1-2. (a) How di Baibl diskraib Moaziz, ahn weh hihn mi du? (b) Weh moov wi fi werk haad fi bee hombl?

DI BAIBL seh dat Moaziz mi “moa hombl dan eni ada man pahn di fays a di ert.” (Num. 12:3) Yu tink dis meen dat hihn mi week, frayd fi mek disizhanz er frayd fi stan op tu peepl weh deh gens ahn? Dat da weh sohn peepl tink ih meenz fi bee hombl. Bot dat da noh weh ih meenz ataal. Moaziz da-mi wahn servant a Jehoava weh mi schrang, weh neva frayd fi mek disizhanz, ahn weh mi ga korij. Wid Jehoava help, hihn mi fays di maiti roola a Eejip, ih mi leed bowt 3,000,000 peepl chroo di dezert, an ih mi help di nayshan a Izrel kanka dehn enimi.

² Wee noh fays di saym kaina chalenjiz weh Moaziz mi haftu deel wid, bot evri day wi haftu deel wid peepl weh mek it haad fi bee hombl. Bot wi ga wahn powaful pramis weh moov wi fi werk haada fi ga dis kwaliti. Jehoava pramis dat “di hombl wan dehn wahn liv pahn di ert.” (Ps. 37:11) Yoo wuda seh yoo da wahn hombl persn? Ada peepl wuda seh yoo hombl? Bifoa wi eevn ansa dehndeh kweschanz, wi haftu noa weh ih meenz fi bee hombl.

3-4. (a) How wi ku iloschrayt weh ih meenz fi bee hombl? (b) Weh kwalitiz wi need fi ga if wi waahn bee hombl, ahn wai?

³ Hyoomiliti * da laik wahn byootiful payntin. Eena weh way? Jos laik how wahn aatis yooz wahn lata difrent priti  kalaz fi paynt wahn picha, wee haftu shoa wahn lata difrent kwalitiz fi bee hombl. Som a dehndeh byootiful kwalitiz da obeedyans, korij, ahn wahn jentl haat. Wai wi need dehnya kwalitiz if wi waahn bee hombl ahn pleez Jehoava?

⁴ Onli hombl peepl wilin fi obay di wil a Gaad. Paat a Gaad wil da fi mek wi ga wahn jentl haat. (Mach. 5:5; Gal. 5:23) Wen wi du di wil a Gaad, Saytan geh beks bad wid wi. Soh eevn doa wi hombl ahn ga wahn jentl haat, wahn lata peepl weh da paat a Saytan werl hayt wi. (Jan 15:18, 19) Dats wai wi need korij fi stan op gens Saytan.

5, 6. (a) Wai Saytan hayt hombl peepl? (b) Weh kweschanz wi wahn ansa?

⁵ Di opozit a wahn hombl persn da sombadi weh prowd, weh kyaahn kanchroal ih anga, ahn weh noh obay Jehoava. Dat da Saytan rait deh! Noh wanda hihn hayt hombl peepl! Fi dehn gud kwalitiz onli proov how wikid Saytan wikid, bikaaz hihn noh ga no gud kwalitiz. Ahn fi mek mataz wos, hombl peepl proov Saytan laiyad. How soh? Bikaaz noh mata weh Saytan seh er du, hihn kyaahn stap hombl peepl fahn serv Jehoava!—Job 2:3-5.

⁶ Wen ih ku bee wahn chalenj fi bee hombl? Ahn wai wi shuda chrai haad fi bee hombl? Fi ansa dehndeh kweschanz wi wahn stodi di egzampl a Moaziz, Jeezas, and di chree yong Heebroo bwai weh di Babiloanyan dehn mi kyapcha.

7-8. How Moaziz mi rispan wen Ayron ahn Miryam mi disrispek ahn?

⁷ How fi bee hombl wen wi ga atariti: Ih ku bee wahn chalenj fi sombadi weh ga atariti fi bee hombl, espeshali wen dehn ga atariti oava sombadi weh noh shoa dehn rispek er weh kweschan di disizhanz weh dehn mek. Dat eva hapm tu yoo? Wat if wahn famili memba ak da way deh? How yoo wuda handl da sichuwayshan? Noatis weh Moaziz mi du.

⁸ Jehoava mi apoint Moaziz az leeda a Izrel an ih mi giv ahn di privilij ahn di aana fi rait di laa dehn fi da nayshan. Fi shoar, Jehoava mi-di sopoat Moaziz. Eevn soh, Moaziz oan brada ahn sista,  Ayron ahn Miryam, mi kritisaiz ahn, ahn tel ahn dat hihn neva marid di rait uman. Som peepl eena Moaziz pozishan wuda geh beks ahn tek it owt pahn dehn—bot noh Moaziz. Hihn mi difrent; hihn neva eezi fi geh beks. Hihn mi eevn bayg Jehoava fi stap ponish Miryam. (Num. 12:1-13) Wai Moaziz mi rispan da way?

9-10. (a) Weh Jehoava mi help Moaziz fi andastan? (b) Weh evri famili hed an elda ku laan fahn Moaziz?

⁹ Moaziz mi alow Jehoava fi chrayn ahn. Bowt 40 yaaz bifoa, wen hihn da-mi wahn memba a di Eejipshan raayal famili, Moaziz neva hombl. In fak, Moaziz mi soh eezi fi geh beks dat wan taim ih mi kil wahn man weh mi du sohnting weh hihn mi joj fi bee rang. Moaziz mi tink dat Jehoava mi agree wid weh ih mi du. Jehoava mi spen 40 yaaz di help Moaziz andastan dat hihn mi need moa dan jos korij fi leed di Izrelait dehn; hihn mi need fi bee hombl. Ahn fi bee hombl, hihn mi aalso need fi bee obeedyant ahn ih mi need fi ga wahn jentl haat. Hihn mi laan ih lesn gud ahn dat mi help ahn fi bee wahn ekselent oavaseeya.—Ex. 2:11, 12; Aks 7:21-30, 36.

¹⁰ Evri famili hed ahn elda shuda kapi Moaziz gud egzampl. If sombadi noh chreet yu wid rispek, noh geh ofendid. Bee hombl an aksep yu mistayk dehn. (Eccl. 7:9, 20) Obay Jehoava dairekshan pahn how fi handl dehn kaina prablemz. Aalwayz ansa eena wahn kaam way. (Prov. 15:1) Wen di famili hed dehn ahn di oavaseeya dehn rispan eena dis way, dehn pleez Jehoava, dehn promoat pees, ahn dehn set wahn gud egzampl a how fi bee hombl.

11-13. Weh egzampl di chree yong Heebroo bwai mi set fi wi?

¹¹ Wen adaz persikyoot wi: Aal chroo hischri, lata difrent govament persikyoot Jehoava peepl. Dehn mait chaaj wi wid difrent “kraim,” bot di reel reezn wai dehn persikyoot wi da bikaaz wi “obay Gaad, noh man.” (Aks 5:29) Peepl mait mak wi, chroa wi eena jayl, an eevn beet wi. Bot wid Jehoava help, wi wahn kip kaam ahn wi noh wahn ansa bak.

¹² Hananaiya, Mishayel, an Azaraiya lef wahn gud egzampl mek wi fala. * Mek wi si weh wi ku laan fahn dehn chree yong Heebroo. Di king a Babilan mi koman dehn fi bow dong ahn wership di imij a goal weh hihn mek. Eena wahn kaam way dehn tel di king dat dehn neva  wahn wership di imij. Dehn mi stay obeedyant tu Gaad eevn wen di king chretn fi bon dehn op eena wahn hat hat fernis. Jehoava mi chooz fi sayv di chree Heebroo, bot dehn neva tek it fi grantid dat hihn mi wahn du dat fi dehn. Raada, dehn mi wilin fi aksep wateva Jehoava wuda alow fi hapm. (Dan. 3:1, 8-28) Weh dehn mi du proov dat hombl peepl ga reel korij—no roola, no chret, ahn no ponishment ku stap wi fahn wership Jehoava ‘wid aala wi haat.ʼ—Ex. 20:4, 5.

¹³ Wen wi laayalti tu Gaad deh anda tes, how wi ku kapi di egzampl a di chree Heebroo dehn? Wi stay hombl ahn chros dat Jehoava wahn tek kayr a wi. (Ps. 118:6, 7) Wen peepl akyooz wi, wi ansa eena wahn kaam way ahn wid rispek. (1 Peet. 3:15, 16) Ahn wi noh mek notn afek er damij wi rilayshanship wid wi lovin Faada, Jehoava.

14-15. (a) Weh ku hapm wen wi deh anda schres? (b) Akaadn tu Aks 8:32, wai wi ku seh dat Jeezas da di perfek egzampl a hyoomiliti eevn wen ih deh anda schres?

¹⁴ Wen wi di deel wid schres: Aala wi feel schres fi difrent reezn. Som a wi mait feel schres bifoa wi tek wahn tes da skool er wen wi haftu du sohnting impoatant da werk. Er maybi wi geh schres owt jos di tink bowt wahn medikal chreetment er serjri weh wi need. Aala dehnya sichuwayshanz ku kaaz wi schres ahn dat mek it haada fi bee hombl. Tingz weh naamali noh afek wi eena no way ku staat tu get pahn wi nervz. Wi mait seh ahn du tingz weh noh kain. If yoo eva feel schres owt, fala Jeezas egzampl.

¹⁵ Joorin di laas fyoo monts weh Jeezas mi deh pahn di ert, hihn mi deh anda lata schres. Hihn mi noa bowt di terabl sofarin weh ih mi wahn goh chroo. (Jan 3:14, 15; Gal. 3:13) Wahn fyoo monts bifoa ih mi ded, hihn mi seh dat ih mi deh anda lata schres. (Look 12:50) Ahn jos dayz bifoa ih mi ded, Jeezas mi seh: “Now mi haat hevi.” Di werdz weh hihn mi yooz fi ekspres ih feelinz tu Gaad wen ih mi pray shoa how hihn mi hombl an obeedyant. Hihn mi seh: “Faada, sayv mi fahn di sofarin weh deh heda mi. Bot dat da egzakli weh Ah kohn fa. Faada, mek dehn si how wandaful yu naym.” (Jan 12:27, 28, NW) Wen di taim kohn, Jeezas mi shoa korij wen ih mi han ihself oava tu Gaad enimi dehn. Dehn mi kil ahn eena di moas terabl way. Eevn doa hihn mi-di goh chroo lata schres ahn sofarin, Jeezas mi stay hombl ahn du weh Gaad mi waahn ih du. Jeezas da di perfek egzampl a sombadi weh shoa hyoomiliti eevn wen ih deh anda lata schres!—Reed Aks 8:32.

16-17. (a) How Jeezas fren dehn mi tes ih hyoomiliti? (b) How wi ku kapi Jeezas egzampl?

¹⁶ Pahn di laas nait bifoa Jeezas mi ded, fi hihn kloasis fren dehn mi tes ih hyoomiliti. Jos imajin di schres Jeezas mi gaahn chroo da nait. Yu tink ih wuda mi stay faytful til di en a ih laif pahn ert? If hihn neva stay faytful, nobadi mi wahn ku geh di chaans fi geh laif. (Roam. 5:18, 19) Eevn moa impoatant, fi hihn Faada naym mi deh pahn di lain. (Job 2:4) Den joorin ih laas meel wid ih apasl dehn, dehn mi “staat tu aagyu monks dehnself az tu wich wan a dehn da-mi di moas impoatant wan monks dehn.” Jeezas mi don karek dehn tinkin wahn lata taimz bifoa. In fak, ih mi jos tel dehn bowt it erliya da sayhn day! Bot,  Jeezas neva geh beks. Insteda dat, hihn mi taak tu dehn eena wahn kaam way. Eevn doa Jeezas mi ansa eena wahn jentl ahn kain way, hihn mi mek it klyaa tu ih apasl dehn weh kaina atichood dehn shuda gat. Afta dat, hihn mi komen dehn fi dehn laayalti ahn fi dehn sopoat.—Look 22:24-28; Jan 13:1-5, 12-15.

¹⁷ How yoo wuda mi rispan if yu mi deh eena wahn simila sichuwayshan? Wee ku kapi Jeezas egzampl ahn stay kaam eevn wen wi deh anda schres. Bee wilin fi obay Jehoava koman fi “aalwayz bayr wid wan anada.” (Kol. 3:13) If wi memba dat aala wi seh ahn du tingz weh mait get adaz beks, wi wahn obay dis koman. (Prov. 12:18; Jay. 3:2, 5) Aalwayz chrai yu bes fi komen adaz fi di gud kwalitiz weh dehn shoa.—Ifee. 4:29.

18. How Jehoava help hombl peepl mek gud disizhanz, bot weh dehn fi du?

¹⁸ If wi hombl, wi wahn mek beta disizhanz. Wen wi noh reeli noa weh fi du, Jehoava wahn help wi mek gud disizhanz. Bot hihn onli wahn help wi if wi hombl. Hihn pramis dat hihn wahn hyaa “di dizaiya a hombl peepl.” (Ps. 10:17) Hihn wahn du moa dan jos hyaa weh wi aks fa. Di Baibl pramis: “Hihn wahn gaid hombl peepl fi du weh rait, ahn hihn wahn teech hombl peepl fi hihn way.” (Ps. 25:9) Di way how Jehoava gaid wi da chroo di Baibl ahn di poblikayshan dehn, * an aalso chroo di veedyo ahn di meetin dehn weh “di faytful ahn diskreet slayv” provaid. (Mach. 24:45-47, NW) Wi fi bee hombl an aksep di help weh Jehoava provaid fi wi. Wi du dis wen wi stodi di mateeryal weh avaylabl fi wi, ahn wen wi obeedyant ahn wilin fi aplai weh wi laan.

19-21. Weh mistayk Moaziz mi mek da Kaydesh, ahn weh lesn wi ku laan fan it?

¹⁹ If wi hombl, wi wahn mek les mistayk. Memba Moaziz mi stay hombl fi yaaz an ih mi pleez Jehoava. Den, wan taim, tuwaadz di en a di 40-yaa jerni chroo di wildanes, Moaziz neva shoa hyoomiliti. Fi hihn sista, praabli di sayhn wan weh mi help sayv ih laif da Eejip, mi jos ded ahn dehn mi beri ahn da Kaydesh. Ahn now di Izrelait dehn mi-di komplayn agen. Dis taim dehn mi-di  “kwaaril wid Moaziz” kaaz dehn neva ga waata. Di peepl mi komplayn eevn afta aala di mirakl dehn weh Jehoava mi du chroo Moaziz, hoo mi-di leed dehn ahn tek gud kayr a dehn aal di wail. Dehn neva jos komplayn kaaz dehn neva ga waata, bot dehn mi komplayn gens Moaziz laik if da mi fi hihn faalt dat dehn mi tersti.—Num. 20:1-5, 9-11.

²⁰ Wen Moaziz mi si how di Izrelait dehn mi-di goh aan, hihn mi geh beks bad an ih neva jentl wid di peepl ataal. Insteda ga fayt eena Gaad ahn taak tu di rak, laik how Jehoava mi koman ahn fi du, hihn mi rayl op wid di peepl ahn tek di kredit fi di mirakl weh ih mi wahn du. Den ih mi schraik di rak too taim ahn lata waata mi poar owt. Praid an anga mi kaaz ahn fi mek dis seeryos mistayk. (Ps. 106:32, 33) Sayka weh Moaziz mi looz ih hyoomiliti, hihn neva geh di privilij fi goh eena di Pramis Lan.—Num. 20:12.

²¹ Wi ku laan wahn lat fahn dis egzampl. Fos, wi need fi kip di chrai haad fi bee hombl, adawaiz wi ku geh prowd ahn staat tu seh ahn du foolish tingz. Sekant, wen wi deh anda lata schres er presha, wi haftu werk eevn haada fi stay hombl.

22-23. (a) Wai wi shuda kantinyu fi bee hombl? (b) Weh Zephaniah 2:3 teech wi?

²² If wi hombl, wi wahn geh protekshan. Soon, Jehoava wahn du weh wid aala di wikid peepl pahn di ert an onli hombl peepl wahn liv pan it. Den yes, di ert wahn bee ful op wid pees. (Ps. 37:10, 11) Yoo wahn bee monks dehndeh hombl peepl? Yu kud if yu aksep Jehoava invitayshan weh deh eena di buk a Zephaniah.—Reed Zephaniah 2:3. *

²³ Wai Zephaniah 2:3 seh: “Maybi unu wahn geh protekshan”? Dis noh meen dat Jehoava kyaahn protek dehn wan weh pleez hihn ahn weh hihn lov. Insteda dat, ih shoa dat wee need fi du sohnting soh dat wi ku geh fi hihn protekshan. Wee onli ku servaiv “di day a Jehoava anga” ahn liv fareva if wi mek di efoat fi bee hombl now ahn pleez Jehoava.