1. Weh mait hapm tu wi if wi feel diskorij?

EVRI day wi ron intu prablemz, bot wi chrai fi handl dehndeh prablemz az bes az wi kud. Bot ih haada fi deel wid wi prablemz wen wi feel diskorij. Soh wi need fi memba dat diskorijment da laik wahn teef; ih ku tek weh wi kanfidens, wi korij, ahn wi hapinis. Proverbs 24:10 seh: “If yu geh diskorij wen haad taim kohn pahn yu, yu wahn geh week.” Yes, ahn dat da chroo. Wen wi feel diskorij, wi feel week ahn den ih haada fi deel wid di prablemz weh wi fays.

2. Wat da sohn tingz weh ku mek wi feel diskorij, ahn weh wi wahn diskos eena dis aatikl?

² Wahn lata tingz ku diskorij wi. Fi egzampl, di mistayk dehn weh wi mek, wahn seeryos siknis, er bikaaz wi kip aan di tink bowt wiself eena wahn negitiv way. Wi mait aalso geh diskorij bikaaz wi neva geh wahn asainment weh wi mi waahn eena Jehoava servis. Er maybi bikaaz wi haftu preech eena wahn teritori wehpaat peepl noh waahn lisn tu wi mesij. Eena dis aatikl, wi wahn si weh wi ku du wen wi feel diskorij.

3. Weh ku help wi wen wi feel bad bowt wiself ahn di mistayk dehn weh wi mek?

³ Ih eezi fi feel bad bowt wiself ahn di mistayk dehn weh wi mek. Soh wi mait tink dat bikaaz wi mek mistayk, Jehoava noh wahn waahnt wi eena Paradais. Bot da kaina tinkin veri daynjaros. Soh how wi shuda feel bowt di mistayk dehn weh wi mek? Wel, di Baibl tel wi dat “evribadi sin,” eksep fi Jeezas. (Roam. 3:23) Bot Jehoava noh foakos pahn di mistayk dehn  weh wi mek, an ih noh ekspek wi fi bee perfek needa. Insted, hihn da wahn lovin Pa weh waahn help wi, an ih payshent wid wi tu. Hihn si how haad wi haftu fait fi du di rait ting ahn noh feel bad bowt wiself, ahn hihn redi fi help wi.—Roam. 7:18, 19.

4-5. How 1 Jan 3:19, 20 mi help too sista fi win di fait gens diskorijment?

⁴ Mek wi luk pahn Deborah ahn Maria egzampl. * Wen Deborah da-mi wahn lee gyal, fi shee famili neva chreet ahn eena wahn lovin way; dehn mi aalwayz mek ih feel bad bowt ihself. Ahn dehn mi bayli komen ahn fi di gud tingz weh ih mi du. Soh wen shee mi geh oalda, ih mi onli tink bowt ihself eena wahn negitiv way. Eevn wen ih mi mek sohn lee mistayk, ih mi feel laik ih kudn du notn rait. Maria mi ga da saym prablem. Fi shee famili mi aalwayz mek ih feel shaym a ihself. Bikaaz a dat, shee staat tu tink dat shee noh wert notn. Eevn afta shee mi laan di chroot, shee mi feel laik shee neva gud inof fi bee wan a Jehoava Witnisiz!

⁵ Bot, Deborah ahn Maria neva stap serv Jehoava. Wai? Bikaaz dehn mi pray tu Jehoava ahn tel ahn how dehn feel. (Ps. 55:22) Dehn mi laan dat Jehoava, hoo da wahn lovin Pa, noa dat di bad tingz weh hapm tu wi ku mek wi feel bad bowt wiself. Bot hihn noh foakos pahn dat. Hihn aalso si di gud kwaliti dehn weh wi gat, eevn if wee noh si notn gud eena wiself.—Reed 1 Jan 3:19, 20.

6. Weh sohnbadi mait du if ih mek di saym mistayk agen?

⁶ Sohnbadi mait di chrai haad fi stap du sohnting weh rang, bot dehn mait mek di saym mistayk agen ahn geh diskorij. Af koars, ih naamal fi feel gilti wen wi sin. (2 Kor. 7:10) Bot wi noh waahn wi tinkin get soh owta kanchroal dat wi staat tu seh: ‘Ai noh wert notn. How Jehoava kuda eva fergiv mi?ʼ Da kaina tinkin rang, an ih ku eevn mek wi stap serv Jehoava. Memba weh Proverbs 24:10 seh: “If yu geh diskorij wen haad taim kohn pahn yu, yu wahn geh week.” Soh wi shuda pray tu Jehoava ahn bayg ahn fi fergivnis soh dat wi ku “set mataz schrayt” wid hihn. (Isa. 1:18) Wen hihn si dat yu reeli sari ahn dat yu di chrai haad fi chaynj, ih wahn fergiv yu. Pahn tap a dat, yu shuda goh tu di eldaz fi help. Dehn wahn bee payshent wid yu ahn dehn wahn help yu fi bee spirichwali schrang agen.—Jay. 5:14, 15.

7. Wai wi shudn feel diskorij if ih haad fi mek wi du weh rait?

⁷ Jean-Luc, hoo da wahn elda weh liv da France, ga sohnting fi seh tu enibadi weh di schrogl wid wahn weeknis. Hihn seh: “Tu Jehoava, wahn raichos persn da noh sohnbadi weh neva eva mek wahn mistayk, bot da sohnbadi weh sari fi di mistayk dehn weh dehn mek  an aalwayz chrai fi mek chaynjiz.” (Roam. 7:21-25) Soh if yoo di schrogl wid wahn weeknis, noh bring dong yuself ahn staat tu seh dat yu noh wert notn. Bikaaz memba dat aala wi mek mistayk an aala wi need di grayt kainis weh kohn fahn Jehoava chroo di ransom.—Ifee. 1:7; 1 Jan 4:10.

8. Wehpaat wi ku geh help wen wi feel diskorij?

⁸ Wi bradaz ahn sistaz eena di kangrigayshan ku inkorij wi. Dehn mait lisn tu wi wen wi need fi taak ahn dehn mait gi wi di komfert weh wi need soh dat wi ku feel beta. (Prov. 12:25; 1 Tes. 5:14) Wahn sista fahn Nigeria weh naym Joy mi haftu fait gens diskorijment; shee seh: “Ai noh noa weh Ah mi wahn du widowt mi bradaz ahn sistaz! Wen mi bradaz ahn sistaz inkorij mi, Ah noa fi shoar dat Jehoava di ansa mi pryaaz. Dehn eevn teech mi how fi inkorij adaz weh feel diskorij.” Bot noh ferget dat wi bradaz ahn sistaz noh wahn aalwayz noa wen wi feel diskorij. Soh wee mait need fi bee di wan weh goh op tu dehn ahn tel dehn dat wi need help.

9. How Psalm 41:3 ahn 94:19 ku inkorij wi?

⁹ Goh tu Jehoava fi help. Wen wi noh di feel gud, an espeshali if wi di sofa wid wahn siknis fi wahn lang taim, ih haad fi bee pazitiv. An eevn doa Jehoava noh yooz miraklz fi kyoar wi tudeh, ih gi wi di komfert weh wi need an ih gi wi di schrent weh wi need soh dat wi ku bayr op. (Reed Psalm 41:3; * 94:19.) * Fi egzampl, Jehoava mait moov wi bradaz ahn sistaz fi help wi rong di hows er fi help wi owt wid wi shapin. Ih mait moov wi bradaz fi pray wid wi. Er ih mait help wi fi memba komfertin skripchaz weh wi reed eena di Baibl—skripchaz weh taak bowt di wandaful hoap wi gat fi liv wahn perfek laif eena Paradais widowt siknis ahn payn.—Roam. 15:4.

10. Wai Isang neva kantinyu feel diskorij afta ih aksident?

¹⁰ Isang, wahn brada weh liv da Nigeria, mi get eena wahn aksident weh mi lef ahn kripl. Di dakta mi tel Isang dat ih mi wahn kyaahn waak eva agen. Isang mi seh dat ih mi feel diskorij. Bot yu tink hihn mi stay da way? No! Weh mi help ahn? Hihn seh: “Mee ahn mi waif neva stap pray tu Jehoava ahn wi neva stap stodi di Baibl. Wi mi aalso mek it wi goal fi bee tankful fi aala di gud tingz weh wi gat, inkloodin wi hoap fi liv fareva eena Gaad nyoo werl.”

11. How Cindy kuda mi bee hapi eevn doa shee mi veri sik?

¹¹ Wahn dakta mi tel Cindy, wahn sista weh liv da Mexico, dat shee mi ga wahn dizeez weh kuda mi kil ahn. Weh Cindy mi du fi bayr op anda da sichuwayshan? Wen shee mi-di get ih chreetment, shee mi mek it ih goal fi preech tu sohnbadi evri day. Shee seh: “Wen Ah mi du dat, Ah mi foakos moa pahn ada peepl dan pahn mi serjri, di payn, er how terabl Ah mi feel. Ahn weneva Ah taak tu di dakta dehn er di ners dehn, Ah wuda aks how dehn famili di du. Den Ah wuda aks dehn wai dehn mi chooz wahn jab laik dis wan. Afta dat, ih mi eezi fi si wich tapik wuda toch dehn haat. Wahn lata dehn mi seh dat peepl bayli aks dehn how dehn di du. Ahn wahn lata dehn mi eevn tel mi tanks bikaaz Ah shoa dat Ah kay bowt dehn. Som a dehn mi eevn gi mi dehn ajres er foan nomba. Ai mi noa dat Jehoava mi wahn help mi fi bayr op chroo dis haad taim, bot Ah mi sopraiz bikaaz di amonk a hapinis weh ih gi mi da-mi moa dan weh Ah mi ekspek!”—Prov. 15:15.

12-13. Weh mi mek it pasabl fi bradaz ahn sistaz weh sik er op eena ayj fi preech tu ada peepl, ahn wat da-mi di rizolt?

 ¹² Bradaz ahn sistaz weh sik er weh don op eena ayj mait feel diskorij bikaaz dehn kyaahn preech az moch az dehn waahnt. Bot eevn soh, wahn lata dehn stil chrai fain difrent wayz fi preech tu peepl. Wahn sista fahn Stayts weh naym Laurel mi haftu lidong eena wahn masheen weh mi help ahn fi breed fi 37 yaaz. Pahn tap a dat, shee mi ga kyansa, ih mi haftu tek lata difrent serjri, an ih mi eevn ga sohn skin dizeez. Bot shee neva stap preech eevn doa ih mi ga aala dehndeh seeryos helt prablemz. Shee mi preech tu di ners dehn an ada medikal werkaz weh yoostu goh chek op pan ahn da ih hows. Wat da-mi di rizolt? Shee mi help bowt 17 peepl fi kom eena di chroot! *

¹³ Richard, wahn elda weh liv da France, ga wahn gud aidyaa fi wi bradaz ahn sistaz weh kyaahn kom owta dehn hows er weh deh eena wahn plays wehpaat dehn tek kayr a oalda peepl. Hihn seh: “Ai sojes dat dehn yooz wahn speshal lee set op fi di poblikayshan dehn. Soh wen peepl paas, dehn wahn seeʼt an aks kweschanz bowt it. Dis ku reeli inkorij wi bradaz ahn sistaz weh kyaahn goh preech fahn hows tu hows nohmoh.” Di wan dehn weh kyaahn kom owta dehn hows ku eevn du leta raitin er preech tu peepl oava di foan.

14. How King Dayvid mi set wahn gud egzampl fi wi?

¹⁴ Wahn lata reezn deh wai wi mait kyaahn geh wahn asainment weh wi waahn eena wi servis tu Jehoava. Fi egzampl, maybi wi noh kwalifai bikaaz a wi ayj er wi mait ga seeryos helt prablemz er ih mait bee bikaaz a ada tingz. If wi deh eena da sichuwayshan, wi ku laan fahn King Dayvid egzampl. Wen hihn mi fain owt dat hihn neva mi wahn bee di wan fi bil Gaad templ—sohnting weh ih mi reeli waahn du—hihn mi stil sopoat di wan weh Gaad chooz fi di asainment. Dayvid mi eevn kanchribyoot wahn lata goal ahn silva fi di proajek. Hihn da wahn reeli gud egzampl fi wi!—2 Sam. 7:12, 13; 1 Chron. 29:1, 3-5.

15. Weh Hugues mi du soh dat ih noh feel diskorij?

¹⁵ Hugues, wahn brada weh liv da France, mi ga helt prablemz. Soh ih mi haftu stap serv az wahn elda, an ih kudn eevn du lee tingz rong di hows. Hihn seh: “At fers, Ai mi feel reeli diskorij ahn laik Ah neva wert notn. Bot afta wahn wail, Ah mi geh fi si dat ih veri impoatant dat Ah noh feel sad bowt di tingz weh Ah kudn du nohmoh, ahn den Ah kuda mi bee hapi bowt weh Ah ku stil du rait now eena mi  servis tu Jehoava. Ai noh wahn giv op. Ai wahn kip aan di fait jos laik Gidiyan an ih 300 soaljaz weh mi kip aan di fait eevn doa dehn mi taiyad bad!”—Judg. 8:4.

16. Weh wi ku laan fahn di aynjel dehn egzampl?

¹⁶ Di faytful aynjel dehn da wahn reeli gud egzampl fi wi. Wen King Ayhab mi-di rool, Jehoava aks aala di aynjel dehn fi gi dehn aidyaaz pahn how fi chrik da wikid king. Wahn lata di aynjel dehn mi gi dehn aidyaaz. Bot Gaad mi onli pik wan aynjel ahn tel ahn dat ih aidyaa mi wahn werk. (1 Ki. 22:19-22) Yu tink di ada faytful aynjel dehn mi feel diskorij ahn staat tu tink, ‘Wai Ai mi eevn chrai?ʼ Af koars nat! Di aynjel dehn reeli hombl ahn dehn waahn aala di aana goh tu Jehoava.—Judg. 13:16-18; Rev. 19:10.

17. Weh wi shuda du if wi feel diskorij bikaaz wi noh ga wahn sertn asainment eena wi servis tu Jehoava?

¹⁷ Memba dat di bigis privilij weh wi gat da fi bee wan a Jehoava Witnisiz ahn fi preech bowt Jehoava Kingdom. Wi noh wahn ga wahn sertn asainment fareva. Aalso, wahn asainment da noh weh mek wi preshos tu Jehoava. Wen wi hombl, dat da weh mek wi preshos tu Jehoava ahn tu wi bradaz ahn sistaz. Soh bayg Jehoava fi help yu stay hombl. Tink bowt aala di gud egzampl a Jehoava hombl peepl eena di Baibl. Ahn bee wilin fi du yu bes fi serv yu bradaz.—Ps. 138:6; 1 Peet. 5:5.

18-19. How yu ku bee hapi eena di minischri eevn wen peepl eena yu teritori noh inchrestid eena di gud nyooz?

¹⁸ Yu eva feel diskorij bikaaz di peepl eena yu teritori noh inchrestid eena di gud nyooz er bikaaz peepl bayli deh hoam? Eena wahn sichuwayshan laik dat, weh yu ku du fi stay hapi er eevn bee hapiya? Sohn gud sojeshan deh eena di baks weh naym “ How fi Bee Hapiya Eena di Minischri.” Ih aalso impoatant dat wi ga di rait atichood tuwaadz di minischri. How wi ku du dat?

¹⁹ Memba dat di mayn reezn wai wi preech da fi mek peepl noa Gaad naym ahn fi tel dehn bowt ih Kingdom. Jeezas mi mek it klyaa dat onli wahn lee bit a peepl wahn get pahn di road weh kehr wi tu laif. (Mach. 7:13, 14) Wen wi deh eena di minischri, wi ga di privilij fi werk lang wid Jehoava, Jeezas, an aala di aynjel dehn. (Mach. 28:19, 20; 1 Kor. 3:9; Rev. 14:6, 7) Ahn Jehoava di saach fi peepl weh waahn  serv ahn. (Jan 6:44) Soh if wahn persn noh waahn lisn tu wi mesij dis taim, maybi di neks taim wi taak tu ahn ih wahn bee wilin fi lisn tu wi.

20. Weh wi ku laan fahn Jeremiah 20:8, 9 bowt how fi win di fait gens diskorijment?

²⁰ Wi ku laan wahn lat fahn di prafit Jerimaiya. Hihn mi haftu preech eena wahn teritori wehpaat di peepl neva waahn lisn tu ahn. Di peepl mi insolt ahn op ahn laaf aata ahn “aal day.” (Read Jeremiah 20:8, 9.) * Wahn taim, hihn mi geh soh diskorij dat ih mi waahn stap preech anaal. Bot ih neva du dat. Wai? Bikaaz “di werd a Jehoava” da-mi laik wahn faiya weh mi-di bon deep eensaida Jerimaiya, an ih kudn hoal it een! Ahn wi ku bee jos laik Jerimaiya if wi reed di Baibl evri day ahn meditayt pahn weh wi reed. If wi du dat, wi wahn bee hapiya ahn moa peepl mait lisn tu wi eena di minischri.—Jer. 15:16.

21. How wi ku win di fait gens diskorijment?

²¹ Deborah, di sista weh di aatikl mi menshan erliya, seh dat diskorijment da wahn powaful wepan weh Saytan yooz. Bot Jehoava moa powaful dan Saytan an eni wepan weh ih yooz. Soh weneva sohnting di kaaz yu fi feel diskorij, yu need fi bayg Jehoava fi help. Hihn wahn help yu fi feel beta if yu ga negitiv feelinz bowt yuself, an ih wahn help yu if yu feel gilti bowt di mistayk dehn weh yu mek. Hihn wahn dehdeh fi yu wen yu di sofa wid wahn terabl siknis. Hihn wahn help yu ga di rait atichood tuwaadz di asainment dehn eena yu servis tu Jehoava. An ih wahn help yu fi bee hapi eena yu minischri. Soh pray tu yu lovin Faada ahn tel ahn egzakli how yu feel. Ahn wid fi hihn help, yu wahn ku win di fait gens diskorijment!