Yong Peepl, Yu Kriyayta Waahn Yu Bee Hapi
“Hihn satisfai yu wid gud tingz aal yu laif.”—PS. 103:5.
1, 2. Wai ih waiz fi lisn tu yu Kriyayta wen yu di disaid weh yu wahn du wid yu laif? (Koment pahn di picha dehn da di biginin a dis aatikl.)
IF YOO da wahn yong persn, yu praabli don geh lata advais bowt yu fyoocha. Yu teecha dehn, yu kongsla dehn, er adaz praabli inkorij yu fi geh wahn haiya ejukayshan er fi chrai geh wahn gud jab soh dat yu ku mek lata moni. Bot Jehoava gi yu difrent advais. Af koars, ih waahn yu werk haad ahn du gud da skool soh dat yu ku mek wahn livin afta yu grajuayt. (Kol. 3:23) Bot, Jehoava noa dat wen yu yong yu haftu mek wahn lata disizhan weh wahn afek yu fyoocha. Soh hihn inkorij yu fi yooz Baibl prinsipl fi help yu liv eena wahn way weh pleez ahn.—Mach. 24:14.
2 Ahn noh faget dat Jehoava noa evriting. Hihn noa weh wahn hapm eena di fyoocha ahn how kloas wi deh tu di en a dis sistem. (Isa. 46:10; Mach. 24:3, 36) Moa dan dat, Jehoava noa yoo. Hihn noa weh wahn mek yu hapi ahn weh ku tek weh yu hapinis. Noh mata how gud di advais weh yu geh fahn adaz mait song, if ih noh bays pahn Gaad Werd, den ih noh reeli waiz.—Prov. 19:21.
WIZDOM ONLI KOHN FAHN JEHOAVA
3, 4. Wen Adam ahn Eev mi lisn tu bad advais, how dat mi afek dehn an aala dehn pikni?
3 Saytan da-mi di fos wan fi gi hyoomanz bad advais bak eena di gyaadn a Eedn, ahn fahn den til now, yu ku geh bad advais fahn aal bowt. Hihn mi tek it pan ihself fi gi Eev advais eevn doa da neva fi hihn plays fi du dat. Ih mi tel Eev dat shee an ih hozban wuda bee hapiya if dehn mi chooz fi dehnself how dehn wahn liv. (Gen. 3:1-6) Bot Saytan mi onli selfish! Hihn mi waahn mek Adam ahn Eev, an aala dehn fyoocha pikni, obay ahn wership hihn insteda Jehoava. Bot weh Saytan mi eva du fi dehn? Da Jehoava mi gi dehn evriting weh dehn mi gat. Hihn mi gi dehn eech ada, wahn byootiful gyaadn fi liv eena, ahn perfek badiz weh kuda mi laas fareva.
4 Bot Adam ahn Eev mi disobay Gaad. Wen dehn mi du dat, dehn mi kot dehnself aaf fahn hihn. Ahn wi ku si di sad rizolt a dat tudeh. Jos laik how wen yu kot wahn flowaz aafa wahn plaant ih jrai op ahn ded, rait soh, wen Adam ahn Eev mi kot dehnself aaf fahn Jehoava, dehn mi geh oal ahn ded. Dehn pikni mi sofa tu, rait dong tu wee tudeh. (Roam. 5:12) Eevn soh, moas peepl stil chooz fi goh dehn oan way. Dehn noh waahn lisn tu Gaad. (Ifee. 2:1-3) Di en rizolt shoa wi dat “no wizdom . . . noh deh weh goh gens Jehoava.”—Prov. 21:30.
5. Weh kanfidens Jehoava mi gat eena hyoomanz? Hihn mi rait fi chros dehn?
5 Stil, Jehoava mi noa dat som hyoomanz, inkloodin wahn lata yong peepl, wuda waahn geh fi noa an serv ahn. (Ps. 103:17, 18; 110:3) Dehn yong peepl veri preshos tu Jehoava! Yoo da wan a dehn? Den fi shoar yu don di injai lata “gud tingz” fahn Gaad weh mek yu hapi. (Reed Psalm 103:5; * Prov. 10:22) Now wi wahn diskos foa a dehnya “gud tingz” weh Gaad gi wi. Ih gi wi lata gud spirichwal food, di veri bes kaina frenz, gud goalz, ahn chroo chroo freedom.
JEHOAVA SATISFAI YU SPIRICHWAL NEED
6. Wai yu shuda satisfai yu spirichwal need, ahn how Jehoava provaid weh yu need?
6 Di animal dehn noh ga wahn spirichwal need. Bot wee ga da need ahn onli wi Kriyayta ku satisfai it. (Mach. 4:4) Wen yu lisn tu Gaad, yu wahn geh wizdom, andastandin, ahn hapinis. Jeezas mi seh: “Di wan dehn weh noa dat dehn need Gaad wahn bee hapi.” (Mach. 5:3, NW) Gaad gi wi di Baibl an ih yooz “di faytful ahn diskreet slayv” fi provaid Baibl-bays poblikayshanz weh help wi fi bil wi fayt. (Mach. 24:45, NW) Wi kaal dehndeh poblikayshan spirichwal food bikaaz dehn mek wi fayt groa ahn dehn schrentn wi rilayshanship wid Jehoava. Ahn wi ga lata gud poblikayshanz, noh chroo?—Isa. 65:13, 14.
7. How yu benifit wen yu tek een di spirichwal food weh Gaad provaid?
7 Di spirichwal food weh Gaad provaid wahn gi yu wizdom an ih wahn teech yu how fi tink eena di rait way. Dat wahn bee wahn protekshan fi yu. (Reed Proverbs 2:10-14.) * Dehnya kwalitiz wahn help yu fi noa if weh yu di hyaa da lai. Fi egzampl, if sohnbadi tel yu no Kriyayta noh deh, er dat moni ahn mateeryal tingz wahn mek yu hapi. Ahn dehn kwalitiz wahn help yu fi avoid eni dizaiya er habit weh ku hert yu. Soh du aal weh yu kud fi laan gaadli wizdom ahn mek Jehoava teech yu di rait way fi tink. Dehnya kwalitiz onli preshos! Az yu divelop dehnya kwalitiz, yu wahn geh fi si dat Jehoava lov yu ahn hihn waahn di bes fi yu.—Ps. 34:8; Isa. 48:17, 18.
8. Wai yu shuda jraa kloas tu Gaad now, ahn how yu wahn benifit fahn dis eena di fyoocha?
8 Soon, hoal a Saytan sistem wahn geh dischrai. Da onli Jehoava wahn ku protek wi ahn provaid fi wi. Wi mait eevn fain wiself di pen pahn hihn fi wi neks playt a food! (Hab. 3:2, 12-19) Yes, now da di taim fi jraa kloas tu yu hevnli Faada ahn laan fi chros ahn eevn moa. (2 Peet. 2:9) If yu du dat, den noh mata weh hapm rong yu, yu wahn feel laik di saamis Dayvid. Hihn mi seh: “Ah aalwayz si di Laad fronta mi aal di taim. Sayka weh ih deh rait saida mi, Ah noh hafu wori bowt notn.”—Ps. 16:8.
JEHOAVA GI YU DI VERI BES KAINA FRENZ
9. (a) Akaadn tu Jan 6:44, weh Jehoava du? (b) How yu feel wen yu meet ada Witnisiz?
9 Wen yu fos meet sohnbadi weh noh serv Jehoava, weh yu noa bowt da persn? Yu mait onli noa ih naym ahn how ih luk. Bot da noh soh wen yu meet sohnbadi weh eena di chroot. Yu don noa dat ih lov ahn serv Jehoava. Yu noa dat Jehoava mi si sohnting gud eena da persn an ih mi invait ahn fi bee paat a fi hihn spirichwal famili. (Reed Jan 6:44.) Eevn if da persn kohn fahn wahn difrent bakgrong, konchri, chraib, er kolcha, yu don noa wahn lat bowt ahn aredi. Ahn hihn noa wahn lat bowt yoo tu!
Jehoava waahn mek wi ga di bes kaina frenz ahn fi set spirichwal goalz (Paragraaf 9-12)
10, 11. Weh Jehoava peepl ga in kaman, ahn how dis benifit wi?
10 Az soon az yu meet wahn nada Witnis, yu don noa dat unu ga di moas impoatant tingz in kaman. Fi egzampl, eevn doa unu mait taak difrent langwij, unu stil taak di “pyoar langwij” a chroot. (Zeph. 3:9) Sayka dat, yu noa dat di too a unu bileev eena Gaad, unu liv akaadn tu di sayhn standad a weh rait ahn weh rang, an unu ga di sayhn hoap fi di fyoocha. Bikaaz a dis, unu ku chros wan anada ahn bil op wahn schrang frenship weh wahn laas fareva.
11 Soh wen yu wership Jehoava, yu reeli ahn chrooli ga di bes kaina frenz. Yu ga frenz aal rong di werl, eevn if yu noh meet
moas a dehn yet! Yoo ku tink a eni ada set a peepl weh ku injai dat? Onli Jehoava peepl ga da preshos gif!JEHOAVA GI YU GUD GOALZ
12. Wat da sohn gud spirichwal goalz weh yu ku set fi yuself?
12 Reed Ecclesiastes 11:9–12:1. * Yu ga eni spirichwal goalz weh yu di werk pan? Maybi yu di chrai reed wahn lee bit a di Baibl evriday, er gi beta koments er paats da di meetin. Er maybi yu di chrai du beta eena di way yu yooz di Baibl eena yu minischri. Wateva yu di werk pan, how yu feel wen yu si gud rizolts, er wen peepl komen yu? Yu praabli feel veri hapi, ahn da soh yu fi feel! Dat da bikaaz yu di du weh Jehoava waahn yu du, jos laik weh Jeezas mi du.—Ps. 40:8; Prov. 27:11.
13. Wai ih beta fi foakos pahn yu servis tu Jehoava raada dan fi goh aata di goalz weh dis werl put fronta yu?
13 Wen yu foakos pahn yu servis tu Jehoava, yu di du wahn werk weh wahn mek yu hapi. Yu wahn feel satisfai bikaaz dis werk wahn neva bee wahn ways a taim. Di apasl Paal mi rait: “Unu fi stan op schrang. Noh mek notn moov unu. Unu kip aan di du di Laad werk wid evriting weh unu gat. Kaa unu noa dat evriting weh unu du fi di Laad noh wahn bee fi notn.” (1 Kor. 15:58) Bot wen peepl goh aata di ting dehn weh dis werl promoat, laik mek lata moni er geh faymos, eevn if dehn ga sokses, dehn noh wahn bee hapi. (Look 9:25) King Salaman mi proov dat tu ihself, ahn wee ku laan fahn fi hihn ekspeeryens.—Roam. 15:4.
14. Weh yu ku laan fahn weh Salaman mi du?
14 Salaman mi doti rich, ahn hihn da-mi wan a di moas powaful man fi eva liv. Wid aala ih moni ih mi disaid fi “chrai owt plezha ahn si weh gud [wuda kohn].” (Eccl. 2:1-10) Hihn mi bil lata hows, mek lata gyaadn ahn paak, ahn du wateva ih mi feel fi du. Yu tink hihn mi feel hapi ahn satisfai aftawodz? Salaman ihself tel wi: “Wen Ah luk bak pan aala di ting dehn weh Ah mi du . . . , Ah si dat evriting da-mi loan ways a taim . . . notn anda di son ga reel valyu.” (Eccl. 2:11) Salaman teech wi wahn powaful lesn. Yu wahn tek it tu haat?
15. Akaadn tu Psalm 32:8, wai yu need fayt, ahn how ih wahn help yu?
15 Som peepl onli laan dehn lesn di haad way. Jehoava noh waahn mek dat hapm tu yoo. Hihn waahn mek yu lisn tu ahn an obay ahn. Dat tek fayt, bot yu wahn neva rigret weh yu du bikaaz a yu fayt. Ahn Jehoava wahn neva faget ‘how yu shoa yu lov tu hihn.ʼ (Heeb. 6:10) Soh werk haad fi bil schrang fayt, ahn yu wahn si fi yuself dat yu hevnli Faada onli waahn di bes fi yu.—Reed Psalm 32:8. *
GAAD GI YU CHROO CHROO FREEDOM
16. Wai wi shuda lov freedom ahn yooz it eena wahn waiz way?
16 Paal mi rait: “Weh di spirit a Jehoava deh, da deh freedom deh.” (2 Kor. 3:17, NW) Jehoava lov freedom, an ih mek yu eena wahn way weh yoo lov freedom tu. Bot ih waahn mek yu yooz yu freedom eena di rait way. If yu du dat, den da freedom wahn bee wahn protekshan fi yu. Maybi yu noa sohn ada yong peepl weh laik wach poarnografi, praktis sekshwal imoraliti, play daynjaros spoats weh ku hert er kil dehn, er abyooz jrogz an alkohol. Da chroo, dehndeh ting mait bee eksaitin fi dehn er gi dehn plezha fi wahn lee wail. Bot moas a di taim dehn haftu pay wahn hevi prais; maybi dehn geh sohn kaina dizeez, dehn geh huk pahn jrogz, er dehn mait eevn ded. (Gal. 6:7, 8) Yong peepl weh du dehndeh tingz mait feel laik dehn free, bot dat da noh chroo chroo freedom ataal.—Taitos 3:3.
17, 18. (a) How obeedyans tu Gaad set wi free? (b) How di freedom weh Adam ahn Eev mi ga eena di biginin difrent fahn di freedom weh peepl ga tudeh?
17 Pahn di ada han, obeedyans tu Jehoava gud fi wi. Humoch peepl yoo noa weh mi geh sik bikaaz dehn mi fala Baibl standadz? Obeedyans tu Jehoava gud fi wi helt an ih mek wi free fi chroo. (Ps. 19:7-11) Soh di waiz way fi yooz yu freedom da fi chooz fi obay Gaad perfek laa dehn an ih prinsipl dehn. Wen yu du dat, yu shoa Gaad ahn yu payrents dat yu da wahn rispansabl persn. Yu payrents wahn praabli chros yu moa ahn gi yu moa freedom. Ahn Jehoava pramis dat soon hihn wahn giv aala ih faytful servants perfek freedom. Di Baibl seh dat Gaad wahn gi yu di wandaful freedom weh bilangz tu ih pikni dehn.—Roam. 8:21.
18 Adam ahn Eev mi geh wahn tays a da freedom. Eena di gyaadn a Eedn, onli wan ting Gaad mi tel dehn noh fi du. Owta aala di chree dehn eena di gyaadn, onli wan chree dehn neva fi eet fram. (Gen. 2:9, 17) Yoo tink da wan koman mi tu schrik er dat ih neva fyaa? Af koars nat! Tink bowt humoch laa peepl don mek ahn foas adaz fi obay. Jehoava onli mi gi Adam ahn Eev wan laa.
19. Weh Jehoava ahn Jeezas di teech wi weh wahn help wi fi bee free?
19 Jehoava veri waiz eena di way how ih chreet wi. Hihn noh gi wi wahn hoal lata laa fi obay. Ih payshent wid wi an ih teech wi fi obay di laa a lov. Ih teech wi fi liv akaadn tu fi hihn prinsipl dehn ahn fi hayt weh bad. (Roam. 12:9) Jeezas Sermon pahn di Mongt da wahn gud egzampl a da teechin. Jeezas mi teech wi di reezn wai peepl du bad tingz. (Mach. 5:27, 28) Az di King a Gaad Kingdom, Jeezas wahn kantinyu fi teech aala wi eena di nyoo werl fi ga di sayhn vyoo a weh rait ahn weh rang laik hihn. (Heeb. 1:9) Jeezas wahn mek wi main ahn badi perfek. Imajin weh laif wahn bee laik wen yu noh haftu deel wid temtayshan ahn yu noh sofa nohmoh bikaaz a imperfekshan. Den, fainali, yu wahn injai di chroo chroo freedom weh Gaad mi pramis!
20. (a) How Jehoava yooz fi hihn freedom? (b) How yu ku benifit fahn Gaad egzampl?
20 Af koars, eevn eena di nyoo werl, wi freedom wahn ga limit. How soh? Wi lov fi Gaad ahn fi ada peepl wahn aalwayz gaid di way wi yooz wi freedom. Aal weh Jehoava di aks wi fi du da fi fala fi hihn egzampl. Hihn noh ga no limit pahn fi hihn freedom, bot hihn chooz fi mek lov gaid evriting weh ih du, inkloodin di way ih chreet wee. (1 Jan 4:7, 8) Soh ih mek sens dat di onli way wi ku reeli ahn chrooli bee free da fi kapi Jehoava egzampl.
21. (a) How Dayvid mi feel bowt Jehoava? (b) Weh wi wahn diskos eena di neks aatikl?
21 Yoo apreeshiayt di lata “gud tingz” weh Jehoava gi yu, laik di lata gud spirichwal food, gud frenz, gud goalz, ahn di hoap fi perfek freedom eena di fyoocha? (Ps. 103:5) Yu praabli feel di sayhn way how Dayvid mi feel wen ih mi seh: “Yu shoa mi di way weh leed tu laif, ahn bikaa yu deh wid mi, Ah onli feel hapi.” (Psalm 16:11) Eena di neks aatikl, wi wahn luk pahn sohn moa spirichwal chrezhaz weh wi ku fain eena Psalm 16. Dehnya wahn help wi fi si how wi ku liv di bes laif eva.
^ par. 5 Psalm 103:5: “Hihn satisfai yu wid gud tingz aal yu laif, soh dat yu wahn feel yong agen laik wahn eegl.”
^ par. 7 Proverbs 2:10-14: “Wen wizdom enta eena yu haat ahn nalij plezant tu yu soal, yu tinkin wahn kip yu sayf, an andastandin wahn protek yu. Ih wahn sayv yu fahn goh di rang way, fahn di man weh taak loan badnis, fahn peepl weh di lef di way a raichosnis fi waak eena di wayz a daaknis, fahn peepl weh hapi fi du weh rang, ahn tek plezha eena eevl tingz.”
^ par. 12 Ecclesiastes 11:9–12:1: “Rijais, yong man, wail yu yong, ahn mek yu haat feel gud eena di dayz a yu yoot. Fala di way a yu haat ahn goh weh yu aiy leed yu; bot noa dat di chroo Gaad wahn joj yu fi aala dehnya ting. Soh geh rid a tingz fahn yu haat weh ku chrobl yu, ahn protek yu badi fahn tingz weh ku hert yu, bikaaz yoot ahn di praim a laif da notn. Soh, memba yu Gran Kriyayta eena di dayz a yu yoot, bifoa di dayz a sofarin kohn ahn yu reech di yaaz wen yu wahn seh: ‘Ah noh ga no plezha eena dehn.ʼ”
^ par. 15 Psalm 32:8: “Ai wahn gi yu andastandin ahn teech yu di way yu fi goh. An Ah wahn kip mi aiy pahn yu wen Ah di gi yu advais.”