1-2. Weh Angelito ekspeeryens teech wi fi du?

FI YOO payrents da Jehoava Witnisiz? If dat da di kays, yu haftu memba dat yu da noh Jehoava fren jos bikaaz yu payrents da fi hihn fren. Weda wi payrents serv Gaad er nat, eech wan a wi haftu werk haad fi ga wahn kloas frenship wid Jehoava.

² Tink bowt di ekspeeryens a wahn brada weh naym Angelito. Fi hihn hoal famili da Jehoava Witnisiz. Bot, wen hihn mi yonga, hihn neva feel reeli kloas tu Gaad. Hihn seh: “Ah jos mi-di serv Jehoava bikaaz Ah mi waahn du weh mi famili mi-di du.” Bot, Angelito mi disaid fi spen moa taim di reed Gaad Werd ahn fi tink bowt weh ih reed, ahn hihn mi aalso staat tu pray tu Jehoava moa dan bifoa. Weh hihn mi laan? Angelito seh: “Ah mi laan dat di onli way fi geh kloas tu mai Faada, Jehoava, da fi get fi noa ahn miself.” Angelito ekspeeryens mek wi tink bowt sohn impoatant kweschanz laik: Wat da di difrens fi noa bowt Jehoava ahn fi noa Jehoava gud? Ahn how wi ku geh fi noa Jehoava gud?

3. Wat da di difrens fi noa bowt Jehoava ahn fi noa Jehoava gud?

³ Wi mait tink dat wi noa Jehoava jos bikaaz wi noa fi hihn naym er som a di ting dehn weh hihn seh er du. Bot fi noa Jehoava gud meenz moa dan dat. Fi mek wi ku akchwali noa Jehoava, wi haftu spen taim di laan bowt hihn  ahn fi hihn wandaful kwalitiz. Den wi wahn ku staat tu andastan wai hihn seh ahn du sertn tingz. Dis wahn help wi fi noa weda er nat Jehoava laik weh wi di tink ahn weh wi di du. Wans wi noa weh Jehoava waahn wi du, wi need fi du it.

4. How Baibl egzamplz ku help wi if wi stodi bowt dehn?

⁴ Peepl mait teez wi bikaaz wi waahn serv Jehoava, ahn dehn mait eevn ton gens wi wen wi staat tu goh da meetin. Bot, wans wi chros Jehoava, hihn wahn neva abandan wi. Wi wahn di bil wahn kloas frenship wid Gaad weh wahn laas fareva. Yu tink wi ku noa Jehoava dat gud? Yes, wi kud! Di egzampl a imperfek man laik Moaziz ahn King Dayvid, proov dat ih pasabl. Az wi stodi bowt weh dehn mi du, wi wahn ansa too kweschan: How dehn mi get fi noa Jehoava? Ahn wat da sohn lesn weh wi ku laan fahn fi dehn egzamplz?

5. Weh Moaziz mi chooz fi du?

⁵ Moaziz mi chooz fi serv Gaad. Wen Moaziz mi bowt 40 yaaz oal, hihn mi chooz fi spen taim wid Gaad peepl, di Izrelait dehn, raada dan fi mek peepl noa hihn az “di son a Fayro daata.” (Heeb. 11:24) Moaziz mi giv op evriting weh ih mi ga soh dat ih kuda mi serv Jehoava. Wen Moaziz mi tek said wid di Izrelait dehn, hihn mi noa dat Fayro mi wahn geh beks bad. Fayro da-mi wahn veri powaful king, ahn di Eejipshan dehn mi tink dat hihn da-mi wahn gaad. Dis mi shoa dat Moaziz mi ga schrang fayt! Moaziz mi chros Jehoava. Dis da-mi di reezn wai aal chroo Moaziz laif hihn mi ga wahn kloas frenship wid Jehoava.—Prov. 3:5.

6. Weh wi ku laan fahn Moaziz egzampl?

⁶ Wat da di lesn fi wee? Jos laik Moaziz, aala wi ga wahn disizhan fi mek: Wi need fi chooz weda wi waahn serv Gaad ahn bee frenz wid fi hihn peepl. Wi mait haftu giv op wahn lata tingz soh dat wi ku serv Gaad, ahn dehn wan weh noh noa Jehoava mait ton gens wi. Bot if wi chros wi hevnli Faada, wi ku bee shoar dat hihn wahn sopoat wi!

7-8. Weh Moaziz mi kantinyu fi laan?

⁷ Moaziz mi kantinyu fi laan bowt Jehoava kwalitiz ahn fi du weh Jehoava mi waahn ih du. Fi egzampl, wen Jehoava mi aks Moaziz fi leed di Izrelait dehn owta di lan a Eejip, Moaziz neva ga moch kanfidens ahn hihn mi tel Jehoava oava an oava dat hihn neva feel kwalifai fi du weh Jehoava mi-di aks ahn fi du. Gaad ansa mi shoa dat hihn mi ga kompashan fi Moaziz, ahn dat hihn mi andastan how Moaziz mi feel. (Ex. 4:10-16) Sayka dat, Moaziz kuda mi kehr sohn powaful mesij a jojment tu Fayro. Moaziz mi si how Jehoava mi yooz Ih powa wen ih mi sayv di Izrelaits ahn dischrai Fayro ahn fi hihn aami eena di Red See.—Ex. 14:26-31; Ps. 136:15.

⁸ Afta Moaziz mi leed di Izrelait dehn owta Eejip, dehn mi kip di komplayn bowt evriting. Stil, Moaziz mi si humoch payshens Jehoava mi ga wid di peepl dehn weh Hihn mi free fahn slayvri. (Ps. 78:40-43) Ahn wen Moaziz mi aks Jehoava fi mek ih neva dischrai di Izrelait dehn, Moaziz mi aalso si di hyoomiliti weh Jehoava ga wen Ih mi lisn tu ahn.—Ex. 32:9-14.

9. Akaadn tu Heebrooz 11:27, weh kaina rilayshanship Moaziz mi ga wid Jehoava?

 ⁹ Afta Moaziz mi help free di Izrelait dehn fahn Eejip, fi hihn rilayshanship wid Jehoava mi geh soh kloas dat da-mi laik if hihn kuda mi si fi hihn hevnli Faada. (Reed Heebrooz 11:27.) Di Baibl shoa how kloas dehn mi kloas. Ih seh: “Jehoava mi taak tu Moaziz fays-tu-fays, jos laik how wahn man wuda taak tu wahn nada man.”—Ex. 33:11.

10. Weh wi need fi du fi mek wi ku noa Jehoava gud?

¹⁰ Wat da di lesn fi wee? Fi mek wi noa Jehoava gud, wi noh need fi jos laan bowt ih kwalitiz bot wi aalso need fi du fi hihn wil. Tudeh, Jehoava wil da fi “sayv aal peepl ahn ih waahn dehn kom fi noa di chroot.” (1 Tim. 2:3, 4) Wan way how wi du Gaad wil da wen wi teech adaz bowt Jehoava.

11. How wi geh fi noa Jehoava beta wen wi teech adaz bowt ahn?

¹¹ Moas a di taim, wen wi teech adaz bowt Jehoava da den wi get fi noa ahn beta. Fi egzampl, wi si how Jehoava shoa kompashan fi peepl wen hihn help wi fain dehn wan hoo waahn bee fi hihn fren. (Jan 6:44; Aks 13:48) Wi si dat Gaad Werd di Baibl ga powa bikaaz ih help wi Baibl styoodents fi stap dehn bad habits an ih help dehn fi mek chaynjiz eena dehn laif. (Kol. 3:9, 10) Ahn wi si proof dat Gaad ga payshens wid di peepl eena wi teritori bikaaz hihn sen wi oava an oava fi help dehn laan bowt hihn soh dat dehn ku geh sayv.—Roam. 10:13-15.

12. Akaadn tu Exodus 33:13, weh Moaziz mi aks fa, ahn wai?

¹² Moaziz mi valyu ih frenship wid Jehoava. Jehoava mi yooz Moaziz fi du wahn lata powaful werk, soh Moaziz mi noa Jehoava gud. Bot hihn mi waahn noa Jehoava beta soh hihn mi aks ahn fi help ahn du dat. (Reed Exodus 33:13.) * Moaziz mi bowt 80 yaaz oal wen hihn mi aks Jehoava dat, bot hihn mi noa dat ih mi stil ga wahn lat moa fi laan bowt ih lovin hevnli Faada.

13. Wat da wan way wee ku proov dat wi valyu wi frenship wid Gaad?

¹³ Wat da di lesn fi wee? Noh mata how lang wi di serv Jehoava, wi fi valyu wi frenship wid Jehoava. Wan way how wi ku proov dat wi valyu wi frenship wid Gaad da fi pray tu ahn.

14. Wai pryaa impoatant fi help wi laan moa bowt Gaad?

¹⁴ If yu waahn bee sombadi kloas fren, unu haftu ga gud kamyoonikayshan. Soh fi ga wahn kloas frenship wid Gaad, yu haftu pray tu ahn wahn lat ahn noh bee frayd fi tel ahn weh yu di tink ahn how yu di feel. (Ifee. 6:18) Krista, wahn sista hoo liv da Turkey, seh: “Mai lov ahn chros fi Jehoava groa evritaim Ah poar owt mi haat tu ahn eena pryaa ahn wen Ah si how hihn help mi. Wen Ah si how Jehoava ansa mi pryaaz, ih help mi fi si Jehoava az wahn Faada ahn wahn Fren.”

15. Weh Jehoava mi seh bowt King Dayvid?

¹⁵ Wen King Dayvid mi baan, fi hihn payrents an evribadi rong hihn mi wership Jehoava Gaad. Bot Dayvid neva mi-di serv Jehoava jos bikaaz fi hihn  famili mi-di du it. Hihn mi werk pahn fi hihn oan rilayshanship wid Gaad, ahn Jehoava mi lov ahn wahn lat. Jehoava mi seh dat Dayvid da-mi wahn man weh mi “kloas tu [fi Hihn] haat.” (Aks 13:22) How Dayvid mi get fi bee soh kloas tu Jehoava?

16. Weh Dayvid mi laan bowt Jehoava jos bai weh ih si eena kriyayshan?

¹⁶ Dayvid mi laan bowt Jehoava fahn kriyayshan. Wen Dayvid mi yong, hihn doz spen wahn lata taim owtsaid, di tek kayr a ih pa sheep. Ih ku bee dat da den hihn mi staat tu meditayt pahn kriyayshan. Fi egzampl, wen Dayvid doz luk op eena di skai da nait, hihn mi si towznz a staar. Bot hihn neva jos admaiya di staarz, hihn mi tink bowt di kwalitiz a di Wan hoo mek dehn. Dayvid mi rait dat di ting dehn eena di yoonivers di shoa Gaad powa, ahn di skai di giv proof a di werk weh Jehoava du wid fi hihn oan han. (Ps. 19:1, 2) Wen Dayvid mi tink bowt di wandaful way how Jehoava mi mek hyoomanz, hihn mi si how waiz Jehoava waiz. (Ps. 139:14) Wen Dayvid mi meditayt pahn di ting dehn weh Jehoava kriyayt, hihn mi riyalaiz dat hihn smaal kompyaa tu Jehoava.—Ps. 139:6.

17. Weh wee ku laan wen wi meditayt pahn kriyayshan?

¹⁷ Wat da di lesn fi wee? Wi need fi shoa inchres eena kriyayshan. Tek di taim fi noatis di byootiful werl weh Jehoava kriyayt. Chrai fi meditayt pahn weh yu ku laan bowt Jehoava fahn kriyayshan, laik fahn di plaant dehn, di animal dehn, ahn peepl. Den eech day yu wahn laan moa bowt yu lovin Faada. (Roam. 1:20) Ahn evri day yu wahn aalso si yu lov far ahn groa moa ahn moa.

18. Akaadn tu Psalm 18, weh Dayvid mi rekonaiz?

¹⁸ Dayvid mi rekonaiz dat Jehoava mi-di help ahn. Fi egzampl, wen Dayvid mi-di protek ih pa sheep fahn wahn laiyan ahn fahn wahn bayr, hihn mi rekonaiz dat da mi Jehoava hoo mi help ahn kil dehn wail animal. Wen Dayvid mi win di fait gens di jaiyant Golaiyat, hihn mi aalso rekonaiz dat da Jehoava mi-di gaid ahn. (1 Sam. 17:37) Ahn wen hihn mi eskayp fahn jelos King Saal, Dayvid mi noa dat da mi Jehoava hoo mi sayv ahn. (Ps. 18, sup) If Dayvid da-mi wahn prowd persn, hihn maita mi tink dat hihn mi du aal dehn tingz bai ihself. Bot Dayvid mi hombl, soh hihn kuda mi rekonaiz dat da Jehoava hoo mi-di help ahn.—Ps. 138:6.

19. Weh wi ku laan fahn Dayvid egzampl?

¹⁹ Wat da di lesn fi wee? Wi need fi du moa dan jos aks Jehoava fi help. Wi need fi aalso rekonaiz wen ahn how hihn di help wi. If wi hombl, wi wahn andastan dat wi kyaahn du evriting bai wiself ahn dat Jehoava wahn help wi du weh wi kyaahn du. An evri taim wi si how Jehoava help wi, wi frenship wid hihn wahn groa schranga. Aizak, wahn brada fahn Fiji hoo di serv Jehoava fi wahn lang taim, mi ekspeeryens dis. Hihn seh: “Wen Ah luk bak pahn mi laif, Ah ku si how Jehoava help mi fahn di taim Ah staat tu stodi di Baibl op tu tudeh. Sayka dat, Ah staat tu si Jehoava az sombadi reel.”

20. Weh wi ku laan fahn Dayvid rilayshanship wid Gaad?

²⁰ Dayvid mi kapi Jehoava kwalitiz. Jehoava mek wee wid di abiliti fi kapi fi hihn kwalitiz. (Gen. 1:26) Di moa wi laan bowt Jehoava kwalitiz, di beta wi wahn ku kapi fi hihn egzampl. Dayvid mi get fi noa Jehoava gud, soh hihn kuda mi kapi Jehoava  kwalitiz wen hihn mi haftu deel wid adaz. Kansida wahn egzampl. Dayvid mi sin gens Jehoava wen hihn mi komit adolchri wid Bat-Sheeba ahn wen ih mi merda fi shee hozban. (2 Sam. 11:1-4, 15) Bot bikaaz Dayvid mi shoa mersi tu adaz, Jehoava mi chooz fi shoa mersi tu Dayvid. Dayvid mi ga wahn gud frenship wid Jehoava, bikaaz a dat, di Izrelait dehn mi lov ahn wahn lat ahn Jehoava mi yooz hihn az wahn egzampl fi di ada king dehn a Izrel.—1 Ki. 15:11; 2 Ki. 14:1-3.

21. Akaadn tu Ifeezhanz 4:24 ahn 5:1, weh wahn hapm if wi “chrai fi bee laik Gaad”?

²¹ Wat da di lesn fi wee? Wi need fi “chrai fi bee laik Gaad.” Wen wi du dis, wi noh onli benifit wiself bot ih aalso help wi fi laan moa bowt Jehoava. Wen wi kapi Gaad kwalitiz, wi aalso proov dat wee da fi hihn pikni.—Reed Ifeezhanz 4:24; 5:1.

22-23. Weh wahn hapm if wi put intu praktis weh wi laan bowt Jehoava?

²² Laik weh wi don si, wi ku laan bowt Jehoava chroo kriyayshan ahn chroo fi hihn Werd, di Baibl. Di Baibl gat een wahn lata egzampl a faytful servants a Gaad weh wi ku kapi, laik Moaziz ahn Dayvid. Jehoava don du fi hihn paat. Ih op tu wee now fi du fi wee paat ahn laan az moch az wi kud bowt hihn.

²³ Wi wahn neva stap laan bowt Jehoava. (Eccl. 3:11) Weh impoatant da noh humoch wi noa bowt Jehoava, bot da weh wi du wid weh wi noa. If wi put intu praktis weh wi laan ahn chrai fi kapi wi lovin Faada, hihn wahn kantinyu fi kohn kloas tu wi. (Jay. 4:8) Chroo di Baibl, Jehoava pramis wi dat hihn wahn neva abandan dehn wan weh di saach fi hihn.