Yu Mi Noa?
Wai sohn man weh da neva Izrelait mi serv eena King Dayvid aami?
DEHN mi ga sohn man weh da-mi farina eena Dayvid aami, fi egzampl, Zeelek di Amonait, Yuraiya di Hitait, an Itma di Moawabait. a (1 Chron. 11:39, 41, 46) Lata “Keretait ahn Peletait, lang wid di 600 man fahn Gat” mi deh eena Dayvid aami tu. Di man dehn fahn Gat da-mi Filisteenz, an ih luk laik di Keretait ahn Peletait dehn da-mi faamli tu di Filisteen dehn tu.—Ezek. 25:16; Jash. 13:2, 3; 1 Sam. 6:17, 18.
Wai Dayvid mi alow dehnya man weh da neva Izrelait fi deh eena ih aami? Hihn mi shoar dat dehn mi laayal tu hihn ahn, moa impoatant, dehn mi laayal tu Jehoava. Fi egzampl, wahn Baibl dikshineri seh dat di Keretait ahn Peletait dehn “mi stay laayal tu Dayvid joorin som a di haadis taimz wail hihn da-mi king.” Eena weh way dehn mi stay laayal? Wen “aala di man dehn fahn Izrel” mi abandan King Dayvid ahn staat fala “wahn chroblmayka weh naym Sheeba,” di Keretait ahn Peletait dehn mi kantinyu sopoat Dayvid ahn help ahn stap di ribelyan weh Sheeba mi staat. (2 Sam. 20:1, 2, 7) Den wahn nada taim, Dayvid son Adonaija mi chrai tek oava di chroan eevn doa Salaman mi sopoas tu bee di neks king. Bot di Keretait ahn Peletait dehn mi stay laayal tu Dayvid ahn dehn help put Salaman pahn di chroan bikaaz da hihn Jehoava mi chooz.—1 Ki. 1:24-27, 38, 39.
Wahn nada man weh da-mi fahn Gat weh naym Itai mi stay laayal tu Dayvid noh mata wat. Itai an ih 600 soaljaz mi sopoat Dayvid wen ih ada son, Absalom, mi ribel gens King Dayvid ahn chrai win oava di Izrelait dehn soh dat dehn mek hihn king insted. Dayvid mi tel Itai dat sins hihn da neva wahn Izrelait, hihn neva haftu fait far ahn. Bot Itai tel ahn: “Az shoar az Jehoava alaiv, an az shoar az yoo alaiv, mi laad di king, Ai gwehn weh yoo gwehn an Ah eevn redi fi ded wid yu!”—2 Sam. 15:6, 18-21.
Itai mi laayal tu Dayvid, di king weh Jehoava mi anoint
Eevn doa di Keretait, Peletait, ahn Gitait dehn da neva Izrelait, dehn mi ga lata rispek fi Jehoava. Dehn mi bileev dat hihn da di chroo Gaad ahn dat hihn mi anoint Dayvid fi bee king a Izrel. Dayvid mosi mi onli hapi fi ga laayal peepl laik dat di sopoat ahn!
a Gaad laa da Deuteronomy 23:3-6 seh dat non a di Amonait er Moawabait dehn kuda mi bee paat a di kangrigayshan a Izrel. Bot ih luk laik dis laa mi-di seh dat dehn kudn bee wahn leegal memba a di nayshan ahn ga aala di raits. Ih neva mi-di seh dat dehn kyaahn spen taim monks Gaad peepl er eevn liv monks dehn. Moa infamayshan pahn dis deh eena Insight on the Scriptures, Volume 1, payj 95.
