Ah baan eena 1927 da wahn lee tong kloas tu Chicago, Illinois, U.S.A. Mi payrents mi ga faiv pikni: Jetha, Don, den mee, Karl, ahn Joy. Aala wi mi waahn yooz wi laif fi serv Jehoava. Soh eena 1943, Jetha gaahn da di sekant klaas a Gilyad Skool. Wahn yaa layta, eena 1944, Don gaahn da Betel da Brooklyn, New York. Chree yaaz layta, eena 1947, Karl gaahn da Betel. Ahn foa yaaz layta, eena 1951, Joy mi jain dehn. Di gud egzampl weh mi payrents ahn mi breda ahn sista dehn set inkorij mi fi du moa fi Jehoava.

Mi ma ahn mi pa yoostu reed di Baibl ahn dehn mi lov Gaad, ahn dehn mi teech wi fi lov hihn tu. Bot mi pa mi looz rispek fi di cherch afta ih fait eena di fers Werl Waar. Mi ma mi graytful dat mi pa kohn bak alaiv fahn di waar, soh ih tel ahn: “Mek wi goh da cherch laik eena di oal dayz.” Bot mi pa tel ahn: “Ah wahn kehr yu, bot Ai noh gwehn een wid yu.” Soh shee aks ahn: “Bot wai nat?” Hihn seh: “Joorin di waar, Ah si di paasta dehn pahn di too said a di waar di bles di soalja dehn ahn dehn wepanz. Ahn di paasta dehn da fahn di saym rilijan. Dat noh mek sens. How Gaad ku deh pahn di too said a di waar?”

Wahn day, wail mi ma mi deh da cherch, too Witnisiz mi kohn da wi hows. Dehn mi shoa mi pa di too buk weh naym Light, weh mi diskos di Baibl buk a Revilayshan. Mi pa mi inchrestid eena di buk dehn, soh ih tek dehn. Wen mi ma kohn bak fahn cherch, shee si di buk dehn ahn staat tu reed dehn. Den wahn day shee si wahn invitayshan eena wahn nyoozpaypa weh mi-di invait peepl fi jain wahn groop weh mi-di yooz dehndeh buk fi stodi di Baibl. Shee gaan an ih mi meet wahn oalda laydi. Shee aks ahn: “Unu di stodi dis buk ya?” Di laydi tel ahn: “Yes, daalin, kom een.” Di neks week, mi ma kehr faiv a wi. Fahn den aan, wi gaan evri week.

Da wan a dehndeh meetin, di brada weh mi-di kandok it aks mi fi reed Saam 144:​15, weh seh dat “evribadi weh serv Jehoava  Gaad wahn bee hapi.” Da skripcha mi reeli toch mi haat. Too ada skripchaz weh Ah mi reeli laik da 1 Timoti 1:​11, weh seh dat Jehoava da “di hapi Gaad,” an Ifeezhanz 5:​1, weh seh dat wi fi “chrai fi bee laik Gaad.” Dehnya skripchaz help mi fi si dat Ai fi bee hapi di serv Jehoava an Ah fi aalwayz tel ahn tanks fi di privilij fi serv ahn. Dehndeh too ting veri impoatant tu mee.

Di kloasis kangrigayshan mi deh bowt 20 mailz fahn weh wi mi liv. Bot wi mi stil mek di efoat fi goh da di meetin dehn an Ah geh fi laan moa bowt di Baibl. Fi egzampl, da wahn meetin, di kandokta mi kaal pahn Jetha ahn shee mi gi wahn koment. Wen Ah mi hyaa fi shee koment, Ah seh tu miself: ‘Ai mi noa di ansa. Ai kuda mi put op mi han tu.ʼ Sins den, Ah staat tu pripyaa fi di meetin dehn ahn giv mi oan koments. Jos laik mi breda ahn sista dehn, mi rilayshanship wid Jehoava mi kip di groa. Soh eena 1941, Ah mek op mi main fi dedikayt mi laif tu Jehoava ahn geh baptaiz.

Ah memba di kanvenshan da Cleveland, Ohio, gud. Wi famili mi kyamp owt eena sohn tent kloas tu di kanvenshan ayrya. Ahn bradaz ahn sistaz fahn 50 ada siti mi kanek tu di proagram chroo di foan. Rong da taim, di sekant Werl Waar mi-di goh aan, ahn dehn mi-di persikyoot Jehoava Witnisiz moa ahn moa. Soh fi kip di bradaz sayf da nait, di bradaz dehn mi paak dehn kaar wid dehn laits di fays away fahn di kyamp. Evribadi mi agree fi ga sohnbadi eena eech kaar jos in kays eniting hapm. Soh if enibadi mi kohn kaaz chrobl, dehn wuda put aan dehn hedlaits ahn bloa di haan. If dat hapm, den bradaz kuda hori kom owt fi help wi. Ah kuda mi reeli si how Jehoava mi help di bradaz fi bee redi fi eniting. Notn bad mi hapm. Soh Ah mi feel sayf, an Ah sleep gud.

Yaaz layta, wen Ah tink bak pan da kanvenshan, Ah riyalaiz dat mi ma neva shoa dat ih frayd. Insted, shee mi chros Jehoava an ih aaganaizayshan. Ah wahn neva ferget fi shee gud egzampl.

Mi ma staat tu regyula painyaa lee bit bifoa da kanvenshan. Soh shee mi pay kloas atenshan tu di taaks bowt ful-taim servis. Wen wi mi deh pahn wi way hoam, shee tel wi, “Ah wuda waahn kantinyu painyaa, bot Ah kyaahn du dat ahn tek kayr a di howswerk tu.” Den ih mi aks wi fi help ahn owt, ahn wee mi agree. Soh shee mi aks wi if wi kuda mi kleen wan er too room bifoa wi jrink tee da maanin. Afta wi wuda lef fi skool, shee wuda mek shoar dat di hows deh nais ahn neet ahn den shee wuda goh owt eena servis. Aldoa Mami mi bizi, shee mi aalwayz tek kayr a wi. Shee mi mek shoar ih deh hoam fi wi wen wi kohn hoam fi lonch ahn wen wi kohn bak fahn skool da eevnin. Sohntaim wi wuda goh owt wid ahn eena servis afta skool, ahn dat mi help wi fi andastan weh ih meen fi bee wahn painyaa.

Ah mi staat tu painyaa wen Ah mi 16. Aldoa mi pa da neva wahn Witnis, hihn mi waahn noa how Ah di du eena di minischri. Wahn eevnin Ah tel ahn dat eevn doa Ah di chrai haad fi geh wahn Baibl stodi, Ah noh fain nobadi weh inchrestid. Lee bit afta dat, Ah aks ahn, “Yoo wuda waahn wahn Baibl stodi?” Ih tink bowt it lee bit an ih seh, “Wel, Ah noh ga no reezn fi seh no.” Soh mi pa da-mi mai fers Baibl styoodent. Dat da-mi sohnting speshal fi mee!

Wi mi staat stodi di buk weh naym “The Truth Shall Make You Free.” Az mi pa mi-di mek proagres, Ah riyalaiz dat hihn mi-di help mi fi bee wahn beta Baibl styoodent ahn teecha. Fi egzampl, wahn taim, afta wi mi reed wahn paragraaf, ih aks mi: “Dis da weh di buk seh, bot how yoo noa dat weh di buk seh da chroo?” Ah neva noa weh fi seh, kaaz ih kech mi aaf gyaad. Soh Ah tel ahn: “Ah noh noa weh fi tel yu rait now, bot di neks taim wi stodi Ah wahn ga wahn ansa fi yu.” Soh Ah mi fain sohn skripchaz weh help mi fi ansa ih kweschan. Sins den, Ah laan fi du beta risaach. Dat mi help mi fi bee redi fi di Baibl stodi. Dat mi help too a wi fi kantinyu groa eena wi rilayshanship wid Jehoava. Mi pa mi yooz weh ih laan eena ih laif, an eena 1952 ih geh baptaiz.

Wen Ah mi 17 Ah lef hoam. Rong da saym taim, Jetha a geh fi bee wahn mishineri, ahn Don gaahn da Betel. Dehn mi reeli lov dehn asainment, ahn dat mi reeli inkorij mi fi waahn du moa. Soh Ah mi aplai fi Betel ahn fi Gilyad, an Ah lef it op tu Jehoava. Eena 1946, Ah mi geh invaitid fi serv da Betel.

Oava di yaaz, Ah geh lata difrent asainments da Betel. Tanks tu dat, Ah laan lata nyoo tingz. Joorin dehnya 75 yaaz, Ah laan how fi mek buk. Ah mi serv eena di akonks dipaatment. An Ah mi laan how fi bai tingz weh di aaganaizayshan mi need ahn fi ship dehn tu wehpaat dehn mi need dehn. Bot weh Ah reeli injai da di inkorijin spirichwal proagramz da Betel, laik maanin wership an ada taaks.

Eena 1947, mi lee breda, Karl, gaahn da Betel. Ah laan wahn lat fan ahn. Hihn da-mi wahn gud Baibl styoodent ahn teecha. Wahn taim, Ah aks ahn fi help mi wid wahn taak. Ah eksplayn tu ahn dat Ah gyada lata infamayshan, bot Ah neva shoar how fi put it tugeda.  Soh hihn aks mi, “Joel, wat da di teem a yu taak?” Rait away, Ah riyalaiz wat da di prablem. Ah mi need fi yooz jos di infamayshan weh mi wahn help mi fi eksplayn di mayn point a mi taak ahn lef di res wan said. Ah neva ferget dat.

Fi bee hapi da Betel, wi haftu mek shoar dat wi tek paat eena di preechin werk. If wi du dat, wi wahn ga sohn gud ekspeeryens. Wahn taim, wi mi-di du eevnin witnisin da New York City, ahn mee ahn wahn brada disaid fi chek op bak pahn wahn laydi weh mi don geh sohn magazeen. Wi tel ahn, “Dis eevnin wi di shayr sohnting inkorijin fahn di Baibl.” Den shee tel wi, “If da bowt di Baibl, unu ku kom een.” Soh wi mi reed sohn skripchaz weh taak bowt Gaad Kingdom ahn weh Gaad wahn du eena di fyoocha. Shee mosi mi reeli injai da diskoshan, bikaaz ih mi invait sohn ada peepl fi kohn di neks week. Dong di road, shee an ih hozban mi staat serv Jehoava.

Ah mi waahn geh marid fi bowt 10 yaaz bifoa Ah meet di sista weh Ah disaid fi marid. Da weh mi help mi fi fain wahn gud waif? Ah mi pray tu Jehoava an Ah mi tink bowt weh mee ahn mi waif wahn du afta wi marid.

Da di 1953 kanvenshan da Yankee Stadium, Ah mi meet wahn sista weh naym Mary Aniol. Shee gaahn wid Jetha da Gilyad Skool, ahn dehn da-mi mishineri paadna. Mary mi tel mi bowt ih difrent asainment eena di Caribbean an aal di Baibl stodiz weh ih mi ga oava di yaaz. Di moa wi mi geh fi noa eech ada, Ah riyalaiz dat too a wi ga di goal fi du moa eena ful-taim servis. Wi lov fi eech ada mi-di geh schranga, an wi en op di geh marid eena Aypril 1955. Shee reeli set wahn gud egzampl. Shee hapi wid eni asainment weh ih get. Ih werk haad, ih kay bowt adaz, an ih aalwayz put di Kingdom fers eena ih laif. (Mach. 6:33) Ah reeli kuda mi si dat dis da-mi proof dat shee da-mi wahn gif fahn Jehoava. Fi chree yaaz wi mi du serkit werk, ahn den eena 1958 dehn invait wi fi serv da Betel tugeda.

Ah mi laan wahn lat fahn Mary. Wi wuda du wi Baibl reedin tugeda, ahn wi wuda du bowt 15 vers. Ahn wen wan a wi wuda don reed da lee sekshan, wi wuda taak bowt it ahn si how wi kuda yooz it eena wi laif. Shee wuda tel mi tingz ih mi laan fahn Gilyad Skool er fahn wen ih mi serv az wahn mishineri. Dehnya kanvasayshan mi help mi fi du beta poblik taak ahn fi noa how fi inkorij sistaz.—Prav. 25:11.

Eena 2013, mi lee waif, Mary, mi ded. Ah luk faawod fi si ahn agen eena Paradais! Fi now, Ah waahn kantinyu laan nyoo tingz ahn chros eena Jehoava. (Prav. 3:​5, 6) Ah aalwayz chrai tink bowt weh aal Jehoava wahn du fi wi eena di fyoocha. Ih wahn bee wahn privilij fi si weh moa wi wahn laan fan ahn. Ah kyaahn stap tel Jehoava tanks fi aal weh ih du fi mi.