1, 2. Weh wahn brada mi riyalaiz bowt ihself? Weh ih mi du bowt it?

RABERT mi geh baptaiz az wahn teenayja, bot ih neva reeli tek di chroot seeryos. Ih seh: “Ah neva du eniting rang, bot Ah neva ga di chroot eena mi haat. Ah mi luk laik wahn spirichwali schrang persn. Ah gaahn da aala di meetin dehn an eevn agzilari painyaa wahn fyoo taimz fi di yaa. Bot sohnting mi misn.”

² Rabert neva fain owt weh mi rang til ih geh marid. Hihn an ih waif yoostu play wahn Baibl gaym tugeda weh dehn aks wan anada kweschan. Ih waif da-mi wahn spirichwali schrang persn, soh shee neva ga no prablem fi ansa di kweschan dehn. Bot moas a di taim, Rabert neva noa di ansa an ih mi shaym. Ih seh: “Da laik Ah neva noa eniting. Ah tel miself, ‘Ai haftu du sohnting if Ai waahn bee mi waif spirichwal hed.ʼ” An ih du it. Ih seh: “Ah stodi, ahn stodi, ahn stodi di Baibl. Ah staat tu si di hoal chroot ahn geh fi andastan tingz beta. Ahn weh mi eevn moa impoatant, Ah staat tu ga wahn schranga rilayshanship wid Jehoava.”

3. (a) Weh wi ku laan fahn Rabert ekspeeryens? (b) Wat da sohn impoatant kweschanz weh wi wahn ansa?

³ Wi ku laan sohn impoatant lesn fahn Rabert ekspeeryens.  Wi mait ga sohn Baibl nalij ahn goh da di meetin ahn deh pahn servis, bot dehnya tingz noh mek wi wahn spirichwal persn. Er maybi wi don mek lee proagres, bot wen wi egzamin wiself, wi fain owt dat wi ku stil du lee beta. (Fil. 3:16) Fi help wi kantinyu groa spirichwali wi wahn ansa chree impoatant kweschan eena dis aatikl: (1) Weh wahn help wi fi noa how spirichwal wee? (2) How wi ku geh schranga spirichwali? (3) If wi ga wahn schrang spirichwaliti, how dat ku help wi eena wi laif evri day?

4. Da fi hoo di kongsl eena Ifeezhanz 4:23, 24?

⁴ Wen wi mi fos staat serv Jehoava, wi mi mek sohn chaynjiz weh mi afek evri paat a wi laif. Ahn wen wi mi geh baptaiz, ih stil neva oava. Di Baibl tel wi ‘fi mek Gaad Spirit chaynj wi haat ahn di way wi tink.ʼ (Ifee. 4:23, 24) Sins wi noh perfek, aala wi need fi kantinyu mek chaynjiz. Eevn bradaz weh di serv Jehoava fi wahn lang taim need fi kip dehn rilayshanship wid Jehoava schrang.—Fil. 3:12, 13.

5. Wat da sohn kweschan weh ku help wi fi egzamin wiself?

⁵ Wi need fi bee aanis wid wiself wen wi di egzamin wiself bowt wi spirichwaliti. Noh kay if wi yong er oal, eech wan a wi ku aks wiself dehnya kweschan: ‘Ai di si chaynjiz eena di way how Ah tink weh shoa dat Ah di groa az wahn spirichwal persn? Ai di bee moa laik Krais? Weh mai atichood da di meetin dehn seh bowt mee? Weh mai kanvasayshan shoa bowt weh Ah reeli waahn eena laif? How Ah di du wid mi persnal stodi? Weh di kaina kloaz weh Ah wayr seh bowt mee? How Ah goh aan wen Ah geh kongsl? Weh Ah du wen Ah fays temtayshan? Ai da wahn spirichwali machoar Kristyan?ʼ (Ifee. 4:13) Dehnya kweschan ku help wi fi mezha wi spirichwaliti.

6. Wat els ku help wi fain owt how spirichwal wee?

⁶ Sohntaim wi need help fahn adaz soh dat wi ku fain owt how spirichwal wee. Di apasl Paal mi menshan dat ih haad fi wahn fizikal persn si dat ih laif noh mek Gaad hapi. Pahn di ada han, wahn spirichwal persn andastan how Gaad si tingz, ahn noa dat Gaad noh pleez wid di laif weh wahn fizikal persn liv. (1 Kor. 2:14-16; 3:1-3) Eldaz hoo tink laik Jeezas aalwayz noatis wen bradaz staat tu tink laik wahn fizikal persn. Soh if dehn tel wi dat dehn noatis sohnting, wi need fi aksep di kongsl an aplai it. Dis wahn shoa dat wi waahn groa az wahn spirichwal persn.—Eccl. 7:5, 9.

7. How wi noa dat Baibl nalij noh nof if wi waahn bee wahn spirichwal persn?

⁷ Memba dat ih noh nof fi jos ga Baibl nalij. King Salaman mi ga lata nalij bowt Jehoava. Ih waiz sayinz en op fi bee paat a di Baibl. Bot eena di en, ih neva stay faytful tu Jehoava az wahn spirichwal man. (1 Ki. 4:29, 30; 11:4-6) Soh den, wat els wi need bisaidz Baibl nalij? Wi need fi kantinyu groa spirichwali. (Kol. 2:6, 7) Bot da how wi du dat?

8, 9. (a) Weh wahn help wi fi kip wi fayt schrang? (b) Weh shuda bee wi goal wen wi stodi ahn meditayt pahn weh wi di laan? (Koment pahn di picha da di biginin a dis aatikl.)

⁸ Paal mi inkorij di bradaz bak den fi groa spirichwali . Ih tel dehn fi mek ‘dehn groa op ahn stap di teech di fos  tingz weh dehn mi laan oava ahn oava agen.ʼ (Heeb. 6:1) How wi ku aplai Paal kongsl tudeh? Wahn impoatant way da fi stodi di buk “Keep Yourselves in Godʼs Love” ahn finish it. Ih wahn help yu fi si how fi aplai Baibl prinsipl eena yu laif. If yu don stodi dis buk, yu tink yu ku stodi ada poblikayshanz weh ku help yu fi geh yu fayt schranga? (Kol. 1:23) Wen yu stodi, meditayt pahn weh yu di laan ahn aks Jehoava fi help yu aplai di infamayshan eena yu laif.

⁹ Wen wi stodi ahn meditayt, wi goal shuda bee fi ga wahn schranga dizaiya fi du weh pleez Jehoava an obay ih laa dehn. (Ps. 40:8; 119:97) Wi need fi rijek eniting weh ku stap wi fahn groa spirichwali.—Taitos 2:11, 12.

10. Weh yong peepl ku du fi geh schranga spirichwali?

¹⁰ If yoo da wahn yong persn, yoo ga spirichwal goalz? Wahn brada weh deh da Betel seh dat hihn laik taak tu di yong peepl weh di geh baptaiz da di serkit asembli bifoa di proagram staat. Ih aks dehn wat da dehn spirichwal goalz. Wahn lata dehn seh egzakli weh dehn waahn du. Dehn waahn serv Jehoava ful-taim er moov sohnweh weh need help eena di minischri. Bot evri now an agen, ih meet yong peepl weh noh noa weh dehn waahn du. Dis ku meen dat dehn tink dehn noh need fi ga spirichwal goalz, noh chroo? If yoo da wahn yong persn, aks yuself: ‘Ai di goh da meetin ahn feel servis jos bikaaz mai payrents waahnt Ah goh? Ai ga mi oan frenship wid Gaad?ʼ Af koars, di kongsl fi ga spirichwal goalz da fi aala wi, noh jos yong peepl. Spirichwal goalz ku help aala wi geh schranga spirichwali.—Eccl. 12:1, 13.

11. (a) Fi geh spirichwali schranga, weh wi need fi du? (b) Wat da sohn Baibl egzampl wi wahn taak bowt weh ku help wi bee wahn moa spirichwal persn?

¹¹ Wans wi si how wi ku du beta, wi need fi staat mek chaynjiz. Ih impoatant fi mek wi bee wahn spirichwal persn. In fak, wi ku eeda looz wi laif er liv fareva bays pahn weda wi spirichwal er nat. (Roam. 8:6-8) Jehoava waahn wi groa spirichwali, bot ih noh ekspek wi fi bee perfek. Fi hihn hoali spirit ku help wi mek eni chaynjiz eena wi laif. Stil, wi need fi du wi paat. Brada John Barr, hoo da-mi wahn memba a di Govanin Badi, mek wahn koment pahn Look 13:24. Ih seh: “Wahn lata peepl fayl bikaaz dehn noh mek di efoat fi groa spirichwali.” Wi need fi bee laik Jaykop. Hihn mi wilin fi fait wid wahn aynjel ahn noh giv op til wen di aynjel bles ahn. (Gen. 32:26-28) Eevn doa wi mait injai Baibl stodi, wi kyaahn ekspek dat di Baibl wahn song laik wahn stoari buk. Wi need fi stodi haad fi fain di preshos chroot dehn weh wi ku yooz eena wi laif.

12, 13. (a) Weh ku help wi fi aplai 1 Korintyanz 2:16? (b) How di apasl Peeta egzampl ahn kongsl ku help wi? (c) Weh yu ku du fi geh schranga spirichwali? (Si di baks “ Weh Yu Ku Du fi Geh Schranga Spirichwali.”)

¹² Wen wi mek di efoat fi geh schranga spirichwali, hoali spirit wahn help wi fi chaynj di way how wi tink. Lee bit bai lee bit, wi ku staat tu tink laik Jeezas. (1 Kor. 2:16.) Hoali spirit ku help wi geh rid a eni rang dizaiya, ahn fi ga kwalitiz weh pleez Gaad. (Gal. 5:16, 22, 23) If wi fain dat wi staat tu foakos pahn mateeryal tingz er rang dizaiya, wi noh fi giv op. Kip aan di aks fi hoali spirit, ahn Jehoava wahn help yu fi foakos pahn di rait tingz. (Look 11:13) Memba di apasl  Peeta. Wahn lata taimz eena ih laif ih neva seh ahn du tingz laik wahn spirichwal man. (Mach. 16:22, 23; Look 22:34, 54-62; Gal. 2:11-14) Bot ih neva giv op. Ahn lee bit bai lee bit, Peeta mi staat tu tink laik Krais. Wi ku du di saym ting.

¹³ Laytaraan, Peeta mi menshan sohn spesifik tingz weh ku help wi. (Reed 2 Peeta 1:5-8.) Wi need fi werk haad ahn mek di efoat fi ga self-kanchroal, indyoarans, ahn lov fi wi bradaz. Dehnya kwalitiz wahn help wi fi geh schranga az wahn spirichwal persn. Evri day, aks yuself dis kweschan, ‘Weh Ai ku werk pan tudeh fi geh schranga spirichwali?ʼ

14. How wi wahn shoa if wi reeli di tink laik Krais?

¹⁴ If wi tink laik Jeezas, ih wahn shoa eena di tingz wi taak bowt, wi akshanz da werk er skool, an eena di disizhanz wi mek evri day. Dehndeh disizhanz wahn shoa dat wi di chrai fi fala Krais. If wee da spirichwal peepl, wi noh wahn mek notn damij wi rilayshanship wid Jehoava. Wen wi fays temtayshan, di fos ting wi wahn du da fait it. Bifoa wi mek eni disizhan, wi wahn stap ahn tink bowt dehnya kweschanz: ‘Wich Baibl prinsipl ku help mi? Weh Jeezas wuda du eena dis sichuwayshan? Wich disizhan wahn pleez Jehoava?ʼ Wi need fi chrayn wiself fi tink laik dis. Soh mek wi luk pahn wahn fyoo sichuwayshan, ahn imajin weh wi wuda du eena eech kays. Fi eech wan a dehn, wi wahn luk pahn wahn Baibl prinsipl weh ku help wi mek wahn waiz disizhan.

15, 16. If wi tink laik Krais how ih wahn help wi (a) fi chooz wahn marij mayt? (b) fi chooz gud frenz?

¹⁵ Wen wi di chooz wahn marij mayt. Di Baibl prinsipl deh da 2 Korintyanz 6:14, 15. (Reed.) Paal mi seh playn ahn schrayt dat wahn spirichwal persn ahn wahn fizikal persn difrent fahn wan anada. Soh how too peepl weh difrent fahn wan anada ku bee laik wan persn? Dehn noh vyoo tingz di saym way. How dis prinsipl ku help wi chooz wahn marij mayt?

¹⁶ Wen wi di chooz wi frenz. Di Baibl prinsipl deh da 1 Korintyanz 15:33. (Reed.) Wahn spirichwal persn noh wahn mek frenz wid enibadi hoo ku damij ih rilayshanship wid Jehoava. Tink bowt how wi ku aplai dis prinsipl eena difrent sichuwayshan. Fi egzampl, how ih ku help wi mek wahn beta disizhan bowt soashal meedya? Er weh wi ku du if sombadi weh wi noh noa invait wi fi play gaymz onlain?

17-19. If wee da spirichwal peepl (a) weh wi wahn avoid? (b) weh kaina goalz wi wahn gat? (c) weh wi wahn du wen wi ga wahn prablem wid sombadi?

¹⁷ Tingz weh ku damij wi spirichwaliti. Paal mi gi di Kristyanz bak den wahn  impoatant waanin. (Reed Heebrooz 6:1.) Wat da di ‘eevl tingz weh bring detʼ weh wi need fi avoid? Eniting weh ku haam wi spirichwali. Dis prinsipl ku help wi ansa wahn lata kweschan weh wi mait aks wiself, laik: ‘Dis wahn help mi er damij mi spirichwaliti? Ah shuda get involv eena dis kaina bizniz? Wai Ah shudn jain wahn groop weh di chrai chaynj di werl?ʼ

¹⁸ Set spirichwal goalz. Jeezas gi wi gud advais bowt goalz eena di Sermon pahn di Mongt. (Mach. 6:33) Wahn spirichwal persn ga spirichwal goalz. If wi memba dis prinsipl, ih wahn help wi fi ansa kweschanz laik: ‘Ai shuda mek planz fi geh wahn haiya ejukayshan? Ah shuda tek dis jab?ʼ

¹⁹ Wen wi ga wahn prablem wid sombadi. How Paal kongsl tu di kangrigayshan da Roam ku help wi wen wi ga prablemz wid peepl? (Roam. 12:18) Bikaaz wi di fala Jeezas egzampl, wi chrai fi “liv peesabl wid evribadi.” Wen wi ga wahn prablem wid sombadi, how wi chreet da persn? Wi lisn, er wi fain it haad fi aksep weh ih ga fi seh? Wi chrai “mek pees” wid da persn?—Jas. 3:18.

20. Wai yoo waahn groa az wahn spirichwal persn?

²⁰ Dehnya da jos wahn fyoo egzampl fi help wi si di kaina disizhanz wahn spirichwal persn wuda mek wen ih yooz Baibl prinsipl fi gaid ahn. Wen wi ga wi main pahn spirichwal tingz, wi laif wahn bee hapiya ahn moa kantentid. Rabert, di brada wi mi taak bowt lee erliya eena dis aatikl, seh: “Ah geh fi bee wahn beta hozban ahn wahn beta pa wen mi rilayshanship wid Jehoava mi geh schranga. Ah kantentid ahn hapi.” Wi ku injai di saym blesinz if wi groa az wahn spirichwal persn. Ahn wi wahn injai wahn beta laif now, ahn di reel laif eena di fyoocha.—1 Tim. 6:19.