Yu don reed dehnya ishu a Di Wachtowa aredi? Wel, mek wi si if yu ku ansa dehnya kweschan:

How di Baibl shoa wi dat Gaad feel kompashan fi wi?

Wen di Izrelait dehn da-mi slayv da Eejip, Gaad mi noa weh dehn mi-di goh chroo an ih mi feel dehn payn. (Ex. 3:7; Isa. 63:9) Wee mek eena Gaad imij, soh wee ku shoa kompashan tu. Hihn feel kompashan fi wee eevn wen wi feel laik wi noh dizerv fi hihn lov.—wp18.3-E, payj 8-9.

How Jeezas teechinz mi help peepl noh fi bee prejudis?

Eena Jeezas taim, lata di Jooz mi prejudis. Krais mi tel dehn dat ih veri impoatant fi bee hombl. Ih mi teech ih falowaz dat dehn kyaahn bee sospishos a peepl er bee prejudis tuwaadz dehn. Hihn mi inkorij ih falowaz fi luk pahn wan anada laik bradaz.—w18.06, payj 9-10.

Weh wi laan fahn weh mi hapm tu Moaziz?

Moaziz mi ga wahn kloas rilayshanship wid Jehoava. (Deut. 34:10) Wen di 40 yaaz eena di wildanes mi nayli don, di peepl dehn mi staat tu komplayn agen bowt how dehn neva ga no waata. Gaad mi tel Moaziz fi taak tu di rak. Bot insteda dat, Moaziz mi schraik di rak. Jehoava mi geh beks wid Moaziz, maybi bikaaz ih neva fala inschrokshanz, er maybi bikaaz ih neva gi gloari tu Gaad fi di mirakl. (Num. 20:6-12) Dis teech wi dat ih veri impoatant fi obay Gaad ahn giv ahn gloari.—w18.07, payj 13-14.

How wi mait mek wahn mistayk if wi joj bays pahn how tingz luk pahn di owtsaid?

Chree tingz ku afek di way wi joj adaz: dehn rays er kolcha, weda dehn rich er poa, ahn dehn ayj. Ih veri impoatant dat wi laan fi si peepl di way how Jehoava si dehn! (Aks 10:34, 35)—w18.08, payj 8-12.

Wat da sohn wayz how oalda Kristyanz ku help adaz?

If wahn oalda Kristyan geh wahn chaynj a asainment, di way Jehoava vyoo dehn noh chaynj. Wahn oalda brada stil ku du wahn lat fi help adaz, ahn soh ih preshos tu Jehoava. Di oalda bradaz eena di kangrigayshan ku reech owt fi help di sista dehn hozban weh noh di serv Jehoava, help di inaktiv wan dehn, kandok Baibl stodiz, ahn du moa eena di minischri.—w18.09, payj 8-11.

Weh aal Kristyanz gat eena dehn Teechin Toolbaks?

Wi ga kantak kyaad ahn invitayshan. Wi ga ayt wandaful chrak ahn di Wachtowa an Awake! magazeen dehn. Di toolbaks gat een sohn broashoar, wi too mayn stodi buk, ahn foa byootiful veedyo, inkloodin di wan weh naym Wai Stodi di Baibl?—w18.10, payj 16.

How wahn Kristyan “bai chroot,” laik weh Proverbs 23:23 inkorij wi fi du?

Wi noh bai chroot wid moni. Bot wi doo haftu spen taim ahn werk haad fi get it.—w18.11, payj 4.

Weh wi ku laan fahn how Hozaya mi deel wid ih waif, Goamer?

Goamer mi cheet pahn Hozaya lata taim, bot hihn mi fagiv ahn an ih mi stay marid tu ahn. If wahn sista hozban komit sekshwal imoraliti, di sista ku fagiv ih hozban. Di sayhn lesn wuda aplai tu wahn brada if ih waif cheet pan ahn. If hihn er shee staat tu ga sekshwal rilayshan wid di gilti wan agen, den akaadn tu di Skripchaz, ih wudn ga nohmoh reezn fi divoas.—w18.12, payj 13.