1-2. Akaadn tu Machyu 5:11, how wi shuda vyoo wi chraiyalz?

JEEZAS mi pramis ih falowaz dat dehn mi wahn ekspeeryens reel hapinis. Bot hihn mi aalso waan dehn dat enibadi weh lov hihn wuda goh chroo chraiyalz. (Mach. 10:22, 23; Look 6:20-23) Wee hapi fi bee Krais disaiplz. Bot how wi wuda feel if wi famili chrai stap wi fahn serv Jehoava, if di govament persikyoot wi, er if di peepl weh wi werk wid er goh da skool wid chrai mek wi du sohnting rang? Wen wi tink bowt dehnya tingz, dehn mait mek wi feel angshos.

² Peepl noh naamali tink dat yu shuda feel hapi wen yu di goh chroo persikyooshan. Bot dat da egzakli how Gaad Werd seh wi shuda feel. Fi egzampl, di disaipl Jaymz mi rait dat insteda feel helples wen wi di fays difrent chraiyalz, wi shuda feel hapi. (Jay. 1:2, 12) Ahn Jeezas mi seh dat wi shuda bee hapi eevn wen peepl persikyoot wi. (Reed Machyu 5:11.) Bot how wi ku bee hapi eevn wen di goh chroo chraiyalz? Wi ku laan wahn lat fahn weh Jaymz mi rait tu di fers-senchri Kristyanz. Fers, mek wi diskos som a di chalenjiz weh dehndeh Kristyanz mi fays.

3. Weh mi hapm lee wail afta Jaymz mi ton wan a Jeezas disaipl?

³ Noh tu lang afta Jeezas haaf-breda Jaymz mi ton wan a Jeezas disaipl, peepl mi staat persikyoot di Kristyanz da Jeroosalem. (Aks 1:14; 5:17, 18) An afta dehn mi kil di disaipl Steeven, wahn lata Kristyanz hori lef Jeroosalem ahn “skyata bowt chroo Judeeya ahn Samayrya.” Ahn  dehn mi eevn ron az faar az Saipros an Antiyak. (Aks 7:58–8:1; 11:19) Wi kyaahn eevn imajin humoch chraiyalz di disaipl dehn mi haftu goh chroo. Stilyet, noh mata wehpaat dehn gaan, dehn mi eega fi preech di gud nyooz. Ahn dehn mi help faam wahn lata nyoo kangrigayshan eena dehndeh plays. (1 Peet. 1:1) Bot dehndeh Kristyanz mi wahn fays eevn moa haad taimz.

4. Weh ada chraiyalz di fers-senchri Kristyanz gaahn chroo?

⁴ Di fers-senchri Kristyanz gaahn chroo lata difrent chraiyalz. Fi egzampl, rong di yaa 50 C.E., di Roaman roola Klaadiyos mi aada aala di Jooz fi lef Roam. Soh di Jooz weh mi ton Kristyan mi haftu lef dehn hoam ahn goh liv sohnweh els. (Aks 18:1-3) Rong 61 C.E., di apasl Paal mi rait dat peepl mi insolt fi hihn bradaz eena poblik, put dehn eena prizn, ahn tek weh dehn bilanginz. (Heeb. 10:32-34) Ahn dehnya Kristyanz mi-di goh chroo som a di saym tingz weh ada peepl goh chroo. Fi egzampl, som a dehn mi poa ahn som a dehn mi sik.—Roam. 15:26; Fil. 2:25-27.

5. Weh kweschanz wi wahn ansa eena dis aatikl?

⁵ Wen Jaymz mi rait ih leta, hihn mi noa egzakli weh chraiyalz ih bradaz ahn sistaz mi-di goh chroo. Jehoava mi gaid Jaymz fi rait wahn leta tu dehndeh Kristyanz fi gi dehn gud advais weh mi wahn help dehn fi stay hapi eevn wen dehn mi-di goh chroo chraiyalz. Mek wi luk pahn di leta weh Jaymz mi rait ahn fain di ansa tu dehnya kweschan: Weh kaina hapinis Jaymz mi rait bowt? Weh ku mek it haad fi wahn Kristyan stay hapi? Ahn how wizdom, fayt, ahn korij ku help wi stay hapi noh mata weh chraiyalz wi goh chroo?

6. Akaadn tu Look 6:22, 23, wai wahn Kristyan ku bee hapi eevn wail ih di goh chroo chraiyalz?

⁶ Peepl mait tink dat dehn onli ku bee hapi if dehn helti, ga lata moni, er ga wahn hapi famili. Bot di kaina hapinis weh Jaymz mi rait bowt da paat a di froot weh di hoali spirit bayr eena wi, soh wee ku bee hapi noh mata weh di hapm eena wi laif. (Gal. 5:22) Wahn Kristyan ku ekspeeryens reel hapinis weh kohn fahn deep dong eena ih haat if ih noa dat ih di pleez Jehoava an ih di fala Jeezas egzampl. (Reed Look 6:22, 23; Kol. 1:10, 11) Da hapinis da laik di flaym eena wahn lamp. Needa breez ner rayn ku owt di flaym, bikaaz di glaas protek it. Saym way soh, wee ku ga da hapinis eena wi haat noh mata weh di hapm eena wi laif. Notn kyaahn owt da flaym, eevn wen wi di goh chroo helt prablemz, wen wi ga moni prablemz, wen peepl insolt wi, er wen wi oan famili er ada peepl persikyoot wi. Wee ku stil bee hapi! Az a mata a fak, wen wi hapinis bon eena wi haat laik wahn flaym, ih wahn geh braita eevn wen peepl du tingz fi chrai owt it. Wai? Bikaaz wen chraiyalz tes wi fayt, dehn akchwali proov dat wi da Krais disaiplz. (Mach. 10:22; 24:9; Jan 15:20) Dats wai Jaymz kuda mi rait: “Mi bradaz, unu mos bee hapi wen unu di fays difrent chraiyalz.”—Jay. 1:2.

7-8. How wi fayt geh schranga wen wi goh chroo chraiyalz?

⁷ Jaymz tel wi wahn nada reezn wai Kristyanz wilin fi bayr op anda chraiyalz. Hihn seh: “Wen chraiyalz tes unu fayt, unu geh schranga, an unu wahn ku bayr op moa ahn moa.” (Jay. 1:3) Wahn chraiyal da laik di faiya weh wahn persn yooz fi mek wahn soad owta steel. Wen dehn heet op di steel ahn den kool it dong, ih geh schranga. Saym way soh, wen wee bayr op anda chraiyalz, wi fayt geh schranga. Dat da wai Jaymz mi rait: “If unu kantinyu bayr op, dis wahn chrayn unu fi bee kompleet eena evriting, ahn nobadi wahn ku fain faalt wid unu.” (Jay. 1:4) Wen wi si how wi fayt geh schranga az wi goh chroo chraiyalz, wi wahn bayr op wid jai.

⁸ Jaymz mi aalso tel wi bowt som a di tingz weh ku mek it haad fi stay hapi. Wat da som a dehndeh tingz, ahn weh wee ku du fi stay hapi?

9. Wai wi need wizdom?

⁹ Wen wi noh noa weh fi du. Wen wi di goh chroo chraiyalz, wi waahn luk tu Jehoava fi help soh dat wi ku mek disizhanz weh wahn pleez hihn, weh wahn benifit wi bradaz ahn sistaz, ahn weh wahn help wi  fi stay faytful tu hihn. (Jer. 10:23) Wi need wizdom fi noa weh fi du ahn weh wi fi seh tu enibadi weh persikyoot wi. Wi mait feel diskorij if wi noh noa weh fi du ahn dat mait mek it haad fi stay hapi.

10. Weh Jaymz 1:5 seh wi fi du if wi waahn geh moa wizdom?

¹⁰ Aks Jehoava fi wizdom. If wi waahn bee hapi eevn wen wi di goh chroo chraiyalz, di fers ting weh wi haftu du da pray tu Jehoava an aks ahn fi di wizdom weh wi need fi mek gud disizhanz. (Reed Jaymz 1:5.) Weh wi shuda du if wi feel laik Jehoava noh ansa wi pryaa rait away? Jaymz seh dat wi shuda “kip di aks Gaad” fi wizdom. Jehoava noh wahn geh beks wid wi er mek wi feel shaym if wi kip aan di aks ahn fi wizdom. Gaad “jenaros,” soh ih hapi fi gi wi di wizdom weh wi need fi bayr op anda di chraiyalz weh wi fays. (Ps. 25:12, 13) Hihn si di chraiyalz weh wi di goh chroo, ih feel bad fi wi wen wi sofa, an ih eega fi help wi. Dis mek wi feel veri hapi! Bot da how Jehoava gi wi wizdom?

11. Wat els wi haftu du fi geh moa wizdom?

¹¹ Wi ku geh wizdom fahn Jehoava wen wi reed fi hihn Werd. (Prov. 2:6) Bot fi kantinyu geh moa wizdom, wi haftu stodi Gaad Werd ahn wi poblikayshanz weh bays pahn di Baibl. Bot wi haftu du moa dan jos stodi it; wi haftu du weh Gaad tel wi fi du. Jaymz mi rait: “Du weh Gaad werd seh fi du, noh onli hyaa weh ih seh.” (Jay. 1:22) Wen wi du weh Gaad tel wi fi du, wi wahn lov pees, wi noh wahn waahn wi oan way aal di taim, ahn wi wahn bee ful a mersi. (Jay. 3:17) Dehndeh kwalitiz help wi fi bayr op anda eni chraiyal ahn stil bee hapi.

12. Wai wi haftu noa di Baibl gud?

¹² Di Baibl da laik wahn miro. Ih help wi fi si weh wi need fi werk pan ahn how wi  ku du dat. (Jay. 1:23-25) Fi egzampl, afta wi stodi Gaad Werd, wi mait riyalaiz dat wi need fi kanchroal wi tempa. Jehoava teech wi dat wi need fi ga wahn jentl haat. Soh wid fi hihn help, wi ku laan how fi deel wid peepl er prablemz weh mek wi geh beks. Ahn wen wi ga wahn jentl haat, wi ku handl wi prablemz beta. Wi wahn ku aalso tink schrayt ahn mek beta disizhanz. (Jay. 3:13) Soh ih veri impoatant dat wi geh fi noa di Baibl gud fi chroo!

13. Wai wi shuda stodi di egzampl a peepl eena di Baibl?

¹³ Sohntaim, wi noh laan weh fi avoid til afta wi don mek wahn mistayk; wi laan di haad way. Wahn moch beta way fi geh wizdom da fi laan fahn ada peepl egzampl, weda gud er bad. Dats wai Jaymz inkorij wi fi luk pahn di egzampl a peepl eena di Baibl laik Aybraham, Rayhab, Joab, an Ilaija. (Jay. 2:21-26; 5:10, 11, 17, 18) Dehndeh laayal servants a Jehoava kuda mi bayr op anda chraiyalz weh kuda mi mek it haad fi stay hapi. Fi dehn egzampl shoa wi dat wid Jehoava help, wee ku bayr op jos laik dehn.

14-15. Weh ku hapm tu wi if wi noh shoar a weh wi bileev?

¹⁴ Wen wi noh shoar a weh wi bileev. Sohntaim, ih ku bee haad fi andastan sohnting weh di Baibl seh. Er maybi Jehoava neva ansa wi pryaaz di way how wi mi waahnt. Dis ku mek wi staat tu dowt weh wi bileev. If wi ignoar dehndeh dowts, dehn ku mek wi fayt geh week ahn damij wi rilayshanship wid Jehoava. (Jay. 1:7, 8) Dehn ku eevn mek wi stap bileev eena wi hoap fi di fyoocha.

¹⁵ Di apasl Paal mi seh dat fi wee hoap fi di fyoocha da laik wahn anka. (Heeb. 6:19) Wahn anka hoal wahn ship eena wan spat joorin wahn staam fi mek ih noh jrif pahn di rak dehn. Bot wahn anka onli gud if di chayn noh brok. Jos laik how wahn anka chayn geh week if ih geh rosti, fi wee fayt ku geh week if wi noh shoar a weh wi bileev. If sohnbadi weh noh shoar a weh dehn bileev fays chraiyalz, dehn ku stap bileev eena Jehoava pramis dehn. If wi noh ga fayt eena Jehoava pramis dehn, den wi noh wahn ga no hoap fi di fyoocha needa. Da jos laik weh Jaymz mi seh: “Enibadi weh dowt da laik di wayv dehn eena di see weh di breez bloa fahn wan plays tu di neks.” (Jay. 1:6) Sohnbadi laik dat wahn praabli neva bee hapi!

16. Weh wi shuda du if wi ga dowts bowt wi bileef dehn?

¹⁶ Geh rid a yu dowts ahn schrentn yu fayt. Mek op yu main fi du sohnting bowt di prablem. Eena Ilaija dayz, Jehoava peepl kudn mek op dehn main bowt weh dehn bileev. Ilaija tel dehn: “How lang unu wahn tek fi mek op unu main? If Jehoava da di chroo Gaad, den fala hihn; bot if Bayal da di chroo gaad, den fala hihn!” (1 Ki. 18:21) Wee need fi mek op wi main bowt weh wi bileev tu. Wi need fi du sohn risaach soh dat wi ku proov tu wiself dat Jehoava da di onli chroo Gaad, dat di Baibl da fi hihn Werd, ahn dat Jehoava Witnisiz da fi hihn peepl. (1 Tes. 5:21) If wi du aala dat, wi wahn geh rid a wi dowts ahn schrentn wi fayt. An if wi need help fi geh rid a wi dowts, wi ku goh tu di eldaz. Wi haftu mek op wi main fi du sohnting bowt di prablem soh dat wi ku bee hapi di serv Jehoava!

17. Weh ku hapm if wi feel diskorij?

¹⁷ Wen wi feel diskorij. Gaad Werd seh: “If yu geh diskorij wen haad taim kohn pahn yu, yu wahn geh week.” (Prov. 24:10) Di Heebroo werd weh chranslayt az  “geh diskorij” ku aalso meen “looz korij.” An if yu looz yu korij, yu noh wahn bee hapi.

18. Weh ih meenz fi bayr op?

¹⁸ Pen pahn Jehoava fi gi yu di korij fi bayr op. Wi haftu ga korij fi bayr op anda chraiyalz. (Jay. 5:11) Di werd weh Jaymz mi yooz weh chranslayt az “neva giv op” gi wi di aidyaa a sohnbadi weh kip di stan op eena ih plays ahn noh mek notn moov ahn. Wi mait tink bowt wahn brayv soalja weh stan op gens ih enimi ahn noh moov wan bit, eevn if dehn di atak ahn.

19. Weh wi ku laan fahn di apasl Paal egzampl?

¹⁹ Di apasl Paal da-mi wahn reeli gud egzampl a sohnbadi weh ga lata korij ahn weh neva giv op fi notn. Sohntaim, hihn mi feel week, bot hihn kuda mi bayr op bikaaz ih mi pen pahn Jehoava fi giv ahn di schrent weh ih need. (2 Kor. 12:8-10; Fil. 4:13) Wee ku ga da saym kaina schrent ahn korij if wi hombl wiself an andastan dat wi need Jehoava help.—Jay. 4:10.

20-21. Weh wi noa bowt di chraiyalz weh wi fays?

²⁰ Wi ku noa fi shoar dat di chraiyalz weh wi fays da noh ponishment fahn Jehoava. Jaymz tel wi: “Wen sombadi di fays chraiyalz, ih shudn seh dat da Gaad di tes ahn, bikaaz nobadi kyaahn tes Gaad wid eevl tingz, ahn hihn noh tes nobadi needa.” (Jay. 1:13) Wen wi reeli bileev dat, wi frenship wid Jehoava wahn geh schranga.—Jay. 4:8.

²¹ Jehoava “noh chaynj evri minit laik wahn shado.” (Jay. 1:17) Hihn mi sopoat di fers-senchri Kristyanz wen dehn mi-di goh chroo chraiyalz, soh hihn wahn help eech wan a wi tudeh tu. Bayg Jehoava fi help yu geh moa wizdom, fayt, ahn korij. Hihn wahn ansa yu pryaaz. Den yu ku bee shoar dat hihn wahn help yu stay hapi eevn wail yu di goh chroo chraiyalz!