1. Wat da wan reezn wai Jehoava famili yoonaitid?

WEE lov fi bee paat a Jehoava famili. Wai wi famili soh peesful ahn yoonaitid? Wan reezn da dat aala wi chrai wi bes fi shoa rispek fi hooeva geh atariti fahn Jehoava. In fak, di beta wi andastan di reezn wai Jehoava giv atariti tu adaz, di moa yoonaitid wi wahn bee.

2. Weh kweschanz wi wahn ansa eena dis aatikl?

² Eena dis aatikl, wi wahn diskos hoo ga atariti eena di kangrigayshan. Wi wahn aalso ansa dehnya kweschan: Weh roal sistaz gat eena di kangrigayshan? Da chroo dat evri brada ga atariti oava evri sista? Di elda dehn ga di saym kaina atariti oava bradaz ahn sistaz laik weh wahn famili hed gat oava ih waif ahn chiljren? Fers, mek wi diskos how wi shuda vyoo wi sistaz.

3. Weh wahn help wi fi apreeshiayt di werk weh wi sistaz du eevn moa?

³ Wi apreeshiayt wi sistaz weh werk haad fi tek kayr a dehn famili, fi preech di gud nyooz, ahn fi sopoat di kangrigayshan. Wi wahn apreeshiayt dehn eevn moa if wi tink bowt how Jehoava ahn Jeezas vyoo dehn. Wi ku aalso laan how fi chreet wi sistaz wen wi luk pahn di way how di apasl Paal mi chreet dehn.

4. How di Baibl shoa wi dat Jehoava apreeshiayt uman saym laik man?

⁴ Di Baibl shoa wi dat Jehoava apreeshiayt uman saym laik man. Fi egzampl, ih shoa wi dat joorin di taim a di apasl dehn, Jehoava mi gi hoali spirit tu man an uman  soh dat dehn kuda mi du miraklz, laik taak eena difrent langwij. (Aks 2:1-4, 15-18) Man an uman mi geh anointid wid hoali spirit fi rool lang wid Krais. (Gal. 3:26-29) Man an uman wahn geh di riwaad a evalastin laif pahn di ert. (Rev. 7:9, 10, 13-15) An aala wi, man an uman, ga di asainment fi preech di gud nyooz. (Mach. 28:19, 20) Fi egzampl, di Baibl tel wi bowt di werk weh wahn sista weh naym Prisila mi du. Shee an ih hozban, Akwila, mi help Apolos, wahn wel-ejukaytid man, fi geh wahn moa karek andastandin a di chroot.—Aks 18:24-26.

5. How Look 10:38, 39, 42 shoa wi dat Jeezas mi ga rispek fi uman?

⁵ Jeezas mi chreet uman wid aana ahn rispek. Hihn neva chreet dehn laik how di Farisee dehn mi chreet dehn. Dehn neva taak tu uman eena poblik ahn dehn wuda neva diskos di Skripchaz wid dehn. Bot Jeezas mi inklood di uman dehn eena di kanvasayshan wen hihn mi diskos di Skripchaz wid ih disaipl dehn. * (Reed Look 10:38, 39, 42.) Hihn mi aalso alow sohn uman fi chravl lang wid ahn wen ih gaahn pahn preechin toar. (Look 8:1-3) Ahn Jeezas mi gi sohn uman di privilij fi anonks tu di apasl dehn dat hihn mi geh rayz op bak tu laif.—Jan 20:16-18.

6. How di apasl Paal mi shoa dat hihn rispek uman?

⁶ Di apasl Paal mi rimain Timoti fi rispek uman. Paal mi tel ahn fi chreet di oalda uman dehn saym laik how ih wuda chreet ih ma, ahn di yonga uman dehn saym laik if dehn da-mi ih sista. (1 Tim. 5:1, 2) Eevn doa Paal mi du wahn lat fi help Timoti fi ga schrang fayt, hihn mi noa dat da mi Timoti ma ahn grani hoo mi teech hihn weh deh eena “di hoali raitin dehn.” (2 Tim. 1:5; 3:14, 15) Wen Paal mi rait ih leta tu di Roamanz, ih mi sen heloa tu di sistaz an ih mi kaal dehn bai dehn naym. Hihn neva onli si di werk weh di sistaz du, bot hihn mi aalso shoa apreeshiayshan fi weh dehn du.—Roam. 16:1-4, 6, 12; Fil. 4:3.

7. Weh kweschanz wi wahn diskos?

⁷ Di paragraaf dehn bifoa dis wan shoa dat di Baibl noh seh dat sistaz noh az impoatant az bradaz. Wi lovin ahn jenaros sistaz help di kangrigayshan veri moch, ahn di eldaz pen pahn dehn fi help kip di pees ahn yooniti eena di kangrigayshan. Bot wi stil need fi fain di ansa tu dehnya kweschan: Wai Jehoava ekspek wahn sista fi wayr wahn hed kovarin sohntaim? Sins da onli bradaz geh apointid az eldaz ahn ministeeryal servants, dis meen dat evri brada ga atariti oava evri sista eena di kangrigayshan?

8. Akaadn tu Ifeezhanz 5:23, evri brada ga atariti oava evri sista eena di kangrigayshan? Pleez eksplayn yu ansa.

⁸ Evri brada ga atariti oava evri sista eena di kangrigayshan? Di ansa da no. (Reed Ifeezhanz 5:23.) Eena wahn famili, di hozban ga atariti oava ih waif. If wahn sista son baptaiz, dat noh meenz dat hihn da fi shee hed. (Ifee. 6:1, 2) An eena di kangrigayshan, di eldaz onli ga som atariti oava di sistaz saym laik how dehn onli ga som atariti oava di bradaz. (1 Tes. 5:12; Heeb. 13:17) How bowt wahn singl sista weh noh liv wid ih payrents  nohmoh? Shee stil rispek ih payrents, bot shee noh deh anda ih pa atariti nohmoh. Ahn shee rispek di eldaz, bot jos laik di bradaz eena di kangrigayshan, shee onli ga wan hed, hoo da Jeezas.

9. Wai sistaz need fi wayr hed kovarin sohntaim?

⁹ Da chroo dat Jehoava gi sohn bradaz di atariti fi tek di leed eena di kangrigayshan, bot hihn noh gi da saym atariti tu sistaz. (1 Tim. 2:12) Wai? Wel, fi di saym reezn wai hihn mi apoint Jeezas fi ga atariti oava di man—fi mek wi ga aada eena di kangrigayshan. If, fi sohn reezn, wahn sista haftu handl wahn asainment weh wahn brada naamali haftu handl, den Jehoava ekspek shee fi wayr wahn hed kovarin. * (1 Kor. 11:4-7) Jehoava aks sistaz fi du dat soh dat dehn ku shoa rispek fi di bradaz weh ga atariti oava dehn. Hihn noh du dis fi mek dehn feel shaym. Now dat wi noa dis, mek wi ansa dis kweschan: Humoch atariti wahn famili hed ahn di eldaz eena di kangrigayshan gat?

10. Wai wahn elda mait waahn mek roolz fi di kangrigayshan sohntaim?

¹⁰ Eldaz lov Krais, ahn dehn lov di “sheep” weh Jehoava ahn Jeezas aks dehn fi tek kayr a. (Jan 21:15-17) Bikaaz wahn elda lov di kangrigayshan, hihn mait feel laik hihn da wahn pa tu di bradaz ahn sistaz eena di kangrigayshan. Hihn mait tink dat if wahn famili hed ga di rait fi mek roolz fi protek ih famili, wahn elda ga di rait fi mek roolz fi protek Gaad sheep tu. Ahn som bradaz ahn sistaz mait inkorij di eldaz fi ak laik fi  dehn spirichwal hed, bikaaz dehn wuda aks di eldaz fi mek disizhanz fi dehn. Bot yu tink di eldaz eena di kangrigayshan ahn di famili hed dehn ga di saym atariti?

11. How di atariti weh wahn famili hed gat simila tu di atariti weh eldaz gat?

¹¹ Di apasl Paal mi seh dat eena som wayz di atariti weh wahn famili hed gat simila tu di atariti weh di eldaz gat eena di kangrigayshan. (1 Tim. 3:4, 5) Fi egzampl, Jehoava waahn famili membaz bee obeedyant tu di hed a di famili. (Kol. 3:20) Hihn aalso waahn di bradaz ahn sistaz eena di kangrigayshan bee obeedyant tu di eldaz. Ahn Jehoava ekspek evri famili hed an elda fi mek shoar dat dehn teech di wan dehn weh deh anda dehn atariti fi lov Jehoava. Di famili hed dehn ahn di elda dehn haftu mek shoar dat dehn wan weh deh anda fi dehn atariti feel dat dehn lov dehn. Ahn jos laik wahn gud famili hed, eldaz mek shoar dat dehn wan weh deh anda fi dehn atariti geh di help weh dehn need wen dehn di ga prablemz. (Jay. 2:15-17) Pahn tap a dat, Jehoava ekspek di eldaz ahn di famili hed dehn fi help adaz obay ih laa dehn. Ahn hihn aalso waan dehn fi “fala weh rait dong eena di Skripchaz, ahn noh du notn moa dan dat.”—1 Kor. 4:6.

12-13. Akaadn tu Roamanz 7:2, how di atariti weh wahn famili hed gat difrent fahn di atariti weh eldaz gat?

 ¹² Bot di atariti weh wahn famili hed gat aalso veri difrent fahn di atariti weh wahn elda gat. Fi egzampl, Jehoava giv eldaz di rispansabiliti fi ak az joj wen prablemz kom op eena di kangrigayshan. Soh if sohnbadi eena di kangrigayshan sin ahn dehn noh waahn ripent, di eldaz ga di atariti fi tek dehn owta di kangrigayshan, bot wahn famili hed noh ga da kaina atariti deh.—1 Kor. 5:11-13.

¹³ Pahn di ada han, Jehoava gi di famili hed dehn sohn atariti weh hihn noh giv tu eldaz. Fi egzampl, hihn gi di famili hed dehn di atariti fi mek roolz fi dehn famili ahn fi mek shoar dat dehn famili fala dehndeh roolz. (Reed Roamanz 7:2.) Soh fi egzampl, if wahn famili hed ga chiljren, hihn ga di rait fi disaid weh taim ih chiljren fi deh hoam da nait. Hihn aalso ga di atariti fi ponish ih chiljren if dehn noh stik tu di taim weh hihn set. (Ifee. 6:1) Af koars, bifoa wahn lovin famili hed mek eni roolz, ih wahn taak bowt it wid ih waif bikaaz di too a dehn da “wan persn.” *—Mach. 19:6.

14. (a) Akaadn tu Maak 10:45, wai ih mek sens dat Jehoava apoint Jeezas az di hed a di kangrigayshan? (b) Wat da di rispansabiliti a di Govanin Badi? (Si di baks “ Di Rispansabiliti a di Govanin Badi.”)

¹⁴ Jehoava mi sen ih Son fi ded fi eech persn eena di kangrigayshan ahn fi enibadi els weh put fayt eena Jeezas. (Reed  Maak 10:45; Aks 20:28; 1 Kor. 15:21, 22) Soh ih mek sens dat hihn apoint Jeezas, di wan weh giv op ih laif fi wi, az di hed a di kangrigayshan. Dat da wai Jeezas ga di atariti fi mek roolz bowt weh eech persn, di famili dehn, ahn di hoal kangrigayshan shuda du. Ahn hihn ga di rait fi mek shoar dat evribadi obay dehndeh roolz. (Gal. 6:2) Bot Jeezas noh onli mek roolz, hihn aalso tek gud kayr a wi an ih lov wi.—Ifee. 5:29.

15-16. Weh yu laan fahn weh Sista Marley ahn Brada Benjamin seh?

¹⁵ Sistaz shoa dat dehn rispek Krais wen dehn fala di gaidans fahn di bradaz weh Jeezas apoint fi ga atariti oava dehn. Wahn lata sistaz agree wid Marley, wahn sista weh liv da di United States. Shee seh: “Ai reeli cherish mi rispansabiliti az wahn waif an az wahn sista eena di kangrigayshan. Ah haftu kip di werk haad fi rispek di atariti weh Jehoava gi mi hozban ahn di eldaz. Bot mi hozban ahn di bradaz eena di kangrigayshan mek it eeziya fi mi bikaaz dehn rispek mi ahn dehn shoa dat dehn tankful fi weh Ah du.”

¹⁶ Bradaz shoa dat dehn andastan di atariti weh Jehoava gi dehn wen dehn aana ahn rispek sistaz. Benjamin, wahn brada weh liv da England, seh: “Ai laan soh moch wen sistaz koment da meetin ahn wen dehn gi sojeshanz pahn how fi preech ahn teech beta. Di werk weh di sistaz du veri impoatant.”

17. Wai wi shuda rispek di fak dat Jehoava gi sohn atariti tu adaz?

¹⁷ Wen evribadi eena di kangrigayshan—di bradaz, di sistaz, di famili hed dehn, ahn di elda dehn—rispek di fak dat Jehoava gi sohn atariti tu adaz, dehn ga pees eena di kangrigayshan. Ahn moa impoatant dan dat, wi bring prayz tu wi lovin hevnli Faada, Jehoava.—Ps. 150:6.