Wen Jeezas mi deh da hevn, hihn mi laan kwalitiz weh mek hihn bee wahn gud persn fi werk lang wid. Den, wen ih mi deh pahn ert, hihn da-mi wahn gud egzampl a sohnbadi weh werk gud wid adaz. How wee ku benifit fahn Jeezas egzampl? Wen wi stodi fi hihn egzampl, wi ku fain chree prinsipl weh ku help wi fi werk gud wid adaz. Dehnya prinsipl wahn help wi fi bee moa yoonaitid wid wi bradaz ahn sistaz.

Sohnbadi weh werk gud wid adaz hombl. Tu hihn, ih werkmayt dehn impoatant an ih noh chrai du tingz fi shoa aaf ahn geh atenshan fi ihself. Jeezas mi laan how fi bee hombl fahn Jehoava. Eevn doa Jehoava da di onli Wan weh wi kaal Kriyayta, hihn mi waahn adaz noa bowt di impoatant werk weh fi hihn Son mi du. Wi andastan dat fahn weh Gaad mi seh: “Mek wi mek man eena fi wee imij.” (Gen. 1:26) Wen Jehoava mi seh dehndeh werdz, Jeezas mi noa dat Jehoava veri hombl.—Ps. 18:35.

Wen Jeezas mi deh pahn ert, hihn mi hombl jos laik ih Faada. Wen peepl mi prayz ahn fi weh ih mi du, hihn mi dairek da prayz tu Gaad, di Wan weh dizerv it. (Maak 10:17, 18; Jan 7:15, 16) Jeezas mi werk fi kip di pees wid ih disaipl dehn ahn hihn mi chreet dehn laik frenz, noh laik slayv. (Jan 15:15) Hihn mi eevn wash dehn fut fi teech dehn bowt hyoomiliti. (Jan 13:5, 12-14) Laik Jeezas,  wi waahn aana wi bradaz ahn sistaz insteda put weh wee waahn fers. Wi ku du lat moa wen wi “shoa aana tu wan anada” ahn noh wori bowt hoo wahn geh di prayz.—Roam. 12:10.

Wahn hombl persn aalso andastan dat wen “wahn groop a kongslaz ga gud kamyoonikayshan dehn ga gud rizolts.” (Prov. 15:22) Noh mata humoch ekspeeryens er skilz wi gat, wi haftu memba dat no hyooman noa evriting. Eevn Jeezas mi seh dat dehn ga tingz weh hihn noh noa. (Mach. 24:36) Hihn mi aalso inchrestid eena weh fi hihn disaiplz mi noa er weh dehn mi tink. (Mach. 16:13-16) Dat da wai dehn wan weh hihn mi werk lang wid mi komfatabl rong ahn! Sayhn way soh, wen wi hombl ahn memba dat wi noh noa evriting, ahn wen wi lisn tu di aidyaaz weh wi bradaz ahn sistaz gat, wi wahn di mek it eeziya fi ga pees monks wiself, ahn wi wahn “ga gud rizolts.”

Ih veri impoatant fi mek eldaz fala Jeezas egzampl ahn bee hombl wen dehn werk tugeda. Dehn need fi memba dat hoali spirit ku mek eni wan a di elda dehn eena di badi a eldaz seh sohnting joorin wan a dehn eldaz meetin weh wahn help dehn fi mek wahn gud disizhan. Joorin dehn meetin, eldaz ku mek shoar dat evribadi feel komfatabl fi shayr weh dehn tink, den tugeda dehn wahn mek gud disizhanz weh wahn help di hoal kangrigayshan.

Sohnbadi weh werk gud wid adaz da wahn reeznabl persn. Ih noh aalwayz du tingz ih oan way an ih hombl. Fi shoar dehn mi ga wahn lata taimz wen Jeezas si dat fi hihn Faada reeznabl. Fi egzampl, Jehoava sen Jeezas fi ded soh dat ih kuda sayv hyoomanz fahn det soh dat dehn ku ga di apachooniti fi liv fareva.—Jan 3:16.

Jeezas mi reeznabl. Tink bowt wen hihn mi help wahn uman fahn Foneesha eevn doa hihn mi kohn fi help di peepl a Izrel. (Mach. 15:22-28) Jeezas mi aalso reeznabl eena weh ih mi ekspek fan ih disaiplz. Afta Peeta mi disoan Jeezas fronta wahn lata peepl, Jeezas mi redi fi fergiv ahn. Laytaraan, hihn mi gi Peeta sohn impoatant werk fi du. (Look 22:32; Jan 21:17; Aks 2:14; 8:14-17; 10:44, 45) Jeezas egzampl shoa wi dat “evribadi fi si dat [wi] noh aalwayz waahn [wi] oan way.”—Fil. 4:5.

 Wen wi reeznabl, ih aalso help wi fi werk gud wid aal kaina peepl eena wahn peesful way. Bikaaz Jeezas mi chreet peepl rong ahn soh gud, ih enimi dehn mi jelos ahn an akyooz ahn fi bee “frenz wid di taks kalekta ahn di sina dehn” hoo lisn tu ih mesij. (Mach. 11:19) Yu tink wee ku bee laik Jeezas ahn werk gud wid adaz hoo difrent fahn wee? Louis, wahn brada hoo spen taim di werk wid peepl fahn difrent bakgrong eena di chravlin werk ahn da Betel, seh: “Wen Ah werk wid ada imperfek peepl da laik Ah di bil wahn waal wid aal kaina stoan weh ga difrent saiz. Bikaaz di stoan dehn difrent, ih tek moa efoat, bot di waal ku en op di bee schrayt. Ai chrai mi bes fi mek eni ajosment weh Ah need fi mek soh dat Ah ku werk lang wid adaz ahn geh di werk don.” Dat da wahn gud atichood weh wi ku gat!

Weh apachoonitiz wi ga fi shoa dat wi reeznabl wid wi bradaz ahn sistaz eena wi kangrigayshan? Wi ku du dat wen wi deh wid wi feel servis groop. Wi mait werk wid poblishaz hoo ga difrent famili rispansabiliti er difrent ayj dan wee. Wee wilin fi bee reeznabl an ajos wi taim er du di kaina preechin weh dehn prifaa soh dat dehn ku injai di minischri moa?

Wahn persn weh werk gud wid adaz “wilin fi shayr.” (1 Tim. 6:18) Wail Jeezas mi-di werk langsaid ih Pa, fi shoar ih mi noatis dat Jehoava neva haid tingz fan ahn. Wen Jehoava mi “mek evriting da hevn,” Jeezas “mi dehdeh” an ih mi laan fahn hihn. (Prov. 8:27) Laytaraan, Jeezas mi moa dan hapi fi shayr “evriting weh [ih] Faada mi tel ahn” wid ih disaiplz. (Jan 15:15) Wi waahn fala Jehoava egzampl ahn shayr weh wi laan wid wi bradaz ahn sistaz. Wahn persn weh werk gud wid adaz noh wahn hoal bak fahn tel dehn weh dehn need fi noa er weh wuda help dehn jos soh dat hihn ku ga di opa han. Insted, ih wuda bee moa dan hapi fi shayr wid dehn weh ih noa er weh ih laan.

Wi ku aalso inkorij wi bradaz ahn sistaz weh wi werk lang wid. Wen sohnbadi noatis di haad werk weh wi du ahn dehn tank wi far it, dat mek wi feel gud, noh chroo? Jeezas mi tel ih disaiplz bowt di gud weh hihn si eena dehn. (Kompyaa Machyu 25:19-23; Look 10:17-20.) Hihn mi eevn tel dehn dat dehn wahn “du eevn grayta tingz” dan hihn. (Jan 14:12) Pahn di nait bifoa ih mi ded, Jeezas mi komen ih faytful apasl dehn; ih tel dehn: “Unu da di wan dehn weh mi stik wid mi chroo aala mi chraiyalz.” (Look 22:28) Weh hihn tel dehn mosi mi inkorij dehn wahn lat ahn mek dehn waahn werk haada! If wee tek di taim fi komen wi bradaz ahn sistaz weh wi werk lang wid, fi shoar dehn wahn hapi ahn dehn wahn luk faawod fi werk haada.

Wahn brada weh naym Kayode seh: “Wahn persn noh haftu bee perfek fi mek ih bee sohnbadi weh gud fi werk lang wid, bot ih mek dehn wan weh ih werk lang wid hapi, an da way deh ih mek di werk eeziya.” Yoo da sohnbadi laik dat? Maybi yu ku aks som a yu bradaz ahn sistaz weh yu werk lang wid. If dehn injai di werk wid yu laik how Jeezas disaiplz dehn mi injai di werk wid hihn, yu wahn ku seh weh di apasl Paal mi seh: “Wi di werk lang wid unu fi mek unu hapi.”—2 Kor. 1:24.