1-2. Wat da sohn tingz weh ku mek wi krai?

 AALA wi krai sohntaim. Sohntaim wi krai wen wi feel hapi. Maybi wi krai wen sohnting speshal hapm eena wi laif, laik wen wahn baybi baan, er wen wi memba sohnting gud bowt wi paas, er wen wi bok op tu wahn kloas fren weh wi noh si fi yaaz.

² Bot lata taim wi krai bikaaz wi sad ahn wi di sofa. Fi egzampl, wi mait krai wen sohnbadi weh wi chros bichray wi. Er wi mait krai wen wi di sofa bikaaz a wahn dizeez weh noh ga no kyoar. Wi mait krai bikaaz sohnbadi weh wi lov ded. Wen ting laik dat hapm tu wi, wi mait feel laik wi jos kyaahn stap krai. Dat da how Jerimaiya mi feel wen di Babiloanyan dehn mi dischrai Jeroosalem. Hihn mi seh: “Mi aiywaata di ron laik wahn riva . . . Ah jos kyaahn stap krai.”—Lam. 3:​48, 49.

 3. How Jehoava feel wen ih si wi di sofa? (Isaiah 63:9)

³ Jehoava noa egzakli humoch tyaaz wi krai bikaaz a sadnis. Di Baibl pramis wi dat hihn noa evri taim wi sofa, ahn hihn hyaa wi wen wi krai owt tu ahn fi help. (Saa. 34:15) Bot Jehoava du moa dan dat. Hihn da wi Pa an ih lov wi wahn lat, soh enitaim ih hyaa wi krai, hihn feel sad tu, an ih eega fi help wi.—Reed Isaiah 63:9.

 4. Weh Baibl egzamplz wi wahn taak bowt, ahn weh dehn teech wi bowt Jehoava?

 ⁴ Eena di Baibl, Jehoava shoa wi how ih feel wen ih peepl sofa ahn weh ih du fi help dehn. Mek wi luk pahn Hana, King Dayvid, ahn King Hezikaiya egzampl fi si weh hihn du fi help dehn. Wai dehn mi krai? How Jehoava mi help dehn? Ahn how fi dehn egzampl ku komfert wi wen wi krai bikaaz sohnbadi weh wi lov ded, sohnbadi weh wi chros bichray wi, er wi di sofa fahn wahn siknis weh noh ga no kyoar?

WEN SOHNBADI WEH YU LOV DED

 5. How Hana sichuwayshan mi mek ih feel?

⁵ Hana gaahn chroo lata tingz weh mi mek shee feel sad ahn mek ih krai. Fi shee hozban mi ga too waif, shee ahn Penina. Penina kudn stan Hana. Pahn tap a dat, Hana kudn ga no pikni, bot Penina mi ga lata pikni. (1 Sam. 1:​1, 2) Sayka dat, Penina yoostu haras Hana. How yoo wuda mi feel if yu da-mi Hana? Hana mi feel soh bad dat “ih wuda krai ahn noh eet” an ih mi “reeli sad an ih kudn tek it nohmoh.”—1 Sam. 1:​6, 7, 10.

 6. Weh Hana mi du fi feel beta?

⁶ Weh Hana mi du fi feel beta? Wan ting weh mi help shee wahn lat da wen ih gaahn wership Jehoava da di tabernakl. Wail ih mi dehdeh, “ih staat tu pray tu Jehoava, an ih kudn stap baal.” Ih beg Jehoava: “Luk pahn humoch Ah di sofa!” (1 Sam. 1:10b, 11) Hana mi poar owt ih haat tu Jehoava. Yoo ku imajin how Jehoava mosi mi feel wen ih si Hana di sofa? Hihn mi lov shee wahn lat an ih mi waahn help ahn.

 7. How Hana mi feel afta ih poar owt ih haat tu Jehoava?

⁷ Afta Hana poar owt ih haat tu Jehoava, Hai Prees Eelai mi tel ahn dat Jehoava wahn ansa ih pryaa. How shee mi feel afta dat? Di Baibl tel wi dat “Hana lef fahn deh ahn gaahn eet, an ih neva luk sad nohmoh.” (1 Sam. 1:​17, 18) Eevn doa Hana sichuwayshan neva chaynj, shee mi feel ih load laita bikaaz ih lef it eena Jehoava han. Shee mi chros dat Jehoava andastan weh ih di goh chroo ahn how ih feel, ahn hihn mi wahn help ahn. Ahn dat da weh Jehoava du. Hihn mi lisn tu ih pryaa an andastan how ih feel, ahn laytaraan ih mi bles ahn wid chiljren.—1 Sam. 1:​19, 20; 2:21.

8-9. Wai wi shuda du evriting weh wi kud fi deh da meetin? (Heebrooz 10:​24, 25) (Koment pahn di picha.)

⁸ Wat da di lesn fi wee? Yoo di goh chroo wahn sichuwayshan rait now weh mek yu krai wahn lat? Maybi yu feel sad  bikaaz sohnbadi weh yu lov ded. Lata taim wen wi feel da way, wi wuda jos waahn deh bai wiself. Bot memba dat Hana mi geh komfert an inkorijment wen ih gaahn da di tabernakl. Rait soh yoo ku geh komfert wen yu goh da meetin, eevn if yu noh feel laik goh. (Reed Heebrooz 10:​24, 25.) Wen wi deh da meetin, wi hyaa skripchaz weh help wi tink bowt gud tingz insteda foakos pahn di bad. Dat ku help wi feel beta, eevn if wi sichuwayshan noh chaynj rait away.

⁹ Da meetin, wi lovin bradaz ahn sistaz shoa wi lov, inkorij wi, ahn komfert wi. (1 Tes. 5:​11, 14) Dat da weh wahn speshal painyaa brada mi si fi ihself afta ih waif ded. Hihn seh: “Sohntaim Ah mis mi waif soh moch dat Ah kyaahn stap krai. Bot wen Ah goh da meetin, Ah geh di inkorijment weh Ah need. Mi bradaz ahn sistaz reeli komfert mi wid di tingz weh dehn seh. Noh mata how bad Ah feel bifoa Ah goh da meetin, Ah aalwayz feel beta fi dehdeh.” Wen wi goh da meetin, Jehoava ku yooz wi bradaz ahn sistaz fi help wi.

10. How wi ku kapi Hana egzampl wen wi feel reeli sad?

¹⁰ Hana mi feel beta afta ih poar owt ih haat tu Jehoava. Dat ku help yoo tu. Yu ku “chroa aala [yu] woriz ahn kyaa pahn [Jehoava],” ahn noa dat hihn wahn lisn tu yu pryaa ahn help yu. (1 Peet. 5:7) Wahn sista weh mi-di sofa bikaaz sohn teef kil ih hozban seh: “Ah feel laik mi haat mi brok op eena peesiz an Ah wuda neva bee hapi agen. Bot Ai noa dat mi hevnli Faada, Jehoava, lov mi wahn lat. An enitaim Ah pray tu ahn, hihn gi mi komfert. Sohntaim Ah noh eevn noa how fi seh weh Ah feel, bot hihn andastan mi. Wen Ah mi deep eena mi sadnis, Ah wuda pray tu Jehoava an aks ahn fi gi mi pees. Ahn den rait away Ah wuda feel wahn kaam feelin kom oava mi an Ah wuda mek it chroo di res a di day.” Wen yu poar owt yu haat tu Jehoava ahn tel ahn wai yu sad, hihn feel sad tu, an ih andastan weh yu di goh chroo. An eevn if di prablem noh goh weh, Jehoava ku gi yu komfert ahn help yu feel kaam. (Saa. 94:19; Fil. 4:​6, 7) Hihn si how haad yu di chrai fi stay faytful tu ahn, an ih wahn bles yu fi dat.—Heeb. 11:6.

WEN SOHNBADI WEH YU CHROS BICHRAY YU

11. How Dayvid mi feel wen adaz mi-di chreet ahn bad?

¹¹ Dayvid laif neva eezi. Ih mi ga lata enimi weh mi-di chrai hert ahn. An eevn peepl weh ih chros, laik famili ahn frenz, mi bichray ahn. (1 Sam. 19:​10, 11; 2 Sam. 15:​10-14, 30) Wahn taim, ih mi-di sofa soh moch dat ih seh: “Ah geh taiyad kaaz Ah stay di krai; Ah soak mi bed wid tyaaz aal nait lang; Ah flod mi soafa wid mi tyaaz kaaz Ah di krai soh moch.” Wai Dayvid mi feel laik dat? Ih seh: “Sayka dehn wan weh di haras mi.” (Saa. 6:​6, 7) Peepl mi kaaz Dayvid soh moch payn dat ih kudn stap krai.

12. How Dayvid mi feel bowt Jehoava? (Saam 56:8)

¹² Eevn wid evriting weh Dayvid mi sofa, hihn mi shoar dat Jehoava lov ahn. Hihn mi seh: “Jehoava wahn hyaa mi wen Ah krai.” (Saa. 6:8) Wahn nada taim, Dayvid mi seh sohnting inchrestin da Saam 56:8. (Reed.) Weh hihn mi  seh eena da vers help wi fi si dat Jehoava lov wi wahn lat an ih kay bowt how wi feel. Dayvid mi feel laik if Jehoava mi-di kalek op aala ih tyaaz eena wahn bag er rait dehn dong eena wahn buk. Dayvid mi shoar dat Jehoava neva jos noatis weh ih gaahn chroo, bot ih mi kanvins dat ih hevnli Faada mi andastan weh aal ih mi-di sofa ahn how dat mi mek ih feel.

13. Weh wi need fi memba wen peepl let wi dong er bichray wi? (Koment pahn di picha.)

¹³ Wat da di lesn fi wee? Yoo di sofa bikaaz sohnbadi weh yu chros let yu dong er bichray yu? Maybi yu feel laik dat bikaaz yu mi-di dayt sohnbadi bot dehn lef yu. Er maybi yu marid ahn yu hozban er yu waif lef yu. Maybi sohnbadi weh yu lov stap serv Jehoava. Wahn brada weh mi-di sofa bikaaz ih waif cheet pan ahn an lef ahn seh: “Ah mi eena shak. Ah kudn bileev dis hapm tu mi. Ah mi feel beks, Ah mi feel sad, Ah mi feel laik Ah neva wert notn.” If yoo di sofa bikaaz sohnbadi bichray yu er let yu dong, memba dat Jehoava noh wahn eva lef yu. Di brada seh: “Ah geh fi andastan dat peepl noh mait aalwayz bee laayal tu yu, bot yu ku aalwayz pen pahn Jehoava. Noh mata weh hapm, hihn wahn aalwayz dehdeh fi yu. Hihn noh wahn lef dehn wan weh laayal tu ahn.” (Saa. 37:28) Ahn memba, tu, dat no man er wuman ku lov yu moa dan humoch Jehoava lov yu. Peepl mait hert yu bad, bot Jehoava noh chaynj di way hihn feel bowt yu. Yoo preshos tu hihn! (Roam. 8:​38, 39) Dis da di point: Noh mata how bad peepl mait chreet yu er mek yu sofa, Jehoava wahn aalwayz lov yu.

14. Weh Saam 34:18 pramis wi?

¹⁴ If sohnbadi bichray yu, weh Dayvid seh da Saam 34:18 ku gi yu komfert. (Reed.) Wen wi feel diskorij, wi mait feel laik wi noh ga notn gud fi luk faawod tu. How Jehoava help wi wen wi feel da way? Jehoava da wi Pa an ih deh “kloas tu” wi wen wi feel laik dat. Wen wahn ma er wahn pa si ih pikni di sofa, dehn hori fi hoal dehn pikni ahn gi dehn komfert. Wen wee di sofa bikaaz sohnbadi bichray wi er lef wi, Jehoava feel wi payn an ih hori fi help wi. Hihn eega fi gi wi komfert an eez wi sofarin. An ih gi wi lata gud tingz fi luk faawod tu weh wahn help wi fi bayr op wen wi di sofa.—Isa. 65:17.

 WEN YU DI SOFA WID WAHN SIKNIS WEH NOH GA NO KYOAR

15. Weh sichuwayshan mi mek Hezikaiya krai?

¹⁵ Wen Hezikaiya mi 39 yaaz oal, ih mi geh sik bad. Jehoava mi sen di prafit Aizaiya fi tel ahn dat ih mi wahn ded fahn da siknis. Ih mi luk laik Hezikaiya neva ga no hoap. (2 Ki. 20:1) Imajin how hihn mosi mi feel! Di Baibl seh dat Hezikaiya mi baal ahn baal. Hihn mi pray haad tu Jehoava ahn beg ahn fi help.—2 Ki. 20:​2, 3.

16. Weh Jehoava mi du fi Hezikaiya wen ih mi krai ahn beg Jehoava fi help?

¹⁶ Wen Jehoava si Hezikaiya di krai ahn di beg ahn fi help, ih mi feel kompashan fi Hezikaiya. Ih sen Aizaiya fi tel ahn: “Ah hyaa yu pryaa. Ah si wen yu mi-di baal. An Ah wahn heel yu.” Jehoava mi pramis Hezikaiya dat Ih mi wahn mek ih liv langa ahn dat Ih mi wahn sayv Jeroosalem fahn di Asiriyan dehn.—2 Ki. 20:​4-6.

17. How Jehoava tek kayr a wi wen wi ga seeryos helt prablemz? (Saam 41:3) (Koment pahn di picha.)

¹⁷ Wat da di lesn fi wee? Weh yu ku du if yu ga wahn siknis weh noh ga no kyoar? Tel Jehoava how yu feel. Hihn wahn lisn tu yu eevn if yu di krai wen yu pray. Di Baibl pramis wi dat “di Faada weh ga lata mersi ahn di Gaad weh aal komfert kohn fram” wahn gi wi di komfert weh wi need wen wi di fays chraiyalz. (2 Kor. 1:​3, 4) Wi kyaahn ekspek Jehoava fi tek weh aala wi prablemz now, bot hihn wahn tek kayr a wi. (Reed Saam 41:3.) Jehoava wahn gi wi ih hoali spirit soh dat wi ku ga di schrent, wizdom, ahn pees fi bayr op chroo wi chraiyalz. (Prav. 18:14; Fil. 4:13) Ahn hihn gi wi wahn hoap fi di fyoocha—wahn taim wen nobadi wahn eva geh sik agen.—Isa. 33:24.

18. Weh skripcha komfert yoo wen yu di deel wid wahn tof sichuwayshan? (Koment pahn di baks weh naym “ Sohn Vers Weh Ku Komfert Yu Wen Yu Di Krai.”)

¹⁸ Weh Jehoava mi tel Hezikaiya mi giv ahn komfert. Jehoava ku help wee di saym way. Weh Jehoava tel wi eena di Baibl ku komfert wi ahn help wi fi bee kaam eevn wen wi di goh chroo tof sichuwayshanz eena laif. (Roam. 15:4) Wahn sista da West Africa mi krai wahn lat wen ih mi fain owt dat ih ga kyansa. Shee seh: “Wahn skripcha weh mi reeli komfert mi da Isaiah 26:3. Eevn doa lata taim wi kyaahn du notn fi chaynj wi prablemz, da vers pramis mi dat Jehoava ku help wi fi feel kaam ahn fi bayr op noh mata weh chraiyalz wi fays.” How  bowt yoo? Yoo ga eni skripcha weh reeli komfert yu wen yu di fays tof sichuwayshanz eena laif?

19. Weh wi ku luk faawod tu?

¹⁹ Wi deh soh kloas tu di en a dis sistem, ahn wi noa dat wi wahn ga lat moa reezn fi krai eena di fyoocha. Bot weh Hana, Dayvid, ahn Hezikaiya egzampl teech wi? Jehoava si wen wi krai, ahn dat toch fi hihn haat. Fi wee tyaaz preshos tu hihn, ahn hihn memba eech an evri tyaa weh jrap. Soh wen wi di sofa, mek wi waahn poar owt wi haat tu Jehoava ahn tel ahn how wi feel. Mek wi stay kloas tu wi bradaz ahn sistaz eena di kangrigayshan. Ahn mek wi kantinyu luk fi di komfert weh Jehoava gi wi eena di Baibl. Wi ku bee shoar dat if wi noh giv op, Jehoava wahn bles wi. Wi luk faawod fi si di taim wen hihn wahn waip weh aala di tyaaz weh wi krai bikaaz a payn ahn sofarin. (Rev. 21:4) Wen da taim kohn, if wi krai, ih onli wahn bee bikaaz wi hapi!