YOO si yuself az sombadi weh tankful? Dat da wahn kweschan weh aala wi need fi aks wiself. Di Baibl seh dat eena fi wee taim, dehn wahn ga wahn lata peepl weh “noh wahn tel nobadi tanks fi notn.” (2 Tim. 3:2) Moa dan laikli, yu don meet peepl weh feel laik ada peepl haftu du tingz fi dehn, er dat peepl haftu gi dehn tingz. Dehn mait tink dehn noh haftu seh tanks fi weh dehn get. Yu wuda agree dat ih noh feel nais fi deh rong peepl weh ak laik dat?

Pahn di ada han, az Jehoava servants, wee sopoas tu “aalwayz tank Gaad.” In fak, wi shuda bee tankful fi evriting. (Kol. 3:15; 1 Tes. 5:18) Reeli, da wahn gud ting fi mek wi bee tankful. Dehn ga wahn lata reezn wai da wahn gud ting fi mek wi bee tankful.

Wahn impoatant reezn wai da wahn gud ting fi bee tankful da kaaz ih help wi fi feel gud bowt wiself. Wen sombadi seh tanks fi sohnting weh dehn get, dehn praabli feel gud bowt dehnself, ahn di persn weh ih seh tanks tu aalso feel gud. Wai wi mek wiself an adaz hapi wen wi shoa dat wi tankful? Wel, tink bowt dis egzampl: If sombadi wilin fi tek di taim owt fi du sohnting fi yu, da bikaaz dehn noa dat yu dizerv it. Dehn kay bowt yu. Wen yu riyalaiz dat, ih shuda mek yu feel gud bowt yuself. Tink bowt Root ahn how shee mosi mi feel. Moa dan laikli shee mi feel di sayhn way. Wai? Kaaz Bowaz mi reeli kain tu shee. Soh wen shee mi si humoch Bowaz mi kay bowt ahn, ih mi mek shee feel gud bowt ihself.—Ruth 2:10-13.

Ih espeshali impoatant fi bee tankful tu Gaad. Af koars, sohntaim yu mait sidong ahn tink bowt aal di spirichwal ahn fizikal gif dehn weh hihn provaid ahn weh ih kantinyu fi provaid. (Deut. 8:17, 18; Aks 14:17) Bot insteda jos tink now an agen bowt di gif dehn weh Gaad provaid, wi shuda stap ahn meditayt pahn di tingz weh Gaad bles wee ahn wi famili ahn frenz wid. Wen wi du dis, ih wahn help wi fi si humoch Jehoava lov wi, an ih wahn schrentn wi apreeshiayshan fi ahn eevn moa.—1 Jan 4:9.

Wi shuda meditayt pahn weh Jehoava gi wi ahn wi shuda aalso tank ahn. (Ps. 100:4, 5) Sohn peepl seh dat “wen yu shoa peepl dat yu tankful, ih mek dehn feel hapiya.”

Wahn nada reezn wai ih gud fi bee tankful da bikaaz ih schrentn yu frenship dehn. Aala wi waahn feel laik sombadi apreeshiayt wi. Wen yu tank sombadi fahn yu haat fi sohnting weh dehn du fi yu, di too a unu wahn staat tu bee beta frenz. (Roam. 16:3, 4) Pahn tap a dat, peepl weh tankful ten fi help ada peepl. Dehn noatis wen adaz kain tu dehn, ahn dat moov dehn fi bee kain tu adaz tu. Yes, wen yu help ada peepl ih mek yu hapi. Da jos laik weh Jeezas mi seh: “Gaad bles yu moa wen yu gi dahn wen yu get.”—Aks 20:35.

Robert Emmons, hoo da wan a di dairektaz da di University of California weh di werk pahn wahn stodi proajek bowt weh ih meen fi bee tankful, mi seh: “Fi mek yu bee wahn tankful persn, yu haftu andastan dat wi pen pahn wan anada. Sohntaim wi giv ahn sohntaim wi geh.” Wi pen pahn ada peepl eena wahn lata difrent wayz fi mek wi ku kantinyu liv ahn ga wahn hapi laif. Fi egzampl, dehn  mait provaid wi wid food er dehn mait haftu ten tu wi wen wi sik. (1 Kor. 12:21) Sombadi weh tankful apreeshiayt weh adaz du fi dehn. Soh, yoo don di mek it wahn habit fi shoa dat yu tankful fi weh adaz du fi yu?

Wahn nada reezn wai da wahn gud ting fi bee tankful da bikaaz ih help wi fi foakos pahn di pazitiv raada dan pahn di negitiv. Eena wahn sens, yu main werk laik wahn schrayna. Ih alow yu fi foakos pahn sertn tingz weh di hapm rong yu wail ih blak owt di res. Yu ten fi foakos pahn pazitiv tingz ahn pay les atenshan tu prablemz. Di moa yu shoa dat yu tankful, di moa yu wahn foakos pahn pazitiv tingz, ahn dat wahn mek yu eevn moa tankful. If yu foakos pahn tingz weh yu ku bee tankful fa, ih wahn help yu fi du weh di apasl Paal mi rait: “Unu mos aalwayz bee hapi eena di Laad.”—Fil. 4:4.

Yu wahn fain owt dat wen yu tankful, ih help yu fi noh tink eena wahn negitiv way. Ih reeli haad fi feel tankful fi sohnting ahn feel jelos, sad, er beks at di saym taim. Peepl weh tankful noh foakos pahn mateeryal tingz. Dehn apreeshiayt weh dehn gat ahn dehn noh aalwayz di chrai fi geh moa tingz.—Fil. 4:12.

Az wahn Kristyan, yu noa dat Saytan wuda waahn mek yu feel sad ahn diskorij wen yu di fays haad taimz eena dehnya laas dayz. Hihn wuda lov if yu wuda divelop wahn negitiv atichood ahn staat tu komplayn bowt evriting. If yoo da da kaina persn, ih wuda bee haada fi mek peepl lisn tu yu wen yu di preech di gud nyooz. Akchwali, fi bee tankful ahn di froot a di spirit goh said bai said. Fi egzampl, wi ekspeeryens jai bikaaz a weh wi si di gud tingz weh Gaad don gi wi ahn wi ga fayt eena weh hihn pramis fi di fyoocha.—Gal. 5:22, 23.

Az wan a Jehoava peepl, yu praabli agree wid weh peepl eena dis aatikl seh bowt how fi bee tankful. Bot stil, yu riyalaiz dat ih noh mait aalwayz eezi fi bee tankful ahn pazitiv. Bot noh mek dat diskorij yu. Yu kud laan how fi bee tankful ahn kantinyu fi bee tankful. How yu ku du dat? Tek taim evri day fi tink bowt sohn tingz eena yu laif weh yu ku bee tankful fa. Di moa yu du dat, di eeziya ih wahn bee fi mek yu bee tankful. Dat wahn mek yu hapiya dan dehn wan weh foakos pahn di haad taimz weh dehn di goh chroo. Foakos pahn di gud tingz weh Gaad an adaz du weh inkorij yu ahn weh mek yu hapi. Yu ku eevn staat tu rait dehn dong eena wahn buk. Eena da buk, yu ku rait too er chree tingz weh yu tankful fa fi da day.

Sohn peepl weh stodi bowt how fi bee tankful seh dat “wen wi praktis how fi bee tankful, ih ku chaynj di way wi brayn werk soh dat ih eeziya fi mek wi feel gud bowt wi laif.” Wahn tankful persn da wahn hapi persn. Soh konk yu blesinz, injai di gud tingz weh hapm tu yu, an aalwayz bee tankful! Raada dan tek di gud tingz weh hapm eena yu laif fi grantid, “gi tanks tu Jehoava, kaa hihn gud.” Yes, “aalwayz tel Gaad tanks.”—1 Chron. 16:34; 1 Tes. 5:18.