1. How som a wi mait feel wen wi goh owt goh preech? (Koment pahn di picha.)

 AZ Jehoava Witnisiz, wi lov wi Pa, Jehoava, wahn lat ahn soh wi waahn mek peepl geh fi noa ahn. Wahn lata wi lov fi preech, bot som a wi noh injai it dat moch. Wai som a wi feel soh? Maybi da bikaaz wi shai ahn feel laik wi kyaahn teech gud. Wi mait frayd fi goh nak pahn peepl doa wen dehn noh di ekspek wahn vizit. Wi mait frayd dat peepl noh wahn waahn lisn tu wi. Er maybi som a wi feel laik wi shudn du eniting weh ku mek wahn persn geh beks. Eevn if wi lov Jehoava wid aala wi haat, wi mait stil fain it haad fi preech tu peepl bowt di gud nyooz. Bot bikaaz wee noa dat dis werk veri impoatant, wi stil goh preech az moch az wi kud. Imajin how hapi Jehoava feel bowt dat!

2. If yoo fain it haad fi injai di minischri, wai yu noh fi feel diskorij?

² How bowt yoo? Yoo fain it haad fi injai di preechin werk fi eni a dehndeh reezn weh wi jos menshan? If yu ansa da yes, noh beet op yuself bowt it. Di fak dat yu tink dat yu da noh wahn gud teecha ku jos meen dat yu hombl ahn yu noh waahn kwaaril wid di peepl yu preech tu. Ahn nobadi laik wen peepl chreet dehn bad, espeshali wen dehn di chrai help. Jehoava noa aala di chalenjiz yu fays wen yu di preech, ahn hihn waahn help yu. (Isa. 41:13) Eena dis aatikl, wi wahn luk pahn faiv tingz weh ku help yu deel wid dehndeh kaina feelinz. Wi wahn aalso taak bowt how yu ku lov di minischri eevn moa.

 MEK GAAD WERD SCHRENTN YU

3. Weh mi help di prafit Jerimaiya fi preech tu peepl?

³ Fahn way bak, Gaad mesij mi giv ih servant dehn schrent wen dehn mi ga wahn tof asainment. Tek di prafit Jerimaiya, fi egzampl. Wen Jehoava mi tel Jerimaiya fi goh preech, ih mi hoal bak bikaaz ih mi frayd. Dis da weh Jerimaiya mi tel Jehoava: “Ah noh noa how fi taak, kaaz Ai da jos wahn lee bwai.” (Jer. 1:6) Weh mi help ahn fi noh bee frayd? Hihn mi pen pahn Gaad werd. Jerimaiya mi seh: “Ih mi ton owt fi bee laik wahn faiya weh mi-di bon deep eensaida mee ahn Ah kudn hoal it een; Ah kudn tek it nohmoh.” (Jer. 20:​8, 9) Jerimaiya mi haftu preech tu peepl weh mi chreet ahn bad. Bot hihn mi geh schrent fahn di saym mesij weh hihn mi fi preech.

4. Weh hapm wen wi reed Gaad Werd ahn meditayt pan it? (Koloashanz 1:​9, 10)

⁴ Kristyanz mi geh schrent fahn di mesij weh deh eena Gaad Werd. Wen di apasl Paal mi rait tu di bradaz da Koloaseh, hihn mi tel dehn fi kantinyu laan moa bowt Gaad. Dat mi wahn help dehn “liv di way how peepl weh serv Jehoava fi liv” ahn fi du “tingz weh bring prayz tu hihn.” (Reed Koloashanz 1:​9, 10.) Wan a di tingz weh wi ku du fi prayz hihn da fi preech di gud nyooz. Wen wi reed ahn meditayt pahn di mesij eena di Baibl, fi wee fayt wahn geh schranga ahn wi wahn andastan how impoatant ih impoatant fi preech bowt Gaad Kingdom.

5. Weh ku help yu geh moa owta yu Baibl reedin?

⁵ Wi wahn geh moa owta wi Baibl reedin if wi noh hori wen wi di reed an if wi tek taim fi stodi ahn meditayt pan it. Noh skip wahn skripcha weh yu noh andastan. Yooz di Watch Tower Publications Index er di Risaach Gaid fi Jehoava Witnisiz fi fain owt weh di vers meen. If yu tek yu taim fi stodi, yu wahn kanvins yuself dat weh Gaad Werd seh da chroo. (1 Tes. 5:21) Ahn dis wahn help yu bee hapi fi taak tu adaz bowt weh yu laan.

PRIPYAA GUD BIFOA YU GOH PREECH

6. Wai wi shuda pripyaa gud bifoa wi goh preech?

⁶ Wen yu pripyaa gud, dis help yu fi bee kanfident wen yu goh preech tu peepl ahn teech dehn bowt di chroot.  Jeezas mi pripyaa ih disaiplz bifoa ih mi sen dehn owt fi goh preech. (Look 10:​1-11) Bikaaz dehn mi du tingz egzakli di way Jeezas mi chrayn dehn, dehn mi en op di du wahn lata gud tingz fi peepl ahn dehn mi hapi.—Look 10:17.

7. Weh ku help wi pripyaa fi du beta eena di minischri? (Koment pahn di picha.)

⁷ Weh ku help yoo fi pripyaa fi di preechin werk? Wi need fi tek taim fi tink bowt how fi eksplayn wahn Baibl teechin eena wi oan werdz. Chrai tink heda taim bowt too er chree wayz how peepl mait rispan eena yu teritori. Den, pripyaa how fi ansa eech wan a dehn. Wen yu di preech tu sohnbadi, chrai rilaks, smail, ahn jos bee frenli.

8. Wai wi ku seh dat wahn Kristyan da laik wahn klay pat?

⁸ Di apasl Paal mi tel di bradaz ahn sistaz: “Wee ga dis chrezha eensaida wi eevn doa wi da laik klay pat.” (2 Kor. 4:7) Da weh chrezha Paal mi-di taak bowt? Da di privilij weh wi ga fi preech di gud nyooz bowt Gaad Kingdom soh dat peepl ku geh sayv. (2 Kor. 4:1) Hoo da di klay pat? Da aala Jehoava peepl weh preech tudeh. Bak eena Paal day, di biznizman dehn wuda kehr tingz laik food, wain, ahn moni eena klay pat. Saym way soh, wee da laik di klay pat dehn weh Jehoava yooz fi kehr di preshos mesij a di gud nyooz tu peepl evriway. Ahn sins Jehoava ga wi bak, wi noa dat hihn wahn help wi fi ga di schrent weh wi need fi kantinyu preech.

PRAY FI GA KORIJ

9. Weh ku help wi fi noh bee frayd fi weh peepl mait seh er du tu wi if dehn noh waahn lisn tu di gud nyooz? (Koment pahn di picha.)

⁹ Sohntaim wi mait feel frayd fi weh peepl mait seh er du tu wi if dehn noh waahn lisn wen wi di preech. Weh yu ku du if yu feel frayd? Tink bowt weh di apaslz mi pray fa wen dehn mi geh di aada fi stap preech. Dehn neva mek fyaa stap dehn. Insted dehn aks Gaad fi gi dehn “di korij fi neva stap taak bowt [ih] werd tu adaz.” Ahn Jehoava mi ansa dehn pryaa rait away. (Aks 4:​18, 29, 31) If yoo feel frayd fi weh peepl mait seh er du, pray tu Jehoava. Aks Jehoava fi  help yu mek yu lov fi peepl geh schranga soh dat yu ku ga di korij fi preech tu dehn.

10. How Jehoava help wi ga korij fi gi wahn witnis bowt ahn? (Isaiah 43:​10-12)

¹⁰ Jehoava pik wee fi bee ih Witnisiz, ahn hihn pramis fi gi wi di korij weh wi need. (Reed Isaiah 43:​10-12.) a Dehnya da sohn wayz how hihn help wi ga korij. Wan, Jeezas deh wid wi wen wi di preech. (Mach. 28:​18-20) Too, Jehoava yooz som a ih aynjelz fi help wi. (Rev. 14:6) Chree, Jehoava gi wi ih hoali spirit fi help wi memba tingz weh wi don laan. (Jan 14:​25, 26) Ahn foa, Jehoava gi wi bradaz ahn sistaz weh ku help wi wen wi di preech. Soh wi ga moa dan inof help. Wi noh haftu frayd fi preech.

STAY PAZITIV AHN BEE REDI FI MEK CHAYNJZ

11. How wi ku fain moa peepl wen wi goh preech? (Koment pahn di picha.)

¹¹ Yoo feel diskorij wen yu fain lee bit a peepl hoam? Wen peepl bayli deh hoam, ih gud fi aks yuself kweschanz laik: ‘Weh di peepl eena mai teritori deh rait now?ʼ (Aks 16:13) ‘Dehn deh da werk er dehn gaahn owt fi bai?ʼ If peepl noh deh hoam, den maybi yu ku goh preech eena wahn poblik ayrya wehpaat lata peepl deh. Wahn brada weh naym Joshua seh, “Ai geh fi preech tu wahn lata peepl wen Ai waak rong ayryaz wehpaat peepl di shap an eena di paakin lat dehn.” Hihn an ih waif Bridget fain dat wen dehn preech eena di eevnin ahn pahn Sondeh aftanoon, dehn fain lat moa peepl fi taak tu.—Ifee. 5:​15, 16.

12. Weh wi ku du if peepl noh waahn lisn tu di gud nyooz?

¹² If peepl luk laik dehn noh reeli waahn lisn tu di gud nyooz, chrai fain owt weh dehn wuda waahn taak bowt er weh dehn bileev. Joshua ahn Bridget  laik yooz di chrak dehn fi staat wahn kanvasayshan wid peepl. Fi egzampl, if dehn yooz di chrak weh naym Weh Yu Tink Bowt di Baibl? dehn wuda tel di persn: “Sohn peepl bileev dat di Baibl da fahn Gaad, bot ada peepl noh tink soh. Weh yoo tink?” Ahn jos laik dat dehn wuda staat op wahn nais kanvasayshan.

13. Wai wi ku stil bee hapi eevn if peepl noh waahn lisn tu wi wen wi preech? (Proverbs 27:11)

¹³ Wi ku stil bee hapi dat wi gaahn preech eevn if nobadi mi waahn lisn tu wi er if wi neva geh fi taak tu enibadi. Wai? Bikaaz wi du weh Jehoava ahn Jeezas koman wi fi du—wi gi wahn witnis. (Aks 10:42) Wi goal da aalwayz fi pleez Jehoava Gaad, an az lang az wi du dat wee wahn bee hapi.—Reed Proverbs 27:11.

14. Wai wi fi bee hapi wen wahn brada er sista staat stodi wid sombadi?

¹⁴ Aala wi hapi wen wahn brada er sista fain sombadi weh waahn laan moa bowt di Baibl. Di Wachtowa kompyaa fi wee preechin werk tu wen wahn groop di luk fi wahn pikni weh geh laas. Evribadi kom owt ahn luk aal oava di plays far ahn. An eevn doa onli wan persn mait fain di pikni, evribadi hapi wen dehn fain ahn. Saym way soh, aala di bradaz ahn sistaz werk tugeda fi preech ahn help peepl geh fi bee Jehoava fren. An aala wi hapi wen sombadi staat kohn da meetin.

TINK BOWT YU LOV FI JEHOAVA AHN PEEPL

15. How Machyu 22:​37-39 ku help wi fi injai di preechin werk moa? (Koment pahn di picha pahn di kova.)

¹⁵ Wi ku injai di preechin werk moa wen wi tink bowt humoch wi lov Jehoava ahn humoch wi lov peepl. (Reed Machyu 22:​37-39.) Jos tink bowt how hapi ih mek Jehoava feel wen ih si wi di goh preech, ahn how hapi peepl feel wen dehn staat stodi di Baibl! Pahn tap a dat, memba dat dehn wan weh lisn tu wi ahn chooz fi staat serv Jehoava wahn ku liv fareva.—Jan 6:40; 1 Tim. 4:16.

16. How wee ku stil bee hapi eevn if wi kyaahn lef wi hows fi goh preech? Yooz di egzampl dehn eena di paragraaf.

¹⁶ Dehn ga eni reezn wai yoo kyaahn lef  yu hows? If yu haftu stay hoam fi wan reezn er di ada, chrai foakos pahn how yu ku stil shoa lov fi Jehoava ahn yu naybaz. Wi ga di egzampl a Samuel ahn Dania. Joorin di COVID-19 pandemik, dehn mi kyaahn goh no way. Dat neva eezi ataal! Bot dehn mi spen az moch taim az dehn kud di du foan witnisin, leta raitin, ahn di kandok Baibl stodiz oava Zoom. Samuel mi preech da di klinik wehpaat hihn mi-di geh ih chreetment fi kyansa. Hihn seh: “Wen wi di deel wid prablemz, dehn lef wi taiyad, schres owt, ahn dehn tes wi fayt. Soh wi need fi fain wayz how wi ku kantinyu bee hapi wail wi di serv Jehoava.” Midl a aala dis, Dania mi jrap dong an ih mi haftu stay eena ih bed fi chree monts. Pahn tap a dat, ih mi haftu deh eena wahn weelchyaa fi siks monts. Dat mosi mi haad, noh chroo? Bot shee seh: “Ai chrai du aal weh Ah ku du fi preech eevn doa Ah mi deh eena da sichuwayshan. Ah wuda preech tu di ners weh kohn si mi an enibadi hoo kohn diliva tingz. An Ah mi ga wahn gud kanvasayshan oava di foan wid wahn laydi weh werk fi wahn medikal kompani.” Eevn doa Samuel ahn Dania kudn du az moch az dehn yoostu, dehn mi du weh dehn kud, ahn dehn mi hapi bikaaz dehn du dehn bes.

17. How yoo ku benifit fahn di sojeshanz eena dis aatikl?

¹⁷ Wen wi fala aala di sojeshan eena dis aatikl, wi wahn injai wi minischri eevn moa. Eech wan a dehnya sojeshan da laik wahn ingreedyent eena wahn resipee. Wen yu put aala dehn tugeda, di food kom owt gud. Soh aala dehnya tingz weh dis aatikl taak bowt wahn help yu deel wid eni negitiv feelinz ahn mek yu feel hapiya eena di minischri.