1-2. Wai aal Kristyanz shuda waahn laan moa bowt di rezorekshan tu laif da hevn?

MOAS peepl weh di serv Jehoava tudeh waahn liv fareva pahn di ert. Bot di lee groop a anointid Kristyanz weh noh ded yet ga di hoap fi geh rayz op bak tu laif da hevn. Dehndeh anointid Kristyanz reeli waahn noa weh dehn laif wahn bee laik wen dehn get da hevn. Bot wai dat shuda mata tu dehn wan weh ga di hoap fi liv pahn di ert? Wi wahn geh fi si dat di rezorekshan a di wan dehn weh wahn liv da hevn wahn aalso benifit di wan dehn weh ga di hoap fi liv pahn di ert. Soh weda wi ga di hoap fi liv da hevn er pahn di ert, di rezorekshan a di wan dehn weh wahn liv da hevn shuda bee reeli impoatant tu wee.

² Gaad hoali spirit mi gaid som a Jeezas disaiplz eena di fers senchri fi rait bowt di rezorekshan a di wan dehn weh wahn liv da hevn. Di apasl Jan mi seh: “Mi dyaa bradaz, eevn doa wi da Gaad chiljren, wi noh noa yet weh wi wahn bee eena di fyoocha. Wi noa dat wen ih shoa ihself, wee wahn bee laik hihn.” (1 Jan 3:2) Soh anointid Kristyanz noh noa weh dehn wahn bee laik wen dehn geh rayz op bak tu laif fi liv da hevn wid spirit badi. Bot, dehn wahn ku akchwali get fi si Jehoava wen dehn get dehn riwaad. Di Baibl noh tel wi evri lee deetayl bowt di rezorekshan a di anointid wan dehn, bot di apasl Paal mi gi wi sohn infamayshan bowt it. Di anointid wan dehn wahn deh wid Krais wen hihn “dischrai aala di govament dehn an aal atariti ahn powa.” Ahn “di laas enimi weh wahn geh dischrai, da det.” An afta aala dat hapm, Jeezas ahn  di wan dehn weh rool lang wid ahn wahn put dehnself an evriting els anda Gaad kanchroal. (1 Kor. 15:24-28) Wi ku jos imajin how eksaitin da taim wahn bee! *

3. Akaadn tu 1 Korintyanz 15:30-32, weh Paal bileef eena di rezorekshan mi help ahn fi du?

³ Paal bileef eena di rezorekshan mi help ahn fi bayr op anda lata difrent chalenjiz. (Reed 1 Korintyanz 15:30-32.) Ih mi tel di bradaz ahn sistaz da Korint: “Evri day Ah fays det.” Paal mi aalso seh: “Ah mi fait wid wail bees da Efisos.” Maybi hihn mi-di rifaa bak tu di taim wen ih mi fait sohn reel animal eena wahn staydyom da Efisos. (2 Kor. 1:8; 4:10; 11:23) Er ih mosi mi-di taak bowt di Jooz an ada peepl weh mi persikyoot ahn weh da-mi laik sohn “wail bees.” (Aks 19:26-34; 1 Kor. 16:9) Eena eeda kays, dehndeh da-mi sohn reeli daynjaros sichuwayshan. Stilyet, Paal mi kantinyu fi bileev dat hihn mi wahn ga wahn hapi fyoocha.—2 Kor. 4:16-18.

4. How di rezorekshan hoap schrentn aal Kristyanz tudeh? (Koment pahn di picha pahn di kova.)

⁴ Wee di liv eena sohn daynjaros taimz. Sohn peepl komit difrent kraim gens wi bradaz. Ada bradaz liv eena sohn plays wehpaat di konchri deh eena waar ahn di peepl noh feel sayf ataal. An eena sohn ada plays, di preechin werk deh anda ban. Dat meenz dat wi bradaz ahn sistaz kyaahn preech laik how dehn waahn, bot dehn kantinyu serv Jehoava eevn doa dehn di put dehn laif ahn freedom eena daynja. Yes, aala dehnya bradaz ahn sistaz kip aan di wership Jehoava ahn dehn da wahn reeli gud egzampl fi aala wi. Dehn noh frayd fi notn, bikaaz dehn noa dat eevn if dehn looz dehn laif now, Jehoava pramis dehn sohnting way beta eena di fyoocha.

5. Weh kaina tinkin ku mek wi looz hoap eena di rezorekshan?

⁵ Paal mi waan di bradaz bowt wahn daynjaros kaina tinkin weh sohn peepl mi gat: “Mek wi eet ahn jrink, kaaz tumaaro wi wahn ded.” Ahn way bifoa dat da kaina tinkin mi don egzis. Hihn praabli mi-di rifaa tu Isaiah 22:13 wehpaat ih taak bowt di atichood weh di Izrelait dehn mi gat. Tu dehn, ih mi moa impoatant fi ga fon an injai dehnself dan fi schrentn dehn lov fi Jehoava. Soh reeli, di Izrelait dehn mi ga di saym tinkin weh kaman eevn op tu tudeh: “Yu ku deh ya tudeh, ahn tumaaro yu gaan!” Bot di Baibl noh lef owt di en rizolt fi di nayshan a Izrel bikaaz a da rang tinkin.—2 Chron. 36:15-20.

6. Eena weh way di rezorekshan hoap shuda afek di disizhan wi mek bowt hoo wi wahn chooz fi bee frenz wid?

⁶ Wee noa dat Jehoava wahn rezorek peepl weh ded soh dat shuda afek hoo wi chooz fi bee frenz wid. Di bradaz da Korint mi need fi mek shoar dat dehn neva spen taim wid peepl hoo neva bileev eena di rezorekshan. Wee ku laan wahn lesn fahn dat tudeh: If wi spen taim wid peepl weh onli waahn ga fon ahn weh noh kay bowt weh wahn hapm eena di fyoocha, dehn noh wahn du wi no gud. If wee az Kristyanz spen tu moch taim wid peepl laik dat, di bad atichood weh dehndeh peepl gat wahn rob aaf pahn wi. In fak, dehndeh kaina peepl ku mek yu du tingz weh Jehoava hayt. Dat da wai Paal mi bayg di bradaz ahn sistaz fi “kohn tu [dehn] sensiz ahn du weh rait ahn stap praktis sin.”—1 Kor. 15:33, 34.

7. Akaadn tu 1 Korintyanz15: 35-38, weh kweschan sohn peepl mi aks bowt di rezorekshan?

⁷ Reed 1 Korintyanz 15:35-38. Sombadi weh waahn mek ada peepl kweschan weda er  nat di rezorekshan wahn reeli tek plays, mait aks: “Da how di ded wahn geh rayz op bak tu laif?” Ih gud fi mek wi tink bowt Paal ansa tu da kweschan bikaaz wahn lata peepl tudeh ga difrent bileef bowt weh wahn hapm afta wi ded. Bot weh di Baibl teech wi?

8. Wat da wahn iloschrayshan weh ku help wi andastan di rezorekshan tu laif da hevn?

⁸ Wen wahn persn ded, ih badi ratn. Bot di Wan hoo kriyayt evriting eena di yoonivers ku rezorek da persn ahn giv ahn di kaina badi weh ih need. (Gen. 1:1; 2:7) Paal mi yooz wahn iloschrayshan fi help wi si dat Gaad wudn need fi bring bak di saym badi. Tink bowt di seed fi wahn plaant. Wen wahn persn plaant da seed eena di grong, ih staat tu groa an ih ton intu wahn nyoo plaant. Da nyoo plaant weh staat tu groa veri difrent fahn di smaal seed weh di persn mi plaant. Paal mi yooz da iloschrayshan fi shoa dat fi wee Kriyayta ku gi eech wan wahn “[badi] di way hihn waahn.”

9. Weh 1 Korintyanz 15:39-41 tel wi bowt di difrent kaina badi?

⁹ Reed 1 Korintyanz 15:39-41. Paal mi seh dat Gaad neva kriyayt evribadi di saym way. Fi egzampl, di badi a wahn kow, wahn berd, ahn wahn fish kompleetli difrent fahn wan anada. Den ih mi seh dat eena di skai, di son ahn di moon veri difrent fahn wan anada. Hihn mi aalso seh dat “eech staar ga dehn oan byooti.” Da chroo, wee kyaahn reeli si di difrens dong ya pahn ert, bot saiyentis tel wi dat aal kaina staarz egzis; som a dehn big, som a dehn smaal, som a dehn red, som a dehn wait, ahn som a dehn yelo laik di son. Paal mi aalso seh dat “wan kaina badi deh da hevn ahn wan kaina badi deh pahn di ert.” Di kaina badi weh deh pahn di ert da fizikal badi, bot di kaina badi weh deh op da hevn da spirit, laik di aynjel dehn.

10. Weh kaina badi di wan dehn weh geh rayz op bak tu laif da hevn wahn gat?

¹⁰ Noatis weh Paal mi seh afta dat: “Da rait  soh wid di rezorekshan a di ded. Jos laik how yu haftu plaant wahn seed eena di grong fi mek ih groa, wen di badi ded, ih beri ahn ratn, bot den wen ih rayz op bak ih kyaahn ratn.” Af koars, wen wi ded, di hyooman badi ratn an ih ton intu dos. (Gen. 3:19) How ih pasabl dat wen wahn badi “rayz op bak ih kyaahn ratn”? Paal neva mi-di taak bowt peepl weh geh rayz op bak pahn di ert, laik peepl weh Ilaija, Ilaisha, ahn Jeezas mi rezorek. Insted, Paal mi-di taak bowt wahn persn weh geh rayz op bak tu laif wid wahn badi weh ku liv da hevn—“wahn spirichwal badi.”—1 Kor. 15:42-44.

11-12. Weh mi hapm wen Jeezas mi geh rayz op bak tu laif, ahn how di anointid wan dehn goh chroo sohnting simila tu weh Jeezas mi gaahn chroo?

¹¹ Wen Jeezas mi liv pahn di ert, hihn mi ga wahn fizikal badi. Bot wen ih mi geh rayz op bak tu laif, hihn “mi kohn fi bee wahn spirit weh gi laif” ahn den ih gaahn bak da hevn. Dat da di saym ting weh wahn hapm tu anointid Kristyanz; dehn wahn geh rayz op bak wid wahn badi weh ku liv da hevn. Paal mi seh: “Jos laik how wee da laik di wan weh geh mek owta dos, saym way soh, wi wahn bee laik di wan weh kohn fahn hevn.”—1 Kor. 15:45-49.

¹² Wi need fi memba dat Jeezas neva geh rayz op bak tu laif wid wahn hyooman badi. Wen Paal mi soon finish wid ih diskoshan, ih gi wi di reezn wai wen ih mi tel wi: “Flesh ahn blod kyaahn bee paat a Gaad Kingdom” da hevn. (1 Kor. 15:50) Di apaslz an ada anointid Kristyanz neva mi wahn geh rayz op bak tu laif wid hyooman badi weh ku ratn. Bot wen dehn mi wahn geh rayz op bak tu laif? Paal mi seh dat mi wahn hapm som taim eena di fyoocha, bot noh rait afta dehn ded. Bai di taim Paal mi rait 1 Korintyanz, som a di disaipl dehn mi don ded ahn wan a dehn da-mi di apasl Jaymz. (Aks 12:1, 2) An ada apaslz an anointid Kristyanz mi wahn ded laytaraan.—1 Kor. 15:6.

13. Weh mi wahn hapm wen Jeezas Krais geh powa az King da hevn?

¹³ Jeezas ahn Paal mi prafesai bowt wahn eksaitin taim eena hischri. Da taim da wen Jeezas staat tu rool az King da hevn ahn kohn bak fi deh wid ih peepl. Ahn sohn impoatant sain mi wahn shoa dat Jeezas kohn bak fi deh wid ih peepl. Joorin da taim, terabl tingz mi wahn staat tu hapm aal rong di werl, laik waar, ertkwayk, dizeez, an ada terabl tingz. Dis Baibl prafesi di kohn chroo sins 1914, ahn wahn nada paat a da prafesi mi wahn kohn chroo tu. Jeezas mi seh dat ih disaipl dehn mi wahn preech di gud nyooz bowt di Kingdom aal oava di ert soh dat “aal di nayshan dehn ku noa bowt it ahn den di en wahn kohn.” (Mach. 24:3, 7-14) Paal mi aalso prafesai dat di taim wen “Krais kohn bak” fi deh wid ih peepl wahn aalso bee wahn taim wen di anointid Kristyanz weh don ded wahn geh rayz op bak fi liv da hevn.—1 Tes. 4:14-16; 1 Kor. 15:23.

14. Weh hapm tu anointid Kristyanz weh ded joorin di laas dayz?

¹⁴ Tudeh, az soon az anointid Kristyanz ded, dehn geh rayz op bak fi liv da hevn. Paal help wi fi bee shoar a dat wen wi reed 1 Korintyanz 15:51, 52 weh seh: “Noh aala wi wahn sleep eena det, bot Gaad wahn chaynj aala wi. Ih wahn hapm jos laik dat, kwika dan di blink a wahn aiy, joorin di taim wen di laas chrompit bloa.” Dehndeh werdz di kohn chroo tudeh! Wi ku onli imajin how hapi dehn wahn hapi bikaaz dehn wahn “aalwayz deh wid di Laad.”—1 Tes. 4:17.

15. Weh kaina werk di wan dehn weh wahn chaynj “kwika dan di blink a wahn aiy” wahn du?

¹⁵ Di wan dehn weh wahn chaynj “kwika dan di blink a wahn aiy” wahn ga werk fi du  wen dehn get da hevn. Di Baibl tel wi weh kaina werk dehn wahn du. Jeezas mi tel dehn: “An Ah wahn gi di persn weh win di vikchri ahn weh du weh Ah seh di atariti fi rool oava di nayshan dehn. Da persn wahn geh di saym atariti weh Ai geh fahn mai Faada. Ahn da persn wahn rool oava di nayshan dehn wid wahn aiyan rad weh ih wahn yooz fi brok op di nayshanz laik klay pat.”(Rev. 2:26, 27) Dehn wahn fala Jeezas ahn shepad di nayshan dehn wid wahn aiyan rad.—Rev. 19:11-15.

16. How lata hyoomanz wahn ga vikchri oava det?

¹⁶ Ih klyaa fi si dat anointid Kristyanz wahn ga vikchri oava det. (1 Kor. 15:54-57) Bikaaz dehn geh rayz op bak fi liv da hevn, dehn wahn ku help geh rid a aala di wikidnis joorin di waar a Armagedon weh deh rait rong di kaana. Milyanz a ada Kristyanz wahn “paas chroo di grayt chribyulayshan” ahn get da di nyoo werl. (Rev. 7:14) Di wan dehn weh liv pahn di ert wahn si wahn nada kaina vikchri oava det, bikaaz dehn wahn si bilyanz a peepl weh mi ded geh rayz op bak tu laif. Tink bowt how hapi wi wahn bee wen da taim kom! (Aks 24:15) An eevn di wan dehn weh alaiv ahn weh laayal tu Jehoava wid aala dehn haat wahn ga vikchri oava det, bikaaz dehn wahn neva ded. Dehn wahn ku liv fareva.

17. Weh 1 Korintyanz 15:58 inkorij wi fi du now?

¹⁷ Tudeh, evri Kristyan ku reeli fain komfert eena di rezorekshan weh Paal mi rait bowt tu di Korintyanz. Notn shuda hoal wi bak fan obay di advais weh Paal gi wi. Hihn mi seh dat wi fi du az moch az wi kud “eena di werk weh di Laad gi wi fi du.” (Reed 1 Korintyanz 15:58.) If wi aalwayz chrai fi du wi bes eena da werk, wi wahn ga wahn hapi fyoocha heda wi. Wi wahn liv wahn laif weh beta dan weh wi kuda eva imajin. Ahn wi wahn si dat evriting weh wi du fi Jehoava da neva fi notn.