1. Weh kud afek di way wahn man chreet ih waif ahn chiljren?

WEH yu tink ih meenz fi ga atariti oava adaz, fi egzampl, fi bee di hed a wahn famili? Sohn man mek dehn kolcha, er fi dehn oan famili bakgrong afek di way dehn chreet dehn waif ahn chiljren. Noatis weh Yanita, wahn sista weh liv da Europe, seh: “Wehpaat Ai liv, peepl reeli bileev dat man moa impoatant dan uman, ahn dehn chreet uman laik slayv.” Wahn brada weh naym Luke, weh liv da di United States, seh: “Sohn man teech dehn son dat notn weh wahn uman seh impoatant, soh wahn man noh haftu pay atenshan tu dehn eni ataal.” Bot Jehoava noh waahn wahn man chreet ih waif laik dat. (Kompyaa Maak 7:13.) Soh den, how wahn man ku laan fi bee wahn gud famili hed?

2. Weh wahn famili hed haftu noa, ahn wai?

² Fi bee wahn gud famili hed, wahn man haftu andastan weh Jehoava waahn mek ih du. Ih aalso haftu noa wai Jehoava mi gi som peepl atariti oava adaz, ahn how hihn ku kapi Jehoava ahn Jeezas egzampl. Wai ih soh impoatant fi mek wahn man noa dehndeh tingz? Bikaaz Jehoava gi di famili hed dehn atariti oava dehn famili, ahn hihn ekspek dehn fi yooz it eena di rait way.—Look 12:48b.

3. Weh wi laan bowt atariti fahn weh di Baibl seh da 1 Korintyanz 11:3?

³ Reed 1 Korintyanz 11:3. Dis vers tel wi how Jehoava aaganaiz ih famili da hevn ahn pahn di ert. Laik how hihn da di hed a da famili, hihn ga aal atariti oava evribadi eena di yoonivers. Fi aaganaiz ih famili, hihn mi gi sohn atariti tu Jeezas, di aynjelz, ahn hyoomanz. Bot dehn haftu ansa tu hihn fi di way how dehn yooz da atariti. (Roam. 14:10; Ifee. 3:14, 15) Jehoava gi Jeezas atariti oava di kangrigayshan,  bot Jeezas haftu ansa tu Jehoava fi di way how ih chreet wi. (1 Kor. 15:27) Jehoava aalso gi di hozban dehn atariti oava dehn waif ahn chiljren, bot dehn haftu ansa tu Jehoava ahn Jeezas fi di way how dehn chreet dehn famili.—1 Peet. 3:7.

4. Humoch atariti Jehoava ahn Jeezas gat?

⁴ Sins Jehoava da di Hed a ih famili eena hevn ahn pahn di ert, hihn ga di atariti fi mek roolz pahn how fi hihn chiljren shuda bihayv, ahn hihn ku mek shoar dat dehn obay dehndeh roolz. (Isa. 33:22) Jeezas da di hed a di Kristyan kangrigayshan. Soh hihn ga di rait fi mek roolz ahn mek shoar dat evribadi eena di kangrigayshan obay dehndeh roolz tu.—Gal. 6:2; Kol. 1:18-20.

5. Humoch atariti Jehoava gi tu di hed a wahn Kristyan famili?

⁵ Jos laik Jehoava ahn Jeezas, di hed a wahn Kristyan famili ga di atariti fi mek disizhanz fi ih famili. (Roam. 7:2; Ifee. 6:4) Bot hihn noh ga az moch atariti az Jehoava ahn Jeezas. Fi egzampl, hihn shuda bays ih roolz pahn di prinsiplz weh ih fain eena Gaad Werd. (Prov. 3:5, 6) Ahn wahn famili hed noh ga di atariti fi mek roolz fi enibadi hoo da noh paat a fi hihn famili. (Roam. 14:4) Aalso, wen fi hihn chiljren groa op ahn moov owta ih hows, dehn wahn kantinyu fi rispek ahn, bot dehn noh deh anda fi hihn atariti nohmoh.—Mach. 19:5.

6. Wai Jehoava giv atariti tu adaz?

⁶ Jehoava mi giv atariti tu adaz bikaaz ih lov ih famili. Dis da wahn gif fahn hihn. Wai wi ku kaal it wahn gif? Bikaaz wid da atariti, Jehoava famili ku fongshan eena wahn peesful an aadali way. (1 Kor. 14:33, 40) If Jehoava neva mek wi noa hoo ga atariti eena fi hihn famili, den tingz mi wahn get owta kanchroal ahn wi neva mi wahn bee hapi. Fi egzampl, nobadi mi wahn noa hoo fi mek di fainal disizhan eena eni sichuwayshan ner hoo fi du weh dehn disaid fi du.

7. Weh Ifeezhanz 5:25, 28 seh bowt how Jehoava waahn mek wahn man chreet ih waif?

⁷ If di bes araynjment da-mi fi mek wahn hozban ga atariti oava ih waif, den wai soh moch uman tudeh feel laik dehn hozban onli chreet dehn kruwil ahn chrai kanchroal dehn? Dis da bikaaz lata man fala loakal kostom er chradishan insteda fala Jehoava standadz fi di famili. Er dehn mait chreet dehn waif bad fi mek dehnself feel gud. Fi egzampl, wahn hozban mait chrai kanchroal ih waif fi mek hihn feel moa impoatant er fi proov tu adaz dat hihn da “maacho man.” Hihn mait tink dat ih kyaahn foas ih waif fi lov ahn, bot hihn ku mek shee bee frayd far ahn. An if shee frayd far ahn, ih wahn eeziya fi kanchroal fi shee laif. * Wahn man weh tink an ak laik dat noh wahn chreet wahn uman wid di aana ahn rispek weh shee dizerv. Ahn weh ih du da di opozit a weh Jehoava waahn ih du.—Reed Ifeezhanz 5:25, 28.

8. How wahn man ku laan fi bee wahn gud famili hed?

⁸ Wahn man ku laan fi bee wahn gud famili hed if ih kapi di way Jehoava ahn Jeezas yooz dehn atariti. Mek wi luk pahn too a di kwalitiz weh Jehoava ahn Jeezas shoa ahn si how wahn famili hed ku shoa dehndeh saym kwalitiz tuwaadz ih waif ahn chiljren.

9. How Jehoava shoa dat ih hombl?

 ⁹ Bee hombl. Jehoava waiza dan enibadi els. Stilyet, hihn lisn tu ih servant dehn wen dehn tel ahn weh dehn tink. (Gen. 18:23, 24, 32) Hihn alow enibadi weh deh anda fi hihn atariti fi gi hihn sojeshanz. (1 Ki. 22:19-22) Jehoava perfek, bot hihn noh ekspek wee fi bee perfek. Insteda dat, hihn help hyoomanz weh noh perfek ahn weh serv hihn fi ga sokses. (Ps. 113:6, 7) In fak, di Baibl eevn seh dat Jehoava “da di wan weh help [wi].” (Ps. 27:9; Heeb. 13:6) King Dayvid mi seh dat di onli reezn wai hihn kuda mi du aala di grayt tingz weh ih du da-mi bikaaz Jehoava hombl an ih mi help ahn.—2 Sam. 22:36.

10. How Jeezas mi shoa dat ih hombl?

¹⁰ Kansida Jeezas egzampl. Eevn doa hihn da Laad ahn Maasta oava ih disaipl dehn, hihn mi wash dehn fut. Wat da wan reezn wai Jehoava mi mek shoar dat da akonk deh eena di Baibl? Da mi fi giv evribadi, inkloodin di famili hed dehn, wahn gud egzampl fi fala. Jeezas ihself mi seh: “Ai di shoa unu weh fi du, kaaz di saym ting weh Ai du fi unu, unu shuda du fi wan anada.” (Jan 13:12-17) Eevn doa Jeezas mi ga lata atariti, hihn neva ekspek nobadi fi serv ahn. Insted, hihn mi serv adaz.—Mach. 20:28.

11. How wahn famili hed ku laan fi bee hombl fahn Jehoava ahn Jeezas egzampl?

¹¹ Weh wi ku laan. If wahn famili hed hombl, ih wahn shoa it eena lata wayz. Fi egzampl, hihn noh ekspek ih waif ahn chiljren fi bee perfek. Hihn wahn lisn tu ih waif ahn chiljren wen dehn tel ahn weh dehn tink, eevn wen dehn noh agree wid hihn. Wahn sista fahn di United States weh naym Marley, seh: “Sohntaim, mee ahn mai hozban ga difrent opinyan. Bot Ai noa dat hihn apreeshiayt mi ahn rispek mi bikaaz hihn wuda aks mi weh Ah tink ahn tink it oava bifoa ih mek wahn disizhan.” Pahn tap a dat, wahn hombl hozban wahn bee wilin fi du hows werk, eevn if peepl eena fi hihn kamyooniti tink dat onli uman sopoas tu du da kaina werk deh. Dat ku bee wahn chalenj. Wai? Wahn sista weh naym Rachel seh: “Wehpaat Ai kohn fram, if wahn hozban help ih waif wash op er kleen  di hows, ih naybaz an ih famili wahn seh dat hihn saaf, er dat ih kyaahn kanchroal ih waif.” If peepl tink da way deh wehpaat yoo liv, aalwayz memba dat Jeezas mi wash ih disaipl dehn fut, eevn doa peepl mi feel laik dat da-mi wahn slayv jab. Wahn gud famili hed wahn foakos pahn how hihn ku mek ih waif ahn chiljren hapi. Ih noh wahn foakos pan ihself ner pahn weda er nat peepl si hihn az powaful er impoatant. Wat da wahn nada kwaliti weh wahn gud famili hed haftu shoa?

12. Weh Jehoava ahn Jeezas du bikaaz a lov?

¹² Shoa lov. Jehoava du evriting bikaaz a lov. (1 Jan 4:7, 8) Hihn shoa wi dat ih lov wi ahn dat ih waahn mek wi bee fi hihn fren wen ih giv wi fi hihn Werd an ih aaganaizayshan. Hihn tel wi dat ih lov wi soh dat wee noa dat ih reeli kay bowt wi. Ahn Jehoava mek shoar wi ga “evriting weh wi need ahn moa fi mek wi bee hapi.” (1 Tim. 6:17) Wen wi mek mistayk, hihn karek wi, bot ih noh stap lov wi. Owta lov, Jehoava mi sen ih Son fi giv op ih laif az wahn ransom fi wi. Ahn Jeezas lov wi soh moch dat hihn mi wilin fi giv op ih laif fi wi. (Jan 3:16; 15:13) Notn ku stap Jehoava ahn Jeezas fahn lov enibadi weh laayal tu dehn.—Jan 13:1; Roam. 8:35, 38, 39.

13. Wai wahn famili hed haftu shoa lov fi ih famili? (Si di baks “ Weh Wahn Man Weh Jos Geh Marid Ku Du fi Mek Ih Waif Waahn Rispek Ahn?”)

¹³ Weh wi ku laan. Wahn famili hed shuda du evriting bikaaz a lov. Wai dat soh impoatant? Di apasl Jan seh: “If ih noh lov ih bradaz [er famili] weh ih ku si, den ih kyaahn lov Gaad weh ih neva si yet.” (1 Jan 4:11, 20) If wahn man lov ih famili ahn waahn kapi Jehoava ahn Jeezas egzampl, ih wahn help ih famili fi ga wahn gud rilayshanship wid Jehoava, ih wahn mek dehn feel sayf ahn sikyoar, an ih wahn mek shoar dehn ga weh dehn need. (1 Tim. 5:8) Ih wahn chrayn ih chiljren an ih wahn disiplin dehn. Ih wahn aalso kantinyu fi laan how fi mek disizhanz weh aana Jehoava ahn benifit ih famili.  Mek wi diskos eech wan a dehndeh tingz weh wahn famili hed haftu du ahn si how ih ku kapi Jehoava ahn Jeezas egzampl.

14. How wahn famili hed ku help ih famili fi jraa kloas tu Jehoava?

¹⁴ Help ih famili fi jraa kloas tu Jehoava. Jeezas mi shoa dat hihn da jos laik ih Pa bikaaz hihn mi waahn help ih falowaz fi kip dehn fayt schrang. (Mach. 5:3, 6; Maak 6:34) Saym way soh, di moas impoatant ting weh wahn famili hed ku du da help ih famili fi jraa kloas tu Jehoava. (Deut. 6:6-9) Fi du dat, hihn wahn mek shoar dat ih famili reed Gaad Werd ahn stodi it, goh da di meetin dehn, preech di gud nyooz, ahn jraa kloas tu Jehoava ahn stay kloas tu ahn.

15. Wat da wan way how wahn famili hed ku mek shoar dat ih famili feel sayf ahn sikyoar?

¹⁵ Mek ih famili feel sayf ahn sikyoar. Jehoava neva hoal bak fahn tel Jeezas humoch ih lov ahn. Hihn mi eevn du dat fronta ada peepl. (Mach. 3:17) Jeezas mi aalwayz shoa lov fi ih falowaz bai weh ih du ahn weh ih seh. Fi hihn falowaz mi aalso tel hihn dat dehn lov ahn. (Jan 15:9, 12, 13; 21:16) Wahn famili hed ku shoa ih waif ahn chiljren dat ih lov dehn bai weh ih du. Fi egzampl, ih ku stodi di Baibl wid dehn. Hihn aalso need fi tel dehn dat ih lov dehn ahn dat dehn preshos tu hihn. Wen ih kud, ih ku komen dehn fronta ada peepl.—Prov. 31:28, 29.

16. Wat els wahn famili hed haftu du, ahn weh ih shudn du?

¹⁶ Mek shoar ih famili ga weh dehn need. Jehoava mi mek shoar dat di Izrelait dehn mi ga weh dehn need eevn wail dehn mi deh pahn ponishment sayka weh dehn neva obeedyant. (Deut. 2:7; 29:5) Hihn aalso mek shoar dat wee ga weh wi need tudeh. (Mach. 6:31-33; 7:11) Jeezas mi feed di peepl weh mi fala hihn tu. (Mach. 14:17-20) Hihn mi aalso kyoar wahn lata sik peepl. (Mach. 4:24) If wahn famili hed waahn pleez Jehoava, ih haftu mek shoar dat ih famili ga weh dehn need. Bot ih aalso haftu mek shoar dat ih noh geh soh bizi di werk fi sopoat ih famili dat ih noh ga taim fi help dehn kip dehn rilayshanship wid Jehoava schrang ahn fi mek dehn feel sayf ahn sikyoar.

17. Weh egzampl Jehoava ahn Jeezas set eena di way how dehn chrayn wi ahn disiplin wi?

¹⁷ Chrayn ih famili. Jehoava chrayn wi ahn disiplin wi bikaaz ih waahn help wi. (Heeb. 12:7-9) Ahn Jeezas da jos laik ih Pa bikaaz ih chrayn evribadi weh deh anda fi hihn atariti eena wahn lovin way. (Jan 15:14, 15) Ih gi schrang kongsl, bot ih aalso kain. (Mach. 20:24-28) Hihn noa dat wee noh perfek ahn dat wi mek wahn lata mistayk.—Mach. 26:41.

18. Weh wahn gud famili hed wahn memba?

 ¹⁸ If wahn famili hed kapi Jehoava ahn Jeezas egzampl, ih wahn memba dat ih famili noh perfek. Hihn “noh [wahn] geh beks” wid ih waif er chiljren. (Kol. 3:19) Insted, hihn wahn fala di prinsipl da Galayshanz 6:1 ahn karek ih famili “wid wahn jentl spirit,” an ih wahn memba dat hihn noh perfek needa. Jos laik Jeezas, hihn andastan dat di bes way fi teech da bai egzampl.—1 Peet. 2:21.

19-20. Wen wahn famili hed haftu mek disizhanz, how ih ku kapi Jehoava ahn Jeezas egzampl?

¹⁹ Mek disizhanz weh wahn benifit di famili. Jehoava mek disizhanz weh wahn benifit adaz. Fi egzampl, hihn mi disaid fi kriyayt laif, noh fi benifit ihself, bot bikaaz ih mi waahn mek wee injai laif. Nobadi kuda mi foas Jehoava fi sen ih Son fi ded fi wi soh dat wi kuda geh fergivnis fi wi sinz. Hihn mi wilin fi du dat bikaaz hihn mi waahn help wi. Jeezas mi mek disizhanz weh mi help adaz tu. (Roam. 15:3) Fi egzampl, wan taim hihn mi stil teech wahn krowd a peepl eevn doa ih mi taiyad an ih mi need fi geh sohn res.—Maak 6:31-34.

²⁰ Wahn gud famili hed noa dat wan a di haadis tingz weh ih haftu du da mek waiz disizhanz fi ih famili, ahn hihn noh tek da rispansabiliti laitli. Hihn chrai haad fi mek shoar dat ih ga gud reezn fi evri disizhan weh ih mek ahn dat ih noh mek disizhanz bays pahn how ih feel joorin sertn taimz. Insted, hihn alow Jehoava fi chrayn ahn fi mek gud disizhanz. * (Prov. 2:6, 7) Eena da way, hihn wahn tink bowt how ih ku benifit adaz, noh ihself.—Fil. 2:4.

21. Weh wi wahn diskos eena di neks aatikl?

²¹ Jehoava gi di famili hed dehn wahn haad asainment, ahn dehn haftu ansa tu hihn fi di way how dehn du dehn asainment. Bot if wahn hozban chrai haad fi fala di egzampl weh Jehoava ahn Jeezas set, ih wahn bee wahn gud famili hed. An if ih waif tek kayr a fi shee rispansabiliti eena di famili, den dehn wahn ga wahn hapi marij. How wahn waif shuda vyoo ih hozban rispansabiliti az di hed a di famili, ahn weh chalenjiz shee mait fays? Di neks aatikl wahn ansa dehndeh kweschan.