DIANA oava 80 yaaz oal ahn shee sofa wahn lat joorin di paas fyoo yaaz. Ih hozban mi sofa fahn Alzheimerʼs dizeez an ih mi haftu liv eena wahn oal foaks hoam fi sohn yaaz bifoa ih mi ded. Pahn tap a dat, di too a fi shee son dehn mi ded, ahn shee mi haftu fait bres kyansa tu. Bot, wen di bradaz ahn sistaz si Diana da di meetin dehn er pahn feel servis, shee aalwayz luk hapi.

Jan da-mi wahn serkit oavaseeya fi oava 43 yaaz. Hihn mi lov ih asainment wahn lat, an ih kudn imajin di du eniting els! Bot wan a ih faamli mi geh sik ahn Jan mi stap serv az wahn serkit oavaseeya fi help tek kayr a ahn. Now Jan di serv eena wahn loakal kangrigayshan. Wen peepl weh mi noa Jan eena di paas meet ahn da kanvenshan er asembli, dehn seh hihn noh chaynj ataal. Ih stilyet ga lata jai.

How Diana ahn Jan ku stil ga jai? How sohnbadi weh di sofa fizikal an imoashanal payn ku bee hapi? Ahn how wahn persn ku stil bee hapi eevn if ih haftu giv op wahn asainment weh ih lov? Di Baibl gi wi di ansa: “Di raichos persn wahn rijais eena Jehoava.” (Ps. 64:10) Wi ku andastan dis chroot beta if wi noa wat wahn gi wi reel jai weh wahn laas.

Sertn tingz wahn aalwayz mek wi feel hapi. Fi egzampl, tink bowt wahn kopl weh di geh marid bikaaz dehn lov wan anada. Er tink bowt wahn persn weh ga dehn fos pikni, er sohnbadi weh geh wahn nyoo asainment eena Jehoava servis. Dehnya kaina ting bring jai bikaaz aala dehn da gif fahn Jehoava. Da hihn gi wi marij, ahn mek wi soh dat wi ku ga pikni, ahn gi wi difrent werk asainment weh wi ku du eena fi hihn aaganaizayshan.—Gen. 2:18, 22; Ps. 127:3; 1 Tim. 3:1.

Bot som tingz weh bring jai noh laas fareva. Ih sad, bot sombadi ku cheet pahn dehn hozban er waif, er eevn ded. (Ezek. 24:18; Hos. 3:1) Som pikni noh obay needa dehn payrents ner Gaad, ahn dehn ku eevn geh disfeloship fahn di kangrigayshan. Samwel son dehn neva pleez Jehoava, ahn Dayvid mi ga lata prablemz eena ih famili sayka weh ih mi sin  wid Bat-sheeba. (1 Sam. 8:1-3; 2 Sam. 12:11) Wen tingz laik dat hapm, ih mek wi feel sad. Dehn noh bring wi no jai.

Sayhn way soh, sohntaim wi kyaahn kantinyu eena wahn asainment bikaaz wi geh sik er haftu tek kayr a wi faamli. Er sohntaim di aaganaizayshan mek chaynjiz weh afek wi asainment. Lata wi bradaz ahn sistaz weh mi haftu goh chroo dehn kaina chaynjiz seh dat dehn mis how hapi dehn yoostu bee eena dehn asainment.

Soh ih playn fi si dat eevn wen sohnting mek wi hapi, di jai noh aalwayz laas. Wee ku eva fain jai weh wahn laas eevn wen tingz noh goh di way wi waahn? Da kaina jai haftu egzis, bikaaz Samwel, Dayvid, an adaz mi hapi eevn wen dehn mi-di goh chroo chraiyalz.

Jeezas mi noa wat da reel jai. Bifoa hihn mi kohn dong tu di ert, di Baibl tel wi dat hihn “mi rijais fronta [Jehoava] aal di taim.” (Prov. 8:30) Bot wen ih mi kohn dong tu di ert, hihn mi gaahn chroo sohn seeryos chalenjiz. Stil, Jeezas mi hapi fi du Gaad wil. (Jan 4:34) How bowt aal weh ih mi sofa joorin di laas owaz bifoa ih mi ded? Di Baibl seh dat hihn mi gaahn chroo di shaym a det pahn wahn taacha stayk an dat “ih neva tink notn a it,” bikaaz hihn mi noa dat “pahn di en ih mi wahn mek ahn hapi fi du it.” (Heeb. 12:2) Soh wi ku laan wahn lat fahn too ting weh Jeezas mi seh bowt chroo chroo jai.

Wan taim, 70 a Jeezas disaipl dehn mi gaahn bak tu ahn afta wahn preechin asainment. Dehn mi ful a jai bikaaz dehn mi du lata miraklz ahn dehn eevn mi jraiv owt deemonz fahn peepl. Den Jeezas mi tel dehn: “Noh feel hapi jos sayka weh eevl spirit obay unu. Insteda dat, unu mos feel hapi kaa unu naym rait dong eena hevn!” (Look 10:1-9, 17, 20) Yes, ih moa impoatant fi mek Jehoava pleez wid wi dan fi ga eni speshal privilij eena ih aaganaizayshan. Dehn faytful disaipl kuda mi bee veri hapi bikaaz dehn kuda mi chros dat Jehoava mi pleez wid dehn.

Wahn neks taim, Jeezas mi-di taak tu wahn krowd a peepl. Wahn Jooish uman mi wel impres wid fi hihn teechin, soh shee mi seh dat  fi hihn ma mos bee veri hapi. Bot Jeezas mi karek ahn. Ih mi seh: “Bot dehn wan weh yehr di Werd a Gaad ahn du weh ih seh stil moa bles dan dat.” (Look 11:27, 28) Da wahn wandaful ting fi bee wahn payrent ahn tek praid eena yu pikni. Bot, yu wahn ga moa reezn fi bee hapi wen yu ga wahn kloas rilayshanship wid Jehoava bikaaz yu obeedyant tu ahn.

Wi feel soh hapi wen wi noa dat Jehoava pleez wid wi. An eevn doa wi noh injai wi chraiyalz, dehn kyaahn tek weh di jai weh wi geh fahn pleez Jehoava. Akchwali, wen wi stay faytful, eevn anda chraiyal, wi geh eevn moa jai. (Roam. 5:3-5) Pahn tap a dat, Jehoava gi hoali spirit tu enibadi weh chros eena ahn, ahn jai da paat a di froot a da spirit. (Gal. 5:22) Dat help wi fi andastan wai Psalm 64:10 seh: “Di raichos persn wahn rijais eena Jehoava.”

Dis eksplayn wai Diana ahn Jan, hoo wi mi menshan erliya, kuda mi kip dehn jai eevn wen dehn mi-di goh chroo seeryos prablemz. Diana seh: “Ai ton tu Jehoava fi sopoat, jos laik how wahn pikni wuda ton tu ih ma er pa.” How shee noa dat Gaad pleez wid ahn? “Ai feel laik ih gi mi di schrent fi kantinyu preech wid wahn smail pahn mi fays, ahn dat da wahn reel blesin.” Jan mi kip aktiv eena di minischri eevn afta ih mi haftu giv op ih asainment. Weh mi help ahn fi du dat? Ih seh: “Sins 1998 wen Ah mi geh asain fi teech Ministeeryal Chraynin Skool, Ah du moa persnal stodi dan eva bifoa.” Ih seh dat hihn an ih waif mi fain it eeziya fi ajos tu di nyoo asainment bikaaz dehn mi wilin fi du wateva Jehoava asain dehn fi du. Ih seh: “Wi noh rigret notn weh wi du eena Jehoava servis.”

Di werdz eena Psalm 64:10 kohn chroo fi wahn lata peepl. Kansida di egzampl a wahn kopl weh mi serv da Betel da di United States fi oava 30 yaaz. Den dehn mi geh asain bak tu di feel az speshal painyaaz. Dehn mi haftu admit: “Ih onli nachral dat yu wahn feel sad wen yu looz sohnting weh yu lov.” Bot den dehn mi seh: “Yu kyaahn stay sad fareva.” Az soon az dehn mi reech dehn nyoo asainment, dehn mi bizi op dehnself di preech wid di kangrigayshan. Dehn mi aalso seh: “Wi mi veri spesifik eena wi pryaaz. Ahn wi mi geh lata inkorijment ahn jai wen wi si di ansa fi wi pryaaz. Soon afta wi mi reech, adaz eena di kangrigayshan mi staat tu painyaa, ahn wi mi geh bles wid too gud Baibl stodiz.”

Af koars, ih noh aalwayz eezi fi feel hapi er ga jai. Sohntaim wi wahn feel sad. Bot, Jehoava inkorij wi wid di werdz weh wi reed eena Psalm 64:10. Eevn wen wi feel diskorij, wi ku chros dat if wi stay faytful noh mata weh wi goh chroo eena laif, wi “wahn rijais eena Jehoava.” Pahn tap a dat, wi ku luk faawod fi si di “nyoo hevnz ahn wahn nyoo ert” weh Jehoava pramis wi. Den evribadi wahn bee perfek. Aala Gaad peepl wahn “bee hapi ahn rijais fareva” wen dehn si an injai aal weh Jehoava wahn du.—Isa. 65:17, 18.

Imajin weh dis wahn meen. Wi wahn ga perfek helt ahn wi wahn wayk op evriday ful a enerji. Noh mata weh kaina imoashanal payn wi mi sofa eena di paas, wi noh wahn haftu sofa nohmoh. Di Baibl pramis wi dat “di tingz weh hapm eena di paas noh wahn kom bak op eena wi main, ner dehn noh wahn kom op eena di haat.” Wi wahn welkom bak famili ahn frenz eena di rezorekshan ahn wi wahn feel laik di payrents a di lee 12-yaa-oal gyal weh Jeezas mi rezorek. Dehn mi soh eksaitid ahn hapi dat dehn “kuda haadli bileev dehn aiy.” (Maak 5:42) Eena di en, evribadi pahn di ert wahn reeli ahn chrooli bee wahn “raichos persn” ahn dehn wahn “rijais eena Jehoava” fareva.