Yu tink yu ku ansa dehnya kweschanz bays pahn Di Wachtowa dehn fi 2019?

Wat da di meenin a Gaad pramis: “No wepan weh dehn bring gens yu wahn ga sokses”? (Isa. 54:17)

Wi ku chros dat Jehoava wahn protek wi wen “di kruwil roola dehn blaas wi laik wahn staam.” (Isa. 25:4, 5) Notn weh wi enimi dehn du wi ku stap Jehoava fahn gi wi evalastin laif.—w19.01, payj 6-7.

How di way Gaad mi deel wid di Kaynanait dehn ahn di stobant Izrelait dehn shoa fi Hihn jostis?

Jehoava mi waan di Izrelait dehn dat hihn mi wahn joj enibadi weh du bad tingz tu di uman dehn ahn di pikni dehn weh kudn difen dehnself. Pahn di ada han, Jehoava mi bles ih peepl wen dehn mi laayal tu hihn ahn chreet wan anada fyaa.—w19.02, payj 22-23.

Weh wi shuda du wen sombadi hoo noh di serv Jehoava seh wahn pryaa?

Wi ku stay kwaiyet ahn bee rispekful. Wi wudn seh “aymen,” ner wi wudn hoal han wid adaz joorin da pryaa, kaaz dat wuda di shoa dat wi agree wid da pryaa. Wi mait chooz fi seh wi oan sailent pryaa.—w19.03, payj 31.

How seeryos chail abyoos?

Chail abyoos da wahn sin gens di viktim, gens di kangrigayshan, gens man laa, ahn gens Gaad. Eena sohn konchri weh ga laa dat chail abyoos haftu ripoat tu di polees, eldaz chrai fi obay di govament laa fi ripoat aal akyoozayshan a abyoos.—w19.05, payj 9-10.

How yu ku chaynj weh eena yu haat ahn yu main fi di beta?

Sohn impoatant steps da: Taak tu Jehoava eena pryaa. Meditayt wid di goal fi mek chaynjiz eena yu laif. Chooz gud frenz.—w19.06, payj 11.

Weh wi ku du fahn now fi pripyaa fi persikyooshan?

Wi need fi schrentn wi rilayshanship wid Jehoava. Bee kanvins dat Jehoava lov wi ahn dat hihn wahn neva abandan wi. Reed di Baibl evri day, ahn pray wahn lat. Bee kanvins dat di blesinz a Gaad Kingdom wahn kohn chroo. Memoraiz wi fayvrit skripchaz ahn sangz weh prayz Jehoava.—w19.07, payj 2-4.

Weh wi ku du fi help wi relitiv dehn fi geh sayv?

Ih impoatant fi shoa andastandin, mek wi gud egzampl giv wahn witnis, bee payshent ahn kain, bot noh mek wi relitiv dehn chaynj wi disizhan.—w19.08, payj 15-17.

How wi fain res laik weh Jeezas mi pramis da Machyu 11:28?

Wi ga lovin eldaz, di bes frenz, ahn di bes werk fi du.—w19.09, payj 23.

How Gaad ku gi wi di dizaiya ahn di powa fi du weh hihn waahn? (Fil. 2:13, NW)

Az wi reed di Baibl ahn meditayt pahn weh wi reed, Gaad ku gi wi di dizaiya fi du weh hihn waahn, ahn di powa fi du it tu. Fi hihn hoali spirit ku mek wi ga beta skilz.—w19.10, payj 21.

Wat da sohn waiz step wi shuda tek bifoa wi mek wahn seeryos disizhan?

Faiv step weh wi shuda tek da: Du deep risaach. Pray fi wizdom. Goh oava wi reezn fi wi disizhan. Bee spesifik. Bee reeznabl.—w19.11, payj 27-29.

Yu tink dat weh Saytan mi tel Eev da-mi di staat a di faals teechin dat di soal kantinyu liv eevn afta wi ded?

Ih noh luk soh. Saytan mi tel Eev dat shee neva mi wahn ded, ih neva tel ahn dat ih onli mi wahn luk laik if ih mi ded. Aal faals rilijan mi geh dischrai eena di Flod joorin Noawa dayz. Wen Gaad mi kanfyooz di langwij dehn da Baybl ahn peepl mi skyata aal oava di ert, moa dan laikli dehn mi kehr di aidyaa wid dehn dat hyoomanz ga wahn soal weh noh ded.—w19.12, payj 15.