ERLI wahn maanin eena May 1910, wahn groop a bradaz mi-di stan op pahn di dek a wahn ship. Dehn mi-di injai di vyoo a di byootiful hilz da Belfast Ireland. Brada Charles T. Russell da-mi wan a dehn bradaz, ahn dis da-mi ih fif chrip tu Ireland. Az dehn mi-di goh lang eena di boat, dehn si lata man di werk pahn too big ship, di Titanic ahn di Olympic. * Wen dehn paas di shipyaad, dehn si wahn dozn Baibl styoodent di wayt fi dehn pahn di waaf.

Bowt 20 yaaz erliya, Brada Russell mi-di luk fi wayz fi spred di gud nyooz aal oava di werl. Soh ih disaid fi toar difrent konchri owtsaida America. Ih mi staat aaf ih toar da Ireland, eena Joolai 1891. Ih sayl pahn wahn ship weh naym City of Chicago. Az ih mi-di reech wehpaat ih mi gwehn, ih wuda mi si di son di goh dong oava Queenstown, weh ih payrents mi kohn fram. Az dehn mi-di paas chroo aala di kleen ahn byootiful tong dehn da Ireland, di bradaz mosi mi riyalaiz dat di feel “redi fi di haavis.”

Brada Russell mi mek sevn chrip tu Ireland. Pahn di fos vizit, lata peepl mi inchrestid fi hyaa di gud nyooz. Afta dat, tu evri taim ih vizit deh, honjridz a peepl, sohntaim eevn towznz, kohn hyaa ih taak dehn. Wen ih mek ih sekant chrip eena May 1903 tu Belfast ahn Dublin, dehn mi-di advataiz di poblik meetin eena di nyoozpaypa. Brada Russell seh dat di “aadyans mi-di pay atenshan” tu di taak “The Oath-Bound Promise,” weh da-mi bowt Aybraham fayt ahn di blesinz weh hyoomanz wahn injai eena di fyoocha.

Bikaaz a di amonk a inchres dehn mi fain da Ireland, Brada Russell mek wahn terd chrip deh. Wen ih reech Belfast eena Aypril 1908, faiv bradaz mi dehdeh fi meet ahn, eevn doa da-mi erli maanin. Dehn mi don advataiz di poblik taak weh mi naym “The Overthrow of Satanʼs Empire.” Soh wen Brada Russell mi gi di taak da saym eevnin, bowt 300 peepl shoa op. Eena di aadyans dehn mi ga wahn man weh mi waahn ster op prablemz. Bot Brada Russell yooz di Skripchaz fi shoa ahn di chroot. Da Dublin, dehn mi ga sohnbadi weh mi moa wos dan hihn. Ih mi naym Mista OʼConnor. Hihn da-mi di sekiteri a di YMCA. Ih mi-di chrai geh di aadyans, weh da-mi moa dan 1,000 peepl, fi ton gens di Baibl Styoodent dehn. Weh mi hapm?

Mek wi imajin wi mi deh da dis meetin ahn wi mi geh fi si aal weh gaan aan. Imajin wahn man mi waahn noa di chroot fahn di Baibl soh ih gaahn da wahn poblik taak weh ih mi si advataiz eena The Irish Times. Ih nayli neva geh wahn seet bikaaz soh moch peepl mi dehdeh. Now, di speeka da-mi wahn man wid wait hyaa, lang byaadz, ahn di wayr wahn lang blak koat. Wel, di man pay kloas atenshan tu di speeka kaaz wen hihn di giv ih taak, ih di waak kraas ahn kraas di stayj, di moov op ih han, an ih yooz skripcha afta skripcha fi teech di chroot.  Meentaim, dis man di geh fi andastan di chroot fahn di Baibl. Di speeka neva need no song ikwipment. Hihn kuda mi taak soh lowd dat evribadi eena di aadyans kuda mi hyaa hihn. Di taak da-mi fi wan an a haaf owaz, an evribadi mi-di lisn tu da speeka. Aftawodz, eena wahn kweschan-an-ansa seshan, Mista OʼConnor an ih fren dehn chalenj di speeka, bot di speeka yooz di Baibl wid skilz ahn difen di chroot. Wel, di hoal aadyans klap dehn han kaaz dehn mi agree wid di speeka. Afta evriting kaam dong, di man weh mi ga inchres tel di brada dehn dat ih waahn laan moa. Akaadn tu peepl weh witnis weh mi hapm da eevnin, lata peepl mi aksep di chroot afta dat.

Pahn May 1909 Brada Russell mek ih foat chrip tu Ireland. Dis taim ih mi deh pahn di Mauretania. Ih mi kehr Brada Huntsinger pahn di chrip kaaz ih mi need sohnbadi fi taip sohn Watch Tower aatikl sins dehn mi wahn deh pahn di ship fi soh lang. Fi di poblik taak da Belfast, 450 peepl mi dehdeh, bot 100 mi haftu stan op bikaaz dehn neva ga inof seet.

Pan ih fif chrip tu Ireland, di wan weh dis aatikl staat aaf di taak bowt, di saym ting hapm. Mista OʼConnor mi bring wahn cherch minista wid hihn tu di poblik taak dis taim. Bot afta di taak, di minista mi geh ansaz fahn di Baibl tu wahn lata fi hihn kweschan dehn. Af koars di aadyans mi lov dat. Di neks day, di bradaz kech wahn boat weh kehr letaz tu Liverpool, ahn fahn deh, dehn kech di ship weh mi naym Lusitania fi goh bak da New York. *

Joorin Brada Russell siks ahn sevent chrip tu Ireland eena 1911, dehn mi du di saym ting an advataiz ih poblik taak dehn. Eevn doa onli 20 Baibl Styoodents mi deh da Belfast, bowt 2,000 peepl reech fi hyaa di poblik taak weh mi naym “Hereafter.” Agen Mista OʼConnor mi shoa op da Dublin wid wahn nada minista hoo mi-di aks kweschanz, bot di aadyans klap wen dehn hyaa aala di ansa dehn fahn di Baibl. Joorin di laas foa monts a 1911, Brada Russell mi vizit sohn ada tong tu. Wahn lata peepl mi gaahn fi hyaa dehndeh taak. OʼConnor ahn 100 moa peepl laik ihself, mi chrai fi intarop di meetin da Dublin agen, bot di aadyans neva mek dat hapm, dehn mi sopoat di speeka.

Eevn doa Brada Russell mi-di tek di leed dehn dayz, ahn da hihn mi gi di poblik taak dehn, ih mi noa dat hihn da noh di onli persn weh kuda mi gi wahn taak kaaz dis da Gaad werk, noh man werk. Di poblik taak dehn da-mi wahn gud way fi teech di chroot fahn di Baibl. Ahn bikaaz a dat, lat moa peepl geh fi hyaa di gud nyooz, ahn nyoo kangrigayshanz mi faam da Ireland.—Fahn wi hischri rekadz da Britain.