Ih noh luk soh. Di Devl neva tel Eev dat if shee mi eet di froot weh Gaad mi tel dehn noh fi eet dat ih badi mi wahn ded bot dat ih spirit mi wahn kantinyu fi liv sohnweh els. Saytan mi klaym seh dat if Eev mi eet di froot a di chree, ‘shee noh mi wahn dedʼ non ataal. Hihn mi seh dat shee mi wahn kantinyu fi liv an injai wahn beta laif pahn ert, wahn laif free fahn Gaad.—Gen. 2:17; 3:3-5.

If dis faals teechin neva staat eena Eedn, den da wen ih mi staat? Wi kyaahn seh fi shoar. Bot wi doo noa dat aal faals rilijan mi geh dischrai eena di Flod joorin Noawa dayz. Noawa an ih famili da-mi di onli wan dehn weh mi servaiv di Flod, an aala dehn mi wership Jehoava. Soh nobadi neva mi wahn di teech eni faals rilijos aidyaa.

Soh di teechin dat di hyooman soal kantinyu fi liv eevn afta di badi ded mosi mi staat afta di Flod. Wen Gaad mi kanfyooz di langwij dehn da Baybl ahn peepl mi skyata “aal oava di ert,” moa dan laikli dehn mi kehr di aidyaa wid dehn dat hyoomanz ga wahn soal weh servaiv afta det. (Gen. 11:8, 9) Bot noh mata wen dis faals teechin mi staat, wee ku bee shoar dat “di pa a aala di lai dehn,” Saytan di Devl, mi deh bihain it, ahn hihn mi hapi fi si da teechin spred aal oava.—Jan 8:44.