1-2. Weh payrents ku du wen dehn pikni aks kweschanz bowt weh wi bileev?

 EVRIBADI wuda agree dat ih noh eezi fi bee wahn payrent. Dat da wahn ful-taim jab. Jehoava hapi dat unu di werk haad fi help unu pikni fi ga schrang fayt eena ahn. (Deut. 6:​6, 7) An az yu pikni geh oalda, dehn mait waahn noa moa bowt weh wi bileev, laik wai Jehoava seh sertn tingz rang.

² Yu mait wori wen yu pikni staat tu aks yu lata kweschanz. Maybi yu mait eevn feel laik yu pikni fayt week. Bot az yu pikni geh oalda, ih wahn need fi aks kweschanz soh dat ih ku schrentn ih oan fayt. (1 Kor. 13:11) Soh noh frayd fi dehndeh kweschanz. Mek ih poar owt ih haat an eksplayn how ih feel. Tek dis chaans fi help yu pikni tink moa bowt weh wi bileev. Da way deh, ih wahn schrentn ih fayt eena Jehoava ahn weh di Baibl seh.

 3. Weh wi wahn diskos eena dis aatikl?

³ Eena dis aatikl, payrents wahn si how dehn ku help dehn pikni fi (1) ga schrang fayt eena Gaad an eena di Baibl, (2) andastan wai ih gud fi fala di Baibl standadz a weh rait ahn weh rang, ahn (3) laan how fi eksplayn weh dehn bileev tu adaz. Wi wahn diskos wai ih impoatant fi mek yu pikni aks kweschanz, ahn wat da sohn tingz weh yoo ahn yu pikni ku du tugeda weh wahn gi yu di chaans fi taak tu dehn bowt weh di Baibl teech.

 HELP YU PIKNI FI GA SCHRANG FAYT EENA GAAD AN EENA DI BAIBL

 4. Wat da sohn tingz pikni mait aks dehn payrents bowt, ahn wai?

⁴ Payrents need fi andastan dat jos bikaaz dehn ga schrang fayt, noh meenz dat dehn pikni wahn ga schrang fayt tu. Jos laik how yoo neva baan wid fayt, yu son er daata neva baan wid fayt needa. Oava taim, yu pikni wahn staat aks wahn lata kweschanz, laik ‘How Ai noa Gaad egzis? Ai ku reeli chros weh di Baibl seh?ʼ In fak, di Baibl inkorij wi fi “serv Gaad wid [wi] hoal main” ahn fi “chek evriting fi mek shoar ih karek.” (Roam. 12:1; 1 Tes. 5:21) Bot weh yoo ku du fi help yu pikni ga schrang fayt?

 5. Weh payrents ku du fi help dehn pikni bileev dat weh di Baibl seh da di chroot? (Roamanz 12:2)

⁵ Help yu pikni proov fi dehnself dat dis da di chroot. (Reed Roamanz 12:2.) Wen yu pikni aks yu kweschanz, shoa dehn how fi du risaach. Fi egzampl, yu ku shoa dehn how fi fain aatiklz ahn veedyoz pahn jw.org weh wahn help dehn fi si dat di Baibl da noh jos wahn buk weh man mi rait. Rada, da di “werd a Gaad.” (1 Tes. 2:13) Fi egzampl, if dehn luk anda “Baibl Teechinz” ahn den anda “Hischri ahn di Baibl,” dehn ku du risaach bowt Niniveh, wahn Asiriyan siti fahn Baibl taimz. Bak eena di day, sohn peepl weh stodi Baibl hischri seh dat Niniveh neva egzis. Bot rong 1850, dehn mi fain rooinz fahn Niniveh. Dat mi proov dat weh di Baibl seh da chroo. (Zeph. 2:​13-15) If yu pikni wuda waahn du moa risaach er geh moa infamayshan bowt how Baibl prafesi mi kohn chroo wen Niniveh geh dischrai, ih ku reed di “Yu Mi Noa?” aatikl eena di Novemba 2021 kapi a Di Wachtowa. Inkorij yu pikni fi du risaach eena wi poblikayshan dehn ahn fi du risaach eena ada refrens mateeryal weh noh kohn fahn wi aaganaizayshan. If dehn kompyaa di infamayshan, ih wahn help dehn fi bil dehn fayt ahn fi si dat weh di Baibl seh da chroo.

 6. How payrents ku help dehn pikni fi tink bowt wai weh di Baibl seh da chroo? Yooz di egzampl eena di paragraaf. (Koment pahn di picha.)

⁶ Inkorij yu pikni fi tink bowt wai weh di Baibl seh da chroo. Payrents ku luk fi eni chaans fi taak tu dehn pikni bowt di Baibl er bowt fayt eena Gaad. Dehn ku du dat if dehn kehr dehn pikni da wahn paak, kehr dehn da wahn myooziyom, tek wahn onlain toar a wahn myooziyom, luk op buks ahn veedyoz weh taak bowt tingz eena hischri, er kehr dehn da wahn  branch aafis a Jehoava Witnisiz. Fi egzampl, if yu luk op veedyoz bowt hischri, yu ku taak bowt how di Baibl gree wid hischri ahn help yu pikni fi si dat weh di Baibl seh da chroo. Maybi yu ku teech dehn bowt di Moabite Stone. Da stoan 3,000 yaaz oal an ih ga Jehoava naym pan it. Di orijinal Moabite Stone deh da wahn myooziyom da Paris. Yu ku si wahn kapi a da stoan if yu goh pahn “The Bible and the Divine Name” toar da di Werl Hedkwaataz a Jehoava Witnisiz da Warwick, New York. Di Moabite Stone seh dat King Meesha fahn Moawab mi ribel gens Izrel. Ahn di Baibl seh di saym ting. (2 Ki. 3:​4, 5) Yu pikni fayt wahn geh schranga wen ih si fi ihself dat weh di Baibl seh da chroo.—Kompyaa 2 Chronicles 9:6.

7-8. (a) Weh wi ku laan fahn di tingz weh Jehoava mek? Yooz di egzampl dehn eena di paragraaf. (Koment pahn di picha.) (b) Weh kweschanz yu ku aks yu pikni fi help dehn ga fayt dat Gaad mek evriting?

⁷ Inkorij yu pikni fi tink bowt tingz weh Jehoava mek. Wen yu di tek wahn waak wid yu pikni, inkorij dehn fi pay atenshan tu di tingz weh deh rong dehn. Fi egzampl, if yu luk pahn sohn snayl shel, sohn flowaz, di leef dehn pahn sohn plaant, an eevn pahn di galaksi dehn, yu wahn si wahn simila dizain. Yu pikni wahn ku si dat sohnbadi waiz dizain aala dehndeh tingz. Eevn saiyentis di stodi dehnya dizain fahn way bak. a

⁸ Yu pikni dehn wahn laan moa bowt dehndeh kaina tingz eena saiyens klaas da skool, ahn yu ku yooz dehndeh tingz fi teech dehn moa bowt Jehoava. Fi egzampl, imajin yoo ahn yu pikni di sidong anda wahn byootiful big chree. Yu luk op ahn yu si di chronk, an aal di lim dehn di groa owt fahn di chronk a di chree, ahn di lim dehn split intu smaala ahn smaala branch az dehn groa owt fahn di chree. Shoa yu pikni di dizain eena di chree ahn tel dehn dat wi ku si wahn simila dizain eena lata tingz eena naycha. Den aks dehn hoo dizain aala dehndeh byootiful tingz. Di moa yu pikni tink bowt kweschanz laik dat, di schranga ih fayt wahn bee dat Gaad mek evriting. (Heeb. 3:4) Az yu pikni geh oalda, yu need fi help dehn andastan wai ih impoatant fi mek wi obay weh Gaad tel wi. Fi du dat, yu ku aks dehn, “If Gaad mek wi, yu noh tink ih mek sens dat ih wuda tel wi weh wi need fi du fi liv wahn gud laif ahn bee hapi?” Ahn den yu ku help dehn fi si dat Hihn gi wi da gaidans eena di Baibl.

 HELP YU PIKNI FI ANDASTAN WAI IH GUD FI FALA BAIBL STANDADZ

 9. Wai pikni mait aks kweschanz bowt tingz weh goh gens di Baibl standadz a weh rait ahn weh rang?

⁹ Sohntaim yu pikni mait aks yu kweschanz bowt tingz weh goh gens di Baibl standadz a weh rait ahn weh rang. Wai yu tink yu pikni aks yu dehndeh kweschanz? Ih ku bee dat dehn noh gree wid weh di Baibl seh. Er maybi dehn jos need wahn lee help fi andastan an eksplayn weh di Baibl seh. Yu need fi chrai yu bes fi reeli andastan wai yu pikni aks yu dehndeh kaina kweschanz. Den yu wahn ku help yu pikni fi andastan wai ih gud fi obay di tingz weh Jehoava tel wi fi du. Fi du dat, yu ku stodi di Injai Laif Fareva! buk wid ahn. b

10. How payrents ku help dehn pikni fi mek Jehoava bee dehn bes fren?

¹⁰ Inkorij yu pikni fi mek Jehoava bee dehn bes fren. Wen yu stodi di Baibl wid yu pikni, yooz di kweschanz an iloschrayshanz eena di Injai Laif Fareva! buk fi si how dehn reeli feel bowt tingz. (Prav. 20:5) Fi egzampl, lesn 8 kompyaa Jehoava tu wahn gud fren weh kay bowt wi ahn rimain wi bowt tingz weh ku help wi ahn kip wi sayf. Afta yu taak wid dehn bowt 1 Jan 5:​3, yu ku aks dehn, “Laik how Jehoava da wi gud Fren, how wi shuda feel bowt di tingz weh hihn tel wi fi du?” Da kweschan wahn help wi pikni fi andastan wai Jehoava mait tel wi fi du sohnting er fi noh du sohnting. Dehn wahn si dat da bikaaz Jehoava lov wi.—Isa. 48:​17, 18.

11. How yu ku help yu pikni fi si how wi benifit wen wi du weh di Baibl seh? (Praverbz 2:​10, 11)

¹¹ Taak bowt how wi benifit wen wi du weh di Baibl seh. Wen unu reed di Baibl er di dayli teks tugeda, taak bowt how unu don benifit fahn Baibl prinsiplz. Fi egzampl, yu ku help yu pikni fi andastan dat ih gud fi mek wi werk haad an aalwayz tel di chroot. (Heeb. 13:18) Yu ku eksplayn how wi wahn bee heltiya ahn hapiya bikaaz wi obay di Baibl advais. (Prav. 14:​29, 30) If yu pikni andastan how gud ih gud fi du weh di Baibl seh, den ih wahn bee moa wilin fi obay it eena ih laif.—Reed Praverbz 2:​10, 11.

12. How Brada Steve help ih son fi si how wi benifit wen wi obay di Baibl advais?

¹² Steve an ih waif ga wahn son weh naym Ethan. Steve eksplayn how dehn help dehn son fi andastan dat Jehoava mek laaz fi wi bikaaz ih lov wi. Steve seh: “Wi aks ahn kweschanz laik, ‘Wai Jehoava waahn wi obay weh hihn seh? How dat shoa wi dat Jehoava lov wi? Weh wuda hapm if yu noh du weh Jehoava seh?ʼ” Dehndeh kweschanz mi help Ethan chros dat weh Jehoava seh mek sens. Steve seh: “Wi goal da fi help Ethan fi si dat di wizdom eena di Baibl faar beta dan eniting weh man kom op wid.”

13. How payrents ku chrayn dehn pikni fi fala Baibl prinsiplz? Yooz di egzampl eena di paragraaf.

¹³ Chrayn yu pikni fi fala Baibl prinsiplz. Fi egzampl, sopoaz yu pikni haftu reed wahn buk fi skool. Maybi di peepl eena di buk du tingz er seh tingz weh goh gens Baibl standadz, fi egzampl, dehn mait sleep rong er bee vailent. Ahn di way di buk taak bowt it da laik if ih naamal an enibadi ku liv dehn laif laik dat. Maybi yu ku inkorij yu pikni fi kompyaa dat wid  weh di Baibl seh ahn mek dehn tink bowt how Jehoava feel wen peepl du er seh tingz laik dat. (Prav. 22:​24, 25; 1 Kor. 15:33; Fil. 4:8) Dat ku help yu pikni fi si wai ih gud fi obay Jehoava. An if enibadi da skool aks ahn bowt di buk, ih wahn ku eksplayn weh ih bileev.

TEECH YU PIKNI HOW FI EKSPLAYN WEH IH BILEEV

14. Weh tapik wahn yong persn mait fain haad fi taak bowt wid adaz, ahn wai?

¹⁴ Sohn yong peepl mait frayd fi taak bowt weh dehn bileev eena. Fi egzampl, dehn mait feel nervos wen dehn haftu eksplayn wai dehn noh bileev eena evolooshan. Wai? Wel di teecha mait seh dat evolooshan hapm fi chroo. How yu ku help yu pikni fi taak bowt weh ih bileev eena laik ih noa weh ih di taak bowt?

15. Weh ku help yu pikni fi chros dat weh ih bileev da chroo?

¹⁵ Help yu pikni chros dat weh ih bileev da chroo. Yu pikni noh haftu shaym bowt weh ih bileev eena. (2 Tim. 1:8) Eevn lata saiyentis bileev dat laif neva jos hapm laik dat. Dehn haftu ga sohnbadi waiz weh mek evriting. Ahn sayka dat, dehndeh saiyentis noh gree wid weh dehn teech da skool rong di werl. Soh weh yoo ku du fi help yu pikni? Help dehn fi ga schrang fayt. Yu ku tel dehn bowt difrent points weh mi help ada bradaz ahn sistaz fi bee shoar dat Jehoava mi mek evriting. c

16. How payrents ku help dehn pikni fi eksplayn wai dehn bileev dat Gaad mek evriting? (1 Peeta 3:15) (Koment pahn di picha.)

¹⁶ Help yu pikni fi eksplayn weh ih bileev. (Reed 1 Peeta 3:15.) Tek owt taim fi goh oava sohn aatikl pahn jw.org weh taak bowt kriyayshan an evolooshan. Help ahn fi si how ih ku eksplayn weh ih bileev ahn reeli help adaz fi andastan dat Jehoava mek evriting. Rimain ahn dat ih noh haftu aagyu wid nobadi wen ih di chrai eksplayn weh ih bileev eena. Inkorij ahn fi eksplayn tingz eena wahn simpl way if di persn weh ih di taak tu wilin fi lisn. Fi egzampl, wat if ih klaasmayt wuda tel ahn: “Ai noh bileev Gaad egzis, kaaz Ah neva yet si ahn.” Maybi yu pikni ku tel  ahn sohnting laik: “Wel, imajin yu deh bakabush ahn yu di waak dong wahn lee pikaado. An owta noway, yu si wahn nais hows. Weh yu wuda seh? Yu wuda seh dat dehn mi haftu ga sohnbadi weh bil da hows, noh chroo? If yu feel laik dat bowt sohnting weh sohnbadi mek, den how wi shuda feel bowt di hoal yoonivers?”

17. How payrents ku help dehn pikni fi fain difrent wayz how fi taak tu adaz bowt di Baibl? Yooz di egzampl eena di paragraaf.

¹⁷ Help yu pikni fi fain difrent wayz how fi taak bowt di Baibl. (Roam. 10:10) Help yu pikni fi si dat wen ih staat tu preech, ih ku bee jos laik wen ih mi staat tu waak. Wen wi di laan fi waak, di fers ting wi laan da fi stan op. Den afta dat, wi staat tu tek wi fers steps. Den afta wahn wail, wi staat tu waak bai wiself ahn wi noh need nobadi fi help wi. Da di saym way wen wi staat tu preech. Wi waahn staat wid sohnting smaal. Shoa yu pikni sohn veedyo fahn di Proof Dat Sombadi Dizain It sekshan pahn jw.org ahn help ahn fi si how ih ku yooz it fi taak tu ih klaasmayt dehn da skool. Maybi yu pikni ku aks ih klaasmayt: “Yoo noatis dat saiyentis kapi tingz eena naycha?” Den ih ku tel ahn: “Ah ga wahn nais veedyo weh Ah wuda waahn shoa yu.” Afta ih play di veedyo, ih ku seh: “If wi big op saiyentis fi sohnting weh dehn kapi fahn naycha, den hoo wi sopoas tu big op fi di tingz eena naycha?” If wi help dehn tek dehnya smaal steps, dehn wahn ku help dehn klaasmayt, ahn dehn klaasmayt mait waahn laan moa bowt Jehoava.

KANTINYU HELP YU PIKNI FI SCHRENTN IH FAYT

18. How payrents ku help dehn pikni fi schrentn dehn fayt eena Gaad?

¹⁸ Wi liv eena wahn werl weh peepl noh ga no fayt eena Jehoava. (2 Peet. 3:3) Soh wen yu stodi di Baibl, help yu pikni fi du risaach. Dis wahn help ahn fi rispek di Baibl. Ih wahn si dat ih gud fi obay Jehoava standadz a weh rait ahn weh rang. Taak tu dehn bowt di tingz weh deh rong yu weh Jehoava mek. Dat wahn help ahn fi ga schranga fayt. Wen yu taak bowt Baibl prafesi, help ahn fi si how Jehoava mek evri singl ting kohn chroo. Dat wahn bil ih chros eena Jehoava ahn weh di Baibl seh. Noh ferget fi pray wid yu pikni an inklood dehn eena yu persnal pryaaz. Wen yu du yu paat fi help yu pikni ga schranga fayt, yu ku bee shoar dat Jehoava wahn bles yu haad werk.—2 Chron. 15:7.