1-2. (a) Weh koman di apasl Peeta, Jaymz, ahn Jan mi get, ahn how dehn mi rispan tu da koman? (b) Weh wi wahn diskos eena dis aatikl?

AFTA di Paasoava a 32 C.E., di apasl Peeta, Jaymz, ahn Jan mi si wahn amayzin vizhan. Pahn wahn hai mongtin, maybi pahn Mongt Herman, Jeezas apyaarans mi chaynj fronta dehn. “Ih fays staat tu shain brait laik di son, an ih kloaz geh az wait az lait.” (Mach. 17:1-4) Rait bifoa di vizhan mi don, di apasl dehn mi hyaa Gaad seh: “Dis da mai Son, di wan weh Ah onli lov, ahn di wan weh Ah pleez wid. Unu mos lisn tu ahn.” (Mach. 17:5) Di way how dehn liv dehn laif afta dat shoa dat dehn mi reeli lisn tu Jeezas. Wee waahn fala fi dehn egzampl.

² Eena di aatikl bifoa dis wan, wi mi laan dat fi lisn tu Jeezas vais meenz dat wi shuda stap du sertn tingz. Eena dis aatikl, wi wahn diskos too tingz weh Jeezas seh wi shuda du.

3. Akaadn tu Machyu 7:13, 14, weh wi shuda du?

³ Reed Machyu 7:13, 14. Noatis dat Jeezas menshan too difrent gayt weh leed tu too difrent road, wahn  “waid” road ahn wahn “naro” road. Dehn onli ga too road. Wee haftu disaid wich wan a dehnya road wi wahn chravl pan. Dis da di moas impoatant disizhan wi wahn eva mek bikaaz onli wan a dehn road leed tu evalastin laif.

4. How yoo wuda diskraib di “waid” road?

⁴ Wi haftu memba di difrens bitween dehnya too road. Wahn lata peepl di chravl pahn di “waid” road bikaaz ih eezi fi chravl pan. Sad fi seh, wahn lata peepl chooz fi stay pahn da road ahn fala weh evribadi els di du. Bot dehn noh andastan dat da Saytan di ron di shoa pahn da road ahn hihn di chrai get az moch peepl az ih kud fi goh pan it. Dis road leed tu dischrokshan.—1 Kor. 6:9, 10; 1 Jan 5:19.

5. Da how sohn peepl chrai fain di “naro” road ahn staat tu chravl pan it?

⁵ Di ada road “naro” ahn Jeezas seh dat da onli lee bit a peepl di fain it. Bot wai? Eena di neks vers, Jeezas mi waan ih falowaz bowt di faals prafit dehn. (Mach. 7:15) Dehn ga towznz a difrent rilijan, ahn bikaaz a dat wahn lata peepl feel diskorij er kanfyooz dat dehn nat eevn waahn luk fi di road weh leed tu laif. Bot dehn kud fain da road. Jeezas mi seh: “Unu da mi disaipl dehn fi chroo if unu obay mi teechinz, an unu wahn noa di chroot, ahn di chroot wahn set unu free.” (Jan 8:31, 32) Ih gud dat yoo neva du di saym az evribadi els, insteda dat, yu mi saach fi di chroot. Yu mi staat wahn deep stodi a di Baibl fi laan weh Gaad ekspek fahn wi, ahn yu mi lisn tu Jeezas teechinz. Yu mi laan wahn lata tingz laik fi rijek di teechinz a faals rilijan ahn noh tek paat eena eni kaina selibrayshan weh kohn fahn faals rilijan. Yu mi aalso laan dat ih noh wahn eezi fi mek chaynjiz eena yu laif fi pleez Jehoava. (Mach. 10:34-36) Ih mi praabli haad fi yoo wen yu mi-di mek dehnya chaynjiz. Bot stil, yu mi kip di chrai yu bes bikaaz yu lov yu hevnli Faada ahn yu waahn mek ahn hapi. Fi shoar hihn pleez wid yu!—Prov. 27:11.

6. Akaadn tu Psalm 119:9, 10, 45, 133, weh ku help wi fi stay pahn di naro road?

⁶ If wi don staat tu chravl pahn di naro road, weh ku help wi fi stay pan it? Tink bowt dis. Wen wi di chravl, wi mait si sohn lee fens saida di road. Da lee fens dehdeh fi help protek wahn jraiva an ih veekl fahn goh tu kloas tu di ej a di road er fahn jraiv aafa di road. Nobadi wuda komplayn ahn seh dat di fens di stap dehn fahn di jraiv aafa di road ahn geh hert er ded! Jehoava standadz weh deh eena di Baibl da laik da fens. Dehn help wi fi stay pahn di naro road.—Reed Psalm 119:9, 10, 45, 133. *

7. How yong peepl shuda feel bowt di naro road?

⁷ Unu yong peepl, unu eva feel laik unu kyaahn du weh unu waahn bikaaz unu haftu obay Jehoava standadz? Dat da weh Saytan waahn yu tink. Ih mait luk laik di peepl weh di chravl pahn di waid road di ga fon ahn Saytan waahn yu foakos pahn dat. Hihn waahn yu tink dat yu  noh di injai laif laik yu klaasmayt dehn ahn peepl weh yu si pahn di Intanet. Saytan waahn yu tink dat Jehoava standadz di kip yu bak fahn injai laif az moch az yu kud. * Bot memba dis: Saytan noh waahn di peepl weh di chravl pahn dis waid road noa wehpaat dehn wahn en op. Pan di ada han, Jehoava waahn yu noa how wandaful fi yoo laif wahn bee if yu stay pahn di road weh leed tu laif.—Ps. 37:29; Isa. 35:5, 6; 65:21-23.

8. Weh yong peepl ku laan fahn Olaf egzampl?

⁸ Mek wi kansida weh wi ku laan fahn di ekspeeryens a wahn yong brada weh naym Olaf. * Ih klaasmayt dehn mi chrai get ahn fi ga seks. Hihn mi eksplayn tu dehn dat Jehoava Witnisiz liv akaadn tu di Baibl hai moaral standadz. Wen sohn  gyal eena fi hihn klaas hyaa dis, dehn mi chrai eevn haada fi get ahn fi ga seks wid dehn. Bot Olaf mi stan op fi weh rait. Dis da neva di onli presha weh hihn mi fays. Hihn seh: “Mi teecha dehn mi chrai kanvins mi fi geh wahn haiya ejukayshan bikaaz dat wuda mek peepl rispek mi. Dehn tel mi dat if Ah noh du dat, Ah noh wahn geh wahn gud jab er ga wahn hapi laif.” Weh mi help Olaf fi noh giv een tu da presha? Hihn seh: “Ah mi bil op wahn schrang frenship wid di frenz eena mi kangrigayshan. Dehn da-mi laik wahn famili tu mee. Ah mi aalso staat stodi di Baibl moa. Di moa Ah mi stodi, di moa Ah mi kanvins dat dis da di chroot. Ahn bikaaz a dat, Ah mi waahn serv Jehoava noh mata wat.”

9. If wi waahn stay pahn di naro road, weh wi shuda du?

⁹ Saytan wuda waahn yu kom aafa di road weh leed tu laif. Hihn waahn yu du weh moas peepl du. Hihn waahn yu jain een pahn di road weh ‘leed tu dischrokshan.ʼ (Mach. 7:13) Bot, wi wahn ku stay pahn di naro road if wi kip aan di lisn tu Jeezas ahn luk pahn da road az wahn protekshan. Now, mek wi kansida sohnting els weh Jeezas mi seh wi shuda du.

10. Akaadn tu Machyu 5:23, 24, weh Jeezas mi seh wi shuda du?

¹⁰ Reed Machyu 5:23, 24. Rait ya, Jeezas mi-di taak bowt sohnting weh mi reeli impoatant tu di Jooz weh mi-di lisn tu ahn. Imajin sohnbadi deh da di templ an ih don redi fi gi di prees ih animal weh ih bring az wahn sakrifais. Bot, if ih memba dat ih brada ga sohnting gens ahn, ih mi fi lef ih sakrifais ahn “goh.” Wai? Bikaaz dehn mi ga sohnting moa impoatant weh hihn mi need fi du bifoa hihn mi aafa ih sakrifais tu Jehoava. Jeezas mi seh klyaa-wan: “Fers mek pees wid yu brada.”

11. Weh Jaykop mi du fi mek pees wid Eesaa?

¹¹ Wi ku laan wahn gud lesn bowt weh ih meenz fi mek pees fahn sohnting weh mi hapm eena Jaykop laif. Gaad mi sen wahn aynjel fi tel Jaykop fi goh bak da di lan weh ih kohn fram. Da mi bowt 20 yaaz sins Jaykop mi lef fahn deh. (Gen. 31:11, 13, 38) Bot dehn mi ga wahn prablem. Bak den, fi hihn oalda breda, Eesaa, mi waahn kil ahn. (Gen. 27:41) Bot Jaykop mi “fraitn an ih staat tu wori” bikaaz ih mi-di wanda if ih breda stil mi waahn kil ahn. (Gen. 32:7) Weh Jaykop mi du fi mek pees wid ih breda? Fers, hihn mi kip di pray tu Jehoava bowt di mata. Den hihn sen wahn big gif tu Eesaa. (Gen. 32:9-15) Wen Jaykop mi fainali si ih breda Eesaa, ih mi shoa ahn rispek. Ih mi bow dong tu ahn noh onli wan taim, er too taim, bot sevn taimz! Bikaaz Jaykop mi hombl an ih mi shoa rispek tu ih breda, hihn kuda mi mek pees wid ahn.—Gen. 33:3, 4.

12. Weh wi laan fahn Jaykop egzampl?

¹² Wi laan wahn gud lesn fahn how Jaykop mi pripyaa fi meet ih breda ahn weh ih mi du wen ih mi meet ahn. Bikaaz Jaykop mi hombl, hihn mi aks Jehoava fi help. Den ih mi shoa dat ih mi meen weh ih pray fa wen ih mi du ih bes fi mek pees wid ih breda. Wen dehn mi fainali meet, Jaykop neva aagyu wid Eesaa bowt hoo mi rait ahn hoo mi rang. Jaykop goal da-mi fi mek pees wid ih breda. How wi ku fala Jaykop egzampl?

13-14. If wi ofen wan a wi brada er sista, weh wi shuda du?

¹³ If wi waahn stay pahn di road weh leed tu laif, den wi haftu chrai wi bes fi ga pees wid wi bradaz ahn sistaz. (Roam. 12:18) Weh wi shuda du if wi riyalaiz dat wi ofen wan a wi brada er sista? Jos laik Jaykop, wi waahn pray tu Jehoava. Wi ku aks ahn fi help wi mek pees wid wi brada er sista.

¹⁴ Wi aalso need fi tek di taim fi egzamin wiself. Fi du dat, wi ku aks wiself kweschanz laik dehnya: ‘Ai wilin fi seh dat Ah mi rang, dat Ah sari, ahn mek pees? How Jehoava ahn Jeezas wahn feel if Ai tek di fers step ahn mek pees wid mi brada er sista?ʼ Wi ansa tu dehndeh kweschan ku mek wi waahn lisn tu Jeezas ahn bee hombl wen wi mek pees wid wi bradaz. Wen wi du dat, wi di fala Jaykop egzampl.

15. Wen wi aplai di prinsipl da Ifeezhanz 4:2, 3, how dat ku help wi fi mek pees wid wi bradaz?

¹⁵ Jos imajin weh kuda mi hapm if Jaykop mi aagyu wid Eesaa bowt hoo mi rait ahn hoo mi rang! Di rizolt wuda mi bee difrent. Wen wi di setl wahn mata wid wahn brada er sista, wi need fi bee hombl. (Reed Ifeezhanz 4:2, 3.) Proverbs 18:19 seh: “Wahn brada weh ofendid haada fi reech dan wahn siti weh ga schrang waal. Ahn dehn aagyument da laik di baar dehn a di gayt a wahn schrang siti.” Wen wi hombl ahn seh sari, dat wahn help wi fi get eena da “schrang siti.”

16. Weh wi shuda tink bowt, ahn wai?

¹⁶ Wi aalso need fi tink bowt weh wi wahn seh tu wi brada er sista ahn how wi wahn seh it. Wen wi redi, wi shuda goh taak tu di persn weh geh ofendid ahn chrai help ahn fi si how ih ku ga wahn gud frenship wid wi agen. At fers, ih mait seh tingz weh wahn mek wi feel bad. Ih wuda bee eezi fi geh beks ahn tel ahn wai wi du weh mi wi du. Bot if wi du dat, yu tink dat wahn help wi mek pees? Non ataal! Memba dat fi mek pees wid yu brada moa impoatant dan fi fain owt hoo mi rait er hoo mi rang.—1 Kor. 6:7.

17. Weh yu ku laan fahn Gilbert egzampl?

¹⁷ Wahn brada weh naym Gilbert mi werk haad fi aalwayz mek pees. Hihn  seh: “Ah mi ga wahn lata prablemz wid mi daata. Fi moa dan too yaaz, Ah werk haad fi taak eena wahn kaam way soh dat Ah kuda mi ga wahn gud rilayshanship wid shee.” Wat els Gilbert mi du? Ih seh: “Bifoa Ah taak tu mi daata, Ah wuda pray ahn rimain miself noh fi geh opset if shee seh sohnting weh noh kain tu mi. Ah need fi bee redi fi fergiv. Ah laan dat Ah shudn chrai proov dat Ai mi rait an Ah mi andastan dat mai rispansabiliti da-mi fi mek pees.” Wat da-mi di rizolt? Gilbert seh: “Now, Ah ga pees a main bikaaz Ah ga wahn gud rilayshanship wid mi hoal famili.”

18-19. If wi ofen sohnbadi, weh wi shuda mek op wi main fi du, ahn wai?

¹⁸ Weh yu shuda mek op yu main fi du if yu riyalaiz dat yu hert wan a yu brada er sista? Obay weh Jeezas seh bowt mek pees. Taak tu Jehoava bowt di mata, ahn pen pahn fi hihn hoali spirit fi help yu mek pees. If yu du dat, yu wahn bee hapi, ahn yu wahn proov dat yu di lisn tu Jeezas.—Mach. 5:9.

¹⁹ Wi soh tankful dat Jehoava gi wi lovin dairekshan chroo di “hed a di kangrigayshan,” Jeezas Krais. (Ifee. 5:23) Mek wi “lisn tu ahn” laik weh di apasl Peeta, Jaymz, ahn Jan mi du. (Mach. 17:5) Eena dis aatikl, wi fain owt how wi ku du dat wen wi mek pees wid wi bradaz ahn sistaz weh wi ofen. Wen wi mek pees ahn stay pahn di road weh leed tu laif, wi wahn geh wahn lata blesin now ahn hapinis weh wahn laas fareva eena di fyoocha.