1, 2. Weh Heebrooz 13:4 shuda moov wi fi du?

AALA wi waahn aana Jehoava. Hihn dizerv wi aana ahn rispek, an ih pramis fi shoa wee aana tu. (1 Sam. 2:30; Prov. 3:9; Rev. 4:11) Jehoava waahn wi shoa aana tu ada peepl tu, fi egzampl, peepl eena govament. (Roam. 12:10; 13:7) Bot dehn ga wahn nada paat a wi persnal laif weh dizerv lata aana ahn rispek tu. Ih veri impoatant dat wi shoa aana fi marij.

² Di apasl Paal mi seh: “Unu mos ga big rispek fi marij. Stay faytful tu unu hozban er waif.” (Heeb. 13:4) Paal kuda mi jos seh dat marij dizerv rispek. Bot hihn akchwali mi-di tel aal Kristyanz dat dehn haftu aana marij. Hihn mi-di inkorij dehn fi vyoo it az sohnting preshos. Da soh yoo feel bowt marij, espeshali fi yoo wan if yu marid?

3. Weh impoatant advais Jeezas mi gi bowt marij? (Koment pahn di picha da di biginin a dis aatikl.)

³ Jeezas mi chreet marij wid aana ahn rispek. Soh if marij preshos tu yoo, yu di fala wahn veri gud egzampl. Wen di Farisee dehn mi aks Jeezas bowt divoas, hihn rimain dehn a weh Gaad mi seh bowt di fos marij: “Dat da wai wahn man fi lef ih ma ahn ih pa ahn jain op wid ih waif, ahn di too a dehn wahn bee laik wan persn.”  Pahn tap a dat, Jeezas mi seh: “Noh mek nobadi separayt weh Gaad don jain tugeda.”—Reed Maak 10:2-12; Gen. 2:24.

4. Wat da-mi Jehoava perpos fi marij?

⁴ Soh Jeezas mi agree dat marij kohn fahn Gaad ahn dat marij mi sopoas tu laas fareva. Wen Gaad mi marid Adam ahn Eev, hihn neva tel dehn dat dehn kuda mi geh wahn divoas. Raada, fi hihn perpos fi dehn da-mi fi mek “di too a dehn” stay marid tu eech ada fareva.

5. How det afek marij?

⁵ Wi noa dat lata tingz mi chaynj wen Adam sin. Bikaaz a sin, hyoomanz mi wahn ded, ahn dat wuda afek di marij araynjment. Di apasl Paal mi eksplayn tu Kristyanz dat wahn marij en wen eeda di hozban er di waif ded, ahn dat di wan weh servaiv kuda geh marid agen.—Roam. 7:1-3.

6. Weh di Laa weh Gaad mi gi Moaziz teech wi bowt how Jehoava vyoo marij?

⁶ Di Laa weh Gaad mi gi di Izrelait dehn mi gat een deetaylz bowt marij. Eena fi dehn taim, ih mi kaman fi wahn man ga moa dan wan waif. Dis kostom mi don egzis eevn bifoa Gaad mi gi di Izrelait dehn di Laa. Di Laa mi alow wahn Izrelait man fi ga moa dan wan waif, bot Jehoava mi inklood sohn laa fi protek di uman ahn pikni dehn fahn bad chreetment. Fi egzampl, if wahn Izrelait man mi marid wahn slayv ahn den marid wahn neks uman laytaraan, ih mi stilyet haftu provaid evriting weh ih fos waif need. Akaadn tu di Laa, hihn mi haftu kantinyu protek ahn kyaa fi shee. (Ex. 21:9, 10) Wee noh deh anda da Laa nohmoh, bot ih stil teech wi how marij veri preshos tu Jehoava. Dat help wee fi aana marij tu.

7, 8. (a) Akaadn tu Deuteronomy 24:1, weh di Laa mi seh bowt divoas? (b) How Jehoava vyoo divoas?

⁷ Weh di Laa mi seh bowt divoas? Eevn doa Jehoava neva waahn peepl divoas, di Laa mi alow wahn Izrelait man fi divoas ih waif if “ih fain owt sohnting bad bowt shee.” (Reed Deuteronomy 24:1.) * Di Laa neva gi deetaylz bowt weh “sohnting bad” meenz. Bot ih mi haftu bee sohnting veri seeryos er shaymful, noh jos eni lee reezn. (Deut. 23:14) Bot sad fi seh, eena Jeezas day wahn lata Jooz mi-di geh divoas “fi eni lee ting.” (Mach. 19:3) Fi shoar wi wuda neva waahn ga da kaina atichood.

⁸ Eena Malakai dayz, ih mi kaman fi wahn man divoas ih fos waif, praabli soh dat ih kuda marid wahn yonga uman weh noh serv Jehoava. Bot Gaad mi tel di Izrelait dehn playn ahn schrayt how hihn feel bowt divoas. Ih mi tel dehn: “Ai hayt divoas.” (Mal. 2:14-16) Dat goh lang wid weh Gaad Werd seh bowt di fos marij: “[Wahn man] wahn marid tu ih waif. Dehn wahn jain tugeda, ahn di man ahn ih waif wahn bee wan.” (Gen. 2:24) Ahn Jeezas mi shoa dat hihn gree wid ih Pa vyoo wen ih mi seh: “Noh mek nobadi separayt weh Gaad don jain tugeda.”—Mach. 19:6.

9. Weh Jeezas mi meen eena Maak 10:11, 12?

⁹ Sohnbadi mait aks, ‘Wahn Kristyan wuda eva ga gud reezn fi divoas ahn geh marid agen?ʼ Noatis weh Jeezas mi seh: “Enibadi weh divoas dehn waif ahn marid tu wahn neks uman di sin gens dehn waif. Ahn rait soh, if wahn waif divoas ih hozban ahn marid tu wahn nada man, den shee di liv eena sin tu.” (Maak 10:11, 12; Look 16:18) Soh wi ku si playn-wan dat Jeezas mi aana marij an ih mi waahn mek ada peepl aana marij tu. If wahn man divoas ih faytful waif, er wahn waif divoas ih faytful hozban ahn marid  sohnbadi els, ih wuda di komit adolchri. Dat da chroo bikaaz Jehoava noh aksep divoas fi jos eni reezn. Soh noh bikaaz sohnbadi geh divoas, dat meenz dehn marij oava. Gaad wuda stil si di too a dehn az “wan.” Pahn tap a dat, Jeezas mi seh dat if wahn man divoas ih inosent waif, shee kuda en op di komit adolchri tu. How soh? Eena dehn dayz, if wahn uman hozban mi divoas ahn, shee praabli wuda feel laik ih haftu geh marid agen, bikaaz ih wuda need wahn hozban fi sopoat ahn. Wahn marij laik dat wuda bee di saym az if shee komit adolchri.

10. Wat da di onli reezn wahn Kristyan ku geh divoas ahn bee free fi geh marid agen?

¹⁰ Jeezas mi teech dat onli wan reezn deh fi mek sombadi geh divoas: ‘Ah di tel unu, yu ku onli divoas yu waif ahn marid tu sohnbadi els if yu waif di cheet pahn yu [Greek, por·neiʹa], ahn noh fi no ada els reezn; adawaiz yu di liv eena sin.ʼ (Mach. 19:9) Hihn mi mek di sayhn point eena di Sermon pahn di Mongt. (Mach. 5:31, 32) Di too taim, Jeezas mi yooz di Greek werd por·neiʹa, weh meenz sekshwal imoraliti. Dat inklood wahn lata sin weh ga fi du wid seks owtsaida marij, laik adolchri, prastityooshan, ahn seks bitween wahn man ahn wahn uman hoo noh marid tu eech ada. Ih aalso inklood sekshwal aktiviti bitween man ahn man, uman ahn uman, ahn seks bitween hyoomanz an animal. Soh, if wahn marid man komit sekshwal imoraliti, ih waif ku disaid weda shee wahn divoas ahn er nat. If shee chooz fi divoas ahn, den dat wuda bee di en a da marij eena Gaad sait.

11. Wai wahn Kristyan mait disaid noh fi geh wahn divoas eevn if ih hozban er waif mi komit sekshwal imoraliti?

¹¹ Noatis dat Jeezas neva seh dat sohnbadi haftu geh wahn divoas if dehn hozban er waif komit sekshwal imoraliti (por·neiʹa). Fi egzampl, wahn waif mait disaid fi chrai sayv ih marij eevn if ih hozban mi cheet pan ahn. Maybi shee stil lov ahn an ih wilin fi fagiv ahn. Shee mait stil bee wilin fi werk wid ih hozban fi schrentn dehn marij. Bot if shee geh wahn divoas ahn noh marid sohnbadi els, shee wuda stil ga chalenjiz fi deel wid. Ih wahn feel loanli? Wat bowt ih mateeryal ahn sekshwal needz? How wahn divoas wuda  afek ih pikni dehn? Ih wuda bee haada fi rayz dehn eena di chroot? (1 Kor. 7:14) Enibadi weh disaid fi geh wahn divoas wahn fays soh seeryos chalenjiz.

12, 13. (a) Weh mi hapm eena Hozaya marij? (b) Wai Hozaya mi tek Goamer bak, ahn weh wi ku laan fahn fi hihn marij?

¹² Di ekspeeryens a di prafit Hozaya teech wi wahn lat bowt how Gaad vyoo marij. Gaad mi tel Hozaya fi marid wahn uman hoo wuda en op di bee “wahn uman weh da wahn prastichoot ahn [ih wuda ga] pikni owta ih prastityooshan.” Soh Hozaya mi marid Goamer, ahn shee “mi geh pregnant an ih mi gi bert tu [Hozaya] son.” (Hos. 1:2, 3) Laytaraan, shee mi ga wahn daata ahn wahn son, praabli fi wahn nada man. Eevn doa Goamer mi cheet pahn Hozaya lata taim, hihn stil neva divoas ahn. Fainali, Goamer mi lef Hozaya ahn shee mi en op az wahn slayv, bot hihn mi stil bai ahn bak. (Hos. 3:1, 2) Jehoava mi-di yooz Hozaya egzampl fi shoa di Izrelait dehn how Hihn mi kip di fagiv dehn aal di taimz weh dehn mi gaahn wership ada gaadz. Weh wi ku laan fahn Hozaya marij?

¹³ Sopoaz wahn sista hozban cheet pan ahn. Sins di sista inosent, shee wuda haftu mek wahn disizhan. Di sichuwayshan wuda bee di saym fi wahn brada tu, if ih waif cheet pan ahn. Jeezas mi seh dat di inosent wan wuda ga reezn fi divoas ahn wuda bee free fi marid agen. Pahn di ada han, ih wudn bee rang if di inosent wan chooz fi fagiv di wan weh mi cheet pan ahn. Hozaya mi tek Goamer bak. Wen Hozaya ahn Goamer mi get bak tugeda, hihn tel shee dat ih neva fi ga seks wid no ada man. Hozaya neva ga sekshwal rilayshan wid Goamer fi wahn wail. (Hos. 3:3, ftn.) Bot afta sohn taim paas, Hozaya mosi mi staat tu ga seks wid ahn agen. Jehoava mi yooz Hozaya ahn Goamer egzampl fi shoa how Hihn mi wilin fi tek bak di Izrelait dehn mek dehn bee ih peepl agen. (Hos. 1:11; 3:3-5) Weh dat teech wi bowt marij tudeh? If wahn inosent Kristyan staat tu ga sekshwal rilayshan wid ih gilti hozban er waif agen, dat wuda shoa dat di inosent wan don fagiv ahn. (1 Kor. 7:3, 5) Den ih wudn ga nohmoh reezn fi geh divoas. Afta dat, di hozban ahn di waif shuda werk tugeda ahn help wan anada fi aana ahn vyoo marij di way Gaad waahn.

14. Akaadn tu 1 Korintyanz 7:10, 11, wat ku hapm eena wahn marij?

¹⁴ Aal Kristyanz shuda chrai haad fi shoa aana ahn rispek fi marij, jos laik Jehoava ahn Jeezas. Bot sohntaim sohn Kristyan noh du dis bikaaz dehn imperfek. (Roam. 7:18-23) Soh ih noh fi sopraiz wi fi fain owt dat som a di Kristyanz eena di fos senchri mi ga seeryos prablemz eena dehn marij. Paal mi rait dat “wahn waif noh sopoas tu lef ih hozban,” bot sohntaim dat mi hapm.—Reed 1 Korintyanz 7:10, 11. *

15, 16. (a) Eevn if wahn marij ga prablemz, wat shuda bee di goal, ahn wai? (b) How dis aplai eevn if di hozban er waif noh di serv Jehoava?

¹⁵ Paal neva eksplayn weh mi kaaz som a dehn Kristyanz fi separayt. Wi noa dat sekshwal imoraliti da neva di prablem, bikaaz if wan a dehn mi cheet pahn dehn marij mayt, di inosent wan wuda mi ga reezn fi geh divoas an ih wuda free fi geh marid agen. Bot Paal mi rait dat if wahn uman separayt fahn ih hozban, “eeda ih stay singl, er goh bak tu ih hozban.” Soh akaadn tu Jehoava, di too a dehn mi stil marid. Paal mi kongsl dat noh mata wat da di prablem, az lang az da noh sekshwal imoraliti, di goal shuda bee fi solv dehn prablemz ahn get bak tugeda. Dehn ku geh help fahn di eldaz eena di  kangrigayshan. Di eldaz noh wahn tek said wid eeda di hozban er di waif, bot dehn wahn aafa advais fahn di Skripchaz.

¹⁶ Bot wat if wahn Kristyan marid tu wahn persn weh noh serv Jehoava? Dehn ku lef eech ada if dehn ga prablemz? Laik wi menshan erliya, di Baibl seh dat sekshwal imoraliti da di onli reezn fi geh wahn divoas. Bot di Baibl noh gi no reezn fi separayshan. Paal mi rait: “If wahn uman weh bileev ga wahn hozban weh noh bileev, ahn di hozban agree fi kip aan di liv wid ahn, di uman noh fi divoas [er, “lef”] ih hozban.” (1 Kor. 7:12, 13) Dat aplai eena fi wee taim tu.

17, 18. Wai som Kristyanz stay marid eevn wen dehn ga seeryos prablemz?

¹⁷ Da chroo, sohntaim wahn “hozban weh noh bileev” bihayv eena wahn way weh mek ih luk laik ih noh “agree fi kip aan” di liv wid ih waif. Maybi hihn beet ahn wahn lat, ahn shee feel laik ih helt er laif eena daynja. Hihn mait stap sopoat shee ahn di famili er eevn chrai foas ahn fi stap serv Jehoava. Eena dehn kaina sichuwayshan, wahn Kristyan waif mait disaid fi ihself dat, noh mata weh hihn mait seh, ih hozban noh “agree fi kip aan di liv” wid shee ahn dat shee shuda lef ahn. Bot ada Kristyanz eena simila sichuwayshanz disaid fi stay wid dehn hozban er waif ahn chrai werk tingz owt. Wai?

¹⁸ If wahn kopl separayt eena wahn sichuwayshan laik dat, dehn stil marid tu wan anada. If dehn noh liv tugeda, eech wan a dehn wahn fays chalenjiz, laik weh wi mi menshan erliya. Di apasl Paal mi gi wahn nada reezn fi di kopl stay tugeda. Hihn mi seh: “Di hozban weh noh bileev don kohn fi bee wan wid ih waif, soh Gaad wahn aksep di hozban laik wan a ih oan. Ahn kaa di waif weh noh bileev don kohn fi bee wan wid ih hozban, Gaad wahn aksep di waif laik wan a ih oan. If dat da neva soh, den dehn pikni neva mi wahn bee hoali fi Gaad. Bot da way deh, dehn hoali fi Gaad.” (1 Kor. 7:14) Wahn lata laayal Kristyanz disaid fi stay wid dehn hozban er waif weh noh serv Jehoava, eevn if di sichuwayshan neva eezi. Dehn mi onli hapi dat dehn mek da sakrifais wen dehn hozban er waif mi staat serv Jehoava laytaraan.—Reed 1 Korintyanz 7:16; 1 Peet. 3:1, 2.

19. Wai di Kristyan kangrigayshan ga soh moch hapi marij?

¹⁹ Jeezas mi gi kongsl bowt divoas, ahn di apasl Paal mi giv advais bowt separayshan. Di too a dehn mi waahn Gaad servant dehn shoa aana fi marij. Lata Kristyan rong di werl tudeh di ga sokses eena dehn marij. Yu ku praabli fain lata hapi koplz eena yu loakal kangrigayshan. Laayal bradaz lov dehn waif, ahn di waif dehn lov ahn rispek dehn hozban. Aala dehn di shoa aana ahn rispek fi marij. Wi ku bee hapi dat milyanz a dehn di shoa dat weh Gaad seh da chroo: “Wahn man wahn lef ih pa ahn ih ma, ahn ih wahn marid tu ih waif. Dehn wahn jain tugeda, ahn di man ahn ih waif wahn bee wan.”—Ifee. 5:31, 33.