Yoo don reed aala Di Wachtowa magazeen fi dis yaa? Wel, mek wi si if yu ku ansa dehnya kweschan:

How Jehoava teech wi fi chreet laydi?

Jehoava chreet laydi di saym way how ih chreet evribadi els; ih noh shoa no fayvritizm bitween man ahn wuman. Hihn kay bowt how laydi feel an ih wilin fi hyaa bowt dehn woriz. Hihn chros dehn fi du fi hihn wil.—w24.01, payj 15-16.

Weh Ifeezhanz 5:7 meenz wen ih seh “unu noh fi ga notn fi du wid dehn,” ahn how wi ku fala da kongsl?

Di apasl Paal mi-di waan wi fi noh kip rong peepl weh noh fala Jehoava hai standadz, kaaz dat wuda mek it haad fi mek wi fala dehndeh standadz. Dat meenz dat wi haftu bee kyaaful hoo wi spen taim wid, eeda fays-tu-fays er pahn soashal meedya.—w24.03, payj 22-23.

Weh kaina faals stoari wi need fi wach owt fa?

Wi haftu bee kyaaful wen wahn brada er sista tel wi sohnting bot dehn neva mek shoar dat weh dehn di tel wi da chroo. Wi haftu wach owt wen wi geh wahn eemayl fahn peepl wi noh noa. Ahn wi haftu main wen apastayts play laik dehn waahn noa moa bowt di Baibl.—w24.04, payj 12.

Weh wi noa ahn weh wi noh noa bowt how Jehoava wahn joj di peepl weh mi ded eena di Flod, di peepl weh mi ded da Sadam ahn Gomora, ahn King Salaman?

Wi noh noa fi shoar if Jehoava wahn dischrai dehn fareva. Bot wi doo noa dat Jehoava noa evriting an ih ful a mersi.—w24.05, payj 3-4.

How wi benifit wen wi si Jehoava az wi Rak? (Deut. 32:4)

Wi ku goh tu Jehoava fi protekshan. Jehoava laayal—ih aalwayz kip ih pramis dehn. Ahn Jehoava noh chaynj. Ih kwalitiz, ih perpos, an ih standadz noh chaynj needa.—w24.06, payj 26-28.

Weh ku help yu wen yu moov da wahn nyoo kangrigayshan?

Pen pahn Jehoava. Noh kompyaa yu nyoo kangrigayshan wid yu oal wan. Bee bizi eena yu nyoo kangrigayshan, ahn chrai yu bes fi mek nyoo frenz.—w24.07, payj 26-28.

Weh wi laan fahn di chree iloschrayshan eena Machyu chapta 25?

Di iloschrayshan bowt di sheep ahn di goat dehn teech wi dat wi need fi bee faytful ahn laayal. Di iloschrayshan bowt di waiz ahn di foolish verjin dehn teech wi dat wi need fi bee redi ahn stay alert. Ahn di iloschrayshan bowt di talent dehn teech wi dat wi need fi bee haad-werkin.—w24.09, payj 20-24.

How hai di roof oava di varanda pahn Salaman templ?

Da 2 Chronicles 3:​4, sohn aynshent manyuskrip seh dat ih mezha “120 kyoobit.” Dat wuda mek di roof 175 fut hai. Bot sohn ada teks weh wi ku chros seh “20 kyoobit,” weh da 30 fut hai. Da mezhament mek moa sens bays pahn di saiz a di waal dehn pahn di templ.—w24.10, payj 31.

Weh Paal mi meen wen ih seh wahn ministeeryal servant “onli fi ga wan waif”? (1 Tim. 3:12)

Dat meenz dat ih wuda marid tu jos wan wuman, an ih wuda neva komit sekshwal imoraliti. Pahn tap a dat, ih wuda neva shoa romantik inchres eena wahn neks laydi.—w24.11, payj 19.

Wai wi ku seh dat Jan 6:53 noh di eksplayn how fi selibrayt Krais Eevnin Meel?

Da Jan 6:​53, Jeezas mi tel di peepl dat dehn need fi eet fi hihn flesh ahn jrink fi hihn blod. Dat da-mi eena 32 C.E., da Gyalilee, ahn di peepl weh ih mi-di taak tu da-mi Jooz weh neva put fayt eena ahn yet. Bot wahn yaa layta, Jeezas mi selibrayt Krais Eevnin Meel wid ih apasl dehn da Jeroosalem. Pahn da okayzhan, ih mi-di taak tu peepl weh wahn rool lang wid ahn da hevn.—w24.12, payj 10-11.