1. Wen wahn singl sista di chrai disaid hoo ih wahn marid, wat da sohn kweschan ih shuda aks ihself?

AAL Kristyanz deh anda di atariti a Jeezas Krais, hoo da wahn perfek hed. Bot wen wahn Kristyan uman geh marid, shee put ihself anda di atariti a wahn man weh noh perfek. Dat noh aalwayz eezi. Soh wen shee di tink bowt hoo ih wahn marid, ih shuda aks ihself: ‘How Ah ku noa if dis brada wahn bee wahn gud famili hed? Fi hihn servis tu Jehoava da di moas impoatant ting eena fi hihn laif? Weh mek Ai tink dat hihn wahn bee wahn gud spirichwal hed afta wi geh marid if hihn da noh wahn spirichwal persn now? Af koars, wahn sista shuda aalso aks ihself: ‘Weh kwalitiz Ai gat weh wahn help mi ga wahn gud marij? Ai payshent ahn jenaros? Ai ga wahn schrang rilayshanship wid Jehoava?ʼ (Eccl. 4:9, 12) If wahn uman mek gud disizhanz bifoa ih geh marid, dat wahn help ahn fi ga wahn gud ahn hapi marij.

2. Weh wi wahn diskos eena dis aatikl?

² Milyanz a wi Kristyan sistaz set wahn veri gud egzampl a how fi bee obeedyant tu dehn hozban. Wi onli hapi fi serv Jehoava langsaid dehnya laayal sistaz! Eena dis aatikl, wi wahn diskos di ansa tu chree kweschan: (1) Wat da som a di prablem dehn weh wahn waif mait haftu fays? (2) Wai wahn waif chooz fi obay ih hozban? Ahn (3) weh wahn Kristyan hozban ahn waif ku laan bowt obeedyans ahn bowt how fi rispek atariti fahn di egzampl a Jeezas, Abigayl, ahn Mayri, di waif a Joazef?

3. Wai aal marid koplz fays prablemz?

³ Marij da wahn perfek gif fahn Gaad, bot peepl noh perfek. (1 Jan 1:8) Dat da wai Gaad Werd waan marid koplz dat dehn “wahn ga lata prablemz.” (1 Kor. 7:28) Mek wi diskos som a di prablem dehn weh wahn waif mait haftu fays.

4. Wai wahn waif mait feel laik da wahn shaym fi put ihself anda ih hozban atariti?

⁴ Di way how wahn waif groa op mait mek shee feel laik da wahn shaym fi put ihself anda ih hozban atariti. Marisol, wahn sista weh liv da di United States, seh: “Wehpaat Ai groa op, peepl yoostu aalwayz seh dat wahn uman haftu bee eekwal tu wahn man eena evriting. Ai noa dat Jehoava mi disaid fi giv atariti tu di hozban ahn dat di waif haftu obay da atariti, bot aalso dat di waif dizerv rispek. Stilyet, ih noh aalwayz eezi fi rispek mi hozban atariti, bikaaz di werl seh dat Ah noh haftu rispek ahn.”

5. Weh rang tinkin sohn man gat bowt di roal weh wahn uman gat eena di famili?

⁵ Pahn di ada han, wahn uman mait bee marid tu wahn man weh tink dat man moa impoatant dan uman. Ivon, wahn sista weh liv da South America, seh: “Wehpaat Ai liv, di man dehn eet fers ahn di uman dehn eet aftawodz. Peepl ekspek di lee gyal dehn fi kuk ahn kleen, bot wahn lee bwai ma ahn sista dehn serv ahn, an tel ahn dat hihn da di ‘king a di hows.ʼ” Yingling, wahn sista weh liv da Asia, seh: “Eena mai langwij, dehn ga wahn sayin weh meenz dat wahn uman noh haftu bee smaat er ga skilz. Wahn uman onli fi du di howswerk, ahn shee noh fi tel ih hozban weh shee tink.” Wahn hozban weh noh shoa lov ahn weh noh du weh di Baibl seh mek laif haad fi ih waif, ih noh fala Jeezas egzampl, ahn Jehoava noh pleez wid ahn.—Ifee. 5:28, 29; 1 Peet. 3:7.

6. Weh wahn waif haftu du fi schrentn ih oan rilayshanship wid Jehoava?

⁶ Eena di laas aatikl, wi menshan dat Jehoava ekspek wahn Kristyan hozban fi help ih famili fi wership Jehoava an aalso fi provaid aala di tingz weh ih famili need. (1 Tim. 5:8) Bot wahn marid sista haftu mek taim eech day fi reed Gaad Werd, fi tink bowt weh ih reed, ahn fi pray tu Jehoava fan ih haat. Dis noh aalwayz eezi. Wahn waif mait tink dat ih noh ga di taim er di enerji fi du dehndeh tingz bikaaz shee aalwayz bizi, bot ih veri impoatant dat ih mek di taim. Wai? Bikaaz Jehoava waahn mek eech wan a wi ga wi oan rilayshanship wid hihn.—Aks 17:27.

7. Weh ku mek it eeziya fi mek wahn waif rispek an obay ih hozban?

⁷ Wahn waif mait haftu werk haad fi bee wilin fi obay ih hozban, bikaaz hihn noh perfek. Bot shee wahn fain it eeziya fi rispek an obay ih hozban laik how Jehoava waahnt if shee andastan di reezn wai di Baibl seh dat da weh shee fi du.

8. Akaadn tu Ifeezhanz 5:22-24, wai wahn Kristyan waif chooz fi put ihself anda ih hozban atariti?

⁸ Wahn Kristyan waif chooz fi put ihself anda ih hozban atariti bikaaz dat da di asainment weh Jehoava giv ahn. (Reed Ifeezhanz 5:22-24.) Shee chros ih hevnli Faada bikaaz shee noa dat hihn lov shee ahn hihn noh wahn aks ahn fi du sohnting weh noh gud fi shee.—Deut. 6:24; 1 Jan 5:3.

9. Weh hapm wen wahn Kristyan sista rispek ih hozban atariti?

⁹ Di werl seh dat wahn uman noh haftu fala Jehoava standadz ahn dat da wahn shaym fi put ihself anda ih hozban atariti. Af koars, enibadi weh promoat da kaina tinkin noh reeli noa fi wee lovin Gaad. Jehoava wuda neva koman fi hihn preshos daata dehn fi du eniting weh wuda shaym dehn.  Wahn sista weh werk haad fi du weh Jehoava tel ahn fi du wahn rispek an obay ih hozban, ahn dat wahn help ih famili fi ga pees. (Ps. 119:165) Fi shee hozban wahn benifit, shee wahn benifit, ahn dehn chiljren wahn benifit.

10. Weh lesn wi ku laan fahn weh Carol seh?

¹⁰ Wahn waif weh wilin fi obay ih hozban, hoo noh perfek, proov dat shee lov ahn rispek Jehoava, di wan weh gi fi shee hozban di atariti weh ih gat. Carol, wahn sista weh liv da South America, seh: “Ai noa dat mi hozban wahn mek mistayk. Ai aalso noa dat di way how Ah rispan tu dehndeh mistayk shoa how Ah feel bowt mi frenship wid Jehoava. Soh Ah chrai fi rispek an obay mi hozban bikaaz Ah waahn pleez mi hevnli Faada.”

11. Weh help Sista Aneese fi bee wilin fi fergiv adaz, ahn weh wi ku laan fahn weh shee seh?

¹¹ Ih ku bee haad fi wahn waif rispek an obay ih hozban if shee feel laik ih hozban noh kay bowt fi shee feelinz ner bowt di tingz weh mek shee wori. Bot dis da weh wahn marid sista weh naym Aneese du wen shee staat tu feel da way. Shee seh: “Ah chrai fi noh geh beks, an Ah chrai memba dat aala wi mek mistayk. Ah chrai fi bee redi fi fergiv, jos laik Jehoava. Ahn wen Ah doo fergiv, Ah feel kaam agen.” (Ps. 86:5) Wen wahn waif wilin fi fergiv, shee wahn fain it eeziya fi rispek an obay ih hozban.

12. Wat da sohn egzampl fahn di Baibl a peepl weh mi put dehnself anda ada peepl atariti?

¹² Sohn peepl feel laik if yu put yuself anda sombadi els atariti, dat meenz yu week. Bot dat da noh chroo. Di Baibl gat een lata egzampl a peepl weh put dehnself anda ada peepl atariti bot stil shoa lata korij. Mek wi si weh wi ku laan fahn Jeezas, Abigayl, ahn Mayri.

13. Wai Jeezas put ihself anda Jehoava atariti? Pleez eksplayn yu ansa.

¹³ Jeezas rispek Jehoava atariti, bot dat noh meenz dat hihn noh smaat er dat hihn noh ga skilz. Onli wahn persn weh reeli smaat ku teech eena wahn way weh simpl an eezi fi andastan, laik di way how Jeezas mi teech. (Jan 7:45, 46) Jehoava noa dat Jeezas ga skilz. Wi noa dis bikaaz Jehoava mi alow Jeezas fi werk lang wid ahn wen ih mi-di kriyayt di yoonivers. (Prov. 8:30;  Heeb. 1:2-4) An afta Jehoava mi rezorek Jeezas, ih giv ahn “aal atariti da hevn ahn pahn di ert.” (Mach. 28:18) Eevn doa Jeezas ga lata skilz, hihn stil luk tu Jehoava fi gaid ahn. Wai? Bikaaz hihn lov fi hihn Pa.—Jan 14:31.

14. (a) Weh wahn hozban ku laan fahn di way Jehoava tink bowt uman? (b) Weh wahn hozban ku laan fahn weh Proverbs 31 seh?

¹⁴ Weh wahn hozban ku laan. Jos bikaaz Jehoava put di waif anda ih hozban atariti, dat noh meenz dat Hihn feel laik man moa impoatant dan uman. Jehoava ihself mi mek dat klyaa wen ih chooz man an uman fi rool wid Jeezas eena hevn. (Gal. 3:26-29) Jehoava mi shoa dat ih chros ih Son wen ih giv ahn atariti. Saym way soh, wahn waiz hozban wahn chros ih waif ahn gi shee sohn atariti tu. Di Baibl seh weh kaina tingz wahn gud waif ku du. Fi egzampl, shee ku manij di werk weh haftu geh don eena di hows, shee ku bai ahn sel lan, ahn shee ku handl bizniz mataz fi di famili. (Reed Proverbs 31:15, 16, 18.) * Shee da noh wahn slayv weh noh ga no rait fi tel ih hozban weh shee tink. Rada, fi shee hozban chros ahn, an lisn tu weh shee ga fi seh. (Reed Proverbs 31:11, 26, 27.) * Wen wahn man chreet ih waif wid da kaina rispek, shee wahn bee hapi fi rispek an obay ahn.

15. Weh wahn waif ku laan fahn Jeezas egzampl?

¹⁵ Weh wahn waif ku laan. Eevn doa Jeezas du wahn lata wandaful tingz, hihn noh feel laik da wahn shaym fi put ihself anda Jehoava atariti. (1 Kor. 15:28; Fil. 2:5, 6) Saym way soh, wahn gud waif weh fala Jeezas egzampl noh wahn feel laik shee noh az impoatant az ih hozban if shee put ihself anda fi hihn atariti. Di mayn reezn wai shee sopoat ih hozban da noh jos bikaaz ih lov ahn, bot bikaaz shee waahn pleez Jehoava.

16. Akaadn tu 1 Samuel 25:3, 23-28, weh prablem Abigayl mi haftu deel wid? (Koment pahn di picha pahn di kova.)

¹⁶ Abigayl mi marid tu wahn man weh naym Naybal. Hihn mi selfish ahn prowd, ahn hihn neva apreeshiayt notn weh peepl du far ahn. Sayka dat, wahn taim Dayvid mi waahn kil ahn. Soh if Abigayl mi waahn ih marij kohn tu wahn en, aal shee wuda mi haftu du da kip kwaiyet ahn lef Dayvid ahn fi hihn soalja dehn fi kil ih hozban. Bot shee neva du dat. Insteda dat, shee mi du weh ih kud fi protek Naybal an evribadi els eena ih hows. Shee gaahn meet Dayvid fi diskos di prablem ahn shee mi taak tu ahn wid rispek. Imajin humoch korij Abigayl mi haftu ga fi du dat fronta 400 soalja. Shee mi eevn wilin fi tek di blaym fi weh fi shee hozban du. (Reed 1 Samuel 25:3, 23-28.) * Dayvid mi riyalaiz dat Jehoava yooz dis brayv uman fi  giv ahn advais weh mi stap ahn fahn mek wahn big mistayk.

17. Weh wahn hozban ku laan fahn weh mi hapm wid Dayvid an Abigayl?

¹⁷ Weh wahn hozban ku laan. Abigayl da-mi wahn waiz uman. Ahn Dayvid mi waiz fi lisn tu fi shee advais. Sayka dat, hihn neva en op di kil inosent peepl. Saym way soh, wahn waiz hozban wahn lisn tu weh ih waif ga fi seh ahn tink bowt it bifoa ih mek wahn impoatant disizhan. Ahn maybi fi shee aidyaaz wahn help ahn fi noh mek wahn bad disizhan.

18. Weh wahn waif ku laan fahn Abigayl egzampl?

¹⁸ Weh wahn waif ku laan. Wahn waif weh lov ahn rispek Jehoava wahn benifit ih famili, eevn if ih hozban noh serv Jehoava er noh liv akaadn tu fi Hihn standadz. Shee noh wahn chrai luk fi wahn way fi mek ih marij kohn tu wahn en. Insted, shee wahn bee wilin fi obay an rispek ih hozban, an eena da way, shee wahn help hihn fi waahn laan moa bowt Jehoava. (1 Peet. 3:1, 2) Bot eevn if fi shee hozban noh disaid fi serv Jehoava, Jehoava apreeshiayt dat shee obay ih hozban ahn dat shee laayal tu Hihn.

19. Wen wahn waif noh fi obay ih hozban?

¹⁹ Pahn di ada han, wahn obeedyant Kristyan waif noh wahn obay ih hozban if hihn aks ahn fi du eniting weh goh gens weh di Baibl seh. Fi egzampl, sopoaz wahn sista marid tu wahn man weh da noh wahn Witnis ahn hihn tel ahn fi tel lai, fi teef, er fi du eniting els weh Jehoava noh pleez wid. Aal Kristyanz, inkloodin marid sistaz, haftu obay Jehoava Gaad bifoa enibadi els. If wahn sista hozban aks ahn fi du eniting weh goh gens Baibl prinsiplz, shee shuda rifyooz an eksplayn eena wahn rispekful way wai shee kyaahn du weh hihn aks ahn fi du.—Aks 5:29.

20. How wee noa dat Mayri mi ga wahn kloas frenship wid Jehoava?

²⁰ Mayri mi ga wahn kloas frenship wid Jehoava. Shee mi noa di Baibl gud. Wahn taim wen Mayri mi-di taak wid Ilizabet, Jan di Baptis ma, shee mi koat fahn di Heebroo Skripchaz moa dan 20 taimz. (Look 1:46-55) Eevn doa Mayri ahn Joazef mi don ingayj, Jehoava aynjel neva gaahn taak tu Joazef fers. Di aynjel mi taak tu Mayri fers ahn tel ahn dat shee wuda gi bert tu di  Son a Gaad. (Look 1:26-33) Jehoava mi noa Mayri gud, ahn hihn mi noa dat shee mi wahn lov fi hihn Son ahn tek gud kayr a ahn. Ahn fi shoar, Mayri mi kantinyu fi kip ih rilayshanship wid Jehoava schrang eevn afta Jeezas mi ded ahn rayz op bak tu hevn.—Aks 1:14.

21. Weh wahn hozban ku laan fahn weh di Baibl seh bowt Mayri?

²¹ Weh wahn hozban ku laan. Wahn waiz hozban wahn bee hapi if ih waif noa di Baibl gud. Hihn noh wahn geh beks wid ahn an feel laik shee di chrai bee di hed a di famili. Hihn riyalaiz dat if ih waif noa di Baibl gud an andastan di prinsiplz weh deh een deh, shee ku help di famili wahn lat. Af koars, eevn if di waif ga moa ejukayshan dan di hozban, da stil fi hihn rispansabiliti fi help ih famili fi wership Jehoava. Fi egzampl, hihn tek di leed eena famili wership.—Ifee. 6:4.

22. Weh wahn waif ku laan fahn Mayri?

²² Weh wahn waif ku laan. Wahn waif haftu rispek an obay ih hozban, bot shee stil rispansabl fi kip ih oan fayt schrang. (Gal. 6:5) Fi du dat, shee haftu mek taim fi du persnal stodi ahn meditayt pahn weh ih laan. Dat wahn help ahn fi kip ih lov ahn rispek fi Jehoava schrang ahn fi bee hapi fi rispek an obay ih hozban.

23. How wahn waif weh rispek an obay ih hozban wahn benifit ihself, ih famili, ahn di kangrigayshan?

²³ If wahn waif kantinyu fi rispek an obay ih hozban bikaaz shee lov Jehoava, shee wahn bee hapiya dan wahn waif weh rijek di atariti weh Jehoava gi tu di hed a di famili. Shee set wahn gud egzampl fi di yong man dehn ahn di yong uman dehn. Shee aalso help ih famili ahn di kangrigayshan fi bee lovin ahn peesful. (Taitos 2:3-5) Moas a Jehoava laayal servant dehn tudeh da sistaz. (Ps. 68:11) Aala wi, weda mayl er feemayl, ku help mek di kangrigayshan bee hapi ahn peesful. Di neks aatikl wahn diskos how eech wan a wi ku du dat.