Wen di apasl Paal mi rait tu Timoti, ih tel ahn: “Ah di koman yu fronta Gaad, Krais Jeezas, ahn di aynjel dehn weh Gaad chooz, fi obay dehnya inschrokshanz widowt prejudis ahn widowt shoa fayvritizm.”—1 Tim. 5:21.

Fers, mek wi taak bowt wich aynjelz noh deh eena dis groop. “Di aynjel dehn weh Gaad chooz” da noh di 144,000. Wen anointid Kristyanz ded, Gaad bring dehn bak tu laif az wahn spirit. Bot wen Paal mi rait tu Timoti, da rezorekshan neva staat az yet, soh dehn kudn bee “di aynjel dehn weh Gaad chooz.”—1 Kor. 15:​50-54; 1 Tes. 4:​13-17; 1 Jan 3:2.

Hoo els kyaahn bee paat a dis groop? Rong di taim a di Flod, sohn aynjel neva obay Gaad. Dehn mi fala Saytan ahn ton deemonz, weh da Jeezas enimi. (Jen. 6:2; Look 8:​30, 31; 2 Peet. 2:4) Eena di fyoocha, Jeezas wahn pich dehn eena di abis fi 1,000 yaaz. Afta dat, dehn wahn geh dischrai lang wid Saytan.—Jood 6; Rev. 20:​1-3, 10.

Soh “di aynjel dehn weh Gaad chooz” da mosi aynjelz da hevn weh laayal tu Gaad ahn Krais Jeezas.

Gaad ga towznz ahn towznz a faytful aynjelz, an ih luk laik noh aala dehn ga di saym asainment. (Heeb. 12:​22, 23; Rev. 14:​17, 18) Fi egzampl, wahn taim Jehoava mi aks wahn aynjel fi dischrai 185,000 Asiriyan soalja. (2 Ki. 19:35) Wahn lata aynjelz praabli geh di asainment fi “tek owt fahn [Jeezas] Kingdom enibadi weh di kaaz adaz fi sin ahn peepl hoo praktis eevl tingz.” (Mach. 13:​39-41) Adaz mait ga di asainment fi “gyada di wan dehn weh hihn pik” fi goh da hevn. (Mach. 24:31) An ada aynjelz ‘protek wi eniway wehpaat wi goh.ʼ—Saa. 91:11; Mach. 18:10; kompyaa Machyu 4:11; Look 22:43.

Soh wen 1 Timoti 5:21 taak bowt “di aynjel dehn weh Gaad chooz,” ih seemz laik ih di taak bowt di aynjel dehn weh help tek kayr a di kangrigayshan. Paal mi-di taak tu di eldaz ahn gi dehn waiz kongsl pahn how fi handl dehn rispansabilitiz eena di kangrigayshan. Akaadn tu Paal inschrokshanz, di eldaz fi tek kayr a di kangrigayshan “widowt prejudis ahn widowt shoa fayvritizm.” Ahn wen dehn need fi mek disizhanz fi di kangrigayshan, dehn fi tink gud bowt di mata bifoa dehn du eniting. Wen eldaz werk haad fi du dat, dehn dizerv di rispek a di kangrigayshan. Dat da wai dis soh seeryos fi eldaz. Dehn need fi fala Paal inschrokshanz bikaaz dehn di du dehn werk “fronta Gaad, Krais Jeezas, ahn di aynjel dehn weh Gaad chooz.” Dehndeh aynjelz mosi du wahn lata werk fi help di kangrigayshan dehn, laik protek dehn, help dehn eena di preechin werk, ahn tel Jehoava weh di hapm eena di kangrigayshan.—Mach. 18:10; Rev. 14:6.