1. How sohn peepl feel bowt evalastin laif?

 LATA peepl chrai eet gud an eksasaiz regyula soh dat dehn ku stay helti. Stilyet, dehn noh ekspek fi liv fareva. Moas peepl bileev dat nat eevn pasabl. An eevn if dat mi pasabl, wahn lata peepl wudn waahn liv fareva bikaaz dehn si di ayks ahn paynz weh kohn wid oal ayj. Bot Jeezas mi taak bowt evalastin laif eena wahn gud way, laik da Jan 3:16 ahn 5:24.

 2. Weh Jan chapta 6 seh bowt evalastin laif? (Jan 6:​39, 40)

² Jeezas mi du wahn mirakl ahn feed towznz a peepl wid wahn lee bit a bred ahn fish. a Dat mi amayzin! Di neks day, di peepl mi gaahn luk fi Jeezas da Kapernyam. Den Jeezas mi tel dehn sohnting weh eevn moa amayzin. Hihn mi seh dat hihn wahn rezorek peepl weh ded ahn dat dehn kuda geh evalastin laif. (Reed Jan 6:​39, 40.) Soh tink bowt weh dat meenz fi yoo ahn fi di peepl weh yu lov weh ded. Jeezas mi seh dat lata peepl weh ded ku geh rezorek ahn dat yoo ahn yu frenz ahn famili ku liv fareva. Bot som a di tingz weh Jeezas seh  eena Jan chapta 6 haad fi andastan. Soh mek wi tek wahn kloasa luk pahn weh hihn mi seh.

 3. Weh wi laan bowt Jeezas eena Jan 6:51?

³ Wen di peepl si di mirakl weh Jeezas du wen ih feed dehn wid di bred, dehn mi tink bowt di mirakl weh Jehoava du wen ih gi di Izrelait dehn mana eena di wildanes. Eevn di Skripchaz kaal mana “bred fahn hevn.” (Saa. 105:40; Jan 6:31) Den Jeezas mi yooz di mana az wahn iloschrayshan fi teech di peepl sohnting impoatant. Eevn doa di mana da-mi wahn gif fahn Jehoava, di peepl weh mi eet it mi stil en op di ded. (Jan 6:49) Bot Jeezas mi tel dehn dat hihn da di “chroo bred fahn hevn,” “di bred fahn Gaad,” ahn “di bred weh gi laif.” (Jan 6:​32, 33, 35) Den Jeezas mi tel di peepl: “Ai da di bred weh kohn dong fahn hevn ahn weh gi laif. Enibadi weh eet dis bred wahn liv fareva.” (Reed Jan 6:51.) Di peepl weh ih mi-di taak tu mi kanfyooz. Dehn kudn andastan how Jeezas kuda mi seh dat hihn da di bred weh kohn dong fahn hevn ahn dat dis bred beta dan di mana weh Gaad mi gi dehn ansestaz. Den Jeezas tel dehn: “Dis bred da mai flesh.” Weh hihn mi meen? Di ansa tu da kweschan impoatant bikaaz ih shoa wi how wee ahn di peepl weh wi lov ku geh evalastin laif. Soh mek wi si weh Jeezas mi meen.

DI BRED WEH GI LAIF DA JEEZAS FLESH

 4. Wai sohn peepl mi shak wen dehn hyaa weh Jeezas seh?

⁴ Som a di peepl weh Jeezas mi-di taak tu mi shak wen hihn tel dehn dat di bred weh dehn shuda eet da fi hihn ‘flesh weh hihn wahn giv op soh dat peepl pahn di ert ku geh laif.ʼ Maybi dehn mi tink dat hihn mi akchwali waahn mek dehn eet fi hihn flesh. (Jan 6:52) Ahn den pahn tap a dat, Jeezas mi tel dehn sohnting weh mi eevn moa shakin. Ih seh: “If unu noh eet di flesh a di Son a man ahn jrink fi hihn blod, unu noh wahn geh laif.”—Jan 6:53.

 5. Wai wi ku bee shoar dat Jeezas neva mi-di tel dehn fi akchwali jrink ih blod?

⁵ Bak eena Noawa dayz, Gaad mi seh dat peepl noh fi eet er jrink blod. (Jen. 9:​3, 4) Ahn laytaraan Jehoava mi koman di Izrelait dehn noh fi eet blod needa, an if enibadi eet blod dehn mi fi kil dehn. (Lev. 7:27) Jeezas mi teech ih falowaz fi obay evriting eena di Laa weh Gaad gi Moaziz. (Mach. 5:​17-19) Soh hihn wuda neva inkorij peepl fi akchwali eet fi hihn flesh er jrink fi hihn blod. Soh eevn doa weh Jeezas mi seh mi song shakin, hihn jos mi-di yooz it az wahn iloschrayshan fi teech di peepl how fi geh “evalastin laif.”—Jan 6:54.

 6. Weh Jeezas mi meen wen ih seh dat dehn fi eet ih flesh ahn jrink ih blod?

⁶ Ih klyaa dat Jeezas mi-di yooz wahn iloschrayshan fi teech di peepl da Kapernyam, jos laik how ih mi yooz wahn iloschrayshan fi taak tu di Samaritan laydi bai di wel: “Bot hooeva jrink fahn di waata weh Ai wahn gi dehn wahn neva geh tersti agen, kaaz di waata weh Ah wahn gi dehn wahn bee laik wahn spring eensaida dehn weh wahn mek dehn liv fareva.” (Jan 4:​7, 14) b  Jeezas neva mi-di tel di laydi dat if ih jrink fahn wahn spesifik wel ih wahn liv fareva. Saym way soh, hihn neva mi-di tel di peepl da Kapernyam dat dehn mi wahn liv fareva if dehn akchwali eet fi hihn flesh ahn jrink ih blod.

WEH JEEZAS SEH GA ENITING FI DU WID KRAIS EEVNIN MEEL?

 7. How sohn peepl andastan Jan 6:53?

⁷ Sohn peepl seh dat weh Jeezas mi seh da Jan 6:53 simila tu weh ih mi tel ih apasl dehn wen dehn mi selibrayt Krais Eevnin Meel tugeda. (Mach. 26:​26-28) Dehn feel laik wen Jeezas mi-di taak tu di peepl da Kapernyam, ih mi-di taak bowt how fi selibrayt da ivent. Sayka dat, dehn feel laik evribadi weh goh da di Memoaryal fi eet di bred ahn jrink di wain. Yu tink dat mek sens? Wi waahn noa di ansa bikaaz wahn lata peepl goh wid wi da di Memoaryal evri yaa. Fi ansa da kweschan, mek wi luk pahn di difrens bitween weh Jeezas mi seh da Jan 6:53 ahn weh ih mi seh joorin Krais Eevnin Meel.

 8. Wat da di difrens bitween weh Jeezas seh da Jan 6:53 ahn weh ih seh da Krais Eevnin Meel? (Koment pahn di picha dehn.)

⁸ Eena Jan 6:​53-56, Jeezas mi-di taak tu wahn krowd a Jooz da Gyalilee eena 32 C.E. Dehndeh peepl jos mi-di foakos  pahn fizikal food, jos weh dehn ku eet. (Jan 6:26) Dehn neva mi-di pay atenshan tu weh Jeezas mi-di teech dehn bowt Jehoava ahn bowt Gaad Kingdom. Soh wen tingz geh haad fi andastan, lata dehn stap lisn tu Jeezas, an eevn som a ih disaipl dehn stap fala ahn. (Jan 6:​14, 36, 42, 60, 64, 66) Bot wen Krais Eevnin Meel mi tek plays eena 33 C.E, Jeezas mi selibrayt it da Jeroosalem lang wid ih 11 faytful apaslz. Aldoa dehn neva andastan evriting Jeezas mi tel dehn, dehn mi shoar dat Jeezas da-mi Gaad Son weh kohn fahn hevn. (Mach. 16:16) Sayka dat, Jeezas mi seh: “Unu da di wan dehn weh mi stik wid mi chroo aala mi chraiyalz.” (Look 22:28) Soh bays pahn dehnya points weh wi jos diskos, ih klyaa fi si dat da Jan 6:​53, Jeezas neva mi-di seh weh mi wahn hapm da Krais Eevnin Meel. Ahn dehnya da noh di onli difrens bitween dehndeh ivents.

WEH JEEZAS WERDZ MEEN FI WEE?

 9. Hoo Jeezas mi-di taak tu da Krais Eevnin Meel?

⁹ Joorin Krais Eevnin Meel, Jeezas mi giv ih 11 faytful apaslz bred widowt ees ahn tel dehn dat di bred stan fi ih badi. Afta dat ih mi gi dehn wain ahn tel dehn dat di wain stan fi ih “blod weh leegalaiz di kovenant a Gaad.” (Maak 14:​22-25; Look 22:20; 1 Kor. 11:24) Weh Jeezas mi seh bowt da kovenant veri impoatant. Wai? Di nyoo kovenant da neva wid evribadi. Da mi onli fi dehn wan weh da paat a spirichwal Izrel ahn weh wahn rool wid Jeezas “eena di Kingdom a Gaad.” (Heeb. 8:​6, 10; 9:15) Di apaslz neva andastan dat yet, bot soon hoali spirit mi wahn kohn dong pahn dehn, dehn mi wahn bee paat a di nyoo kovenant, ahn dehn wahn rool wid Jeezas da hevn.—Jan 14:​2, 3.

10. Wat da wahn nada difrens bitween weh Jeezas mi seh da Krais Eevnin Meel ahn weh ih seh da Gyalilee? (Koment pahn di picha.)

¹⁰ Joorin di Krais Eevnin Meel, Jeezas mi foakos pahn di “lee flak.” Ahn fi hihn 11 faytful apaslz da-mi di fers peepl weh mi wahn bee paat a da groop. (Look 12:32) Di apaslz an enibadi els weh da paat a da groop fi eet di bred ahn jrink di wain bikaaz dehn ga di hoap fi rool wid Jeezas da hevn. Soh dat da wahn nada difrens bitween Krais Eevnin Meel ahn weh mi hapm da Gyalilee. Weh Jeezas mi seh da Krais Eevnin Meel da-mi jos fi wahn smaal groop a peepl. Bot weh hihn mi seh da Gyalilee da-mi fi wahn lat moa peepl.

11. How wi noa dat di blesinz weh Jeezas mi taak bowt da Gyalilee da noh jos fi wahn smaal groop a peepl?

¹¹ Eena 32 C.E, wen Jeezas mi taak tu di big krowd da Gyalilee, dehn mi onli waahn deh rong hihn fi food. Bot Jeezas mi-di chrai help dehn fi si sohnting eevn moa impoatant. Hihn mi tel dehn how dehn kuda liv fareva. Jeezas mi seh dat peepl weh ded wahn ku kohn bak tu laif pahn di laas day ahn liv fareva. Wen hihn mi seh dat, ih neva mi-di taak tu wahn smaal groop laik di wan weh ih taak tu joorin Krais Eevnin Meel. Hihn mi-di taak tu evribadi fi mek dehn noa weh blesinz dehn kuda get. Jeezas mi seh: “Enibadi weh eet dis  bred wahn liv fareva. Yes, dis bred da mai flesh weh Ai wahn giv op soh dat peepl pahn di ert ku geh laif.”—Jan 6:51. c

12. Weh wi need fi du if wi waahn liv fareva?

¹² Yu tink Jeezas mi meen dat evribadi weh eva liv pahn di ert mi wahn geh evalastin laif jos laik dat? No. Onli dehn wan weh “eet dis bred,” er shoa fayt eena ahn, kuda mi benifit fahn dis. Tudeh, lata peepl weh seh dehn da Kristyanz klaym dat dehn bileev eena Jeezas ahn dat hihn da dehn sayvya. (Jan 6:29) Bot hyaa wat: Som a dehn peepl weh mi deh eena da krowd mi bileev eena Jeezas tu, bot dehn mi stil en op di lef ahn. Wai?

13. Weh ih meen fi ga schrang fayt eena Jeezas?

¹³ Di peepl mi jos deh rong Jeezas bikaaz dehn mi waahn ih heel dehn, gi dehn food, ahn tel dehn weh dehn mi waahn hyaa. Bot Jeezas neva kohn jos fi gi dehn weh dehn mi waahn. Hihn mi kohn fi teech dehn weh dehn need fi du if dehn reeli waahn bee fi hihn disaiplz. Dehn mi need fi aksep an obay evriting weh ih mi teech dehn.—Jan 5:40; 6:44.

14. Weh wi need fi du fi benifit fahn di ransom sakrifais?

¹⁴ Wen Jeezas mi taak tu di peepl da  Gyalilee bowt ih flesh ahn blod, ih mi-di rifaa tu di sakrifais weh ih mi wahn aafa laytaraan. Da sakrifais da weh oapm di way fi mek peepl geh evalastin laif. Di Jooz mi need fi shoa fayt eena da sakrifais. (Jan 6:40) Fi mek wee benifit fahn Jeezas flesh ahn blod, laik weh Jan 6:53 taak bowt, wi need fi ga fayt eena di ransom sakrifais tu. Wahn lata peepl ku ga di hoap fi liv fareva sayka da sakrifais.—Ifee. 1:7.

15-16. Weh wi waahn memba fahn Jan chapta 6?

¹⁵ Jan chapta 6 help wi fi laan sohn impoatant tingz weh ku inkorij aala wi. Ih help wi fi si how Jeezas feel bowt peepl. Ih mi chreet dehn eena wahn kain way, ih mi kyoar dehn wan weh mi sik, ih mi teech dehn bowt Gaad Kingdom, an ih mi feed dehn wen dehn mi hongri. (Look 9:11; Jan 6:​2, 11, 12) Noh onli dat, ih mi help dehn fi si dat hihn da “di bred weh gi laif.”—Jan 6:​35, 48.

¹⁶ Di peepl weh Jeezas mi kaal di “ada sheep” noh fi eet di bred er jrink di wain da di Memoaryal. (Jan 10:16) Bot dehn stil benifit fahn Jeezas flesh ahn blod wen dehn shoa fayt eena di ransom sakrifais. (Jan 6:53) How bowt dehn wan weh anointid? Dehn fi eet di bred ahn jrink di wain bikaaz dehn da paat a di nyoo kovenant. Dehn ga di hoap fi rool lang wid Jeezas. Soh ih noh mata if wi ga di hoap fi liv da hevn er fi stay rait ya pahn di ert, Jan chapta 6 teech wi wahn impoatant lesn. Ih teech wi dat wi need fi ga schrang fayt eena di ransom sakrifais if wi waahn liv fareva.