PEEPL yoozhwali waahn ga wahn hapi laif. Bot eena dehnya laas dayz, evribadi di deel wid “terabl taimz.” (2 Tim. 3:1) Som peepl looz dehn jai eena laif bikaaz dehn noh ga wahn jab, dehn sik, dehn looz sombadi eena det, er dehn di deel wid som ada kaina prablem eena dehn laif. Eevn Gaad servant dehn ku geh diskorij ahn looz dehn jai. How yu ku get bak yu jai if dis di hapm tu yoo?

Bifoa wi ansa da kweschan, wi need fi andastan wat da chroo jai ahn how sohn peepl kip dehn jai ahn stay hapi eevn wen dehn ga prablemz. Den wi wahn laan weh wi ku du fi kip wi jai, ahn how wi ku geh moa jai eena wi laif.

Wahn persn weh ga jai da noh di saym az wahn persn weh laik laaf. Fi egzampl, wen wahn persn jrink tu moch alkahol, ih mait laaf ahn laaf. Bot wen ih geh soaba, laafin stap kaaz ih memba aala ih prablem dehn. Da gud feelin weh ih mi gat da noh chroo jai.—Prov. 14:13.

Jai da wahn feelin deep dong eena wi haat. Da weh wi feel wen sombadi gi wi sohnting er wi di hoap fi geh sohnting. If wi ga jai, wi wahn stil bee hapi noh kay if tingz rong wi gud er bad. (1 Tes. 1:6) In fak, wahn persn ku di wori bowt sohnting ahn stil ga jai eena ih haat. Fi egzampl, dehn mi beet di apasl dehn bikaaz dehn mi-di preech bowt Jeezas. Bot wen dehn lef di Jooish Kongsl, dehn ‘mi hapi kaaz Gaad mi tink dat dehn gud inof fi mek dehn sofa fi Jeezas Krais.ʼ (Aks 5:41, JNT) Af koars, dehn neva hapi bikaaz a di beetn dehn mi get, bot bikaaz dehn mi stay faytful tu Jehoava.

Wi noh baan wid dis kaina jai, ner wi kyaahn get it rait soh. Chroo jai da paat a di froot a Gaad hoali spirit. Wid di help a fi hihn spirit, wi ku bee wahn “nyoo persn” ahn ga dis kaina jai. (Ifee. 4:24; Gal. 5:22) Ahn wen wi ga jai, wi ku handl di prablemz eena laif eena wahn beta way.

Jehoava mi waahn gud tingz fi hapm pahn di ert, noh bad tingz. Bot eevn doa da moasli bad tingz di hapm, Jehoava stil ga jai. Di Baibl seh: “Schrent ahn jai deh eena di plays weh hihn liv.” (1 Chron. 16:27) Moroava, di gud tingz weh ih servants di du di mek ‘fi hihn haat hapi.ʼ—Prov. 27:11.

Wi ku fala Jehoava egzampl ahn noh wori tu moch wen tingz noh werk owt laik how wi mi waahn. Insteda looz wi jai, wi ku foakos pahn di gud tingz wi ga now ahn bee payshent ahn wayt fi wahn beta fyoocha. *

 Wahn lata egzampl deh eena di Baibl bowt servants a Gaad hoo mi kip dehn jai eevn wen dehn di deel wid wahn haad taim eena dehn laif. Tek fi egzampl Aybraham. Hihn mi deh eena sohn sichuwayshan weh ih kuda mi looz ih laif, an ih mi fays prablemz weh ada peepl kaaz far ahn. (Gen. 12:10-20; 14:8-16; 16:4, 5; 20:1-18; 21:8, 9) Eevn anda aala dehndeh kaina presha, Aybraham mi ga jai eena ih haat. How ih mi manij fi du dat? Ih hoap giv ahn jai. Ih mi luk faawod tu di taim wen Jeezas mi wahn rool az King. (Gen. 22:15-18; Heeb. 11:10) Jeezas mi seh dat Aybraham mi onli hapi fi noa dat di Mesaiya mi wahn kohn. (Jan 8:56) Wi ku fala Aybraham egzampl wen wi tink bowt aala di tingz weh wahn bring wi jai eena di fyoocha.—Roam. 8:21.

Jos laik Aybraham, di apasl Paal an ih fren Sailas mi foakos pahn dehn hoap. Dehn mi ga schrang fayt ahn dehn mi kip dehn jai eevn wen tingz neva gaahn gud fi dehn. Fi egzampl, afta dehn mi geh wahn bad beetn ahn en op da jayl, “rong midnait [da saym nait] Paal ahn Sailas mi-di pray ahn sing himz tu Gaad.” (Aks 16:23-25) Soh Paal ahn Sailas mi geh schrent fahn dehn hoap. Bot sohnting els mi gi dehn jai. Dehn mi gaahn da jayl bikaaz dehn mi-di witnis bowt Jeezas. Wi ku fala fi dehn egzampl wen wi tink bowt di gud tingz weh hapm wen wi stay faytful ahn serv Gaad.—Fil. 1:12-14.

Wahn lata wi bradaz tudeh di fays haad taimz ahn stil kip dehn jai. Dehn da gud egzampl fi wee. Memba taifoon Haiyan weh mi hit di senchral paat a di Philippines eena Novemba 2013? Oava 1,000 Witnis famili mi looz dehn hoam. Wahn brada weh naym George da-mi wan a dehn. Ih seh: “Di bradaz mi stil hapi eevn doa aala dis mi jos hapm. Ih haad fi mek Ah tel yu di jai wi feel.” Dehnya bradaz da wahn gud egzampl fi wee. Wen wi goh chroo wahn rof sichuwayshan, wi wahn kip wi jai if wi memba aal weh Jehoava du fi wi aredi. Wat els Jehoava gi wi soh dat wi ku ga jai?

Wai wi ku ga jai? Bikaaz wi noa di Sovrin a di yoonivers. Hihn da wi Faada, wi Gaad, ahn wi Fren!—Ps. 71:17, 18.

Jehoava gi wi laif ahn hihn mi mek wi eena wahn way fi injai wi laif. Wi chrezha dis gif. (Eccl. 3:12, 13) Jehoava mi jraa wee tu hihn, ahn wee ku andastan wat da fi hihn wil fi wi. (Kol. 1:9, 10) Soh wi noa wai wi deh ya ahn how fi liv wi laif. Bot moas peepl tudeh noh eevn noa wai dehn deh ya. Paal seh: “‘Nobadi neva si, ahn nobadi neva yehr, ahn nobadi neva yet imajin, aal weh Gaad ga plan fi dehn wan weh lov ahn.ʼ Bot wi noa dehnya ting kaa Gaad mek ih Hoali Spirit shoa dehn tu wi.” (1 Kor. 2:9, 10) Wee andastan wat da Gaad wil ahn perpos. Dis gi wi lata jai fi chroo!

Wat els ku gi wi jai? Jehoava mi mek di way pasabl fi fagiv wi sinz. Fi shoar dis gi wi lata jai. (1 Jan 2:12) Bikaaz a Gaad mersi, fi wee hoap da fi liv eena di nyoo werl. (Roam. 12:12) Jehoava eevn gi wi wi bradaz ahn sistaz weh ku inkorij wi. (Ps. 133:1) Ahn fi hihn Werd, di Baibl, pramis wi dat hihn wahn protek wi fahn Saytan an ih deemon dehn. (Ps. 91:11) If wi stap ahn tink bowt aala dehnya blesinz fahn Gaad, wi wahn si how wi ga moa jai.—Fil. 4:4.

Kristyanz da hapi peepl. Bot Jeezas seh wi ku ga moa jai. Ih seh: “Ah tel unu aala dehn ting ya soh dat unu ku geh ful op wid aala di sayhn hapinis weh Ai ga deep deep  dong eena mai haat.” (Jan 15:11) Dis shoa wi dat wi ku ga moa jai, bot wi haftu werk far it. Tink bowt dis: How yu kip wahn faiya di bon? Yu haftu put moa wud eena di faiya fi mek ih geh hata. Jos laik dat, di moa yu werk fi yu rilayshanship wid Jehoava, di schranga ih wahn get. Dis wahn gi yu moa jai. Memba, jai kohn fahn Gaad spirit. Soh yu wahn ga moa jai if yu aks Jehoava fi ih hoali spirit. Bifoa yu reed di Baibl, seh wahn lee pryaa. Ahn den afta yu reed, tek di taim fi tink bowt it.—Ps. 1:1, 2; Look 11:13.

Yu ku ga moa jai tu wen yu kip bizi di du tingz weh pleez Jehoava. (Ps. 35:27; 112:1) Aftaraal dis da wai Jehoava mek wi. Di Baibl seh: “Fyaa di chroo Gaad ahn kip ih komanment dehn, bikaaz dis da weh wi sopoas tu du.” (Eccl. 12:13) Gaad mek wi eena wahn way weh wi ku du fi hihn wil. Soh ih mek sens den, dat wen wi serv Jehoava, wi wahn ga di moas jai eena wi laif. *

Di benifits a jai eena wi laif da moa dan jos wahn feelin eena wi haat. Fi egzampl, if wi serv Jehoava noh mata weh sichuwayshan wi deh eena, wi wahn bee moa byootiful tu hihn. (Deut. 16:15; 1 Tes. 5:16-18) Wen wi ga chroo jai, wi wahn rijek mateeryal tingz ahn wi wahn mek moa sakrifais fi put Gaad Kingdom fos eena wi laif. (Mach. 13:44) Wen wi si how wi di benifit, wi jai groa, ahn wi feel hapiya eena wi haat. Ahn di peepl weh deh rong wi wahn feel hapi tu.—Aks 20:35; Fil. 1:3-5.

Wahn teecha fahn di Yooniversiti a Nebraska eena di U.S. seh: “If yu hapi ahn satisfai wid yu laif tudeh, yu ku bee moa helti eena di fyoocha.” Dat da chroo kaaz di Baibl seh: “Wahn haat weh ful a jai da gud medisn.” (Prov. 17:22) Soh if yu chrai ga moa jai eena yu haat, yu ku bee wahn moa helti persn.

Eevn doa wi di goh chroo lata schres dehnya dayz, wi ku stil ga jai. Wi need hoali spirit, soh wi need fi pray moa, stodi, ahn tink bowt weh wi reed fahn di Baibl. Dis wahn help wi fi ga jai. Ahn wi need fi tink bowt aala di blesinz weh wi di injai rait now, fala di egzampl a adaz, ahn du di wil a Gaad. Den wi ku ekspeeryens weh Psalm 64:10 seh: “Di raichos persn wahn rijais eena Jehoava ahn luk tu hihn fi protekshan.”