Eena 2 Korintyanz 12:2, 3, Paal taak bowt wahn man weh “mi geh kehr op eena di haiyis hevn.” Da hoo Paal mi-di taak bowt? Wen Paal mi-di rait tu di kangrigayshan da Korint, ih mi mek it klyaa tu dehn dat Gaad mi-di yooz hihn az wahn apasl. (2 Kor. 11:5, 23) Den ih mi menshan di ‘vizhan dehn ahn di seekrit ting dehn [er, “revilayshan dehn,” NW] weh di Laad shoa ahn.ʼ Paal neva menshan nobadi els wen ih mi-di taak bowt dehnya ting. Soh ih mek sens dat Paal mi-di taak bowt ihself az di man weh mi geh dehn vizhan ahn revilayshan.—2 Kor. 12:1, 5.

Soh Paal da-mi di man weh “mi geh kehr op eena di haiyis hevn” ahn “geh kehr” da “Paradais.” (2 Kor. 12:2-4) Hihn seh ih mi geh sohn “revilayshan,” soh ih praabli mi-di taak bowt weh wahn hapm eena di fyoocha.

Wat da-mi “di haiyis hevn” weh Paal mi si?

Eena di Baibl, “hevn” ku meen di fizikal hevnz, er skai. (Gen. 11:4; 27:28; Mach. 6:26) Bot di Baibl yooz “hevn” eena ada wayz tu. Sohntaim ih yooz it fi rifaa tu hyooman govament. (Dan. 4:20-22) Er ih ku rifaa tu Gaad roolaship, chroo fi Hihn Kingdom.—Rev. 21:1.

Paal mi si “di haiyis [er, “terd,” NW] hevn.” Weh Paal mi meen bai dat? Sohntaim di Baibl seh di sayhn ting chree taim fi shoa dat sohnting impoatant, er fi mek wahn schrang point. (Isa. 6:3; Ezek. 21:27; Rev. 4:8) Soh ih ku bee dat wen Paal mi seh “di terd hevn,” ih mi-di taak bowt di bes kaina govament—Gaad Kingdom wid Jeezas Krais ahn di 144,000 di rool. (Si Insight on the Scriptures, Vol. 1, payj 1059, 1062.) Soh da laik weh di apasl Peeta mi rait wen ih mi seh dat wi di wayt fi di “nyoo hevn” weh Gaad mi pramis wi.—2 Peet. 3:13.

Weh Paal mi meen wen ih mi taak bowt “Paradais”?

Di werd “paradais” ku meen difrent tingz tu. Ih ku meen: (1) Wen wi kansida di orijinal hoam weh Gaad mi mek fi hyoomanz, “paradais” ku rifaa tu wen di ert wahn bee wahn paradais eena di fyoocha. (2) Ih ku rifaa tu di peesful kandishan weh Gaad peepl wahn injai eena di nyoo werl. (3) Er, ih ku rifaa tu di wandaful kandishanz eena hevn, “Gaad gyaadn [er, “paradais,” NW]” weh Revilayshan 2:7 menshan.—Si Di Wachtowa, Joolai 15, 2015, payj 8. par. 8.

Ih ku bee dat Paal mi-di taak bowt aal chree pasabl meenin wen ih mi taak bowt ih vizhan eena 2 Korintyanz 12:4.

Fi rivyoo:

“Di haiyis hevn” weh Paal mi taak bowt da 2 Korintyanz 12:2 da praabli Gaad Kingdom wid Jeezas Krais ahn di 144,000 di rool. Di Baibl kaal dat di “nyoo hevn.”—2 Peet. 3:13.

Dis da di “terd,” er “haiyis hevn” bikaaz dis Kingdom soh moch beta dan eni ada govament.

Di “Paradais” weh Paal mi si eena ih vizhan praabli meenz (1) di fizikal Paradais weh di ert wahn bee eena di fyoocha, (2) di spirichwal paradais weh wahn egzis eena da taim, weh wahn bee beta dan di spirichwal paradais weh wi don di injai now, ahn (3) “Gaad gyaadn” eena hevn weh wahn egzis di sayhn taim.

Ahn soh, di nyoo werl wahn bee di nyoo hevnz ahn di nyoo ert put tugeda. Ih wahn bee wahn nyoo araynjment, an ih wahn inklood di Kingdom govament eena hevn an aala di hyoomanz weh di serv Jehoava eena Paradais ya pahn di ert.