1. Weh Jehoava ekspek fahn wi?

 WAN a di hapiyis taimz fi wahn marid kopl da wen dehn baybi baan. Bot eevn doa di payrents lov dehn baybi, dehn wudn waahn ih bee wahn baybi fareva. In fak, dehn wuda staat tu wori if dehn baybi noh groa. Saym way soh, Jehoava hapi wen wi staat laan bowt ahn, bot ih noh waahn wi bee “laik baybi” fareva. (1 Kor. 3:1) Insteda dat, hihn waahn mek wi “bee machoar” Kristyanz.—1 Kor. 14:20.

2. Weh kweschanz wi wahn ansa eena dis aatikl?

² Eena dis aatikl, wi wahn fain di ansa tu dehnya kweschan: How wahn machoar Kristyan tink an ak? Weh wi need fi du fi bee wahn machoar Kristyan? How salid spirichwal food help wi fi ga wahn schranga rilayshanship wid Jehoava? Wai wi shudn tink dat wi machoar inof ahn wi noh need fi werk pahn wi rilayshanship wid Jehoava?

HOW WAHN MACHOAR KRISTYAN TINK AN AK?

3. How wahn machoar Kristyan tink an ak?

³ Wen di Baibl taak bowt wahn machoar Kristyan, ih noh ga notn fi du wid peepl ayj. In fak, di Greek werd fi “machoar” ku aalso meen “perfek” ahn “kompleet.” a (1 Kor. 2:6) Soh wi geh fi bee machoar Kristyanz wen wi mek proagres er groa eena wahn spirichwal way ahn stap bee “laik baybi.” Bot eevn wahn persn weh feel laik ih spirichwali machoar need fi kantinyu werk haad fi schrentn ih rilayshanship wid Jehoava. (1 Tim. 4:15) An aala wi ku groa fi bee machoar Kristyanz, bot how wi ku noa if wee machoar?

4. How yu wuda diskraib wahn machoar Kristyan?

 ⁴ Wahn machoar Kristyan noh pik ahn chooz weh paat a Gaad laa ih wahn fala; ih du evriting weh Jehoava aks ahn fi du. Eevn doa ih noh perfek an ih mek mistayk, evri day ih du ih bes fi tink an ak di way Jehoava waahn. Ih put aan di nyoo way a laif an aalwayz chrai ih bes fi tink di way Gaad tink. (Ifee. 4:​22-24) Ih chrayn ihself fi yooz Jehoava laa ahn prinsipl dehn fi mek waiz disizhanz, soh ih noh need wahn lang lis a roolz fi evri lee ting. Ahn wen ih mek wahn disizhan, ih werk haad fi du weh ih disaid fi du.—1 Kor. 9:​26, 27.

5. Weh ku hapm tu wahn Kristyan weh noh machoar? (Ifeezhanz 4:​14, 15)

⁵ How bowt wahn Kristyan weh noh machoar? Ih ku bee eezi fi chrik dehn. Peepl ku tel dehn aal kaina ting, ahn dehn wahn bileev it. Dehn mait bileev peepl weh spred gasip er rang infamayshan pahn di nyooz er di Intanet. Er dehn mait eevn bileev tingz weh apastayts seh. b (Reed Ifeezhanz 4:​14, 15.) Dehn mait jelos ada peepl, ga prablemz wid dehn, eezi fi kech feelinz, er eezi fi giv een tu temtayshan.—1 Kor. 3:3.

6. Weh egzampl ku help wi andastan weh aal wahn persn need fi du fi bee spirichwali machoar? (Koment pahn di picha.)

⁶ Erliya, wi si dat di Skripchaz kompyaa wahn persn weh di groa spirichwali tu wahn pikni weh di groa op fi bee wahn adolt. Dehn ga lata tingz weh wahn pikni noh noa, soh ih need wahn adolt fi protek ahn an gaid ahn. Fi egzampl, wahn ma mait hoal ih lee gyal han fi kraas wahn schreet. Az di lee gyal geh oalda, ih ma mait alow ahn fi kraas di schreet bai ihself, bot ih wahn stil rimain ahn fi luk too wayz bifoa ih kraas. Wen di lee gyal groa op, shee wahn noa how fi protek ihself eena sichuwayshanz laik dat. Soh jos laik how wahn lee pikni need adolts fi help ahn stay owta daynja, wahn Kristyan weh noh machoar need machoar Kristyanz fi help ahn stay weh fahn spirichwal daynja ahn fi mek waiz disizhanz. Pahn di ada han, wen wahn machoar Kristyan haftu mek wahn disizhan, ih luk fi Baibl  prinsiplz weh wahn help ahn fi si weh Jehoava tink, ahn den ih yooz weh ih laan fi mek gud disizhanz.

7. Yu tink wahn machoar Kristyan need help fahn adaz?

⁷ Dis noh meen dat wahn machoar Kristyan noh need help fahn adaz. Wai? Sohntaim, wahn machoar Kristyan wahn haftu aks fi help. Bot wahn Kristyan weh noh machoar wahn ekspek adaz fi tel ahn weh fi du er fi mek wahn disizhan far ahn. Wahn machoar Kristyan difrent. Eevn doa ih mait aks adaz weh ga moa wizdom an ekspeeryens fi help, ih noa dat Jehoava ekspek ahn fi mek ih oan disizhanz ahn “bak ih oan load.”—Gal. 6:5.

8. How machoar Kristyanz difrent fahn eech ada?

⁸ Aal adolts noh luk di saym. Jos laik dat, noh aal machoar Kristyanz ga di saym kwalitiz. Fi egzampl, som a dehn mait shoa moa wizdom, an adaz mait ga moa korij. Som a dehn mait bee veri jenaros, an adaz mait ga lata kompashan. Soh eevn wen too machoar Kristyanz deh eena di saym sichuwayshan, dehn mait mek wahn difrent disizhan. Bot dat noh meenz dat wan a dehn rait ahn di ada wan rang, bikaaz too a dehn bays dehn disizhan pahn Baibl prinsiplz. Dat ku hapm wen wahn Kristyan haftu mek wahn disizhan bays pan ih kanshans. Soh dehn noh joj eech ada if dehn noh mek di saym disizhan. Insteda dat, dehn werk haad fi stay yoonaitid wid wan anada.—Roam. 14:10; 1 Kor. 1:10.

WEH WI NEED FI DU FI BEE WAHN MACHOAR KRISTYAN?

9. Wai wahn persn need fi werk haad fi groa spirichwali?

⁹ Chiljren groa op fi bee adolts eena wahn nachral way; dehn jos need taim. Bot fi mek wahn persn rilayshanship wid Jehoava geh schranga, dehn need fi werk pan it; ih noh hapm rait soh. Fi egzampl, di bradaz ahn sistaz da Korint mi aksep di gud nyooz, geh baptaiz, geh hoali spirit, ahn laan wahn lat fahn di apasl Paal. (Aks 18:​8-11) Bot eevn afta dehn mi baptaiz fi wahn kopl yaaz, wahn lata dehn stil neva spirichwali machoar. (1 Kor. 3:2) How wi ku mek shoar dat noh hapm tu wee?

10. Weh wi haftu du fi bee spirichwali machoar? (Jood 20)

¹⁰ Fi bee wahn spirichwali machoar persn, wi haftu waahn bee machoar. Enibadi weh “lov fi ak foolish” ahn weh noh waahn groa op spirichwali wahn neva bee spirichwali machoar. (Prov. 1:22) Wi noh waahn bee laik peepl weh eevn afta dehn groa op stil pen pahn dehn payrents fi mek disizhanz fi dehn. Insted, wee waahn tek kayr a wi oanself spirichwali ahn mek shoar dat wi rilayshanship wid Jehoava kantinyu groa. (Reed Jood 20.) If yu stil di werk haad fi bee wahn spirichwali machoar persn, pray tu Jehoava an aks ahn fi gi yu “di dizaiya ahn di powa fi du weh hihn waahn.”—Fil. 2:13.

11. Weh Jehoava gi wi fi help wi geh machoar? (Ifeezhanz 4:​11-13)

¹¹ Jehoava noh ekspek wi fi laan fi bee spirichwali machoar peepl pahn wi oan. Hihn gi wi shepadz ahn teechaz eena di Kristyan kangrigayshan weh help wi fi “bee machoar peepl ahn bee laik Krais eena evri way.” (Reed Ifeezhanz 4:​11-13.) Jehoava aalso gi wi ih hoali spirit, weh help wi “ga di main a Krais.” (1 Kor. 2:​14-16) Pahn tap a dat, Gaad gi wi di foa Gaspl fi shoa wi weh aal Jeezas mi du wen ih mi deh pahn ert. Wen yu kapi di way how Jeezas mi tink, taak, an ak, yu  ku reech yu goal ahn bee wahn machoar Kristyan.

WAI SALID SPIRICHWAL FOOD IMPOATANT

12. Wat da “di baysik teechinz bowt di Krais”?

¹² If wi waahn bee wahn machoar Kristyan, wi haftu laan moa dan “di baysik teechinz bowt di Krais.” Som a dehndeh teechinz da bowt baptizm, rezorekshan, how fi ripent, ahn how fi ga fayt. (Heeb. 6:​1, 2) Aal Kristyanz fi bileev dehndeh teechinz. Dat da di reezn wai di apasl Peeta mi taak bowt dehdeh tingz wen ih mi preech tu di peepl da Pentikaas. (Aks 2:​32-35, 38) Wi haftu aksep dehndeh teechinz if wi waahn bee wan a Jeezas disaipl. Fi egzampl, di apasl Paal mi seh dat if wi noh bileev eena di rezorekshan, wi kyaahn bee wan a Jeezas disaipl. (1 Kor. 15:​12-14) Soh wi shuda werk haad fi laan moa dan jos dehndeh baysik teechinz soh dat wi ku bee wahn machoar Kristyan.

13. Weh wi haftu du if wi waahn benifit fahn di salid spirichwal food weh Heebrooz 5:14 menshan? (Koment pahn di picha.)

¹³ Baysik Baibl teechinz da noh di saym ting laik salid spirichwal food. Salid spirichwal food inklood Jehoava laa ahn prinsipl dehn, weh help wi andastan how Jehoava tink. If wi waahn benifit fahn salid spirichwal food, wi haftu stodi di Baibl, meditayt pahn weh wi reed, ahn du wi bes fi yooz weh wi laan. Dat wahn help wi fi mek disizhanz weh pleez Jehoava. c—Reed Heebrooz 5:14.

14. How Paal mi help di bradaz ahn sistaz da Korint fi bee machoar Kristyanz?

¹⁴ Kristyanz weh noh machoar ga wahn haad taim di mek di rait disizhan wen no spesifik laa noh deh eena di Baibl fi tel dehn weh fi du. Eena da kays, som peepl feel laik dehn ku du wateva dehn waahn. Adaz mait aks fi wahn rool wen dehn shudn need wahn rool fi mek wahn sertn disizhan. Fi egzampl, ih luk laik di Kristyanz da Korint mi aks Paal fi wahn rool bowt weda er nat dehn kuda mi eet food weh sombadi aafa tu wahn aidol. Paal neva tel dehn weh fi du. Insteda dat, hihn mi shoa dehn dat eech wan a dehn mi  ga di “freedom fi chooz” bays pahn weh dehn kanshans mi alow dehn fi du. Hihn mi gi dehn sohn Baibl prinsiplz weh kuda mi help dehn mek wahn disizhan weh noh lef dehn wid wahn gilti kanshans ahn weh noh stombl adaz. (1 Kor. 8:​4, 7-9) Paal mi chrai help di bradaz ahn sistaz da Korint fi bee machoar Kristyanz. Hihn mi teech dehn fi yooz di Skripchaz fi mek dehn oan disizhanz insteda pen pahn ada peepl er luk fi roolz.

15. How Paal mi help di Heebroo Kristyanz fi mek spirichwal proagres?

¹⁵ Wi ku laan wahn nada impoatant lesn fahn weh Paal mi rait tu di Heebroo Kristyanz. Som a dehn mi mek dehn rilayshanship wid Jehoava stap groa. In fak, dehn mi eevn alow da rilayshanship fi geh weeka. Dehn da-mi laik “pikni weh need milk insteda salid [spirichwal] food.” (Heeb. 5:12) Dehn neva kip op wid di nyoo tingz weh Jehoava mi-di teech dehn chroo di kangrigayshan. (Prov. 4:18) Fi egzampl, lata di Jooish bileeva dehn stil mi-di promoat di Laa weh Gaad mi gi Moaziz eevn doa bowt 30 yaaz erliya Jeezas sakrifais mi put wahn en tu da Laa. (Roam. 10:4; Tai. 1:10) Fi shoar dehn mi ga inof taim fi andastan dat dehn neva haftu fala da Laa nohmoh. Soh Paal mi-di chrai help dehn fi aksep di salid spirichwali food weh hihn mi-di teech dehn. Ahn dat da egzakli weh dehndeh Kristyanz mi need fi si—dat di nyoo way a wership moch beta dan di way dehn yoostu wership Jehoava. Dat mi schrentn dehn fayt ahn gi dehn di korij weh dehn mi need fi kantinyu preech eevn doa di Jooz mi-di chrai stap dehn.—Heeb. 10:​19-23.

KANTINYU WERK HAAD FI BEE SPIRICHWALI MACHOAR

16. Wat els wi haftu du eevn if wi da machoar Kristyanz?

¹⁶ Wi noh onli haftu werk haad fi bee wahn machoar Kristyan. Wi haftu werk haad fi kantinyu bee machoar. Sohn peepl mait feel laik dehn don machoar ahn dat dehn noh haftu kip di schrentn dehn rilayshanship wid Jehoava. Soh wi haftu bee kyaaful dat wi noh tink da way. (1 Kor. 10:12) Wi haftu “kip di chek” wiself  fi mek shoar dat wi rilayshanship wid Jehoava kantinyu groa.—2 Kor. 13:5.

17. How Paal leta tu di Koloashanz shoa wi dat wi haftu kantinyu bee machoar?

¹⁷ Wen Paal mi rait ih leta tu di Kristyanz da Koloaseh, hihn mi tel dehn dat dehn need fi kantinyu bee machoar. Eevn doa dehndeh Kristyanz mi spirichwali machoar, Paal mi waan dehn dat dehn haftu bee kyaaful fi mek peepl eena di werl noh chrik dehn wid hyooman wizdom. (Kol. 2:​6-10) An Epafras, hoo mi noa di bradaz ahn sistaz eena di kangrigayshan gud, mi aalwayz pray fi mek dehn bee “machoar bradaz.” (Kol. 4:12) Weh wi ku laan fahn dis? Paal an Epafras mi noa dat if wi waahn kantinyu bee machoar Kristyanz, wi need Gaad help ahn wi haftu mek shoar dat wi rilayshanship wid ahn kantinyu fi groa. Dehn mi waahn di bradaz ahn sistaz fahn Koloaseh fi stay spirichwali schrang eevn doa dehn mi-di fays chalenjiz.

18. Weh ku hapm tu wahn Kristyan weh machoar? (Koment pahn di picha.)

¹⁸ Paal mi waan di Heebroo Kristyanz dat ih pasabl fi mek wahn machoar Kristyan looz ih gud rilayshanship wid Gaad fareva. If wahn Kristyan rifyooz fi obay Jehoava, ih ku jraa soh faar fahn Jehoava dat ih kyaahn ripent ahn Hihn noh wahn fergiv ahn. Gud ting di Heebroo Kristyanz neva did get tu da point. (Heeb. 6:​4-9) How bowt dehn wan weh inaktiv er geh disfeloship bot laytaraan ripent? If dehn hombl ahn ripent, dehn shoa dat dehn da noh laik di peepl weh Paal mi taak bowt. Bot wen dehn doo kohn bak tu Jehoava, dehn need fi aksep di help weh hihn provaid fi dehn. (Ezek. 34:​15, 16) Dat da wai di eldaz mait araynj fi mek wahn spirichwali machoar brada er sista help di persn bil bak ih rilayshanship wid Jehoava.

19. Weh goal wi shuda set?

¹⁹ If yoo di werk haad fi bee wahn spirichwali machoar Kristyan, kip it op ahn yu wahn ku reech yu goal! Kantinyu fi tek een salid spirichwal food ahn laan fi tink moa ahn moa laik Jehoava. An if yu don spirichwali machoar, werk haad fi stay da way now ahn fareva.