava pramis fi du fi wi?

⁹ Wi feel kaam. Wai? Bikaaz eena di fyoocha “nobadi wahn memba” aal di tingz weh kaaz wi payn ahn sofarin. Ih wahn bee laik if dehn “haid fahn [Gaad].” (Reed Isaiah 65:​16, 17.) b Dis meenz dat Jehoava wahn geh rid a aal wi chroblz. An az taim paas, wi wahn ferget aal di memriz weh kaaz wi payn. Bot Isaiah 65:14 seh dat enibadi weh disaid fi stay owtsaida di spirichwal paradais wahn ‘krai owt bikaaz a di payn eena dehn haat ahn baal bikaaz a wahn dipres spirit.ʼ

10. Wai da wahn blesin fi spen taim wid yu bradaz ahn sistaz? (Koment pahn di picha.)

¹⁰ Wen wi deh da meetin, wi feel kaam ahn wi ku put wi prablemz wan said. Wi help wi bradaz ahn sistaz feel di saym way wen wi shoa kwalitiz laik lov, jai, pees, kainis, ahn ga wahn jentl haat. Aala dehnya kwalitiz kohn fahn di hoali spirit. (Gal. 5:​22, 23) Da wahn privilij fi bee paat a Gaad aaganaizayshan! Evribadi weh stay eena di spirichwal paradais wahn si wen Gaad mek ih pramis bowt di “nyoo hevnz ahn wahn nyoo ert” kohn chroo.

11. Bays pahn Isaiah 65:​18, 19, how di spirichwal paradais shuda mek wi feel?

¹¹ Wi feel tankful an eksaitid. Aizaiya mi eksplayn wai wi ga reezn fi “bee hapi ahn rijais.” Wi feel dis way bikaaz Jehoava da di wan weh mek dis spirichwal paradais. (Reed Isaiah 65:​18, 19.) c Soh ih mek sens dat Jehoava yooz wi fi help peepl kom owta di aaganaizayshan dehn weh noh di teech dehn bowt hihn ahn help dehn fi bee paat a dis byootiful spirichwal paradais. Wi soh hapi fi aala di blesinz wi get bikaaz wi noa di chroot, ahn dat mek wi waahn tel peepl bowt it.—Jer. 31:12.

12. How yoo feel bowt di pramis dehn weh Jehoava mek da Isaiah 65:​20-24, ahn wai yoo feel da way?

 ¹² Wahn nada reezn wi soh tankful an eksaitid da bikaaz a di hoap weh wi ga fi liv eena Paradais. Jos imajin weh aal yu wahn geh fi si ahn du eena di nyoo werl! Eena di Baibl, Jehoava pramis wi dat ‘no baybi wahn baan an onli liv fi wahn fyoo dayz, ahn no oal man wahn ded bifoa ih finish liv ih laif.ʼ Wi wahn “bil hows ahn [wee] saym wan wahn liv een deh; ahn [wi] wahn plaant aachad ahn eet fahn di froot weh ih giv.” Wi wahn bee “di wan dehn weh Jehoava bles,” soh wi noh wahn wori dat wi noh wahn geh notn fi wi haad werk. Jehoava pramis dat wi laif wahn ga perpos ahn wi wahn hapi. Ih tel wi dat “eevn bifoa [wi] kaal owt” tu hihn, ih wahn don noa weh wi need an ih wahn “gi wi evriting weh wi waahn.”—Isa. 65:​20-24; Ps. 145:16.

13. Eksplayn how Isaiah 65:25 diskraib di chaynjiz peepl wahn mek wen dehn staat serv Jehoava.

¹³ Wi ga pees ahn wi feel sayf. Wid di help a Jehoava hoali spirit, peepl weh mi reeli bad mek sohn big chaynjiz eena dehn laif. (Reed Isaiah 65:25.) Dehn werk haad fi geh rid a dehn bad wayz. (Roam. 12:2; Ifee. 4:​22-24) Dis noh meenz dat Gaad peepl perfek. Eevn doa wi noh perfek ahn wi stil mek mistayk, Jehoava help wi fi shoa lov ahn ga pees monks eech ada. Hihn bring “aal kaina peepl” tugeda, ahn notn ku brok di pees ahn yooniti weh wi injai. (Tai. 2:11) Da onli Jehoava ga di powa fi du wahn mirakl laik dat!

14. Wai Isaiah 65:25 mek wahn brada tink bowt ihself?

¹⁴ Yu tink peepl reeli ku chaynj? Yes! Fi egzampl, dehn mi ga wahn yong man weh gaahn da jayl wahn lata taimz bai di taim ih mi 20 yaaz oal. Hihn da-mi wahn vailent persn, ih mi teef peepl kaar, brok eena peepl hows, ahn du wahn lata ada bad tingz. Hihn mi onli faita tu. Bot wen ih mi staat stodi di Baibl ahn goh da meetin, hihn mi laan dat dehn mi ga wahn moch beta way fi yooz ih laif. Hihn ku wership Jehoava ahn bee paat a di spirichwal paradais. Soh ih mi staat mek chaynjiz an ih mi geh baptaiz. Now wen ih luk bak pahn ih laif, ih seh dat Isaiah 65:25 mek ih tink bowt ihself, bikaaz hihn feel laik ih chaynj fahn wahn daynjaros laiyan tu wahn kaam lee sheep.

15. Wai wee waahn mek ada peepl bee paat a di spirichwal paradais, ahn how wi ku help dehn du dat?

¹⁵ Isaiah 65:13 staat aaf di seh: “Dis da weh di Sovrin Laad Jehoava seh.” Den afta Jehoava tel wi bowt ih pramis dehn, vers 25 en aaf wid di werdz “Jehoava seh.” Evriting weh Jehoava pramis aalwayz kohn chroo. (Isa. 55:​10, 11) Wi don deh eena di spirichwal paradais. Jehoava bring ih peepl tugeda laik wan big famili fi wership hihn. An eevn doa wi stil di liv eena wahn wikid werl, wi ga pees ahn wi feel sayf, ahn notn els mek wi feel laik dis. (Ps. 72:7) Dis mek wi waahn adaz jain wi. Wi ku onli help dehn du dat if wi teech dehn bowt Jehoava.—Mach. 28:​19, 20.

WEH MEK PEEPL WAAHN BEE PAAT A DI SPIRICHWAL PARADAIS?

16. Weh mek peepl waahn bee paat a di spirichwal paradais?

¹⁶ Aala wi ku du sohnting fi mek peepl waahn bee paat a Jehoava spirichwal paradais. Wi ku du dis wen wi kapi Jehoava egzampl. Hihn noh foas peepl fi bee paat a ih aaganaizayshan. Insted, hihn “jraa” dehn tu hihn eena wahn lovin way. (Jan  6:44; Jer. 31:3) How hihn du dat? Wen peepl shoa dat dehn waahn geh fi noa Jehoava, hihn help dehn laan bowt ih byootiful kwalitiz an ih lovin persnaliti. An az dehn geh fi laan moa bowt Jehoava, dehn kyaahn help bot geh kloasa tu hihn. How di gud tingz weh wi du ahn wi gud kwalitiz ku mek peepl waahn bee paat a di spirichwal paradais?

17. How wee ku mek peepl waahn bee paat a di spirichwal paradais?

¹⁷ Wee ku mek peepl waahn bee paat a di spirichwal paradais wen wi shoa wi bradaz ahn sistaz lata lov. Wen nyoo peepl kohn da meetin, wi waahn mek dehn feel di saym way how di peepl da Korint mi feel wen dehn mi gaahn da dehn fers meetin. Bikaaz a weh dehn mi si eena di kangrigayshan, dehn mi seh: “Gaad deh wid unu fi chroo!” (1 Kor. 14:​24, 25; Zech. 8:23) Wi haftu kantinyu “liv eena pees wid wan anada” if wi waahn help peepl bee paat a di spirichwal paradais.—1 Tes. 5:13.

18. Weh ku mek peepl waahn bee paat a Jehoava aaganaizayshan?

¹⁸ Wi waahn du wi bes fi si wi bradaz ahn sistaz di way Jehoava si dehn. Wi waahn foakos pahn dehn gud kwalitiz weh wahn laas ahn noh pahn di mistayk dehn weh dehn mek. If wi ga eni prablemz wid wi bradaz ahn sistaz, wi waahn werk it owt eena wahn lovin way. Dis meenz dat wi wahn ‘bee kain, shoa kompashan, ahn bee redi fi fergiv wan anada fahn wi haat.ʼ (Ifee. 4:32) Dis da how peepl wuda waahn mek evribadi chreet dehn. Soh wen dehn si dis, dat wahn mek dehn waahn bee paat a di spirichwal paradais. d

 KANTINYU BEE PAAT A JEHOAVA SPIRICHWAL PARADAIS

19. (a) Eena di baks weh naym “ Dehn Kohn Bak,” weh sohn bradaz ahn sistaz seh wen dehn staat injai Jehoava spirichwal paradais agen? (b) Weh shuda bee wi goal? (Koment pahn di picha.)

¹⁹ Wi soh tankful fi di spirichwal paradais weh Jehoava mek fi wi. Ih moa byootiful dan bifoa, ahn moa ahn moa peepl di jain wi. Wi waahn shoa Jehoava how tankful wi tankful fi bee paat a fi hihn spirichwal paradais. Wi haftu kantinyu bee paat a di spirichwal paradais if wi waahn bee spirichwali schrang, hapi, ahn feel kaam ahn sayf. Memba dat Saytan di du evriting ih kud fi mek wi noh injai dehnya blesinz. (1 Peet. 5:8; Rev. 12:9) Wee kyaahn mek Saytan win, soh mek wi du aal wi kud fi protek dis byootiful, kleen, ahn peesful paradais.