1-2. Weh wi wahn diskos eena dis aatikl?

SOHNTAIM, wi kyaahn stap wiself fahn tink bowt how laif soh shaat ahn “ful op a prablemz.” (Job 14:1) Soh wi ku andastan wai wi mait feel diskorij fahn taim tu taim. Eena Baibl taimz, wahn lata Jehoava peepl mi feel da way deh tu. Som a dehn mi eevn waahn ded. (1 Ki. 19:2-4; Job 3:1-3, 11; 7:15, 16) Bot dehn mi aalwayz geh komfert ahn schrent fahn di Gaad weh dehn mi chros—Jehoava. Fi dehn laif stoari deh eena di Baibl soh dat wen wi reed bowt dehn, wi geh di komfert weh wi need ahn wi aalso laan fahn dehn.—Roam. 15:4.

² Eena dis aatikl, wi wahn taak bowt Joazef, hoo da-mi Jaykop son; Nayomi, hoo da-mi wahn wido; Nayomi daata-in-laa, Root; di Leevait man weh mi rait Psalm 73; ahn di apasl Peeta. Dehn da jos wahn fyoo a Jehoava peepl weh neva giv op eevn doa dehn mi gaahn chroo sohn haad taimz weh mi reeli diskorij dehn. How Jehoava mi schrentn dehn? Ahn wat da sohn lesn weh wi ku laan fahn fi dehn egzampl? Di ansaz tu dehndeh kweschan wahn help wi fi si dat “Jehoava kloas tu dehn wan weh sad eena dehn haat,” an ih “sayv di wan dehn weh feel diskorij.”—Ps. 34:18.

3-4. Weh mi hapm tu Joazef wen hihn da-mi jos wahn yong man?

³ Wen Joazef mi bowt 17 yaaz oal, Jehoava mi mek ih ga too jreem. Di jreem dehn weh Joazef mi gat mi meen dat hihn mi wahn bee wahn impoatant persn weh ih famili mi wahn ga lata rispek fa.  (Gen. 37:5-10) Bot rait afta Joazef mi geh dehndeh jreem, aal kaina bad tingz mi staat tu hapm tu ahn. Ih jreem dehn neva luk laik dehn mi-di kohn chroo bikaaz insteda ih breda dehn ga rispek far ahn, dehn sel ahn. Soh Joazef en op di bee wahn slayv fi wahn Eejipshan ofishal weh mi naym Potifa. (Gen. 37:21-28) Joazef laif mi chaynj oavanait! Fers, ih mi deh hoam wid ih pa weh onli lov ahn. Den, ih mi deh da Eejip az wahn slayv weh peepl mi luk dong pan an ih mi-di werk fi wahn man weh neva eevn noa Jehoava.—Gen. 39:1.

⁴ Den Joazef sichuwayshan mi jos geh wers. Potifa waif lai an seh dat Joazef mi chrai rayp shee. Ahn Potifa neva eevn bada fi fain owt weda da mi chroo er nat. Ih jos chroa Joazef da prizn ahn lef ahn rait deh chayn op. (Gen. 39:14-20; Ps. 105:17, 18) Imajin how Joazef mi feel afta dehn akyooz ahn a sohnting laik dat. Ahn bikaaz a da faals akyoozayshan, peepl kuda mi seh bad tingz bowt Jehoava. Wi ku andastan wai Joazef mi feel diskorij!

5. Weh Joazef mi du soh dat ih neva feel soh diskorij?

⁵ Wail Joazef da-mi wahn slayv, ahn laytaraan wen ih mi deh da prizn, ih kudn du notn fi chaynj ih sichuwayshan. Soh weh mi help hihn fi bee pazitiv? Insteda foakos pahn weh ih kudn du, ih chrai ih bes fi du di werk weh dehn mi giv ahn fi du. Bot di moas impoatant ting weh Joazef mi du fi stay pazitiv da-mi fi foakos pahn how ih ku pleez Jehoava. Ahn bikaaz a dat, Jehoava mi bles evriting weh Joazef du.—Gen. 39:21-23.

6. How di jreem dehn weh Jehoava mi gi tu Joazef mi komfert ahn?

⁶ Wen Joazef mi tink bak pahn di jreem dehn weh Jehoava mi giv ahn yaaz erliya, dat mosi mi reeli inkorij ahn. Dehndeh jreem mi rimain Joazef dat ih mi wahn get fi si ih famili agen, ahn dat ih sichuwayshan mi wahn geh beta. Ahn dat da egzakli weh hapm. Wen Joazef mi bowt 37 yaaz oal, di jreem dehn weh Jehoava mi giv ahn staat tu kohn chroo eena wahn amayzin way!—Gen. 37:7, 9, 10; 42:6, 9.

7. Akaadn tu 1 Peeta 5:10, weh wahn help wi fi bayr op anda difrent chraiyalz weh wi fays?

 ⁷ Weh wi ku laan? Evriting weh Joazef mi gaahn chroo rimain wi dat dis da wahn kruwil werl ahn dat peepl wahn chreet wi eena wahn way weh noh fyaa. Eevn wahn brada er sista mait du sohnting fi hert wi. Bot if wee si Jehoava az wi Rak, er az sohnbadi weh wi ku ron tu fi protekshan, wi noh wahn feel soh diskorij er stap serv ahn. (Ps. 62:6, 7; reed 1 Peeta 5:10.) Ahn wi noh waahn ferget dat Joazef mosi mi bowt 17 yaaz oal wen Jehoava mek ih ga dehndeh jreem. Ih klyaa fi si dat Jehoava ga kanfidens eevn eena di yong peepl weh di serv hihn. Wahn lata dehn da jos laik Joazef, bikaaz dehn ga schrang fayt eena Jehoava. Som a dehn eevn haftu goh da prizn bikaaz dehn disaid fi stay laayal tu Jehoava.—Ps. 110:3.

8. Weh mi hapm tu Nayomi ahn Root?

⁸ Nayomi an ih famili mi haftu lef Jooda bikaaz no food mi dehdeh, ahn dehn gaahn liv da Moawab az farinaz. Rait deh, Nayomi hozban, Elimelek, mi ded. Soh now da mi onli Nayomi an ih too son dehn. Afta wahn wail, Nayomi son dehn mi geh marid tu too laydi fahn Moawab weh mi naym Root an Orpa. Den bowt ten yaaz layta, Nayomi too son dehn mi ded tu, ahn dehn neva lef no pikni. (Ruth 1:1-5) Imajin how sad dehn chree uman mosi mi feel! Af koars, Root an Orpa kuda mi chooz fi geh marid agen, bot hoo mi wahn dehdeh fi tek kayr a Nayomi, hoo mi onli di geh oalda? Nayomi mi soh dipres dat shee seh: “Noh kaal mi Nayomi, kaal mi Mayra, bikaaz di Almaiti mek Ah ga wahn mizarabl laif.” Wid sadnis eena ih haat, Nayomi mi disaid fi goh bak da Betlihem, ahn Root gaahn lang wid ahn.—Ruth 1:7, 18-20.

9. Akaadn tu Ruth 1:16, 17, ahn 22, how Root mi inkorij Nayomi?

⁹ Laayal lov mi wahn help Nayomi fi feel beta. Fi egzampl, Root mi shoa laayal lov tu Nayomi, bikaaz ih neva lef Nayomi said. (Reed Ruth 1:16, 17, 22.) * Ahn wen dehn mi deh da Betlihem, Root mi werk haad fi gyada op baali soh dat shee ahn Nayomi kuda mi ga sohnting fi eet. Bikaaz a dat, evribadi mi noa Root az wahn gud uman weh werk haad.—Ruth 3:11; 4:15.

10. How Jehoava mi shoa lov tu di poa peepl laik Nayomi ahn Root?

¹⁰ Jehoava mi mek wahn laa weh mi shoa dat ih ga kompashan fi poa peepl laik Nayomi ahn Root. Hihn mi tel ih peepl noh fi pik op weh mi jrap wen dehn mi-di gyada dehn haavis, bot fi lef it deh soh dat di poa peepl kuda mi tek it. (Lev. 19:9, 10) Soh eevn doa Nayomi ahn Root mi poa, dehn neva haftu bayg fi food.

11-12. Weh Bowaz mi du fi mek Nayomi ahn Root bee hapi?

¹¹ Di feel wehpaat Root gaahn fi gyada op grayn mi bilangz tu wahn rich man weh mi naym Bowaz. Ih mi reeli impres hihn wen ih si how Root mi soh laayal tu Nayomi ahn humoch shee mi lov Nayomi. Soh laytaraan, ih geh marid tu Root ahn bai bak di lan weh yoostu bilang tu Nayomi famili. Da way deh, di lan mi wahn bee fi Root pikni dehn eena di fyoocha. (Ruth 4:9-13) Den Root ahn Bowaz mi ga wahn lee bwai weh mi naym Obed, ahn hihn mi en op fi bee King Dayvid grampa.—Ruth 4:17.

¹² Wi ku onli imajin how hapi Nayomi mosi mi feel wail shee hoal di lee baybi ahn giv tanks tu Jehoava! Bot wen Nayomi ahn Root geh rayz op bak tu laif, dehn wahn bee eevn hapiya. Wai? Bikaaz dehn wahn fain owt dat Obed da-mi Jeezas ansesta!

13. Wat da sohn impoatant lesn wi ku laan fahn Nayomi ahn Root?

 ¹³ Weh wi ku laan? Wen wi goh chroo difrent prablemz, wi mait feel diskorij er eevn feel veri sad. Maybi wi feel laik wi prablemz wahn neva goh weh. Joorin taimz laik dat, wi need fi pen pahn Jehoava ahn stay kloas tu wi bradaz ahn sistaz. Af koars, Jehoava mait noh geh rid a di chraiyal weh wi di fays. Aftaraal, hihn neva bring Nayomi hozban an ih son dehn bak tu laif. Bot wan ting wi noa fi shoar da dat Hihn wahn aalwayz help wi get chroo di chraiyalz weh wi fays. Ahn wan way ih mait du dat da chroo di kain tingz weh wi bradaz ahn sistaz du fi wi.—Prov. 17:17.

14. Wai wahn Leevait man mi geh soh diskorij?

¹⁴ Di man weh mi rait Psalm 73 da-mi wahn Leevait. Dat meenz dat hihn mi ga di privilij fi serv da di plays wehpaat Jehoava peepl goh fi wership ahn. Bot wahn taim, eevn hihn mi geh diskorij. Wai? Bikaaz ih mi staat tu geh jelos a di peepl weh mi wikid ahn prowd, noh bikaaz hihn mi waahn bee laik dehn, bot bikaaz ih mi luk laik dehn mi gat tingz gud eevn doa dehn mi soh wikid. (Ps. 73:2-9, 11-14) Ih mi luk laik dehn gat evriting—moni, wahn gud laif, ahn no woriz. Ahn wen di saamis si dat, ih geh soh diskorij dat ih seh: “Ah mi kip mi haat kleen ahn wash mi han dehn fi shoa dat Ah inosent. Bot aala dat da-mi fi notn.” Datdeh kaina tinkin kuda mi kaaz ahn fi stap serv Jehoava.

15. Akaadn tu Psalm 73:16-19, ahn 22-25, how di Leevait man mi stap ihself fahn geh soh diskorij?

¹⁵ Reed Psalm 73:16-19, 22-25. * Di Leevait man “gaan eena di hoali plays a Gaad.” Sins ih mi dehdeh, moa dan laikli ih mi deh rong ada peepl weh mi wership Jehoava an ih kuda mi bee kaam, tink schrayt, ahn pray bowt ih sichuwayshan.  Ahn dat mi help ahn fi si dat hihn mi-di tink laik wahn persn weh noh ga no sens, ahn dat if ih neva wach owt, ih kuda mi looz ih frenship wid Jehoava. Hihn mi aalso geh fi andastan dat wikid peepl deh pahn “slipri grong,” ahn soon dehn “wahn geh dischrai.” Dis Leevait man mi haftu laan how fi si tingz di saym way how Jehoava si dehn soh dat ih neva geh soh diskorij ahn jelos a wikid peepl. Wen ih mi du dat, dehndeh tingz neva bada ahn agen an ih mi hapi. Hihn mi seh: “Az lang az [Jehoava] deh wid mee, Ai noh need notn els pahn di ert.”

16. Wat da sohn lesn wi ku laan fahn di Leevait man?

¹⁶ Weh wi ku laan? Wi shuda neva bee jelos a wikid peepl weh luk laik dehn di ga wahn gud laif. Fi dehn hapinis noh wahn laas lang; dehn noh ga di hoap fi liv fareva. (Eccl. 8:12, 13) If wi geh jelos a peepl laik dat, wi onli wahn diskorij wiself ahn damij wi rilayshanship wid Jehoava. Soh if yu eva kech yuself di geh jelos a di gud laif weh wikid peepl luk laik dehn di liv, du weh di Leevait mi du. Obay Jehoava lovin advais ahn kip kompni wid peepl weh du fi hihn wil. Wen yu lov Jehoava moa dan eniting els, dat da wen yu wahn bee reeli hapi. Ahn yu wahn stay pahn di road weh kehr yu tu “di reel laif.”—1 Tim. 6:19.

17. Wai Peeta mi geh diskorij?

¹⁷ Di apasl Peeta da-mi wahn laivli man, bot sohntaim ih mi seh er du tingz widowt tink, ahn laytaraan ih mi feel sari fi weh ih mi seh er du. Fi egzampl, wen Jeezas mi tel ih apasl dehn dat ih mi wahn haftu sofa ahn ded, Peeta staat tu rayl op wid Jeezas; ih tel ahn: “Dehnya tingz noh wahn hapm tu yu ataal.” (Mach. 16:21-23) Bot Jeezas karek Peeta. Den wen wahn groop a soalja kohn fi ares Jeezas, Peeta ak widowt tink ahn chap aaf di ayz a di slayv a di hai prees. (Jan 18:10, 11) Jeezas mi haftu karek Peeta agen. Aalso, Peeta mi boas ahn seh dat if aala di ada apasl dehn mi ron lef Jeezas bikaaz a weh mi wahn hapm tu ahn, hihn wuda neva disoan Jeezas! (Mach. 26:33) Peeta mi ga lata kanfidens eena ihself. Bot weh hapm laytaraan? Ih mi geh frayd bad ahn disoan Jeezas chree taimz! Peeta mi geh  soh diskorij dat ih “gaan owtsaid ahn baal ahn baal bikaaz ih mi feel veri sad.” (Mach. 26:69-75) Hihn mi praabli staat tu wanda if Jeezas kuda eva fergiv ahn.

18. How Jeezas mi help Peeta fi stap feel diskorij?

¹⁸ Peeta neva geh soh diskorij tu di point dat ih stap serv Jehoava. Afta weh mi hapm, ih get rait op agen ahn kantinyu serv Jehoava lang wid di ada apasl dehn. (Jan 21:1-3; Aks 1:15, 16) Weh mi help ahn fi feel beta agen? Wel, erliya Jeezas mi pray fi mek Peeta fayt aalwayz geh schranga ahn schranga, an ih tel Peeta fi goh bak an inkorij ih bradaz. Jehoava mi ansa da sinsyaa pryaa. Ahn laytaraan, Jeezas apyaa tu Peeta fi inkorij ahn. (Look 22:32; 24:33, 34; 1 Kor. 15:5) Aalso, wahn taim afta di apasl dehn gaahn fishin hoal nait ahn neva kech notn, Jeezas apyaa tu dehn. Joorin da taim, Jeezas mi giv Peeta wahn chaans fi shoa ahn humoch ih lov ahn. Jeezas mi fergiv ih dyaa fren ahn giv ahn moa werk fi du.—Jan 21:15-17.

19. Akaadn tu Psalm 103:13, 14, how Jehoava feel bowt wi wen wi sin?

¹⁹ Weh wi ku laan? Di way Jeezas mi chreet Peeta shoa wi dat Jeezas da wahn persn weh shoa lata mersi, jos laik ih Pa. Soh weneva wi mek wahn mistayk, wi shudn tink dat Jehoava wahn neva fergiv wi. Memba, dat da egzakli weh Saytan waahn wi tink. Soh mek wi chrai haad fi si wiself ahn di wan dehn weh sin gens wi di sayhn way how Jehoava si wi. Jehoava lov wi an andastan dat wi noh perfek, ahn hihn waahn fergiv wi.—Reed Psalm 103:13, 14. *

20. Weh wi wahn diskos eena di neks aatikl?

²⁰ Wen wi mi luk pahn di egzampl a Joazef, Nayomi ahn Root, di Leevait, ahn di apasl Peeta, dehn mi rimain wi dat “Jehoava kloas tu wan dehn weh sad eena dehn haat.” (Ps. 34:18) Sohntaim Jehoava alow wi fi goh chroo difrent chraiyalz, an ih mait alow wi fi feel diskorij tu. Bot wi fayt wahn geh schranga wans wi pen pahn Jehoava fi help wi bayr op anda dehndeh chraiyalz. (1 Peet. 1:6, 7) Eena di neks aatikl, wi wahn laan moa bowt how Jehoava sopoat ih laayal servant dehn weh feel diskorij, maybi bikaaz a dehn oan imperfekshan er bikaaz a di haad sichuwayshan weh dehn mait di fays.