1, 2. (a) How wahn lata bradaz ahn sistaz feel bowt spirichwaliti? (b) Wat da sohn impoatant kweschan wi wahn ansa eena dis aatikl?

WAHN sista fahn Canada seh: “Ah hapiya now dat Ai da wahn spirichwal persn kaaz Ah ku fays di difrent chraiyalz weh kom op eena mi laif.” Wahn brada fahn Brazil seh: “Wi marid fi 23 yaaz ahn wi hapi, bot da bikaaz wi chrai fi bee spirichwal peepl.” Ahn wahn brada fahn di Philippines seh: “Bikaaz Ah chrai fi bee wahn spirichwal persn, Ah ga pees, an Ah get lang beta wid mi bradaz ahn sistaz fahn difrent bakgrong.”

² Koments laik dehnya mek wi si di benifits weh wi get wen wi da wahn spirichwal persn. If wi waahn dehnya benifit, wi ku aks wiself: ‘Weh Ah need fi du fi bee wahn spirichwal persn an injai dehnya benifit?ʼ Bifoa wi ansa da kweschan doh, wi need fi andastan weh di Baibl seh bowt wahn spirichwal persn. Eena dis aatikl, wi wahn ansa chree impoatant kweschan. (1) Weh ih meen fi bee wahn spirichwal persn? (2) Wat da sohn egzampl weh ku help wi bee moa spirichwal?  (3) If wi tink laik Krais, how dat wahn help wi fi bee wahn spirichwal persn?

3. How di Baibl diskraib di difrens bitween wahn fizikal man ahn wahn spirichwal man?

³ Di apasl Paal help wi fi andastan di difrens bitween wahn spirichwal man ahn wahn fizikal man. (Reed 1 Korintyanz 2:14-16.) Di fizikal man noh aksep ‘di tingz weh Gaad Spirit gi wi, kaaz dehn ting da loan schupidnis tu hihn.ʼ Bot di spirichwal man ‘mek Gaad Spirit gaid ahn, ku joj evriting karek,ʼ an ih “tink di sayhn way Jeezas Krais tink.” Paal inkorij aala wi fi bee spirichwal peepl. Wat da sohn ada wayz how di fizikal persn difrent fahn di spirichwal persn?

4, 5. How wi ku noa wahn fizikal persn?

⁴ Weh kaina atichood wahn fizikal persn gat? Wahn fizikal persn ga di atichood a peepl eena dis werl hoo foakos onli pahn weh dehn waahn. Paal seh dat dis atichood ‘di kanchroal aala dehn peepl weh noh lisn tu Gaad.ʼ (Ifee. 2:2) Peepl wid dis atichood yoozhwali jos fala lang wid weh evribadi els di du. Dehn du weh dehn tink rait ahn noh eevn chrai fi liv op tu Gaad standadz. Wahn fizikal persn onli tink bowt pozishan, moni, er fi hihn oan raits.

⁵ Wat da wahn nada way wi ku noa wahn fizikal persn? Wahn fizikal persn da enibadi hoo “fala dehn sinful hyooman naycha.” (Gal. 5:19-21) Eena Paal fos leta tu di Korintyan kangrigayshan, ih mi menshan sohn ada tingz dat fizikal peepl wuda du. Dehn tek said wen eni aagyument kom op, dehn chrai fi divaid op adaz, dehn inkorij adaz fi ribel, dehn kehr wan anada da koat, dehn noh ga no rispek fi hedship, ahn food ahn jrink ahn fon kohn fos eena dehn laif. Wen wahn fizikal persn fays wahn temtayshan, ih geh week ahn giv een. (Prov. 7:21, 22) Jood mi seh dat peepl wuda get tu di point dat dehn “noh ga di Spirit a Gaad” ataal eena dehn laif.—Jood 18, 19.

6. How wi ku noa wahn spirichwal persn?

⁶ Weh ih meen fi bee wahn spirichwal persn? Wel, wahn spirichwal persn kay bowt ih rilayshanship wid Gaad. Dis da di opozit a di fizikal persn. Peepl weh spirichwal “chrai fi bee laik Gaad.” (Ifee. 5:1) Dis meen dat dehn waahn laan how Jehoava tink ahn chrai si tingz di way how hihn si tingz. Gaad da wahn reel persn tu dehn. Spirichwal peepl chrai fi liv akaadn tu Jehoava standadz. (Ps. 119:33; 143:10) Insteda foakos pahn di tingz a di flesh, di spirichwal persn chrai fi ‘mek di Hoali Spirit kanchroal how ih liv.ʼ (Gal. 5:22, 23) Fi help wi beta andastan weh ih meen fi ga wahn spirichwal main, tink bowt dis: Wen wahn persn gud pahn mek moni, wi seh da persn ga wahn bizniz main. Jos laik dat, wahn persn weh kay bowt ih wership tu Gaad da wahn persn wid wahn spirichwal main.

7. Weh di Baibl seh bowt peepl wid wahn spirichwal main?

⁷ Di Baibl seh dat peepl wid wahn spirichwal main da hapi peepl. Machyu 5:3 seh: “Gaad bles dehn wan weh noa seh dehn need hihn, kaa di kingdom a hevn da fi dehn,” soh bikaaz Gaad bles dehn, dehn hapi. Roamanz 8:6 taak bowt di advantij weh wahn persn wid wahn spirichwal main gat. Ih seh: “Dehn peepl weh fala dehn sinful haat, fi dehn main ded. Bot dehn wan weh fala di Spirit a  Gaad, dehn wahn ga laif fareva, ahn dehn wahn ga pees eena dehn haat.” Wen wi foakos pahn spirichwal tingz now, wi wahn ga pees wid Gaad, pees eena wi oan haat, ahn di hoap fi liv fareva eena di fyoocha.

8. Wai ih tek werk fi bee wahn spirichwal persn?

⁸ Wi di liv eena wahn daynjaros werl. Wi deh rong loan fizikal peepl, soh wi need fi werk haad fi bee wahn spirichwal persn ahn fi protek wi spirichwaliti. If wahn persn looz ih spirichwaliti, ih wahn staat tu tink an ak laik wahn fizikal persn. Weh ku help wi fi avoid dat? How wi ku groa spirichwali?

9. (a) Weh ku help wi fi groa spirichwali? (b) Fi hoo egzampl wi wahn luk pahn fi help wi bee spirichwal peepl?

⁹ Jos laik how wahn pikni laan fan ih payrents ahn fala fi dehn gud egzampl, wi ku laan fahn faytful servants a Gaad ahn fala fi dehn gud egzampl tu. Wi ku laan how fi bee wahn spirichwal persn. Pahn di ada han, wen wi si di bad egzampl a wahn fizikal persn, wi laan weh noh fi du. (1 Kor. 3:1-4) Di Baibl ga di too kaina egzampl. Bot sins wi waahn bee spirichwal peepl, mek wi luk pahn di gud egzampl a Jaykop, Mayri, ahn Jeezas.

10. How Jaykop mi shoa dat hihn da-mi wahn spirichwal man?

¹⁰ Fos, mek wi luk pahn di egzampl a Jaykop. Jos laik moas a wi tudeh, laif neva eezi fi Jaykop. Ih mi haftu put op wid ih brada, Eesaa, hoo da-mi wahn fizikal persn. Ih mi waahn hert Jaykop. Pahn tap a dat, ih mi haftu deel wid ih faada-in-laa hoo stay mi-di chrai rip ahn aaf. Jaykop mi stay wahn spirichwal man eevn doa ih mi haftu deel wid sichuwayshan laik dehndeh. Ih mi ga fayt eena di pramis weh Gaad mi mek  tu Aybraham. Soh ih protek ih famili, kaaz ih noa dehn mi wahn bee wahn impoatant paat a da pramis. (Gen. 28:10-15) Jaykop neva mek di atichood a adaz rong ahn kaaz ahn fi faget Jehoava pramis. Fi egzampl, wen ih mi feel laik Eesaa mi wahn hert ahn, ih aks Gaad: “Sayv mi, Ah di pray tu yu . . . Da yoo mi seh: ‘Ai wahn deel gud wid yu, ahn Ai wahn mek yu chiljren dehn bee laik di grayn a san eena di see.ʼ” (Gen. 32:6-12) Jehoava mi mek wahn pramis tu Jaykop an ih ansesta dehn. Jaykop mi ga schrang fayt eena da pramis, soh wateva ih mi du, da-mi akaadn tu di wil a Gaad an ih perpos.

11. How wi noa dat Mayri da-mi wahn spirichwal persn?

¹¹ Now mek wi luk pahn di egzampl a Mayri. Wai Jehoava mi pik Mayri fi bee Jeezas ma? Bikaaz shee da-mi wahn spirichwal persn. How wi noa dat? Wen Mayri gaahn vizit Zakaraiya an Ilizabet, fi shee kanvasayshan wid dehn shoa dat shee da-mi wahn spirichwal persn. (Reed Look 1:46-55.) Weh Mayri mi seh pahn da vizit tel wi dat shee mi lov di Werd a Gaad ahn mi noa di Heebroo Skripchaz gud. (Gen. 30:13; 1 Sam. 2:1-10; Mal. 3:12) Memba tu dat wen shee mi marid Joazef, dehn neva ga eni sekshwal rilayshan til Jeezas mi baan. Weh wi ku laan fahn dis? Wi laan dat weh mi moa impoatant tu Joazef ahn Mayri da-mi fi du di wil a Gaad insteda satisfai dehn oan dizaiya. (Mach. 1:25) Az taim gaan aan, Mayri mi noatis evriting weh mi hapm eena Jeezas laif ahn ‘kip aala dehn ting eena fi shee haat.ʼ (Look 2:51) Shee mi inchrestid eena Gaad pramis bowt di Mesaiya. Yu noh tink Mayri egzampl ku help wi fi si how wi ku put di wil a Gaad fos eena wi laif?

12. (a) How Jeezas mi fala ih Faada egzampl? (b) How wi ku fala Jeezas egzampl? (Koment pahn di picha da di biginin a dis aatikl.)

¹² Owta evribadi hoo eva liv, hoo da di bes egzampl a wahn spirichwal persn? Da Jeezas Krais. Hihn fala ih Faada egzampl joorin ih hoal laif ahn minischri pahn di ert. Weh ih mi tink, feel, ahn du da-mi egzakli laik Jehoava. Jeezas mi du ih Faada wil ahn rispek fi Hihn standadz. (Jan 8:29; 14:9; 15:10) Fi egzampl, noatis how di prafit Aizaiya diskraib di kompashan Jehoava gat, ahn kompyaa dat wid how Maak diskraib Jeezas feelinz. (Reed Isaiah 63:9; Maak 6:34.) * Wi ku aks wiself: ‘Ai da laik Jeezas, hoo mi aalwayz redi fi shoa kompashan tu peepl weh need help? Ai fala Jeezas egzampl ahn foakos pahn di preechin ahn teechin a di gud nyooz?ʼ (Look 4:43) Wahn spirichwal persn wahn shoa kompashan ahn chrai fi help ada peepl.

13, 14. (a) Weh wi ku laan fahn di egzampl a spirichwal peepl tudeh? (b) Menshan eni egzampl fahn di paragraaf dehn.

¹³ Tudeh, wi ga lata egzampl a spirichwal bradaz ahn sistaz hoo di fala Jeezas egzampl. Maybi yu noatis dehn lov fi di minischri, dehn jenaros atichood, dehn kompashan, er som ada gud kwaliti. Ahn jos laik wee, dehn noh perfek ahn dehn haftu fait difrent weeknis, bot dehn di werk haad fi bee wahn beta persn. Fi egzampl, Raychel da wahn sista fahn Brazil. Shee seh: “Ai mi lov fi  fala di fashan eena di werl. Soh Ah neva jres eena wahn deesent way. Bot afta Ah laan di chroot, Ah mek di efoat fi bee wahn spirichwal persn. Ih neva eezi fi mek dehn chaynjiz, bot now Ah hapiya ahn mi laif ga moa meenin.”

¹⁴ Wahn nada sista fahn di Philippines, weh naym Rayleen, mi ga wahn difrent chalenj. Shee staat tu goh afta haiya ejukayshan ahn wahn gud jab. In taim, ih spirichwal goalz neva meen eniting tu ahn. Shee seh: “Ah staat tu riyalaiz dat sohnting mi misn eena mi laif, sohnting faar moa impoatant dan mi jab.” Rayleen chaynj di way ih mi-di tink ahn staat foakos pan ih servis tu Jehoava. Now, shee chros eena Jehoava pramis da Machyu 6:33, 34. Shee seh: “Ah noa fi shoar dat Jehoava wahn tek kayr a mi!” Maybi yoo noa bradaz ahn sistaz laik dehnya eena yu kangrigayshan. Wen wi si how dehn di fala Jeezas egzampl, wi waahn fala fi dehn faytful egzampl tu, noh chroo?—1 Kor. 11:1; 2 Tes. 3:7.

15, 16. (a) Weh wi need fi du if wi waahn bee laik Jeezas? (b) How wi ku ‘tink laik Kraisʼ?

¹⁵ How wi ku persnali fala Jeezas egzampl? Di Baibl da 1 Korintyanz 2:16 seh fi “tink di sayhn way Jeezas Krais tink.” Ahn 1 Peeta 4:1 seh fi “tink jos laik how Krais mi tink.” Soh, fi bee laik Jeezas, wi need fi noa how Jeezas tink, feel, ahn how ih yoostu ak. Den wi ku fala fi hihn egzampl. Jeezas mi aalwayz foakos pan ih rilayshanship wid Gaad. Soh di moa wi chrai bee laik Jeezas, di moa wi wahn bee laik Jehoava. Dat da wai ih impoatant dat wi laan fi tink laik Jeezas.

¹⁶ How wi ku du dis? Jeezas disaipl dehn mi si ih du lata mirakl, lisn tu ih teechinz, wach how ih yoostu deel wid aal kaina peepl, ahn noatis how ih mi alow Jehoava tinkin fi gaid ahn. Dehn mi seh: “Wee da witnis tu aala dehn ting weh ih mi du.” (Aks 10:39) Bot wee tudeh kyaahn si Jeezas; wee noh deh rong ahn. Soh Jehoava gi wi di Gaspl dehn soh dat wi ku noa Jeezas. If wi reed bowt Jeezas eena Machyu, Maak, Look, ahn Jan, ahn tink bowt weh wi reed, wi wahn laan fi tink laik hihn. Dis wahn help wi fi ‘fala eena fi hihn futstep dehn,ʼ ahn fi “tink jos laik how Krais mi tink.”—1 Peet. 2:21; 4:1.

17. How wi wahn benifit wen wi tink laik Jeezas?

¹⁷ How wi wahn benifit wen wi tink laik Jeezas? Gud helti food schrentn wi badi. Jos laik dat, wen wi feed wi main wid Krais tinkin, ih wahn schrentn wi spirichwaliti. Lee bit bai lee bit, wi geh fi noa weh Krais wuda du eena eni sichuwayshan. Dis wahn help wi fi mek disizhan weh wahn pleez Gaad ahn gi wi wahn kleen kanshans. Dehnya benifit da gud reezn “fi mek di Laad Jeezas bee az kloas tu wi az di kloaz weh wi wayr.” Yu noh agree wid dat?—Roam. 13:14.

18. Weh yoo laan fahn dis stodi bowt weh ih meen fi bee wahn spirichwal persn?

¹⁸ Dis aatikl mi help wi fi si weh ih meen fi bee wahn spirichwal persn. Den wi mi si weh wi ku laan fahn di gud egzampl a spirichwal peepl. Ahn wi mi laan how wi ku tink laik Jeezas. Bot wi ku laan moa. Fi egzampl, how wi ku noa if wee da wahn spirichwali schrang persn? Weh wi ku du fi bee schranga spirichwali? Ahn how wi spirichwaliti afek wi laif? Wi wahn ansa dehnya kweschan eena di neks aatikl.