Kweschanz Weh Peepl Aks
Di Baibl seh dat fi proov wahn mata, wahn persn need at lees too persn az witnis. (Num. 35:30; Deut. 17:6; 19:15; Mach. 18:16; 1 Tim. 5:19) Bot anda di Laa, if wahn man mi deh owt eena di feel an ih rayp wahn uman weh ingayj, if di uman skreem, shee wuda mi bee inosent a adolchri bot di man wuda mi bee gilti. Sins nobadi witnis di rayp, how wi ku noa dat shee mi inosent ahn hihn mi gilti?
Di akonk da Deuteronomy 22:25-27 da noh jos fi proov dat di man gilti, bikaaz eena dis akonk di man mi kansida gilti aredi. Di foakos a dis laa da-mi fi proov dat di uman inosent. Kansida di kanteks a dis akonk.
Eena Deuteronomy 22:23, 24 ih taak bowt wahn man “eena di siti” weh mi ga seks wid wahn uman weh mi ingayj tu wahn nada man. If hihn mi du dis, ih mi gilti a adolchri, bikaaz da mi jos laik if di uman weh mi ingayj mi don marid aredi. How bowt di uman? “Shee neva skreem eena di siti.” If shee mi skreem, adaz mi wahn hyaa ahn, an dehn mi wahn difen ahn. Bot sins shee neva skreem, shee jos az gilti az di man.
Neks, di Baibl taak bowt wahn difrent sichuwayshan. Ih seh: “Bot if ih soh hapm dat wail wahn man deh owt eena di feel, ih meet wahn uman weh ingayj ahn di man rayp ahn, den di man weh rayp ahn dizerv fi ded, bot yu noh mos du notn tu di uman. Di uman noh komit wahn sin, soh yu noh fi kil shee. Dis kays da sayhn laik wen wahn man atak wahn neks man ahn kil ahn. Bikaaz ih soh hapm dat di man mi meet di uman owt eena di feel, ahn di uman mi skreem, bot nobadi neva deh fi sayv ahn fahn di man.”—Deut. 22:25-27.
Eena da kays, di joj dehn mi bileev di uman. Dehn mi bileev dat shee mi “skreem, bot nobadi neva deh fi sayv ahn fahn di man.” Soh shee neva komit adolchri. Bot di man mi gilti a rayp. An ih mi aalso gilti a adolchri bikaaz hihn mi “rayp” wahn uman weh mi ingayj.
Soh, eevn doa dis laa mi foakos pahn weda er nat di uman inosent, di akonk proov dat di man mi gilti a rayp an adolchri. Wi ku bee kanfident dat di joj dehn wuda mi “investigayt di mata chroo ahn chroo” ahn mek wahn disizhan weh bays pahn di prinsiplz weh Gaad set ahn weh hihn mi ripeet oava ahn oava.—Deut. 13:14; 17:4; Ex. 20:14.