STODI AATIKL 50
Da Jehoava Set Wi Free!
“Unu mos . . . anonks freedom eena di lan tu aala di peepl weh liv deh.”—LEV. 25:10.
SANG 22 Pray Mek di Kingdom Kohn!
WEH WI WAHN DISKOS? *
1-2. (a) Wat da wahn joobilee? (Si di baks “ Wat Da-Mi di Joobilee?”) (b) Weh Jeezas mi taak bowt da Look 4:16-18?
EENA sohn konchri, dehn ga speshal ivents fi selibrayt wen wahn king er wahn kween rool fi 50 yaaz. Dehn naamali rifaa tu da yaa az di roola joobilee yaa. Peepl mait kantinyu fi selibrayt dis joobilee fi sohn taim; ih ku laas wahn day, wahn week, er eevn langa. Bot wen dehndeh selibrayshan en, peepl ferget bowt di jai weh ih mi bring.
2 Wi wahn luk pahn wahn beta joobilee, wan weh eevn beta dan di Joobilee weh di Izrelait dehn doz selibrayt evri 50 yaaz bak eena dehn dayz. Da Joobilee mi bring freedom tu di peepl weh mi selibrayt it. Wai wee shuda waahn laan bowt it? Bikaaz ih rimain wi a wahn wandaful araynjment weh Jehoava mek fi wi. Da araynjment wahn bring wi freedom weh wahn laas fareva, ahn wi ku benifit fan it eevn now. Jeezas mi taak bowt dis wandaful freedom.—Reed Look 4:16-18.
Peepl da Izrel mi hapi joorin di Joobilee, bikaaz di Izrelait dehn hoo da-mi slayv mi free fi goh bak tu dehn famili ahn dehn lan (Paragraaf 3) *
3. Akaadn tu Leviticus 25:8-12, how di Izrelait dehn mi benifit fahn di Joobilee?
3 Fos, if wi diskos di Joobilee weh Gaad mi araynj way way bak fi ih peepl, ih wahn eeziya fi mek wi andastan weh Jeezas mi meen wen hihn mi taak bowt freedom. Jehoava mi tel di Izrelait dehn: “Unu fi kip evri 50th yaa hoali an anonks freedom eena di lan tu aala di peepl weh liv deh. Ih wahn bee wahn Joobilee fi unu, an eech wan a unu wahn goh bak tu ih lan an eech wan a unu fi goh bak tu ih famili.” (Reed Leviticus 25:8-12.) * Eena di aatikl bifoa dis wan, wi mi diskos how di Izrelait dehn mi benifit fahn di Sabat. Bot, how di Izrelait dehn mi benifit fahn di Joobilee? Wel, imajin dat wahn Izrelait mi oa wahn lata moni, an ih mi haftu sel ih lan fi pay bak weh ih mi oa. Joorin di Joobilee yaa, hihn wuda mi get bak ih lan. Soh di man kuda mi “goh bak tu ih lan,” an eena di fyoocha ih chiljren kuda mi inherit di lan. Eena wahn nada sichuwayshan, wahn man hoo mi oa moni maybi mi wahn haftu sel ihself er wan a ih chiljren az wahn slayv fi pay bak weh ih mi oa. Bot joorin di Joobilee yaa, di slayv mi fi “goh bak tu ih famili.” Soh nobadi mi wahn bee wahn slayv fareva wid no hoap! Dis araynjment mi shoa dat Jehoava reeli kay bowt ih peepl!
4-5. Wai ih impoatant fi mek wi laan bowt di Joobilee?
4 Wat da wahn neks benifit a di Joobilee? Jehoava mi seh chroo Moaziz: “Nobadi monks unu shuda geh poa, kaaz fi shoar Jehoava wahn bles unu eena di lan weh Jehoava unu Gaad di gi unu fi liv eena az wahn inheritans.” (Deut. 15:4) Dat veri difrent fahn weh di hapm eena di werl rong wi tudeh! Tudeh wi si di rich di get richa ahn di poa di get eevn moa poa.
5 Az Kristyanz, wee noh deh anda di Laa weh Jehoava mi gi di Izrelait dehn chroo Moaziz. Dis meenz dat wi noh fala di laa bowt di Joobilee weh free aala di slayv dehn, kyansl weh wahn persn oa, ahn gi peepl bak dehn famili lan. (Roam. 7:4; 10:4; Ifee. 2:15) Bot, ih impoatant fi mek wi laan bowt di Joobilee. Wai? Bikaaz wee aalso ku injai wahn sertn freedom weh rimain wi a di araynjment weh Jehoava mi mek fi di Izrelait dehn.
JEEZAS MI ANONKS FREEDOM
6. Weh hyoomanz need freedom fram?
6 Sin da wahn reeli kruwil faam a slayvri weh aala wi need freedom fram. Bikaaz wi da sinaz, wi geh oal, wi geh sik, ahn wi ded. Wahn lata peepl si proof dat dis da chroo wen dehn luk eena wahn miro er goh da wahn dakta fi chreetment. Wi aalso geh diskorij bikaaz wi komit sin. Di apasl Paal mi seh dat hihn da-mi ‘laik wahn prizna tu di laa weh ih badi mi-di fala, weh mi-di mek ih sin.ʼ Hihn mi kantinyu fi seh: “Poa mee! Ah da wahn mizarabl man! Hoo wahn free mi fahn weh dis badi waahn Ah du, Roam. 7:23, 24.
dis badi weh det di kanchroal?”—7. Weh Aizaiya mi prafesai bowt freedom?
7 Wi soh hapi dat Gaad provaid wahn way fi mek wi ku geh free fahn sin. Jeezas da di wan hoo mek dis freedom pasabl. Moa dan 700 yaaz bifoa Jeezas mi kohn dong pahn di ert, di prafit Aizaiya mi prafesai dat wahn taim wahn kohn wen peepl wahn bee free. Da freedom wahn bee beta dan di kaina freedom weh di Izrelait dehn mi injai joorin dehn Joobilee yaa. Hihn mi rait: “Di spirit a di Sovrin Laad Jehoava deh pahn mi, bikaaz Jehoava mi anoint mi fi tel di gud nyooz tu di hombl wan dehn. Hihn mi sen mi fi heel di wan dehn weh feel sad eena dehn haat, fi preech freedom tu di prizna dehn.” (Isa. 61:1) Da hoo da prafesi di taak bowt?
8. Da hoo Aizaiya prafesi di taak bowt?
8 Da impoatant prafesi bowt freedom mi staat tu kohn chroo afta Jeezas mi staat ih minischri. Wen Jeezas mi gaahn da di sinagag da Nazaret, hihn mi reed di sayhn werdz weh Aizaiya mi rait tu di Jooz weh mi gyada deh. Jeezas seh dat di prafesi mi-di taak bowt hihn. Hihn mi seh: “Gaad Spirit deh pahn mi, sayka weh ih pik mi fi preech di Gud Nyooz tu di poa peepl dehn. Ih sen mi fi tel di prizna dehn dat dehn wahn free, ahn fi tel blain peepl dat dehn wahn si. Ahn aala unu weh dehn chaans op wahn geh free. Dis da di taim wen Gaad wahn smail pahn ih peepl dehn.” (Look 4:16-19) How Jeezas mi fulfil da prafesi?
DI FERS PEEPL FI BEE FREE
Da di sinagag da Nazaret, Jeezas anonks freedom (Paragraaf 8-9)
9. Weh wahn lata peepl eena Jeezas taim mi waahn freedom fram?
9 Eena Jeezas taim, peepl mi don staat tu geh di freedom weh Aizaiya mi prafesai bowt ahn weh Jeezas mi taak bowt. Wee ku bileev dis bikaaz Jeezas mi seh: “Tudeh, dis sed Skripcha weh unu yehr Ah jos don reed kohn chroo.” (Look 4:21) Wahn lata peepl weh mi hyaa weh Jeezas reed mi praabli di hoap fi geh free fahn di Roaman govament. Jeezas disaipl dehn mi praabli feel di saym way. Bikaaz wahn lee wail layta, too a dehn mi seh: “Wee mi-di hoap dat hihn mi wahn bee di Wan weh mi wahn free Izrel.” (Look 24:13, 21) Bot wi noa dat Jeezas neva inkorij ih falowaz fi fait gens di kruwil roolaship a di Roamanz. Insted, hihn mi tel dehn fi gi “Seeza weh bilangz tu Seeza.” (Mach. 22:21) Soh how Jeezas mi free peepl at da taim?
10. Weh Jeezas mi free peepl fram?
Mach. 5:31-37; 15:1-11) Di peepl dehn weh mi klaym seh dat dehn mi-di help adaz fi serv Gaad neva mi-di serv Gaad eena di rait way dehnself, soh da mi laik if dehn mi blain. Bikaaz dehn mi rijek di Mesaiya ahn di chroot weh hihn mi teech, dehn neva kohn fi noa Gaad—da mi laik dehn mi eena daaknis—ahn dehn neva geh fagivnis fi dehn sinz. (Jan 9:1, 14-16, 35-41) Bikaaz Jeezas mi teech di chroot ahn set wahn gud egzampl, hihn mi shoa hombl peepl how dehn ku bee free fahn faals teechinz.—Maak 1:22; 2:23–3:5.
10 Gaad Son mi kohn fi mek peepl geh freedom eena too wayz. Fos, Jeezas mi help peepl fi bee free fahn di rang teechinz a di rilijos leedaz. Wahn lata Jooz bak den mi fala hyooman chradishanz ahn rang bileef bikaaz dat da weh dehn mi yoostu. (11. Wat da-mi di sekant way how Jeezas mi provaid freedom?
11 Sekant, Jeezas mi mek it pasabl fi mek peepl get free fahn slayvri tu di sin weh wi inherit. Bikaaz Jeezas mi giv ih laif az wahn ransom, Gaad ku fergiv di sinz a enibadi weh ga fayt eena di ransom, ahn weh shoa dehn fayt bai di tingz weh dehn du. (Heeb. 10:12-18) Jeezas mi seh: “If Gaad Son mek unu geh free fahn sin, den unu wahn free fi chroo.” (Jan 8:36) Da freedom mi way beta dan di freedom weh wahn Izrelait kuda mi geh joorin di Joobilee yaa! Fi egzampl, wahn man weh mi geh ih freedom joorin di Joobilee yaa mait en op az wahn slayv agen, ahn pahn di langa ron, ih mi wahn ded tu. Bot di freedom weh Jeezas provaid wahn laas fareva.
12. Hoo da-mi di fos fi benifit fahn di freedom weh Jeezas mi anonks?
12 Pahn Pentikaas 33 C.E., Jehoava mi anoint di apasl dehn an ada faytful man an uman wid hoali spirit. Hihn mi adap dehn az fi hihn pikni soh dat eena di fyoocha hihn ku rezorek dehn da hevn fi rool wid Jeezas. (Roam. 8:2, 15-17) Dehnya anointid Kristyanz da-mi di fers fi benifit fahn di freedom weh Jeezas mi anonks eena di sinagag da Nazaret. Dehnya man an uman da-mi no langa slayv tu di faals teechinz a di Jooish rilijos leedaz er tu dehn chradishanz weh neva bays pahn di Baibl. Gaad mi aalso kansida dehn fi bee free fahn sin weh leed tu det. Dis simbolik Joobilee, er freedom, weh mi staat wen Krais falowaz mi geh anointid eena 33 C.E., wahn en wen Krais Towzn-Yaa Rool finish. Weh wahn hapm bitween now ahn di en a Krais Towzn-Yaa Rool?
FREEDOM FI MILYANZ MOA
13-14. Apaat fahn anointid Kristyanz, hoo els ku geh di freedom weh Jeezas mi anonks?
13 Tudeh day, milyanz a sinsyaa peepl fahn aal oava di werl mek op di groop weh Jeezas kaal di “ada sheep.” (Jan 10:16, NW) Gaad neva chooz dehn fi rool wid Jeezas da hevn. Insted, di Baibl seh dat dehn ga di hoap fi liv fareva pahn di ert. Dat da fi yoo hoap?
14 Eevn now, yu ku injai som a di gud tingz weh di anointid dehn di injai. Bikaaz yu ga fayt eena Jeezas sakrifais, yu ku aks Jehoava fi fergiv yu sin dehn. Soh yu ku ga pees bikaaz yu noa dat Gaad pleez wid yu. (Ifee. 1:7; Rev. 7:14, 15) Aalso, tink bowt di blesin dehn yu injai bikaaz yu free fahn faals teechinz. Jeezas mi seh: “Unu wahn noa di chroot bowt Gaad, ahn da sayhn chroot wahn mek unu free fi chroo.” (Jan 8:32) Wee veri hapi fi ga dis freedom!
15. Weh blesinz ahn freedom wee ku ga eena di fyoocha?
15 Yu ku ekspek grayta freedom eena di fyoocha. Soon, Jeezas wahn dischrai faals rilijan an aala di wikid govament dehn. Gaad wahn protek di “big big krowd” a peepl hoo di serv hihn, ahn den hihn wahn alow dehn fi injai blesinz eena wahn paradais pahn di ert. (Rev. 7:9, 14) Wahn lata peepl wahn geh rezorek ahn dehn wahn ga di apachooniti fi bee free fahn aala di bad rizolts a Adam sin.—Aks 24:15.
16. Weh wandaful freedom hyoomanz wahn geh eena di fyoocha?
16 Joorin Krais Towzn-Yaa Rool, hihn ahn dehn wan weh wahn rool wid ahn da hevn wahn werk tugeda fi help hyoomanz fi ga perfek helt ahn wahn perfek rilayshanship wid Gaad. Di Izrelait dehn mi injai freedom joorin di Joobilee, bot hyoomanz wahn injai dis faar grayta freedom joorin Krais Towzn-Yaa Rool. Dis wahn meen dat hyoomanz hoo stay laayal tu Jehoava wahn bee perfek ahn free fahn sin.
Eena di nyoo werl, wi wahn injai di du yoosful werk ahn wi wahn fain satisfakshan eena it (Paragraaf 17)
17. Akaadn tu Isaiah 65:21-23, weh wahn hapm tu Gaad peepl? (Koment pahn di picha pahn di kova.)
17 Isaiah 65:21-23 * diskraib weh laif pahn ert wahn bee laik eena di fyoocha. (Reed.) Wi noh wahn bee layzi ahn du notn. Insted, di Baibl shoa dat Gaad peepl wahn di du yoosful werk weh wahn mek dehn feel hapi. Da di en a di Towzn-Yaa Rool, Gaad peepl ku bee shoar dat ‘Gaad wahn set dehn free soh dat dehn noh wahn hafu ded nohmoh. Gaad wahn free dehn soh dat ih ku gi dehn di sayhn gloari weh bilangz tu ih pikni dehn.ʼ—Roam. 8:21.
18. Wai wi ku chros dat wi wahn ga wahn hapi fyoocha?
18 Jos laik how Jehoava mi mek shoar dat di Izrelait dehn wuda mi ga taim fi werk ahn fi res, hihn wahn du di sayhn ting fi fi hihn peepl joorin Krais Towzn-Yaa Rool. Wi wership tu Gaad impoatant fi mek wi bee hapi tudeh, an eena di nyoo werl, wi ku bee shoar dat fi hihn peepl wahn ga wahn lata taim fi wership hihn. Aal faytful hyoomanz wahn bee hapi joorin Krais Towzn-Yaa Rool, bikaaz aala wi wahn ga werk weh wahn mek wi feel hapi, an aala wi wahn di serv Jehoava.
SANG 142 Hoal Aan tu di Hoap Weh Gaad Gi Wi
^ párr. 5 Jehoava mi provaid wahn speshal araynjment fi gi di Izrelait dehn freedom. Da araynjment da-mi di Joobilee. Az Kristyanz, wee noh deh anda di Laa weh Jehoava mi gi di Izrelait dehn chroo Moaziz; bot stil, di Joobilee ga meenin fi wee. Eena dis aatikl, wi wahn laan how di Joobilee da Izrel rimain wi a sohnting weh Jehoava du fi wi ahn how wee ku benifit fan it.
^ párr. 3 Leviticus 25:8-12:““‘Unu wahn konk sevn sabat yaa, sevn taimz sevn yaaz, ahn di dayz a di sevn sabat yaaz wahn ad op tu 49 yaaz. 9 Den pahn di tent a di sevent mont, unu wahn bloa di haan lowd; pahn Atoanment Day, unu fi mek di hoal lan wehpaat unu liv hyaa di song a di haan. 10 Unu mos mek evri 50th yaa hoali an anonks freedom eena di lan tu aala di peepl weh liv deh. Ih wahn bee wahn Joobilee fi unu, an eech wan a unu wahn goh bak tu ih lan an eech wan a unu fi goh bak tu ih famili. 11 Evri 50th yaa wahn bee wahn Joobilee fi unu. Unu noh wahn plaant seed ner reep weh groa pan ih oan fahn di grayn weh lefoava, ner gyada di grayp fahn di vain weh noh chrim. 12 Kaaz da yaa da wahn Joobilee. Ih fi bee hoali tu unu. Unu onli ku eet weh di lan projoos bai ihself.ʼ””
^ párr. 17 Isaiah 65:21-23: “Ahn dehn wahn bil hows ahn dehn saym wan wahn liv een deh; ahn dehn wahn plaant aachad ahn eet fahn di froot weh ih giv. 22 Dehn noh wahn bil hows jos fi mek sombadi els liv een deh; dehn noh wahn plaant ahn sombadi els get fi eet di froot. Di dayz weh mi peepl liv wahn bee laik di lent a taim weh wahn chree liv; ahn di werk weh fi mee peepl dehn du wid dehn oan han, dehn wahn geh fi injai tu nohmoh nohmoh. 23 Dehn noh wahn hafu werk haad fi notn, ner dehn noh wahn baan pikni weh wahn sofa; bikaa dehn da di pikni a di wan dehn weh Jehoava bles, dehn ahn aal hoo baan afta dehn.”
^ párr. 63 DI PICHA: Joorin di Joobilee, sohn man weh da-mi slayv geh set free ahn dehn di goh bak tu dehn famili ahn dehn lan.